Saavâjođetteijee

Tuomas Aslak Juuso ađai Gáijjot Ánte Issahá Duommá lii šoddâm Lahtist kuovâmáánu 7. peeivi 1985. Juuso lii pajasšoddâm sehe Lahtist ete Käresavonist, mutâ vuáđuškoovlâ sun lii jottáám iänááš Lahtist. Juuso lii čođâldittâm puásui- já luándutuálu áámmáttotkos Säämi máttááttâskuávdáást Kaamâs Tuáivunjaargâst. Toos lasseen sun lii čođâldittâm puásuituálu vuolgâttâsulmuu ohjelm (The Reindeer ambassador program, International Centre for Reindeer Husbandry) sehe kuursâid algâaalmugvuoigâdvuođâst (Sámi University College, Kuovdâkiäinu). Tääl Juuso áásá Käresavonist.

Juuso väljejui Sämitige jesânin vuossâmuu tove ive 2008. Sun lii ain nuorâmus Sämitiigán väljejum jeessân miätá aaigij. Juuso väljejui Sämitige 2. värisaavâjođetteijen valjâpajan 2016-2019 já tääl suu kuálmád pajan 2020-2023 Juuso väljejui Sämitige saavâjođetteijen kuovâmáánust 2020.

Juuso lii lamaš aktiivlávt mieldi sämmilâšohtsâškode tooimâst nuorâvuođâ rääjist. Juuso tooimâi Suomâ Sämmilâšnuorah rs. stiivrâ saavâjođetteijen iivijn 2005-2007 já 2009-2012. Lasseen sun lii toimâm Ovtâstum aalmugij (OA) algâaalmugij nuorâi lito (Global Indigenous Youth Caucus) saavâjođetteijen iivijn 2012-2015 já OA algâaalmugij maailmkonferens ohtâvuođâst toimâm algâaalmugij maailmvijđosii koordinistempargojuávhu jesânin 2012-2014. Sun lii lamaš meid maaŋgâin OA:st tábáhtum ráđádâllâmprosesijn mieldi, ovdâmerkkân EMRIP (Expert Mechanism on the Rights of Indigenous Peoples) mandaat uđâsmittemráđádâlmeh, algâaalmugij uásálistemvuoigâdvuotâ OA:n já OA maailmkonferens loppâdokument ráđádâlmeh.

Algâaalmugij vuoigâdvuođah láá Juuson teháliih já sun muštâl-uv, ete OA algâaalmugij julgáštus lii suijâ toos, mane sun vuolgij vuossâmuid sämitiggevaljáid fáárun. Juuso puátá Kaijukka ađai Ávžžášjávri siijdâst, mast puásuituálu vuáđđun lii puáris sijdâ-vuáhádâh.

Tuomas Aslak Juuso
Saavâjođetteijee

Ohtâvuotâtiäđuh

tuomas.juuso(at)samediggi.fi
040 687 3394 / 010 839 3101

Saavâjođetteijee išedeijee

Laura Olsén-Ljetoff
laura.olsen-ljetoff(at)samediggi.fi
040 617 5113 / 010 839 3190