Ive 2019 ávuduvvoo OA algâaalmugkielâi ihe (IYIL2019)

Teemaive tárguttâssân lii pajediđ oovdân maailm algâaalmugkielâi tile. Ulmen lii teemaive peht eereeb iärásij lasettiđ tiäđulâšvuođâ algâaalmugkielâin já toi uhkevuálásâšvuođâst já ovdediđ já standardistiđ kielâid. Maailm suulân 6700 kielâst paijeel 40 % láá uhkevuálásiih. Tain iänááš uási láá algâaalmugkielah.

Algâaalmugkielâi ive jođettem- já koordinistemovdâsvástádâs lii adelum UNESCOn. Teemaive tooimân lii rahtum toimâvuávám já teemaive uulmij olášume čuávvum várás lii vuáđudum stivrimjuávkku, mast láá staatâi já algâaalmugjuávhui ovdâsteijeeh.  Arktâsii kuávlu algâaalmugij ovdâsteijen lii väljejum Taažâ sämitige saavâjođetteijee Aili Keskitalo. UNESCO lii lekkâm teemaihán nettisiijđoid: https://en.iyil2019.org, kuus puohah pyehtih lasettiđ tiäđuid tábáhtusâin já uásálistmist teemaihán. Liiŋkâst kávnoo meid teemaive toimâvuávám. Siijđoin pyehtih oovdân sierâ vuovijd, maht teemaihán puáhtá uásálistiđ. Meid media ovdâsteijeeh pyehtih almottâttâđ teemaive ohtsâšpargokyeimin siijđoin.

Sämitigge uásálist jieijâs tooimâi peht teemaihán oovtâstpargoost Taažâ já Ruotâ Sämitigijguin ja teemaive ääigi uárnejuvvojeh tábáhtusah já seminaareh. Sämitigge haalijd toos lasseen movtijdittiđ sierâ uásipeelijd uásálistiđ teemaihán já orniđ tábáhtusâid. Teemaihe puáhtá šiev máhđulâšvuođâ kiddiđ huámmášume eromâšávt sämikielâi tilán já toi oovdedmân.

https://en.iyil2019.org

Mij kevttip taid tubdâlduvâid sosiaallii mediast:

#IYIL2019 #sápmi #Indigenouslanguages #WeAreIndigenous