Valjâluvâttâlmân ucâlume

Valjâlävdikodde merkkee ive 2023 valjâluvâttâlmân taid sämmilijd, kiäh lijjii jienâvuoigâdvuođâliih Sämitige vaaljâin 2019. Puoh iärráseh kalgeh ucâluđ valjâluvâttâlmân majemustáá 31.12.2022 ovdil tme 16.

Valjâluvâttâlmân puáhtá ucâluđ sämitiggelaavâ 3 § 1 moomeent 1, 2 já 3 saje já 21 § vuáđuld:

  1. Tun lah jieš tâi aainâs ohtâ tuu vanhim tâi ákku tâi äijih lii oppâm sämikielâ vuossâmuš kiellân.
  2. Tun lah taggaar ulmuu maajeeldpuáttee, kote lii merkkejum tuoddâr-, mecci- tâi kuálásteijeelappalâžžân eennâm-, viärukyeddim- tâi jieggâkirjeest.
  3. Ohtâ tuu vanhimijn lii merkkejum tâi ličij puáhtám merkkejuđ jienâvuoigâdvuotâlâžžân säämi parlament tâi Sämitige vaaljâin.

Nuorah

Meid jienâvuoigâdvuotâahan šoddâm nuorah kalgeh ucâluđ valjâluvâttâlmân tevdimáin uuccâmluámáttuv. Ive 2023 vaaljâin jienâvuoigâdvuotâahasâš lii nuorâ, kote lii tiävdám 18 ihheed majemustáá vaaljâi majemuš peeivi 2.10.2023. Maaccât vuáláčallum luámáttuv tienuuvt, ete tot lii valjâlävdikoddeest majemustáá 31.12.2022 ovdil tijme 16. Mij avžuuttep kevttiđ vuosâsaajeest šleđgâlijd luámáttuvâid.

Uuccâmluámáttuvah

Uuccâmluámáttuvah ive 2023 sämitiggevaaljâi valjâluvâttâlmân kalgeh leđe valjâlävdikode toimâttuvâst 31.12.2022 ovdil tme 16. Uuccâmluámáttuv puáhtá toimâttiđ šleđgâlávt, poostâ peht tâi tooimâtmáin uuccâmluámáttuv Sämitiigán valjâlävdikode toimâttâhân. Mij avžuuttep kevttiđ vuosâsaajeest šleđgâlijd luámáttuvâid.

Šleđgâlâš uuccâmluámáttâh

Tun kaavnah šleđgâlii luámáttuv Sämitige nettisiijđoin. Šleđgâliih luámáttuvah kávnojeh anarâškielân, nuorttâlâškielân, tavesämikielân já suomâkielân.

Uuccâmluámáttuv toimâttem poostâ peht

Printtii uuccâmluámáttuv Sämitige nettisiijđoin tâi pivde tom valjâlävdikode toimâttuvâst. Vuolgât vuáláčallum uuccâmluámáttuv lahtosijguin poostâ peht čujottâsân:

Sämitige valjâlävdikodde
Säämi kulttuurkuávdáš Sajos
Menesjärventie 2A
99870 INARI/AANAAR

Lasetiäđuid ucâlum háárán puáhtá tiäđuštâllâđ syeijejum šleđgâpoostâ peht.

Syeijejum šleđgâpostâ: https://secmail.com/send/m7jcWH7B, vuástáväldee: vaalit@samediggi.fi