Meerlaž lääʹjjšiõttummuž lââʹssen Sääʹmteeʹǧǧ tuåimmjummuž ohjjad Sääʹmteeʹǧǧ såbbar priimmâm tuâjjriâššmõš, koʹst šiõtteet jm. viiʹrjin, jeeʹres orgaanin da tõi tuâjain di vaaldâšm-mõõntõõllmest Sääʹmteeʹǧǧest. Sääʹmteeʹǧǧ piisarkåʹdd nårrai kolmmân konttrest: takai koontâr, sääʹmǩiõl koontâr di škooultõs- da mättmateriaalkoontâr.

1. Takai koontâr

Takai koontâr tuâjjan lij håiddad Sääʹmteeʹǧǧ tällõs-, tuâjjlažkåʹdd- da jeeʹres takai vaaldâšm kuõskki aaʹššid di aaʹššid, kook jie leäkku mieʹrruum jeeʹres konttrid håiddamnalla.

Takai koontâr vuâllsiʹžžen tuåimmje kulttuurkõõskõs Sajoozz kääzzkõsjuâǥǥtõs da sosiaal- da tiõrvâsvuõttjuâǥǥtõs di sääʹm päärnaikulttuurkõõskõs, musiikk-kõõskõs da alggmeerai fiʹlmmkõõskõs.

2. Sääʹmǩiõl koontâr

Sääʹmǩiõl koontâr veekk čõõđ sääʹmǩiõll-lääʹjj (lääʹǩǩ 1086/2003, asetõs 108/2004) meâldlaž tuâjaid. Tõt âânn huõl lääʹjjest jurddum jåårǥlõõzzi tuåimtummšest jeeʹres veʹrǧǧniiʹǩǩid da stroiʹttlid, veäʹǩǩat veʹrǧǧniiʹǩǩid da stroiʹttlid sääʹmǩiõlltäiddsaž tuulki haʹŋǩǩummšest di jeeʹres sääʹmǩiõll-lääʹjjest jurddum tuâjain da seuʹrrai sääʹmǩiõll-lääʹjjest šiõttum täävtõõzzi teâuddjummuž da tuejjeeʹl taarbšeʹmmen aalǥtõõzzid sääʹmǩiõl âânnmõõžž oouʹdeem diõtt.

3. Škooultõs- da mättmateriaalkoontâr

Škooultõs- da mättmateriaalkonttâr tuâjjan lij håiddad säʹmmlai škooultõõzz da mättʼtõõzz di sääʹmǩiõllsaž mättmateriaal puuʹtʼtummuž kuõskki aaʹššid. Koontâr vaʹsttad sääʹmǩiõllsaž mättmateriaal plaanummšest, valmštõõllmest da jueʹǩǩmest, sääʹmnuõri čeäʹppvuõđpeeiʹv riâššmõõžžin, õlmstââʹtt sääʹm-mättʼtõõzz stastiikkid da tuõʹllai õhttvuõđ sääʹm-mättʼtõõzz riâšši kooʹddid da škooulid di mättʼtõõzz vaaldšma. Koontâr valmštââll da peejj tueiʹmme še säʹmmlai škooultõsaaʹšši õhttsažtuâjjorgaan såbbri äʹššǩiiʹrjid da vuässââtt sääʹm mättʼtõshalltõõzz tâʹvvjânnmallaš õhttsažtuõjju.

Tuåimmpääiʹǩ

Sääʹmteeʹǧǧ piisarkååʹdd väʹlddtuåimmpäiʹǩǩ lij Aanrest Sääʹmkulttuurkõõskõs Sajoozzâst. Sääʹmteeʹǧǧest lie čårrtuåimmpääiʹǩ še Jeänõõǥǥ da Uccjooǥǥ ceerkavsiidin.