Dihtosis lij Sääʹmteeʹǧǧ Nuõrisuåvtõõzz da Nuõri Akatemia õhttsaž haʹŋǩǩõs, koon mieʹrren lij lââʹzzted väʹlddnarooʹde kuulli nuõri teâđaid säʹmmlai da sääʹmkulttuur pirr. Haʹŋǩǩõõzz jurddjen lij kõʹllʼjed škooulin sääʹmteemaivuiʹm di älšmâʹtted škooulid veeʹzz Lääʹddjânnam ǩiõttʼtõõllâd ääʹšš mättčiâssines õuddmiârkkân juuʹhljââʹtteeʹl juõʹǩǩ eeʹjj täʹlvvmannui õnnum saaʹmi meersažpeeiʹv.
Haʹŋǩǩõõzz kuõiʹt ääiʹjab vueʹzz äiʹǧǧen lij kõʹllʼjum škooulin pâʹjjel 160 vuâra jeeʹres åʹrnn Lääʹddjânnmest. Škooulkõʹllʼjeeʹjen toiʹmmje pâʹjjel 18-ekksa sääʹmnuõr. Kõʹllʼjempäiʹǩǩen lie leämmaž väʹlddgååradvuʹvdd, Turku, Tampere, Jyväskylä, Oulu, Ruäʹvnjargg, Suäʹđjel di vuuʹd täi ââlda. Haʹŋǩǩõõzzâst lij rajjum mõõntõõllâmkorttpakk da Seppo-speâllvuâla õõl rajjum Čaaŋŋlummuš sääʹmvuõʹtte -mobiilspeâll, koid uʹčteeʹl da ohjjeei vuäiʹtte äuʹǩǩeed sääʹmkulttuur päärnai da nuõrivuiʹm ǩiõttʼtõõllmen. Määusteʹmes mobiilspeâll da mõõntõõllâmkorttpaakk vuäitak tiʹllʼjed tääiʹben. Paakk lie rajjum lääʹdd- da ruõccǩiõllsaž version.
Haʹŋǩǩõs juätkkai eʹpet lookkâmeeʹjj 2020–2021. Tååbdas škooulkõʹllʼjummši lââʹssen kõʹllʼjet škooulin ougglõsõhttvuõđin pueʹrab väʹlddkååddlaž kättmõʹšše vuällam diõtt di plaanât kõʹllʼjummšid da kõʹllʼjet škooulin da raajât sääʹmteema meâldlaž mobiilspeâll vueʹllškooulekksaid še. Vueʹllškooulid jurddum toiʹmmjummuš jåttai ođđeeʹjjmannust 2021. Čaaŋŋlummuš sääʹmvuõʹtte –mobiilspeâll jåårǥlââʹttet tâʹvvsääʹmǩiõʹlle, da speâll tâʹvvsääʹmǩiõllsaž versio õlmstââʹttet ođđeeʹjjmannust 2021.
Dihtosis-haʹŋǩǩõõzz teäggat Mättʼtõs- da kulttuurministeria. Haʹŋǩǩõsäiʹǧǧ: 1.7.2018-30.6.2021
Lââʹssteâđ:
Nuõri Akatemia Ulla Saalasti, projeʹkttjååʹđteei, teʹl.: 040 567 4203, ulla.saalasti(at)nuortenakatemia.fi
Nuõri Akatemia Maria Aikio, projeʹkttkoordinaattor , teʹl.: 040 8470 862, maria.aikio(at)nuortenakatemia.fi