Sámedikki válggaid doaimmaheapmi
Sámedikki válggat doaimmahuvvojit 4.9.-2.10.2023.
Jietnavuoigadahtton sáhttá jienastit juogo poastta bokte dahje máhcahemiin válgaáššegirjjiid válgalávdegotti doaimmahahkii dahje sámiguovllus johtti válgabiilii 18.-29.9.2023 gaskasaš áigge.
Dasa lassin olbmot, geat leat divššus lágádusas dahje ruovttus sápmelaččaid ruovttuguovllus ja eai muđuid sáhtášii jienastit almmá badjelmeare váttisvuođaid, ožžot jienastit dikšunbáikkistis.
Válgalávdegoddi fuolaha das, ahte válgaáššegirjjit seailluhuvvojit vugiin, mii sihkkarastá válgasuollemasvuođa. Válgalávdegotti bargit vuostáiváldet válgaáššegirjjiid. Máhcahankonfeluhtat seailluhuvvojit rabakeahttá jienaidrehkenastima álggaheami rádjái.
Válgadoaimmahusa álggaheapmi ja válgaáššegirjjit
Válgaáššegirjjit leat sáddejuvvon poastta mielde girjejuvvon reiven juohkehaš jietnavuoigadahtton olbmui vuossárgga 4.9.2023. Girjejuvvon reive lea árvopoasta ja jienasteaddji ferte viežžat dan iežas poastadoaibmabáikkis, go lea ožžon almmuhusa poasttas. Válgaáššegirjjit leat válgalávdegotti steampalastin jienastanlihppo, válgakonfeluhtta, sáttareivve, sáttakonfeluhtta, evttohaslistu ja jienastanráva.
Jienasteapmi poastta bokte
Jietnavuoigadahtton olmmoš sáhttá geavahit iežas jietnavuoigatvuođa, go lea ožžon válgaáššegirjjiid. Jienasteapmi lea čađahuvvon, go jietnavuoigadahtton olmmoš lea guođđán jienastanlihpo sisttisdoalli válgakonfeluhta ja su vuolláičállin ja sáttakonfeluhttii biddjon sáttareivve postii jođihanláhkái girjejuvvon sáttan nu, ahte válgaáššegirjjit ollejit Sámedikki válgalávdegoddái maŋimuštá 2.10.2023 dmu. 18.00.
Jienasteapmi máhcahemiin válgaáššegirjjiid válgalávdegotti doaimmahahkii dahje sámiguovllus johtti válgabiilii
Jietnavuoigadahtton olmmoš sáhttá máhcahit válgaáššegirjjiid persovnnalaččat maiddái válgalávdegotti doaimmahahkii dahje sámiguovllus johtti válgabiilii 18.–29.9.2023 gaskasaš áigge. Jienasteapmi lea čađahuvvon, go jietnavuoigadahtton olmmoš lea ožžon kuitte válgaáššegirjjiid guođđimis.
Jienasteapmi dikšunlágádusas ja ruovttus
Sápmelaččaid ruovttuguovllus leahkki lágádusain divššuvuloš olbmot ja maiddái dat ruovttus leahkki divššuvuloš olbmot, geat eai muđui sáhtášii jienastit almmá badjelmeare váttisvuođaid, ožžot jienastit dikšunbáikkistis.
Dikšunbáikkis jienasteami várás válgalávdegotti mearrida iežas lahtu ja várrelahtu, geat ovddastit válgalávdegottis gažaldatvuloš gieldda, doaibmat válgaáššeolbmon ja su várreáššeolbmon.
Dikšunbáikkis jienastettiin jienasteamis ferte jienasteaddji ja válgaáššeolbmo lassin leat mielde jienasteaddji válljen dahje dohkkehan sámedikki válgalogahallamii merkejuvvon jietnavuoigadahtton olmmoš.
Áššis ferte váldit oktavuođa válgalávdegotti doaimmahahkii juoga telefovnnain dahje šleađgapoasttain.
Sámedikki válgalávdegoddi
040 530 9513 / 010 839 3155
040 193 1653 / 010 839 3174
040 487 2164 / 010 839 3177
040 557 2717 / 010 839 3153
Válgalávdegoddái sáhttá sáddet suddjejuvvon šleađgapoastta čujuhusas: https://secmail.com/send/vMJaNprX.
Jienasteapmi duopmostuolu mearrádusa vuođul
Olbmui, guhte ovdal jienaidrehkenastima álggaheami čájeha válgalávdegoddái alimus hálddahusrievtti mearrádusa iežas jietnavuoigatvuođas, várrejuvvo dilálašvuohta oažžut válgaáššegirjjiid ja jienastit. Válgalávdegoddi álggaha jienaidrehkenastima vuossárgga 2.10.2023 dmu. 18 Sajosis Anáris.
Olmmoš lea geatnegahtton luohpadit mearrádusa dahje dan vuoiggalažžan duođaštuvvon kopiija válgalávdegoddái dahje válgadoaibmagoddái, vai dat sáhttá dahkat áššis merkejumi válgalogahallamii.
Váldde oktavuođa válgalávdegotti doaimmahahkii!
Sámedikki válgalávdegoddi
Sámekulturguovddáš Sajos
Menesjärventie 2A
99870 Anár
040 530 9513 / 010 839 3155
040 193 1653 / 010 839 3174
040 487 2164 / 010 839 3177
040 557 2717 / 010 839 3153