Sámediggeválggat 2023
Sámedikki válggat doaimmahuvvojit 4.9.-2.10.2023.
Válggain jietnavuoigadahtton leat sápmelaččat, geat leat merkejuvvon sámedikki válgalogahallamii. Jietnavuoigadahtton sápmelaččat leat maiddái válgagelbbolaččat ja sáhttet álgit válggain evttohassan.
Sámiid parlameanta dahjege Sámediggi lea Suoma sámiid alimus politihkalaš orgána, mii ovddasta sámiid sisriikkalaš ja riikkaidgaskasaš oktavuođain. Sámedikki 21 lahtu ja njeallje várrelahtu válljejuvvojit juohke njealját jagi doaimmahuvvon válggain. Sámiid ruovttuguovllu juohke gielddas válljejuvvojit uhcimustá golbma ovddasteaddji.
Áigetávvalat
| 31.12.2023 ovdal dmu 16 | Válgalogahallamii ohcan nohká |
| 28.2.2023 | Válgalávdegoddi nanne válgalogahallama |
| 10.3.2023 | Almmuhankoarttat postejuvvojit jietnavuoigadahtton olbmuide |
| 20.-31.3.2023 | Válgalogahallan ásahuvvo oaidnin láhkai |
| 14.4.2023 ovdal dmu 16 | Njulgengáibádus válgalávdegoddái válgalogahallamis |
| 4.8.2023 ovdal dmu 16 | Evttohasa ásaheapmi nohká |
| 4.9.-2.10.2023 | Válggaid doaimmaheapmi |
| 4.10.2023 dmu 18 maŋŋá | Válgalávdegoddi nanne válggaid bohtosa |
Válgalogahallamii ohcan
Válgalávdegoddi merke jagi 2019 válgalogahallamii daid sápmelaččaid, geat ledje jietnavuoigadahtton Sámediggeválggain 2015. Buot earát galget ohcat válgalogahallamii maŋimustá 31.12.2022 ovdal dmu 16.
Maiddái jienastanvuoigatvuođaahkái boahtán nuorat galget ohcat válgalogahallamii deavdimiin ohcanskovi. Jienastanvuoigatvuođaahkásaš lea nuorra, guhte lea deavdán 18 jagi maŋimustá válggaid maŋimuš beaivve 2.10.2023.
Almmuhus jienastanvuoigatvuođas
Válgalogahallamii merkejuvvon sápmelaččat ožžot almmuhusa jienastanvuoigatvuođas, válgalogahallama oaidninláhkai doallanáiggis ja -báikkiin ja válggaid doaimmaheapmái gulavaš eará áššiin poastta fáro njukčamánus 2023. Válgalogahallan lea oaidninláhkai 20.-31.3.2023. Báikkiin almmuhuvvo almmolaš gulahusain.
Sáhtát gáibidit njulgema, juos oaivvildat, ahte du leat guođđán eahpevuoiggalaččat eret válgalogahallamis dahje du guoski merkejupmi lea válgalogahallamis boastut. Válgalogahallama njulgengáibádusa galgá bargat 14.4.2023 dmu 16 rádjai válgalávdegoddái.
Evttohasa ásaheapmi
Evttohasa sámediggeválggaide sáhttá ásahit válljenovttastus, man leat vuođđudan golbma sápmelačča. Evttohasa ásaheamis dieđihuvvo almmolaš gulahusain. Evttohasásaheami várás devdojuvvo skovvi, man válgalávdegoddi lea nannen, ja dat doaimmahuvvo válgalávdegotti doaimmahahkii maŋimustá 4.8.2023 ovdal dmu 16.
Skovvi almmustahtto Sámedikki neahttasiidduin seammá áigge gulahusain ja dan sáhttá čálihat siidduin dahje dan sáhttá bivdit válgalávdegotti doaimmahagas. Válgalávdegoddi gieđahallá evttohasaid válgagelbbolašvuođa, ráhkada ja nanne sin guoski evttohaslisttu ja almmustahttá dan farggamusat.
- Skovvi evttohasásaheami várás
Válggaid doaimmaheapmi
Sámedikki válggat doaimmahuvvojit 4.9.-2.10.2023. Válgaáššebáhpárat doaimmahuvvojit jietnavuoigadahtton olbmuide čakčamánu álggus poastta fárus čálihuvvon breavan.
Válggaid jienaidrehkenastin
Válgalávdegoddi álggaha jienaidrehkenastima válgadoaimmahusa maŋŋá vuossárgga 2.10.2023 dmu. 18 Sajosis Anáris. Jienaidrehkenastima álggaheami maŋŋá boahtán sáttakonfeluhtat guđđojuvvojit rabakeahttá válddekeahttá vuhtii. Doaimmahusas dollojuvvo beavdegirji. Válljensearvvi áššeolbmos dahje várreáššeolbmos lea vuoigatvuohta leat báikki alde jienaidrehkenastimis.
Válgaáššegirjjiid seailluheapmi
Sámedikki válggaid válgaáššegirjjit ja eará válggain geavahuvvon materiála fertejit seailluhuvvot nu, ahte diehtosuodji lea sihkkarastojuvvon. Áššegirjjiid seailluheamis bissovaččat ásahuvvo arkiivalága (831/1994) 8 §:s. Eará áššegirjjit seailluhuvvojit dassážii, go čuovvovaš válggat leat doaimmahuvvon, lohpeohcamušat ja daidda ožžojuvvon vástádusat sihke mearrádusgirjjit goittotge válgalávdegotti mearridan mearreáiggi.
Válggaid bohtosa mearrašuvvan
Sámedikki áirrasin bohtet válljejuvvot 21 eanemus jienaid ožžon evttohasa, gáibádusain, ahte sin joavkkus leat uhcimustá golbma evttohasa sápmelaččaid ruovttuguovllu guđege gielddas. Juos mas nu dáin gielddain eai leat dán joavkkus golbma evttohusa, bohtet válljejuvvot dan gieldda golbma eanemus jienaid ožžon evttohasa.