Ravvuuh tiilájeijei

Ravvuuh tulkkum tiiláámân

Uáppáásm tieđettemčáállusáid ášástâllâmtulkkuumist já aalmugtilálâšvuođâ tulkkuumist. 

Tärhibeh tiäđuh tulkkum tiiláámân láá Suomâ jurgâleijei já tuulhâi lito siijđoin.

  • Sämikielâi tuulhah láá viehâ uccáá, te lii pyeri algâttiđ tulkkum ornim tuárvi ääigild. Sáttá leđe vaigâd finniđ tuulhâid uáli kivkked.
  • Tulkkum tiiláádijn lii pyeri selvâttiđ tiilájeijee ohtâvuotâtiäđuid, tulkkumkielâ, äigimudo já pääihi, tulkkumvyevi, tulkkum fáádá já pištem nuuvt tárkká ko máhđulâš, vâi tulkkâ puáhtá ráhtádâttâđ muuneeld.
  • Seelvât, ete kalle tuulhâ tarbâšeh tilálâšvuotân. Tuulhâi meeri sorjo tast, ete mon kuhháá tilálâšvuotâ pištá já kalle kielâ láá tulkkumnáál.
  • Mušte visásmittiđ, ete mon sämikielâ tuulhâ tun tarbâšah: tavesämi-, anarâš- vâi nuorttâlâškielâ.
  • Tulkkuumist lii pyeri sooppâđ muuneeld pargo iävtuid, pargoääigi, mäksimnáál päälhi já maassâdkeessimiävtuid.
  • Tulháin lii pyeri sooppâđ muuneeld meid tast, ete kulá-uv sopâmušân máhđulâš ijâstâllâm, mätkisajanmáksu, mälissajanmáksu tâi peiviruuđâ mäksim.
  • Tuulhâst lii tahheevuoigâdvuotâ jieijâs tulkkuumân, já tulkkum vuorkkim iävtuin kalga sooppâđ muuneeld.
  • Jis tulkkum uárnejuvvoo káidusohtâvuođáin, te tast kalga sooppâđ muuneeld tulháin sehe selvâttiđ, ete maid teknisijd orniistâlmijd tulkkum váátá.
  • Seelvât, ete mii tulkkumvuovijd heivee pyeremusávt tilálâšvuotân já taarbâš-uv tulkkuumân sierâ tekniik.
  • Ášástâllâmtulkkum puáhtá tábáhtuđ aldatulkkuumin pääihi alne tâi káidustulkkuumin ovdâmerkkân puhelin tâi videotulkkumpiergâsij vievâst.
  • Almostilálâšvuođâ tulkkum puáhtá tábáhtuđ konsekutiivlávt tâi simultaanlávt, sehe cuulijdmáin.
    • Konsekutiivtulkkuumist sárnoo já tulkkâ sárnuv vuáruluvâi. Konsekutiivtulkkum ij vaađâ sierâ tulkkumpiergâsijd, peic tom puáhtá orniđ siämmái jienâtävistempiergâsijguin ko eres-uv tilálâšvuođâ.
    • Simultaantulkkuumist sárnum tulkkojeh siämmáá-áigásávt nube kielân. Simultaantulkkum váátá tulkkumpiergâsijd. Tilálâšvuođâ uárnejeijee västid tulkkumpiergâsij orniimist.
  • Ko tulkkum uárnejuvvoo káidusin, te lii pyeri sooppâđ káidustulkkum keččâlem ovdil čuákkim.

Tulkkumtekniik puáhtá tiäđuštâllâđ Säämi kulttuurkuávdáš Sajosist. Ohtâvuotâtiäđuh láá Saijoos nettisiijđoin.

  • Tulkkum tuáváášmateriaal kalga toimâttiđ tuulkân nuuvt jotelávt ko máhđulâš, vâi tulkkâ pasta ráhtádâttâđ olmânáál tulkkumtilálâšvuotân. Tuáváášmateriaal lii ovdâmerkkân tilálâšvuođâ ohjelm, uásálisteelisto, kieđâvuššâmnáál äššikirjeh tâi sahâvuároid lohtâseijee tuáváášmateriaaleh.
  • Mušte toimâttiđ meid ääigi mield peividum versioid sehe eidu ovdil tilálâšvuođâ finnejum materiaalijd tulháid nuuvt jotelávt ko máhđulâš.
  • Soovâ tulhâiguin, ete mon ennuv ovdil tilálâšvuođâ älgim kalga leđe pääihi alne.
  • Tulhâiguin lii pyeri sooppâđ tast, ete kii tuáimá tilálâšvuođâst tuulhâi ohtâvuotâolmožin, vâi tuulhah finnejeh táárbu mield ohtâvuođâ tilálâšvuođâ uárnejeijei.

