Doaibma
Sámedikki bargun lea dikšut áššiid, mat gusket sámiid gillii, kultuvrii ja sajádahkii álgoálbmogin. Sámediggi sáhttá dahkat eiseválddiide álgagiid ja evttohusaid ja maiddái addit cealkámušaid áššiin, mat gusket dan bargoviidodahkii. Dáin áššiin Sámediggi geavaha maiddái mearridanválddi dan láhkai go dan guoski lágas dahje eará sajis láhkaaddimis mearriduvvo.
Sámedikki doaimma birra mearriduvvo sámediggelágas (974/95 oktan maŋŋá boahtán rievdadusaiguin) ja láhkaásahusas (1727/95), sámi giellalágas (1086/03) ja stáhtaráđi láhkaásahusas sámi giellalága ollašuhttimis (108/04) ja maiddái eará láhkaaddimis ásahuvvon ja mearriduvvon lágaiguin ja láhkaásahusaiguin. Dáid lassin doaimmas čuvvojuvvo Sámedikki iežas bargoortnet.
