Giellavahku ulbmilin lea oažžut sámegielaide fuopmášumi ja oažžut sámegielaid oidnot ja gullot buot servodaga surggiin Suomas, Ruoŧas ja Norggas. Mii sávvat, ahte nu máŋgasat go vejolaš oassálastet oktasaš viggamuššii Giellavahkus oidnosa sámegielaide earálágan doaimmaiguin báikkálaš, guvllolaš ja álbmotlaš dásis.

Giellavahkku ordnejuvvui Suoma, Ruoŧa ja Norgga Sámedikkiid ovttasbarggus vuosttas háve jagi 2019, goas ávvuduvvui ON:id riikkaidgaskasaš gielaid jahki. Giellavahkku leage ordnejuvvon jagi 2019 rájes buot golmma Sámedikki ovttasbargun, juohke jagi golggotmánus vahkus 43.

• Oainnusmahttit sámegielaid geavahemiin omd. sámegielat oahpistangalbbaid. Gárvves oahpistangalbbat gávdnojit čujuhusas Oahpistangalbbat davvisáme-. anáraš- ja nuortalašgillii sihke suomagillii
• Oainnusmahttit sámegielaid ja oažžut daid gullot geavahemiin sámegielat dearvvahusaid omd. gulahusain. Dearvvahusat gávdnojit Sámedikki dokumeantabáŋkku Sanastot-oasis (Sánit)  Sátnegirjjáš –girjjis (PDF-fiila).

Sápmelaččat leat Eurohpa Uniovnna áidna eamiálbmot. Suomas sápmelaččaid gielalaš ja kultuvrralaš vuoigatvuođaid vuođđun lea vuođđoláhka, man mielde sápmelaččain eamiálbmogin lea vuoigatvuohta doalahit ja ovddidit iežaset giela ja kultuvrra. Sámegielat leat Eurohpa álgogielat ja nuortamearasuopmelaš gielaid (dego suoma- ja esttegiela) lagamus gáidan fuolkegielat. Sámegielaid hállat Suomas, Ruoŧas, Norggas ja Ruoššas. Suomas hállet golmma sámegiela: davvisámegiela, anárašgiela ja nuortalašgiela. Vuođđolága mielde sápmelaččain lea sápmelaččaid ruovttuguovllus (Anára, Eanodaga, Ohcejoga ja Soađegili gieldda davveoassi) gielaset ja kultuvrraset guoski iešmearrideapmi dan mielde go lágain mearriduvvo.

Sámegielat leat dehálaččat ovttaskas giellageavaheaddjái, sámi álbmogii ja maiddái Suoma servodahkii. Sámegielat eai leat dehálaččat dušše gulahallama gaskaoapmin, muhto maiddái olbmo identitehttii, kulturárbái ja gullevašvuhtii. Giela oainnusmahttin beaivválaš eallimis lea dehálaš giela árvui, gullevašvuhtii ja dohkkeheapmái. Go giella oidno beaivválaččat, de addá dat dovddu, ahte min giella lea dohkkehuvvon, das lea árvu ja dat gullá servvodahkii.  Go min gielat oidnojit servvodagas, de dat sakka illudahttá min.

Mii háliidit, ahte Suoma servvodat oahpašii eanet ja buorebut ipmirdit sámegiela, sámi kultuvrra ja sámi servvodateallima.

Mii sávvat, ahte sáhttibehtet oassálastit Giellavahkkui. Ovttas mii sáhttit oažžut sámegielaid oainnusin servodagasteamet ja lasihit dieđu sámegielaid birra Sámegielaid vahkus golggotmánus 2022!