Sääʹmteeʹǧǧ väʹlddkoontâr da parlameʹnttkueʹrnec lie Sääʹmkulttuurkõõskõs Sajoozzâst Aanar ceerkavsiidâst. Lääʹddjânnam säʹmmlai parlameʹnttpõʹrtte vuäitt tobdstõõttâd vuässõõđeeʹl Sääʹmkulttuurkõõskõs Sajoozz riâššâm vuäʹpstum kõrvvjid. Sääʹmteeʹǧǧ puk tiuddsåbbar lie äävai ǩiõččjid še.
Vuäʹpstum kõrvvi
Sajoozz vuäʹpstum kõõrv arggpeeiʹvi č 12. Vuäʹpstemkõõrv peštt n. 45 minuuttad da kõrvvi poodd tobdstõõđât Sääʹmtegga da Sajooʹzze. Looppâst čuäʹjtet 15 minuutt Sápmi – The Way of Being vuäʹniǩjieʹllikaart, koon mieʹldd peäss vueiʹnned ânnʼjõžpeeiʹv jieʹllem Sääʹmjânnmest. Kõrvvi hâʹdd lij 8 euʹrred õhttân oummust, ââʹneeʹl seʹst kaaʹff/čee kaaʹffpõrtt Čaijust.
Vuäʹpstõõzz jooukid suåppmõõžž mieʹldd, hâʹdd 200 euʹrred õhttân jooukâst. Vaʹrrjummuž da teâđstõõllmõõžž sajos(at)samediggi.fi leʹbe 010 839 3168.
Tiuddsåbbar seuʹrrjed
Sääʹmteeʹǧǧ sååbbar norrââtt 4-5 vuâra eeʹjjest täujja Sääʹmkulttuurkõõskõs Sajoozzâst Aanrest. Såbbar lie õlmmsa da tõid pâstt seuʹrrjed pääiʹǩ âʹlnn parlameʹnttkueʹrncest. Parlameʹnttkueʹrncest tuʹlǩǩeemaparaatt lie ǩiõččji ââʹnnmest.
