De!-projeeʹktest ooudâsviiǥǥât nuõrituåimmjummuž sääʹmǩiõlin

Sääʹmteeʹǧǧ nuõrisuåvtõõzz De!-projeeʹktest ooudâsviiǥǥât nuõri luõvâsääiʹj tuåimmjummuž pukin Lääʹddjânnmest mainstum sääʹmǩiõlin. Projeeʹkt täävtõssân lij mooutʼted sääʹmnuõrid plaaneed jiõčč, måkam sääʹmǩiõllsaž luõvâsääiʹj tuåimmjummša sij jiõčč haaʹleʹče vuässõõttâd. De!-projeeʹktest kaartʼtet še, måkam sääʹmǩiõllsaž nuõri tuåimmjummuž jeeʹres kååʹdd da õhttõõzz tän poodd rieʹšše. Projeeʹkt poodd viiǥǥât čõõđ nuõri plaanääm sääʹmǩiõllsaž luõvâsääiʹjtuåimmjummuž piloottid. Täävtõssân lij nââneed sääʹmǩiõllsaž nuõrikulttuur da smeʹllkâʹtted  nuõrid ââʹnned sääʹmǩiõl luõvâsäiʹǧǧen še.

De!-projeeʹkt ouddnummuž vuäitt seuʹrrjed Nuõrisuåvtõõzz sosiaalʼlaž media kanaalin, Instagraammâst da Facebookâst. Projeeʹkt viiǥǥât čõõđ ääiʹjest 1.10.2018-30.8.2019 da tõn teäggat Leader Tââʹvmõs Lappi.

13-29-âkksaž nuõrr! Vaʹstted De!-projeeʹkt kõjldõʹsse sääʹmǩiõllsaž nuõrituåimmjummšest:

https://www.samediggi.fi/de/