Jieʹllikarttkõõskõs Skábma
Alggmeerai jieʹllikarttkõõskõs
Alggmeerai jieʹllikarttkõõskõs Skábma lij vooudlaž jieʹllikartt- da audiovisuaalʼlaž sueʹrj resursskõõskõs, kååʹtt tuåimmai Sääʹmteeʹǧǧ vueʹlnn Aanrest. Tän poodd tuåimmjummuž teäggat Mättʼtõsministeria da riikk jieʹllikarttčeäppõstuåimmkåʹdd.
Alggmeerai jieʹllikarttkõõskõs tuärjjad sääʹmǩiõl da -kulttuur di rääjj oudldõõzzid säʹmmlai da jeeʹres alggmeerai jiiʹjjez jiõn da kaart kuâsttjemvuõʹtte da kollʼjemvuõʹtte jieʹllikartt- da mediaindustriast alggmeerai jiiʹjjez määinaivuiʹm da jiiʹjjez vueʹlǧǧemsõõʹjin.
Skábma tuärjjad jieʹllikaarti da mediaouddõõzzi plaanummuž, ooudâsviikkmõõžž da puuʹtʼtõõzz ooʒʒeeʹl teäggtõskanaalid da õhttsažtuâjjkuõiʹmid di riâššeeʹl škooultõõzz da jieʹllikarttsueʹrj šõddmõõžžid sääʹmvuuʹdest.
Lââʹssen kõõskõs liâvat sääʹmjieʹllikaartid jeeʹresnallšem šõddmõõžžid, juâkk teâđ sääʹmjieʹllikaartâst, vuuʹdest da säʹmmlaž tuejjeeʹjin. Skábma lij mieʹldd še riâššmen Skábmagovat -alggmeerai jieʹllikarttfestivaal.
Tuâj
Alggmeerai jieʹllikarttkõõskõõzz tuâjjan lij
- tuäʹrjjeed sääʹmjieʹllikartt- da TV-puuʹtʼtõõzzid
- riâššâd jieʹllikarttškooultõõzz, -šõddummuž
- riâššâd čuäjtõs- da liâvtemtuåimmjummuž: (jm. Skábmagovat –jieʹllikarttfestivaal)
Meeraikõskksaž vueʹss sääʹmkulttuurkõõskõõzzâst
Aanra vuâđđeemnalla åårrai Sääʹmkulttuurkõõskõs âânn seʹst jieʹllikarttkõõskõõzz lââʹssen määŋgnallšem tuåimmjummuž jm. sääʹmǩiõtt-tuõjju, sääʹm-musiiʹǩǩe da jieʹllemvuõʹjjid kuuleeʹl di päärnaid da nuõrid jiiʹjjez juâkkseez. Kõõskõõzz seʹst puätt tuåimmjed sääʹmǩeʹrjjpõrtt še.
Alggmeerai jieʹllikarttkõõskõõzz tuåimmjummuž vueʹlǧǧemsââʹj lie jieʹllemvuâkksa da kulttuurla. Kõõskõs äuʹǩǩad õhttsažtâʹvvjânnmallaš sääʹmvuuʹd puʹhttem synergiaouddõõzz jieʹllikaarti ǩiõttǩeeʹrjtummšest, sniimmʼmest da jeäʹrben tõõi meeraikõskksaž teäggtummšest. Lââʹssen kõõskõs äuʹǩǩad Skabmagovat -jieʹllikarttfestivaal mieʹldd pohttam maaiʹlmveiddsõs jieʹllikarttsäiʹmmõõzz.
TUÅIMMJUMMUŠ
Jieʹllikartt- da televisiopuuʹtʼtõõzz
Alggmeerai jieʹllikarttkõõskõs tuärjjad säʹmmlaž jieʹllikarttraajjʼjid kaunnâd ođđ õhttsažtuâjjkuõiʹmid da teäggtõsmaallid di tuåimmai õhttsažtuâjjorganisaation alggmeerai jieʹllikarttraajjʼji kõõsk ooʒʒeeʹl jieʹllikarttprojeeʹktid da tuâjjvuäittmõõžžid maaiʹlmveiddsânji.
