Ságajođiheaddji

Tiina Sanila-Aikio, Paavvâl Taannâl Tiina, lea riegádan Čeavetjávrris, Anáris 25.3.1983 boazodoallobearrašii. Sanila-Aikio bajásšattai Čeavetjávrris, gos son váccii vuođđoskuvlla. Logahaga Sanila-Aikio váccii Roavvenjárggas, man maŋŋá son álggahii juridihka oahpuid Lappi universitehtas. Dán áigge son ássá Anára kirkosiiddas isidiin ja nieiddain.

Sanila-Aikio leamašan Sámedikki lahttu jagi 2012 rájes. Son válljejuvvui Sámedikki 1. várreságajođiheaddjin válgabadjái 2012-2015, ja Sámedikki ságajođiheaddjin njukčamánus 2015 válgabaji 2012-2015 loahpa rádjai. Sanila-Aikio válljejuvvui fas Sámedikki ságajođiheaddjin badjái 2016-2019 guovvamánus 2016.

Ovdal doaimma Sámedikki ságajođiheaddjin Sanila-Aikio barggai nuortalašgiela ja kultuvrra oahpaheaddjin Sámi oahpahusguovddážis Anáris. Oahpaheami lassin son leamašan aktiivvalaš nuortalašgiela ja kultuvrra guoski áššiin, ovdamearkan jorgalus- sihke oahppamateriálabargguin. Sanila-Aikio dovdojuvvo maiddái artistan, guhte lea loaiddastan máŋggain eará oktavuođain sihke árbevirolaš, nuortalaš leudd go modearnna rock-musihka suorggis. Sanila-Aikio bearraša nubbi váldoealáhus lea boazodoallu, mas son lea fárus iežas barggu lassin.

Sanila-Aikio leamašan aktiivvalaččat fárus sámeservodaga doaimmas nuorravuođa rájes, ovdamearkan Saa´mi Nue´tt rs – Nuortalašgiela ja kultuvrra searvvis sihke Nuortalaččaid giličoahkkima vuollásaš Njávdáma nuortalašráđis, mas son doaimmai jagiin 2003-2013. Lassin son lea doaibman earret eará Suoma Sámenuorat rs:a ságajođiheaddjin sihke Lyseonpuisto logahaga oahppiidgotti ságajođiheaddjin.

Ságadoalli
Tiina Sanila-Aikio
tiina.sanila-aikio(at)samediggi.fi
010 839 3192