Sääʹmnuõri čeäʹppvuõttpeiʹvv Aanrest – Tubeʹtteei Mansikka ärvstõõllʼjen
Sääʹmnuõri čeäʹppvuõđpeiʹvv ââʹnet tän eeʹjj 12.4. Aanrest. Eeʹjj 2018 čeäʹppvuõđpeeiʹv teeʹmmen lij “jiõččan jiõnn” da šõddmõõžž äʹššvuʹvdden liâ musikk da tubettmõš leʹbe nuʹt ciâlkkum You Tube videoi sniimmʼmõš.
– Musikk lij še jeeʹresåʹrnn Lääʹddjânnmest teeʹmmen tän eeʹjj da ǥu teeʹmmen lij jiijjâs jiõnn, šeâtt tuʹbettmõš še samai puârast miʹjjid, ceälkk Sääʹmnuõri čeäʹppvuõđpeeiʹv puuʹtʼteei, Aleksi Ahlakorpi.
Tubettmõš-ǩeâšt ärvstõõllʼjen lij Mansikka (Maiju Voutilainen), kååʹtt lij õhtt Lääʹddjânnam peäggtum tubeʹtteeʹjin. Suu tubettmõõžž čuâvva pâʹjjel 160.000 ooumžed.
– Lij kâʹl samai hääʹsǩ vuäǯǯad näkam peäggtum ooumaž miʹjjid ärvstõõllʼjen. Mansikka veʹt lij õiʹdde jeällam Aanrest ââʹnnmen tubettmõš-škooultõõzz nuõrid da tõn leʹjje pääiʹǩ âʹlnn čuâvvmen nuʹt čueʹtt nuõr da pääʹrn da striim pääiʹǩ võl lââzz, rämmai Ahlakorpi.
Tän eeʹjj leʹčči leämma čeäʹppvuõđpeeiʹv päiʹǩǩen Vuõccu, leša Suäʹđjel kååʹdd peälštemveʹrǧǧneeʹǩǩ miõlâst Vuõccu škooul kueʹrnec lij leigga occkaž čeäʹppvuõđpeeiʹv šõddmõʹšše.
– Vaiddlep štõ jeäʹp piâssâm Vuõccu, leša kâʹl tâma tän vuäitt ceäʹlǩǩed še positiivlaž vaiggâdvuõttan. Meeʹst liâ juʹn nuʹt jiânnai säʹmmlaž- da sääʹmǩiõllsa nuõr, štõ ij meinnu käunnʼjed tueʹrv šurr sââʹjj šõddmõʹšše. Päärnai da nuõri staanvuõtt še lij miʹjjid tuõđi vääžnai da tõõzz õhttneei aaʹššid âlgg väʹldded tuõđi lokku ǥu šõddmõõžž lij plaanmen, teäddad Ahlakorpi.
Sääʹmnuõri čeäʹppvuõđpeeiʹv jääʹrjast Sääʹmteʹǧǧ. Tubettmõš-ǩeâštt puätt leeʹd õhttsažtuejast Aarktlaž pedagogikk-haʹŋǩǩõõzzin da tõʹst lij ärvstõõllʼjen Mansikka. Tääʹrǩab teâđaid šõddmõõžžâst uʹvddep škooulid da median mâʹŋŋlest. Lââssteâđ käunnʼje addrõõzzâst: https://samediggi.fi/2018/01/21/saamelaisnuorten-taidetapahtuman-2018-lajeina-musiikki-ja-tubetus/ https://www.facebook.com/daiddadahpahus/
Aleksi Ahlakorpi
Puuʹtʼteei Sääʹmnuõri čeäʹppvuõttpeiʹvv
010 839 3128
aleksi.ahlakorpi@samediggi.fi