Škooultõs
Jieʹllikarttkõõskõs plaanad škooultõõzz ämmatniiʹǩǩid da čiŋlmââvv jieʹllikarttšõddummuž ooudâsviikkma sääʹmvuuʹd škooulivuiʹm.
Jieʹllikarttšõddeemtuâj tuejjeet tän poodd Aanar, Uccjooǥǥ da Jeänõõǥǥ škooulivuiʹm. Tuâjjpaaʹji puhttõõzzid leät čuäʹjtam läʹddlaž da ålggjânnmallaš jieʹllikarttfestivaalin, televisiost da jeeʹresnallšem nuõri šõddmõõžžin.
Uccjooǥǥ da Jeänõõǥǥ lookkjiškooul lie taʹrjjääm mediakuursid mättʼtõõttjid čõõučâst 2009 ääʹljeeʹl. Aanrest Sääʹmvuuʹd škooultemkõõskõõzzâst medialiinjâst tuejjeet vuäʹniǩ-, dokumeʹntt- da animaatiojieʹllikaartid di televisioprograammid. Škooultõs peštt 1-2 eeʹjj. Määŋg Sääʹmvuuʹd škooultemkõõskõõzz medialiinj jååttam reâugga tän poodd Sääʹmvuuʹdest media- da jieʹllikarttsueʹrjest. Tuâjjuvddi lie jm. Lääʹddjânnam, Taarrjânnam da Ruõccjânnam sääʹmradio da televisio, oʹdinakai jieʹllikarttpuuʹtʼtõõzz di jieʹllikarttšõddmõõžž da škooultõõzz.
Alggmeerai jieʹllikarttkõõskõs riâšši eeʹjj 2020 Puuʹtʼtõs-šõddmõõžž Skábmagovat-jieʹllikarttfestivaal poodd. Puuʹtʼtõs-šõddmõõžžâst tâʹvvjânnmallaš puuʹtʼtõsõhttõõzzid da teäggteeʹjid puʹhtteš âʹlddlâkka säʹmmlaž tuejjeeʹjid. Šõddmõõžž mieʹrren leäi oouʹdeed ämmatnallšem jieʹllikartt raajjmõõžž, tobdstâʹtted puuʹtʼteeʹjid da tuejjeeʹjid kueiʹmeez di liâvted sääʹmjieʹllikaart.
Skábma-puuʹtʼtõs-šõddmõš piiʹšti kueʹhtt peeiʹv. Peeiʹvi poodd tâʹvvjânnmallaš jieʹllikarttsueʹrj ämmatneeʹǩǩ mõʹnne čõõđ ideaid, mušttle tâʹvvjânnmallaš teäggtõõzzâst, liâvtem- da čuäʹjtemvuäittmõõžžin di vuäʹpste idea kaaupšummšest. Tuâjjpääʹj mââimõs peiʹvven jieʹllikarttraajji čuäʹjte jiiʹjjez ideaid puuʹtʼtõsõhttõõzzid da teäggteeʹjid. Šõddmõš leäi vuässõõttjid määuʹsteʹm.
Lââʹssteâđaid vuäǯǯ Alggmeerai jieʹllikarttkõõskõõzzâst
teʹl: +358 40 187 9909
neʹttpååʹšt: skabma@samediggi.fi
Skábmagovat da jeeʹres čuäjtõs- da liâvtemtuåimmjummuš
Alggmeerai jieʹllikarttkõõskõs lij mieʹldd riâššmen da ooudâsviikkmen Skábmagovat -jieʹllikarttfestivaal. Festivaalin lij leämmaž mieʹldd eeʹjjest 2005 päärnai- da nuõripeeiʹv še, kook lie põõžžtam pääiʹǩes šõddmõõžžâst. Skábmagovat-festivaal lij vääžnai foorum säʹmmlaž jieʹllikarttraajjʼjid da võl tääuʹjab sääʹmjieʹllikaarti vuõssčuäjtõspäiʹǩǩ. Sääʹmjieʹllikaart leävvne täujja Skábmagovat-festivaalin pirr maaiʹlm.
Skábmagovat-festivaal lââʹssen Alggmeerai jieʹllikarttkõõskõs liâvat ooudâs teâđ säʹmmlai da alggmeerai jieʹllikaarti pirr meeraikõskksaž jieʹllikarttfestivaalid, -šõddmõšriâššjid da -liâvteeʹjid.