Skábma Filbmaguovddáš

Eamiálbmogiid filbmaguovddáš

Eamiálbmogiid filbmaguovddáš Skábma lea guovlluguovdasaš filbma- ja audiovisuála suorggi resursaguovddáš, mii doaibmá sámedikki vuolde Anáris. Dál doaibmama ruhtadit Oahpahusministeriija ja stáhta filbmadáiddadoaibmagoddi.

Eamiálbmogiid filbmaguovddáš Skábma doarju sámegiela ja kultuvrra. Dasa lassin dat duddjo vuođu, vuoi sámiid ja eará eamiálbmogiid iežaset jietna gullo ja govva oidno filbma- ja mediaindustriijas eamiálbmogiid iežaset eavttuiguin ja iežaset vuolggasajis.

Skábma doarju filmmaid ja mediabuktagiid plánema, ovddideami ja buvttadeami nu, ahte dat ohcá ruhtadankanálaid ja ovttasbargoguimmiid sihke lágida skuvlema ja ordne filbmasuorggi dáhpáhusaid sámeguovllus.

Filbmaguovddáš maiddái lávdada sámefilmmaid sierralágan dáhpáhusaide ja juohká dieđu sámefilmmas, -guovllus ja sápmelaš filbmadahkkiin. Skábma lea maiddái fárus lágideamen Skábmagovat-eamiálbmogiid filbmafestivála.

Doaimmat
Eamiálbmogiid filbmaguovddáža doaibman lea

1. doarjut sápmelaš filbma- ja TV –buvttadeami
2. lágidit filbmaskuvlema ja -bajásgeassima
3. ordnet čájehan- ja juohkindoaimmaid (ee. Skábmagovat -filbmafestivála)

Riikkaidgaskasaš oassi sámi kulturguovddážis

Sámi kulturguovddáš, mii vuođđuduvvo Anárii, fállá filbmaguovddáža lassin máŋggaid doaimmaid. Dain ee. sámeduodji, sámemusihkka, ealáhusat sihke mánát ja nuorat ožžot iežaset ossodagaid. Kulturguovddášviesus lea maiddái sámegirjerádju.

Eamiálbmogiid filbmaguovddáža doaibmama vuolggasajit bohciidit ealáhusain ja kultuvrras. Filbmaguovddáš atná ávkin davviriikkalaš sámeguovlu addin synergiijaovddu filmmaid giehtačállimis, govvemis ja earenoamážit daid riikkaidgaskasaš ruhtadeamis. Dasa lassin filbmaguovddáš atná ávkin Skábmagovat–filbmafestiválaid mielddisbuktin máilmmiviidosaš filbmafierpmádaga.

DOAIMMAT

Filbma- ja televišuvdnabuvttadeapmi

Eamiálbmogiid filbmaguovddáš Skábma doarju filbmadahkkiid gávdnat ođđa ovttasbargoguimmiid ja ruhtadanmálliid. Dasa lassin dat doaibmá ovttasbargoorganisašuvdnan eamiálbmogiid filbmadahkkiid gaskkas nu, ahte dat ohcá filbmaprošeavttaid ja bargovejolašvuođaid miehtá máilmmi.

Skuvlen

Filbmaguovddáš pláne skuvlema ámmátolbmuide ja vuojulduvvá filbmabajásgeassima ovddideapmái ovttas sámeguovllu skuvllaiguin.

Filbmabajásgeassinbargu dahkko dál Anára, Ohcejoga ja Eanodaga gielddaid skuvllaiguin. Bargobájiid bohtosat leat čájehuvvon Suoma ja olgoriikkaid filbmafestiválain, TV:as ja sierralágan nuoraid dáhpáhusain.

Ohcejoga ja Eanodaga logahagat fállet mediakurssaid oahppiide čavčča 2009 rájes.

Anáris Sámi oahpahusguovddáža medialinnjás ráhkadit oanehis-, dokumeanta- ja animašuvdnafilmmaid sihke TV-prográmmaid. Skuvlen bistá 1‒2 jagi. Barggu fállet ee. Suoma, Norgga ja Ruoŧa sámeradio ja –TV, ovttaskas filbmabuvttadeamit, filbmadáhpáhusat ja skuvlemat.

Eamiálbmogiid filbmaguovddáš Skábma lágida buvttadusdáhpáhusa jagi 2010 Skábmagovat –filbmafestivála áigge. Buvttadusdáhpáhusas geahččaluvvo oažžut davviriikkalaš buvttadanfitnodatservviid ja ruhtadeaddjiid lagabui sápmelaš filbmadahkkiid. Dáhpáhusa ulbmilin lea ovddidit ámmátlaš filmma dahkama, oahpásmuhttit buvttadeaddjiid ja dahkkiid guhtet guoibmáseaset sihke lávdadit sápmelaš filmma.

Skábma-buvttadusdáhpáhus bistá guokte beaivvi. Dáhpáhusa áigge davviriikkalaš filbmasuorggi ámmátolbmot mannet čađa ideaid, muitalit davviriikkalaš ruhtadeamis, lávdadan- ja čájehanvejolašvuođain sihke oahpistit ideaid vuovdimis. Bargobáji maŋimuš beaivve filbmadahkkit čájehit iežaset ideaid buvttadanfitnodatservviide ja ruhtadeaddjiide. Dáhpáhussii čáhket 6‒10 dahkki ja idea sihke máŋga buvttadanfitnodatsearvvi ja ruhtadeaddji. Dáhpáhus lea nuvttá oassálastiide.

Lassedieđuid oažžu Eamiálbmogiid filbmaguovddážis,
tel: +358 40 187 9909
e-poasta: skabma(at)samediggi.fi

Skábmagovat ja eará čájehan- ja lávdadandoaibma

Eamiálbmogiid filbmaguovddáš lea fárus ordnemin ja ovddideamen Skábmagovat –filbmafestivála. Festiválain lea leamaš jagi 2005 rájes maiddái mánáid ja nuoraid beaivvit, main lea juo fásta sajádat dáhpáhusas. Skábmagovat-festivála lea dehálaš forum sápmelaš filbmadahkkiide ja ain dávjjit sámefilmmaid vuosttaseahket –báiki. Sámefilmmat levvet dávjá Skábmagovat-festiválas miehtá máilmmi.

Skábmagova-festivála lassin eamiálbmogiid filbmaguovddáš sirdá dieđu sápmelaš ja eamiálbmogiid filmmaid birra riikkaidgaskasaš filbmafestiválaide, -dáhpáhusaordnejeaddjiide ja –ládvadeaddjiide.