Sääʹmteʹǧǧvaal 2023

Sääʹmteʹǧǧvaalid tuåimtet 4.9.-2.10.2023.

Vaalin jiõnstemvuõiggâdvuõttneeʹǩǩ lie säʹmmla, ǩeäk lie mieʹrǩǩuum sääʹmteeʹǧǧ vaal-loǥstõʹǩǩe. Jiõnstemvuõiggâdvuõđla säʹmmla lie še vaalââʹnteei da vuäiʹtte äʹlǧǧed vaalin võboršeʹǩǩen.

Säʹmmlai parlameʹntt leʹbe Sääʹmteʹǧǧ lij Lääʹddjânnam säʹmmlai ââʹlmõs poliittlaž orgaan, kååʹtt eeʹttkâstt säʹmmlaid meerlaž da meeraikõskksaž õhttvuõđin. Sääʹmteeʹǧǧ 21 vuäzzliʹžžed da nellj väärrvuäzzla vaʹlljeet vaalin, koid piijât tueiʹmme juõʹǩǩ neelljad eeʹjj. Juõʹǩǩ säʹmmlai dommvuuʹd kååʹddest vaʹlljeet uuʹccmõsân kolmm eʹtǩǩeei.

Äiʹǧǧtaull

31.12.2022 ouddâl čiâss 16	Vaal-loǥstõʹǩǩe ooʒʒõõttmõš poott
28.2.2023	Vaal-luʹvddkåʹdd raavad vaal-loǥstõõǥǥ
1.3.2023	Iʹlmmtõskoortid vuõltteet pååʹštest jiõnstemvuõiggâdvuõttniiʹǩǩid
20.-31.3.2023	Vaal-loǥstõõǥǥ piijât vueiʹnnemnalla
14.4.2023 ouddâl čiâss 16	Vuõiǥeemkaiʹbbjõs vaal-luʹvddkådda vaal-loǥstõõǥǥâst
4.8.2023 ouddâl čiâss 16	Võboršiiʹǩǩi piijjmõš poott
4.9.-2.10.2023	Vaali tuåimtummuš
4.10.2023	Vaal-luʹvddkåʹdd raavad vaali puåđõõzz

Vaal-luʹvddkååʹdd teâđtõõzz

16.3.2023

Teâđtõs sääʹmteeʹǧǧ eeʹjj 2023 vaal-loǥstõõǥǥ raavummša kuuleeʹl

9.3.2023

Sääʹmteeʹǧǧ vaal 2023

2.3.2023

Sääʹmteeʹǧǧ vaal-luʹvddkåʹdd iʹlmmat ooccâmnalla koontârpiisar mieʹrräiggsaž tuâj

20.12.2022

Ooʒʒõõttmõš eeʹjj 2023 sääʹmteʹǧǧvaali vaal-loǥstõʹǩǩe poott 31.12.2022 õuʹddel čiâss 16

19.10.2022

Sääʹmteeʹǧǧ vaal-luʹvddkåʹdd lij raavääm lomaakkid eeʹjj 2023 vaal-loǥstõʹǩǩe ooʒʒõõttmõõžž vääras

Vaal-loǥstõʹǩǩe ooʒʒõõttmõš

Vaal-luʹvddkåʹdd mieʹrǩǩad eeʹjj 2023 vaal-loǥstõʹǩǩe tõiʹd säʹmmlaid, ǩeäin leäi jiõnstemvuõiggâdvuõtt Sääʹmteeʹǧǧvaalin 2019. Pukin jeärrsin âlgg ooʒʒõõttâd vaal-loǥstõʹǩǩe mââimõõzzâst 31.12.2022 ouddâl čiâss 16.

Jiõnstemvuõiggâdvuõttâkka šõddâm nuõrr âlgg še ooʒʒõõttâd vaal-loǥstõʹǩǩe tiuddeeʹl ooccâmlomaakk. Jiõnstemvuõiggâdvuõttâkksaž lij nuõrr, kååʹtt lij teâuddam 18 eeʹǩǩed mââimõõzzâst vaali mââimõs peiʹvven 2.10.2023.

