Sámi Giellagáldu lea sámeálbmoga oktasaš davviriikkalaš áššedovdiorgána sámegielaid guoski áššiin. Sámegielaid fága- ja resursaguovddáš Sámi Giellagáldu, man Suoma, Norgga ja Ruoŧa Sámedikkit leat vuođđudan, lea ásahuvvon bissovaš iešheanalaš doaibmaorgánan Norgga Sámedikki oktavuhtii 2022.

Sámi Giellagáldu vástida sámegielaid guoski davviriikkalaš ovttasbarggu koordineremis, nannemis ja ovddideamis. Sámi Giellagáldu ulbmilin lea sámi čállingielaid ja hállangielaid ráhkadan kulturárbbi seailluheapmi, gáhtten ja ovddideapmi ja sámegielaid seailluheapmi, nannen ja ovddideapmi válddedettiin seammás vuhtii sierra sámegielaid dárbbuid, hástalusaid ja resurssaid.

Sámi Giellagáldu vástida sámegielaid gielladikšumis. Sámi Giellagáldu doaibmá oktasaš áššedovdiorgánan áššiin, mat gusket sámi čállingielaid normerema. Dása gullet terminologiija normeren ja čállinnjuolggadusat. Sámi Giellagáldu bargun lea riggudit sámegielaid sátneráju ja veahkehit ná iežas oasil dorvvastit sámegielaid boahttevuođa. Sámi Giellagáldu fállá giellageavaheaddjiide dieđuid, neavvuid ja rávvagiid, mat laktásit sámegielaid geavahussii.

LASSEDIEĐUT

Mika Saijets

Sámi Giellagáldu direktevra

+47 78 47 41 48, +47 902 01 138

mika.saijets(at)giellagaldu.org