Sääʹmteʹǧǧvaal 2019

Säʹmmlai parlameʹntt leʹbe Sääʹmteʹǧǧ lij Lääʹddjânnam säʹmmlai ââʹlmõs poliittlaž orgaan, kååʹtt eeʹttǩad säʹmmlaid meerlaž da meeraikõskksaž õhttvuõđin.

Sääʹmteeʹǧǧ 21 vuäzzliʹžžed da nellj väärrvuäzzla vaʹlljeet vaalin, koid piijât tueiʹmme juõʹǩǩ neelljad eeʹjj. Juõʹǩǩ säʹmmlai dommvuuʹd kååʹddest vaʹlljeet uuʹccmõsân kolmm eʹtǩǩeei.

Vaalin jiõnstemvuõiggâdvuõđla lie säʹmmla, ǩeäk lie pijjum ǩiiʹrji ool sääʹmteeʹǧǧ vaal-loǥstõʹǩǩe. Jiõnstemvuõiggâdvuõđla säʹmmla lie še vaalââʹnteei da vuäiʹtte äʹlǧǧed vaalin võboršeʹǩǩen.

31.12.2018 ouddâl č. 16 Vaal-loǥstõʹǩǩe ooccõõttmõš poott
28.2.2019 Vaal-luʹvddkåʹdd raʹvvai vaal-loǥstõõǥǥ
4.3.2019 Iʹlmmtõskoortid vuõltteet pååʹštest jiõnstemvuõiggâdvuõttniiʹǩǩid
18.-29.3.2019 Vaal-loǥstõõǥǥ piijât vueiʹnnemnalla
12.4.2019 ouddâl č. 16 Vuõiǥeemkaiʹbbjõs vaal-luʹvddkådda vaal-loǥstõõǥǥâst
2.8.2019 ouddâl č. 16 Võboršiiʹǩǩi piijjmõš poott
2.9.-30.9.2019 Vaali tuåimtummuš
2.10.2019 Vaal-luʹvddkåʹdd raʹvvai vaali puåđõõzz

Vaal-loǥstõʹǩǩe ooccõõttmõš

Vaal-luʹvddkåʹdd mieʹrǩǩad eeʹjj 2019 vaal-loǥstõʹǩǩe tõiʹd säʹmmlaid, ǩeäin leäi jiõnstemvuõiggâdvuõtt Sääʹmteeʹǧǧvaalin 2015. Pukin jeärrsin âlgg ooccõõttâd vaal-loǥstõʹǩǩe mââimõõzzâst 31.12.2018 ouddâl č. 16.

Vaal-loǥstõʹǩǩe vuäitt ooccõõttâd sääʹmteʹǧǧlääʹjj 3 § 1 momeeʹnt 1, 2 da 3 pääiʹǩ da 21 § vuâđald:

  1. Leäk jiõčč leʹbe aainâs õhtt tuu puärrsin leʹbe ääʹjjin leʹbe ääkkain lij mättjam sääʹmǩiõl vuõssmõs ǩiõllân.
  2. Leäk nåkam oummu kåårmlač, ǩii lij mieʹrǩǩuum tuõddâr-, meäʹcc- leʹbe kueʹllšiiʹllilappaliʹžžen mädd-, piiđkueʹddem- leʹbe jiõggǩeeʹrjest.
  3. Õhtt tuu puärrsin lij mieʹrǩǩuum leʹbe leʹčči vuäittam leeʹd mieʹrǩǩuum jiõnstemvuõiggâdvuõđliʹžžen sääʹm parlameeʹnt leʹbe Sääʹmteeʹǧǧ vaalin.
Nuõr

Jiõnstemvuõiggâdvuõttâkka šõddâm nuõri âlgg še ooccõõttâd vaal-loǥstõʹǩǩe tiuddeeʹl ooccâmlomaakk. Jiõnstemvuõiggâdvuõttâkksaž lij nuõrr, kåått lij teâuddam 18 eeʹǩǩed mââimõõzzâst vaal mââimõs peeiʹv 30.9.2019. Maaccât vuâlla ǩeeʹrjtum blaaŋk nuʹtt, što tõt lij vaal-luʹvddkååʹddest mââimõsân 31.12.2018 ouʹddel čiâss 16.

Ooccâmlomaakk

Lomaakk vuäitak printteed Sääʹmteeʹǧǧ neʹttseeidin addrõõzzâst www.samediggi.fi/vaal-2019 leʹbe vuäǯǯak tõn raaukeeʹl vaal-luʹvddkååʹdd konttrest. Maaccât vuâlla ǩeeʹrjtum blaaŋk nuʹtt, što tõt lij vaal-luʹvddkååʹddest mââimõsân 31.12.2018 ouʹddel čiâss 16.

Iʹlmmtõs jiõnstemvuõiggâdvuõđâst

Vaal-loǥstõʹǩǩe mieʹrǩǩuum säʹmmla vuäǯǯa iʹlmmtõõzz jiõnstemvuõiggâdvuõđsteez, vaal-loǥstõõǥǥ vueiʹnnemnalla åårramääiʹjest da -paaiʹǩin da jeeʹres vaali tuåimtummša õhtteei aaʹššin pååʹšt mieʹldd pâʹsslašttâm-mannust 2019.