Ravvuuh jurgâlusâi tiiláámân

  1. Vuolgât jurgâlemtáttum čujottâsân anne-kirste.aikio(at)samediggi.fi tâi njuolgist jurgâleijeid
  • Tavesämikielâ: irma.laiti(at)samediggi.fi
  • Anarâškielâ: tanja.kyro(at)samediggi.fi
  • Nuorttâlâškielâ: merja.fofonoff(at)samediggi.fi
  1. Almoot čielgâsávt, ete mon sämikielân tun táátuh jurgâlus
  2. Almoot ain toivum toimâttempeeivi
  3. Almoot vuolgâteevstâ merkkâmere, koskâmerhâiguin
  4. Almoot rekigistemčujottâs já máhđulâš čuijoos
  5. Lahte vuolgâteevstâ šleđgâpoostân ain word-tiätuvuárkkán

Tiilám vuástáväldim jurgâleijee vuolgât tiilájeijei kuittám já almoot, ete lii-uv toimâttemäigitavlu máhđulâš.

Tekstâ jurgâluvvoo vuolgâteevstâ oolâ já tondiet lii velttidmettum, ete vuolgâtekstâ lii word-tiätuvuárkkán já valmâšin hämmejum. Jurgâleijeeh iä räähti tekstâkieđâvuššâm tiilájeijee peeleest.

Hadeh

Sämikielâ toimâttuv adelem jurgâlusâst piärroo máksu kielâpaarâst suomâkielâ – sämikielâ (tavesämikielâ, anarâškielâ tâi nuorttâlâškielâ) teikâ nubijkulij 85 eurod/sijđo já siijđost 1 560 merkkâd koskâmerhâiguin.

Jis jurgâlemnáál tekstâ lii táváliist vaigâdub, te jurgâlemmáávsu puáhtá alediđ enâmustáá 50 %:jn siämmáánáál ko huápulii pargo jurgâlemmáávsu puáhtá alediđ enâmustáá 50%:jn. Jis jurgâlus ana sistees peividem jo orroo jurgâlusân, te haddeest puáhtá kepidiđ 50 % tâi kevttiđ ucemushade.

Jurgâlusâi ucemushadde lii 25 eurod.

Luuvâ lase: https://www.samediggi.fi/jurgalempalvalusah/?lang=an

  • Tun puávtáh uuccâđ freelancer-jurgâleijeid Sämitige jurgâleijei já tuulhâi uuccâmpalvâlusâst
  • Toovâ falâlduv jurgâlempalvâlusâst
  • Jurgâlus tiiláádijn lii pyeri pyehtiđ oovdân kuittâg taid aašijd
    • Jurgâlusâi vuolgâkielâ já čuosâttâhkielâ
    • Teevstâ fáddá já siskáldâs
    • Teevstâ kukkodâh, jurgâleijeeh pyehtih čäälliđ reekkig merkkâmere, sijđomere tâi raddalâshade mield
    • Kuás materiaalijd puáhtá toimâttiđ jurgâleijei
    • Jurgâlus äigitavlu
    • Mon häämist tekstâ lii finnimnáál
  • Mušte almottiđ čielgâsávt, ete mon sämikielân tun táátuh jurgâlus
  • Soovâ jurgâlus haddeest já rekigist muuneeld
  • Soovâ, ete kulá-uv njuolgâluuhâm haadan. Jis koččâmušâst lii tekstâ, mii teddiluvvoo, te jurgâleijein puáhtá sooppâđ, ete sun täärhist vala teddilem várás valmâš teevstâ kielâ.
  • Jurgâlusâst puáhtá toohâđ meid munetiäđustâllâm, jis jurgâlemnáál tekstâ ij lah vala vaalmâš, mutâ tun tiäđáh suulân valmâštumääigi.

Sämitige hoodijd puáhtá anneeđ ovdâmerkkân, mutâ freelancer-jurgâleijein láá jieijâs hadeh. Freelancer-jurgâleijei jurgâlemhoodijd kannat koijâdiđ njuolgist freelancer-jurgâleijein.