Looǥǥ lââʹzz

Iʹlmmtõs jiõnstemvuõiggâdvuõđâst

Vaal-loǥstõʹǩǩe mieʹrǩǩuum säʹmmla vuäǯǯa iʹlmmtõõzz jiõnstemvuõiggâdvuõđsteez, vaal-loǥstõõǥǥ vueiʹnnemnalla åårramääiʹjest da -paaiʹǩin da jeeʹres vaali tuåimtummša õhttneei aaʹššin pååʹšt mieʹldd pâʹsslašttâm-mannust 2023. Vaal-loǥstõk lij vueiʹnnemnalla 20.-31.3.2023. Paaiʹǩin iʹlmmtet õõlmâs kuultõõzzin.

Vuäitak õõlǥted vuõiǥõõzz, jõs ǩiõččak, što ton leäk kuõđđum vuõiggâdvuõđtaa meädda vaal-loǥstõõǥǥâst leʹbe tuu kuõskki meârkkõs vaal-loǥstõõǥǥâst lij vââǥǥlaž. Vaal-loǥstõõǥǥ vuõiǥeemkaiʹbbjõs âlgg tuejjeed 14.4.2023 čiâss 16 mõõneeʹst vaal-luʹvddkådda.

Vuõiǥeem-mõõntõõllâmvuäʹppõõzz 2023

Võboršeeʹǩǩ piijjmõš

Võboršeeʹǩǩ sääʹmteʹǧǧvaalid vuäitt piijjâd kooum säʹmmla alttääm vaʹlljeeiõhttõs. Võboršeeʹǩǩ piijjmest teâđtet õõlmâs kuultõõzzin. Võboršeeʹǩǩ piijjmõõžž vääras tiuddeet vaal-luʹvddkååʹdd raaveem lomaakk da tuåimtet tõn vaal-luʹvddkååʹdd konttra mââimõõzzâst 4.8.2023 ouddâl čiâss 16.

Lomaakk õlmstââʹttet Sääʹmteeʹǧǧ neʹttseeidain seämma ääiʹj kuultõõzzin da tõt lij printteemnalla seeidain leʹbe tõn vuäitt raukkâd vaal-luʹvddkååʹdd konttrest. Vaal-luʹvddkåʹdd ǩiõttʼtââll võboršiiʹǩǩi ââʹntemvuõđ, rääjj da raavad siʹjjid kuõskki võboršeǩloǥstõõǥǥ da õlmstââʹtt tõn mââʹjeeǩâni.

Lomaakk võboršeeʹǩǩ piijjmõõžž vääras

Õhttvuõtt-teâđ

Sääʹmteeʹǧǧ vaal-luʹvddkåʹdd peejj vaalid tueiʹmme Sääʹmteeʹǧǧest uvddum lääʹjj 4 lååǥǥ da vuõiggâdvuõttministeria vaalmõõntõõllmest ouddam asetõõzz meâldlânji.

Sääʹmteeʹǧǧ vaal-luʹvddkåʹdd
Sääʹmkulttuurkõõskõs Sajos
Menesjärventie 2A
99870 AANAR

+358 40 530 9513 / +358 10 839 3155
+358 40 530 5686 / +358 10 839 3138

vaalit(at)samediggi.fi

Vaal-luʹvddkådda vuäitt vuõltteed suõjjuum neʹttpååʹšt addrõõzzâst: https://secmail.com/send/m7jcWH7B.

Vaali pirr teâđtummuš

Vaal-luʹvddkåʹdd teâđat vaali jååʹttmest õõlmâs kuultõõzzin Helsingin Sanomat da säʹmmlai dommvuuʹdest iʹlmstõõvi gaʹzeââʹtin di Sääʹmteeʹǧǧ neʹttseeidain.