Barggus Sámedikkis
Sámedikkis mii bargat olles sámeálbmoga buorrin, vuoi sámegielain ja kultuvrras livčče eallinsadji maiddái boahttevuođas. Sámediggi lea okta dain sámeguovllu mearkkašahtti bargoaddiin. Doaibmagieddi lea viiddis ja áššedovdit dárbbahuvvojit sierra oassesurggiide ja iešguđetlágan bargguide.
Sámediggi lea luohttámušolmmošorganisašuvdna, gos bajimuš mearranválddi geavaha válggain válljejuvvon Sámedikki čoakkán. Sámedikki politihkalaš orgánat vástidit politihkalaš linnjádemiid dahkamis ja čállingoddi bargá politihkalaš linnjádemiid gárgedeami ja ollahuhttima várás.
Sámedikki jođiheapmi ja hoavdabargu dáhpáhuvvet sámiid árvvuid ja ovttas sohppon njuolggadusaid mielde. Sámedikki bargiid barggu láidestit Sámedikki válgabaji doaibmaprográmma ja maiddái Sámedikki bargoortnet, mas ásahuvvo ee. virggiin, sierra orgánain ja daid bargguin ja maiddái hálddahusmeannudeamis Sámedikkis. Bargoveahkapolitihka stivre Sámedikki bargoveahkapolitihkalaš prográmma, mii ráhkaduvvo doaibmabajiid mielde.
Njuovžilis bargomáŧolašvuođat
Iežas bealistis Sámediggi háliida leat doarjumin sámegielaid ja kultuvrra eallinfámu seailuma, sámiid árbevieruid ja dábiid seailuma ja sámeealáhusaid eallinfámu doarjuma.
Sámediggi atná dehálažžan, ahte maiddái Sámedikki bargit sáhttet bargat bargguset oktavuođas sámeealáhusaiguin. Njuovžilis bargoáigehámiid ja gáiddusvejolašvuođaid bakte dorjojuvvojit bargiid máŧolašvuođat barggu ja bearraša oktiiheiveheapmái, árbevirolaš ealáhusaiguin bargamii ja maiddái barggus veadjimii.
Sámediggi doarju maiddái bargiid čehppodaga ovddideami, skuvlenmáŧolašvuođaid ja sámegiela studerema.
Bálká ja ovddut
Sámedikki bálká čohkiida barggu gáibádusdási mielde vuođđobálkkás sihke sámeguovllu lasis ja vejolaš ahkelasis. Bálkáluohká birra almmuhuvvo bargosadjealmmuhusas.
Bargin oaččut mis viiddes bargodearvvasvuođafuolahusa bálvalusaid ja maiddái lihkadan-, kultur- ja buresveadjinovddu. Sámedikkis leat maiddái biddjon návccat bargiid miela buresveadjimii: fállat bargiide bargorávvema ja dan lassin giddet fuopmášumi rabas ságastallankultuvrii.
Sámediggi čuovvu stáhta virge- ja bargoeaktosoahpamuša.
Mii almmuhit rabas bargosajiid birra neahttasiidduin. Dárkilut ohcanrávvagat ja maiddái olbmo, gii vástida rekryteremis, oktavuođadieđut gávdnojit bargosadjealmmuhusas.
Sáhtát maiddái sáddet midjiide rabas ohcamuša, mainna buvttát ovdan beroštumi bargat Sámedikkis. Sádde rabas ohcamuša.
