SÄMINUORÂI TAAIĐÂTÁBÁHTUS 2021

Taan ive tábáhtus uárnejuvvoo live stream -vuolgâttâssân majebaargâ vyesimáánu 18. peeivi. 

Tábáhtusân puáhtá uásálistiđ tienuuvt, ete kovvee jieijâs uánihisfiilmâid, moi teeman lii ”Mun lam čeppi”, ”Muái láán čeepih” teikâ ”Mij lep čeepih”. 

Uásálistee kalga juátkiđ paječalluu ucemustáá ovttáin saanijn, ovdâmerkkân ´Muái láán čeepih tánssáđ…´. Teema ij lah räijejum tärhibeht, mutâ videoh kalgeh leđe sämikielâliih já muštâliđ säminuorâi elimist. Škoovlah uásálisteh já čuávuh tábáhtus stream peht. 

Videoid kalga toimâttiđ taaiđâtábáhtuspargojuávkun 10.5. räi. Video puáhtá leđe enâmustáá 3 miinut kukke.

Tábáhtusâst väljejuvvojeh säminuorâi ovdâsteijeeh väldikodálii Nuori Kulttuuri -festivaalân, mii uárnejuvvoo káidusin. Toos lasseen uásálistest lii máhđulâšvuotâ finniđ videos uássin Skábmagovat -festivaal párnái já nuorâi peeivi.  Nuori Kulttuuri -festivaal: https://nuorikulttuuri.fi/festival/  

Lasetiäđuh: 

Anni-Sofia Niittyvuopio 

anni-sofia.niittyvuopio(at)samediggi.fi 

+358 40 620 1917 / +358 10 839 3132

Tábáhtus hastag: #dáiddadáhpahus, #taaiđâtábáhtus, čeaäppvuõđpeeiv ja #sntaidetapahtuma

Mušte meid čuávvuđ taaiđâtábáhtus: 

Säminuorâi taaiđâtábáhtusâst

Säminuorâi taaiđâtábáhtus lii lamaš nuorâi kulttuur- já taaiđâpuđâldeijei vuossâmuš aareen jo neelji ihelove ääigi. Maaŋgah tááláá ääigi tubdum sierâ suorgij sämitaaiđâreh láá finnim tobbeen vuossâmuu oovdânpyehtimsaajees já jieijâskielâlii aalmugis. Tábáhtus lii nanodâm nuorâi puđâldâsâid já siämmást meid sämikielâ kevttim já oppâm, oohtânkulluuvâšvuođâ já sämmilii identiteet.

Taaiđâtábáhtusah láá iloliih já ivnááh tábáhtusah – tooid láá valmâštâllâm ubâ ive eromâšávt škoovlâin, kost máttáátteijeeh láá toimâm iäljárávt nuorâi stivrejeijen. Tábáhtus addel nuoráid tilálâšvuođâ ovdediđ táiđuidis, čäittiđ taid meid iärrásáid já finniđ oovdânpyehtimijn movtijdittee macâttâs tuámmárijn sehe stuorrâ juávhust páihálijd já eres kuávluin puáttám kuosijd.

Säminuorâi taaiđâtábáhtusah láá uárnejum 1970-lovo pelimudo rääjist. Aalgâst Säämi parlament já páiháliih sämiseervih lijjii uárnejeijen Laapi lääni nuorâilävdikode vuálásâžžân. Sämmilij škovlâašijrääđi, mii asâttui ovdediđ sämimáttááttâs, ornij tábáhtusâid 1990-lovo pelimuddoost. Rääđi tooimâ lopâttii já ton pargoid sirdii Sämitiigán, mii lii koordinistâm orniimijn ive 1998 rääjist.

Säminuorâi taaiđâtábáhtus kuulâi vistig väldikodálii Nuorâi taaiđâtábáhtusâi rááiđun ohtân páihálij tábáhtusâin. Tääl tot lii Nuorâ Kulttuur–viärmáduv kuávlulijd tábáhtussáid verditittee kejâlmâs, kost väljejuvvojeh ovdâsteijeeh kiiđâ uáivitábáhtusân teikâ Škoovlâ stuorrâjuhlen, mii uárnejuvvoo meri-iivij. Taaiđâtábáhtusân kočoh puoh sämipaarnijd já -nuorâid sehe sämikielâ teikâ sämikielâlii máttááttâsâst leijee paarnijd já nuorâid.

Válduteema meriduvvoo väldikodálii tábáhtus tanssâ-, muusik- teikâ teatterteema miäldásávt, mon lasseen ohjelmist lii miinii eromâšávt sämikulttuurân lohtâseijee teemaid. Taaiđâtábáhtus ulmen ij kuittâg lah tuše ärbivuovij kattim, peic eres taaiđâšlaajah láá vuáruluvâi fáárust. Teeman láá lamaš el. kovetaaiđâ, tihtâkišto, muusikjuávhust čuojâttem, ráiđukove, uánihis fiilmah, roolipihtâseh, sämimááccuh- já tyejičáittuseh, juáigus- já muusikpargopáájáh.

Säminuorâi taaiđâtábáhtus váldu-uárnejeijen lii sämitige škovlim- já oppâmateriaallävdikodde, já orniimijd koordinist škovlim- já oppâmateriaaltoimâttâh. Orniimáid uásálisteh meid sämikuávlu kieldah. Taaiđâtábáhtus kulá škoovlâi ihásii pargo-ohjelmân já tábáhtusah uárnejuvvojeh škovlâoho ääigi. Tábáhtus sehe väldikodálijd tábáhtussáid uásálistem ruttâd Máttááttâs- já kulttuurministeriö.