Meeraikõskksaž alggmeerai ǩiõli
lååieeʹǩǩ IDIL 2022–2032

ÕM lij kuultam lååieeʹǩǩpââʹj 2022–2032 meeraikõskksaž alggmeerai ǩiõli lååieeʹǩǩen, the International Decade of Indigenous Languages (IDIL).  Maaiʹlm meerast 6 proseeʹnt ǩiõččât kuullâm alggmeeraid, leša ǩiõli mieʹrr, koid alggmeer mainste lij jõnn.  Ärvvtõõlât, što maaiʹlmest mainstum nuʹtt 6 700 ǩiõlâst pâʹjjel 4 000 ǩiõllâd lie alggmeerai ǩiõl. Lååʹj eeʹjj jurddjen lij vuâmmšâʹtted määŋgai alggmeerai ǩiõli kriittlaž vuâkka maaiʹlmveiddsânji.

Meeraikõskksaž alggmeerai ǩiõli lååʹjeeʹjj täävtõsân lij staanâd alggmeerai vuõiggâdvuõđid seeilted, jeällted da oouʹdeed ǩiõleez da seämmast oouʹdeed pukin suõʹrjin da tuʹmmstõktuâjast ǩiõlʼlaž määŋghämmsažvuõđ. Alggmeerai ǩiõli lååieeʹǩǩ taʹrjjad oʹdinak vueiʹttemvuõđ tuejjeed õhttsažtuâj da oouʹdeed maaiʹlmveiddsaž vuârrsaǥstõõllmõõžž. Meeraikõskksaž alggmeerai lååʹjeeʹǩǩ taʹrjjad vueiʹttemvuõđ äʹlǧǧed taarbšum tååimaid alggmeerai ǩiõli ââʹnnmõõžž staanâm diõtt, jeälltem õuʹdde da õõudummša puk veeʹzz maaiʹlmest.

Ǩiõl lie vieʹltʼteeʹm oummu saaǥǥtummšest da vuârrvaaiktõõzzâst, jurddji juâkkmõõžžâst, jiijjâs õlmmummšest täättas mieʹldd da kreevsânji di õhttsaž identiteeʹtt raajjmõõžžâst. Ǩiõll lij kõskksââʹjest še ooumažvuõiggâdvuõđin da vuâđđluõvâsvuõđin.

Huõlǩani tõʹst, što ǩiõlin lij čuuʹt tääʹrǩes miârktõs, määŋg ǩiõl lie vaarvuâla.  Ǩiõllõõutstõõzz – aainâs alggmeerai seʹst – teivva jeeʹresnallšem vaʹǯǯtõõzzi õõl: geopoliittlaž, tällõõzzlaž, sosiokulttuurlaž da teknolooglaž vaʹǯǯtõõzzi, kookk jäänab leʹbe ooʹccab pääkkte oummuid vaajted ǩiõl da ââʹnned jäänbõsǩiõlid, mâʹte eŋgglõsǩiõl, ruõccǩiõl leʹbe espanjaǩiõl. Teʹl čueʹttiiʹjji historia, teâtt da kulttuurlaž reeʹǧǧesvuõtt lie vaarâst jaukkâd.

Alggmeerai ǩiõl lååʹj eeʹjj IDIL alggmeerai ǩiõli meeraikõskksaž lååʹjeeʹǩǩ äiʹǧǧen jeeʹres čõõnõsjooukin lij vueiʹttemvuõtt vuässõõttâd ǩiõlʼlaž määŋghämmsažvuõđ da määŋgǩiõllsažvuõđ seeiltummša, jeälltummša da tuärjjummša!

Takai teâtt da ääiʹjpoddsaž teâđ Meeraikõskksaž alggmeerai ǩiõli lååieeʹjj pirr käunnʼje:

IDIL-dommseeid https://idil2022-2032.org/

FB: International Decade of Indigenous Languages

Twitter: @ILDecade

Instagram: @indigenouslanguages

Vuässõõđ Ǩiõllneättla!

Ǩiõllneäʹttel jäʹrjstet 24.-30.10.2022. Sääʹmteʹǧǧ kåčč pukid vuässõõttâd teemaneäʹttla da puʹhtted sääʹmǩiõlid õuʹdde teemaneäʹttel ääiʹj jeeʹres naaʹlivuiʹm õuddmiârkkân jäʹrjsteeʹl noorõõttmõõžžid, kampaanjid leʹbe ââʹnned sääʹmǩiõlid iʹlmmtõõzzin da teeʹkstin.