Giellagáldu-prošeakta ja Sámi Giellagáldu

Giellagáldu lea Suoma, Ruoŧa ja Norgga Sámedikkiid ovttasbargoprošeakta, mii doaibmá Sámedikkiid parlamentáralaš ovttasbargoorgána, Sámi Parlamentáralaš Ráđi, vuollásažžan. Prošeakta álggahuvvui 1.8.2015 ja nohká 31.5.2018. Giellagáldu-prošeakta ruhtada davviriikkalaš sámegielaid fága- ja resursaguovddáža Sámi giellagáldu doaimma. Prošeavtta guovddášulbmil lea sihkkarastit Sámi Giellagáldu bissovaš doaimma, nu ahte háhkat bisovaš ruhtadeami fága- ja resursaguovddáža doibmii. Giellagáldu-joatkkaprošeavtta ruhtadit EU’ Interreg V Davvi-prográmma Sápmi-oasseguovlu, Lappi lihttu, Romssa fylkkasuohkan ja Norgga, Ruoŧa ja Suoma Sámedikkit. Prošeavtta jođiha Suoma Sámediggi ja prošeavtta ollislaš bušeahtta lea 3 062 052 euro.

Prošeavtta ulbmilat

Prošeavtta áigge Sámi Giellagáldu joatká sámi giellaovttasbarggu ovddideami, koordinerema ja nannema. Sámi Giellagáldu joatká doaimmas maiddái sámi álbmoga giellaáššiid bajimuš oktasaš mearridanorgánan. Sámi Giellagáldu ulbmilin lea fágalaš áššedovdiorgánan seailluhit ja ovddidit kulturárbbi ja doaimmaid, mat gullet sámegielaide. Fága- ja resursaguovddážis lea maiddái bajimuš ovddasvástádus sámegielat giellabálvalusain, mat leat oaivvilduvvon giellageavaheddjiide. Prošeavtta áigge Sámi Giellagáldu doaibmaorgánaide lasihuvvon giellaráđđi álggaha doaimmas ja juo ovdal vuođđuduvvon lulli-, julev-, davvi-, anáraš- ja nuortalašgielaid giellajuhkosat jotket doaimmas. Giellabargit, geat leat lullisámegielas 2, julevsámegielas 2, davvisámegielas 3, anárašgielas 1 ja nuortalašgielas 1, vástidit geavatlaš giellabarggus. Prošeavtta áigge Sámi Giellagaldu ja Sámedikkit nannejit ja ovddidit ovttas sámegielaid nu, ahte iešguđege giela dárbbut, hástalusat ja resurssat váldojuvvojit vuhtii.

Sámi Giellagáldu barggut

Fága- ja resursaguovddáža bargun leat earret eará giellagáhtten, giela ovddideapmi, terminologiijabargu, normeren ja báikenammabálvalus. Giellabargit bagadallet ja rávvejit sámegiela geavaheapmái gullevaš gažaldagain ja válmmastallet iežaset giela áššiid giellajuhkosiid mearrideami várás. Giellajuhkosat addet ávžžuhusaid sámegielaid geavaheapmái gullevaš áššiin, nugo normeremis ja ođđa terminologiijas. Sámi Giellagáldu ruovttusiidduin www.giella.org gávdnojit dárkilut dieđut Sámi Giellagáldus ja áigeguovdilis dieđuid ámmát- ja resursaguovddáža doaimmas ja ođđa terminologiija ja normeremiid. Sámi Giellagáldus lea maiddái FB-siidu www.facebook.com/SamiGiellagaldu, man bokte sáhttá jearrat gažaldagaid, mat gullet sámegielaid geavaheapmái. Siiddus dieđihuvvo maiddái Sámi Giellagáldu doaimmas. Giellagažaldagaid sáhttá maiddái sáddet šleađgapoastačujuhussii info()giellagaldu.com dahje riŋget njuolga Sámi Giellagáldu bargiide.