Govven
Nigá, noveallačoakkáldat 1
Nigá -nammasaš sámegándda mánná- ja nuorravuođa dáhpáhusat sajáiduvvet 1940-50 -loguide. Girjji 25 novealla vuođđun leat sámebearraša duohta eallindáhpáhusat. Bearaš háhká birgenlágiset meahcce- ja guollebivddus smávva duottargilážis. Bearrašii gullet Jovnna-áhčči, Elle-eadni ja ealaskas Nigá-gánda, guhte lea fárus buotlágan doaimmain, vaikko ii álo livčče nu sávahahttige. Ná uhca almmái oahppá buot dáidduid ja dieđuid, maid son boahtá dárbbašit eallimisttis davvin.
Sápmelaš girječálli Niilo Aikio lea ieš eallán Nigá láhkai mánná- ja nuorravuođas Buolbmátjávrre meahccegilážis duon seamma áigodagas, ja sus leage duohta vásihus girjjis eallindiliin. Girječállin son nagođa ealáskahttit dološ báikkiid ja eallindiliid. Ivdnás ja njuovžilis gielainis son bajida min čalmmiid ovdii jáhkkemeahttun ja gelddolaš dáhpáhusaid, mat geasuhit maid dálá nuoraid. Guolle- ja meahccebivdui sihke šibitdollui gullevaš bargguid birra Aikio muitala iežas vásihusaid vuođul dárkilit ja áššedovdámušain.
Govvadáiddár Marketta Nilsen lea govvidan juohke novealla dáhpáhusa dáiddalaš oainnus čađa. Ulbmilin lea veahkehit nuorra lohkki vuodjut Nigá máilbmái ja fuobmát, man gelddolaš ja somás áššiid nuorat máhttet hutkat maiddái boaittobealbáikkiin. Go olmmoš lea hutkái ja diehtoáŋgir, son ii astta dolkat.
Girjji logadettiin lohkki beassá Nigá fárus dakkár áigái ja máilbmái, man son dálá Sámis ii šet muđuid fáhte.
