Saaʹmi meersažpeiʹvv 6.2.

Vuässõõđ Saaʹmi meersažpeivva da ååʹn ij leäkku pääiʹǩest ǩidd

Virtuaalšõddmõš vuõltteet Sajoozzâst pâʹsspeeiʹv 6.2. čiâss 16 ääʹljeeʹl. Šõddmõõžž piâssak seuʹrrjed addrõõzzâst www.sajos.fi/live.

Sääʹmteeʹǧǧ saaǥǥjååʹđteei Tuomas Aslak Juuso kåčč pukid vieʹttjed Saaʹmi meersažpeeiʹv õõutâst vuõigg vuõlttõõzz pääiʹǩ.

Šõddmõõžž poodd kuulât saaǥǥjååʹđteei meersažpeeiʹv tiõrvvʼvuõtt, sääʹmpäärnai tiõrvvʼvuõđ da piâssâp naaudšed musikkčuäjtõõzzin di še vuäʹniǩjieʹllikaartin. Eiʹdde maaiʹlm vuõssmõõzz livđe bliin õlmstâttam Anna Morottaja juâigg äʹrbbvuõđlaž aanarsääʹm musiikk. Ulla Pirttijärvi & Ulda -bääʹnd Kahdeksan vuodenaikaa -konseʹrtt põhtt ouʹdde tââvas luõttu õhttneei teeʹmaid Ulla Pirttijärvi persoonlaž mooštai mieʹldd da mâânn musiikklaž vuârrmainstem äʹrbbvuõđlaž sääʹmkulttuur da ânnʼjõž maaiʹlm kõõskâst. Lââʹssen vueiʹnet odm. Čeʹvetjääuʹr škooulniiʹǩǩi rap video.

Vuäitak vuässõõttâd vuõltteeʹl meersažpeeiʹv tiõrvvʼvuõđääd nââmra +358 40 663 4493 teʹksttsaaǥǥin leʹbe Whatsappi pääiʹǩ. Vuäitak še kueʹđđed tiõrvvʼvuõđääd Twittrest tobddõõǥǥin #SaaʹmiMeersažpeiʹvv.

Looǥǥ lââʹzz

Saaʹmi meersažpeeiʹv juuʹhlʼjet juõʹǩǩ eeʹjj täʹlvvmannu 6. peeiʹv. Juuʹhlvuõđid riâššât teʹl pirr Sääʹmjânnam da tääʹl Sääʹmjânnam åålǥbeäʹlnn še.

Saaʹmi meersažpeiʹvv lij õhtt saaʹmi liiʹpptempeeiʹvin. Juʹhllpeiʹvven meersažpeiʹvv lij õinn nuõrr, lääʹdd kaʹlndaaʹre tõn mieʹrǩǩeeš eman eeʹjjest 2004. Meersažpeeiʹvest tuʹmmeeš kuuitâǥ juʹn eeʹjjest 1992, da juʹhllpeeiʹv preddan lie pâʹjjel čueʹtt eeʹǩǩed mââiåʹrnn, eeʹjjest 1917. Teʹl Taarrjânnam Trondheimist rieʹššeš vuõssmõs tâʹvvjânnmallaš sääʹmsåbbar, koon mieʹrren leäi smiõttâd saaʹmi jieʹllemvuäittmõõžžid da väʹldded beäʹl saaʹmid kuõskki kõõččmõõžžid.

Teâtt saaʹmi pirr mättjummša da jeärrsid ǩeäiʹd miõl ǩeäss: www.oktavuohta.com.

Teâđ saaʹmi pirr mättʼtõʹsse 

Oktavuohta.com -seeid taʹrjjee teâđ mättʼtõʹsse da jeärrsid, kook haaʹlee teâđ säʹmmlai pirr. Seidd lij tooimtum Sääʹmteeʹǧǧ da Mättʼtõshalltõõzz õhttsažtuâjjan. Seeid âʹnne seʹst teâđ säʹmmlai meersaž symboolin, sääʹmkulttuur sueʹrjin, sääʹmõhttsažkååʹddest da šõddmõõžžin teeʹkstivuiʹm, snimldõõǥǥivuiʹm da videoivuiʹm. Oktavuohta.com -seeid lie veâl lääʹddǩiõllsa.

Šiõǥǥ saaʹmi meersažpeiʹvv pukid!
Pyeri säämi aalmugpeivi puohháid!
Buori sámi álbmotbeaivvi buohkaide!

#SámiÁlbmotbeaivi #SäämiAalmugpeivi #SaaʹmiMeersažpeiʹvv #SámiNationalDay #SaamelaistenKansallispäivä