Sääʹm-musikk-kõõskõs lij Sääʹmteeʹǧǧ vuâlaž kõõskõs, kååʹtt oouʹdad määŋgnalla sääʹm-musiikk jeeʹres vueʹssvuuʹdid. Kõõskõõzzâst lij õhtt mieʹrräiggsaž tuâjjlaž.
Sääʹm-musikk-kõõskõs tuärjjad ääʹrbvuâlaž säʹmmlai vokaalmusikkšlaaji (luõđ/juõigg, leuʹdd da livđe) seillmõõžž da ooudâs ouddnummuž, reäšš jieʹlli da ouddneei sääʹm-musiikk mätt’tõõzz, taʹrjjad raamid sääʹm-musiikk puuʹtʼtummša, veekk ooudâs musikksilttummuž, kägg sääʹm-musiikk imago da tõn pääiʹǩ lââʹzzat perstummuž sääʹm-musiʹǩǩe.
Sääʹm-musikk-kõõskõõzz kõskksumõs tuåimmjummuž lie juõiggmätt’tõõzz riâššmõš sääʹmvuuʹd škooulid. Uʹčteeʹlen puäʹtte leeʹd äʹrbbvuõttkuõʹddi, kook silttee juõiggäʹrbbvuõđ. Tuâjj lij oʹdinaknallšem da täin poorǥât staanad ääʹrbvuâlaž säʹmmlai vokaalmusikkšlaaji seillmõš da ooudâs ouddnummuš. Lââʹssen sääʹm-musikk-kõõskõs tuärjjad še ođđ sääʹm-musiikk mätt’tõõzz da reäšš uʹčteeʹli škooultummuž sääʹm-musiikk beäʹlnn. Iinnteʹmes inn lij Aanrest riõššum alggmeerai musikkšõddmõš. Sääʹm-musikk-kõõskõs lij kõskksaž roolâst šõddmõõžž riâššmest.
Sääʹm-musikk-kõõskõs lij Sääʹmkultturkõõskõõzz Sajoozz aktiivlaž tuåimmjeei. Sajos taʹrjjad šiõǥǥ raamid Sääʹm-musikk-kõõskõõzz tuåimmjummša. Sääʹm-musikk-kõõskõs reäšš Sajoozzâst konseeʹrtid da jeeʹres musiʹǩǩe õhttneei šõddmõõžžid.
Sääʹm-musikk-kõõskõõzz tuåimmjummuž teäggat mättʼtõsministeria.
Iinnteʹmes inn – alggmeerai musikkfestivaal: www.ijahisidja.fi
Sääʹmkultturkõõskõs Sajos: www.sajos.fi