Dihtosis lea Sámedikki Nuoraidráđi ja Nuoraid Akatemia oktasašprošeakta, man dárkkuhussan lea lasihit váldoálbmogii gullevaš mánáid ja nuoraid diđolašvuođa sápmelaččaid ja sámekultuvrra birra. Prošeavtta ulbmilin lea ollašuhttit sámefáttat skuvlagalledemiid sihke movttiidahttit skuvllaid miehtá Suoma gieđahallat fáttá oahppadiimmuid áigge ovdamearkan ávvudemiin sámiid álbmotbeaivve, mii dollojuvvo jahkásaččat guovvamánus.
Prošeavtta guovtte ovddit oasi áigge leat ollašuhtton badjel 160 skuvlagalledeami birra Suoma. Skuvlagalledeaddjin doibmet badjel 18-jahkásaš sámenuorat. Galledanbáikegoddin leat leamaš oaivegávpotguovlu, Turku, Tampere, Jyväskylä, Oulu, Roavvenjárga, Soađegilli ja daid lagašguovllut. Prošeavtta olis lea buvttaduvvon metodakortepáhkka ja Seppo-speallovuolážii ráhkaduvvon Sukellus saamelaisuuteen -mobiilaspeallu, maid oahpaheaddjit ja jođiheaddjit sáhttet geavahit ávkin go gieđahallet sámekultuvrra mánáiguin ja nuoraiguin. Nuvttá mobiilaspealu ja metodapáhka sáhtát diŋgot dáppe. Páhkat leat buvttaduvvon suoma- ja ruoŧagielat veršuvdnan.
Prošeakta joatkašuvvá vuot skuvlajagi 2020-2021. Árbevirolaš skuvlagalledemiid lassin ollašuhttojit skuvlagalledeamit gáiddusoktavuođaid bokte buoret riikkadási juksama várás sihke plánejuvvojit ja ollašuhttojit skuvlagalledeamit ja sámefáttat mobiilaspeallu maiddái vuolleskuvlaahkásaččaide. Vuolleskuvllaide dárkkuhuvvon doaibma álgá ođđajagemánus 2021. Sukellus saamelaisuuteen –mobiilaspeallu jorgaluvvo davvisámegillii, ja spealu davvisámegielat veršuvdna almmustahtto ođđajagemánus 2021.
Dihtosis-prošeavtta ruhtada Oahpahus- ja kulturministeriija. Prošeaktaáigi: 1.7.2018-30.6.2021.
Lassidieđut:
Nuoraid Akatemia Ulla Saalasti, prošeaktahoavda, tel: 040 567 4203, ulla.saalasti(at)nuortenakatemia.fi
Nuoraid Akatemia Maria Aikio, prošeaktakoordináhtor, tel: 040 8470 862, maria.aikio(at)nuortenakatemia.fi