Vaal-loǥstõk lij vueiʹnnemnalla 18.-29.3.2019. Paaiʹǩin iʹlmmtet õlmmsaž kuultõõzzin.

Vaal-loǥstõõǥǥ vuõiǥeemkaiʹbbjõõzz âlgg tuejjeed 12.4.2019 č. 16 mõõneeʹst vaal-luʹvddkådda. Vuäitak õõlǥted vuõiǥõõzz, jõs ǩiõččak, što ton leäk kuõđđum vuõiggâdvuõđtaa meädda vaal-loǥstõõǥǥâst leʹbe tuu kuõskki meârkkõs vaal-loǥstõõǥǥâst lij vââǥǥlaž.

Võboršeeʹǩǩ piijjmõš

Võboršeeʹǩǩ sääʹmteʹǧǧvaalid vuäitt piijjâd kooum säʹmmla alttääm vaʹlljeeiõhttõs. Võboršeeʹǩǩ piijjmest teâđtet õlmmsaž kuultõõzzin.

Võboršeeʹǩǩ piijjmõõžž vääras tiuddeet vaal-luʹvddkååʹdd raaveem lomaakk da tuåimtet tõn vaal-luʹvddkååʹdd konttra mââimõõzzâst 2.8.2019 ouddâl č. 16.

Lomaakk õlmstââʹttet Sääʹmteeʹǧǧ neʹttseeidin seämma ääiʹj kuultõõzzin da tõt lij printteemnalla seeidin leʹbe tõn vuäitt raukkâd vaal-luʹvddkååʹdd konttrest.

Vaal-luʹvddkåʹdd ǩiõttʼtââll võboršiiʹǩǩi ââʹntemvuõđ, rääjj da raaʹvai siʹjjid kuõskki võboršeǩloǥstõõǥǥ da õlmstââʹtt tõn mââʹjeeǩâni.

Vaali tuåimtummuš

Sääʹmteʹǧǧvaalid tuåimtet 2.9.-30.9.2019. Vaaläʹššǩiiʹrjid tuåimtet jiõnstemvuõiggâdvuõttniiʹǩǩid čõhččmannu aalǥâst pååʹštest ǩeʹrjjuum ǩeʹrjjen.

Jiõnstummuš pååʹšt mieʹldd

Jiõnstummuš šâdd maaccteeʹl vaaläʹššǩiiʹrjid vaal-luʹvddkådda ǩeʹrjjuum vuõlttõssân nuʹtt, što tõk lie vaal-luʹvddkååʹddest mââimõõzzâst 30.9.2019 ouddâl č. 18.

Jiõnstummuš maaccteeʹl vaaläʹššǩiiʹrjid vaal-luʹvddkååʹdd konttra

Jiõnstummuš šâdd maaccteeʹl vaaläʹššǩiiʹrjid persoonlânji vaal-luʹvddkååʹdd konttra leʹbe jeeʹres tuåimmpaaiʹǩid 16.9.-27.9.2019.

Vaalpeeiʹv jiõnstummuš

Vaal-luʹvddkåʹdd teâđat jeeʹrab vaalpeeiʹv jiõnstummuž riâššmest.

Jiõnstummuš håiddstroiʹttlin da dååma

Jiõnstummuž riâššât säʹmmlai dommvuuʹdest åårrai håiddstroiʹttlin leʹbe dååma hoiʹddjemnalla åårrai oummid, jõs tõõzz lij tarbb (STL 32 §).

Sääʹmteeʹǧǧ vaal-luʹvddkåʹdd

Sääʹmteeʹǧǧ vaal-luʹvddkåʹdd peejj vaalid tueiʹmme Sääʹmteeʹǧǧest uvddum lääʹjj 4 lååǥǥ da vuõiggâdvuõttministeria vaalmõõntõõllmest uʹvddem asetõõzz meâldlânji.

Sääʹmteeʹǧǧ vaal-luʹvddkåʹdd
Sääʹmkulttuurkõõskõs Sajos
Menesjärventie 2A
99870 AANAR

+358 10 839 3120
vaalit@samediggi.fi

www.samediggi.fi

Lomaakk

Vaalid kuõskki lomaakkid vuäitak printteed sääʹmteeʹǧǧ neʹttseeidin addrõõzzâst www.samediggi.fi/vaal-2019 leʹbe vuäǯǯak tõiʹd raaukeeʹl vaal-luʹvddkååʹdd konttrest.

Vaali pirr teâđtummuš

Vaal-luʹvddkåʹdd teâđat vaali jååʹttmest õlmmsaž kuultõõzzin Helsingin Sanomat da Kalevala -gaʹzeââʹtin da säʹmmlai dommvuuʹdest õlmstõʹtti gaʹzeââʹtin di Sääʹmteeʹǧǧ neʹttseeidin.