Sämitige valjâlävdikodde koolgâi vala kuoddâliđ juávhust alemuu haldâttâhrievti miärádâsâin, moiguin AHR komettij valjâlävdikode syeinimáánust toohâm jiešvuoigimijd. Kuoddâlmijn paijeelmiärálâš nubástusuuccâmvyehhin váttoo, ete AHR meddâlist jieijâs puástumiärádâsâid.

Ovdeláá porgemáánust tohhum, siämmáá äššiubâlâšvuotân lohtâseijee kuoddâlmij vuáđustâssân lijjii maaŋgah feeilah, tego vuoigâlii riehtijotteem vuáđuprinsiipij luávkkám já tuámustoovli jiešmerideijeevuođâ já pelettemesvuođâ luávkkájeijee čuávdusij almos munedem. Tai lasseen tääl kuoddâlem čuosâttâhhân orroo 27 AHR miärádâsâin lii uđđâ puástuvuotâ.

Tain uđđâ miärádâsâin AHR meridij valjâlävdikode sajanmäksiđ väidei riehtijotteemkoloid, mutâ väridij valjâlävdikoodán tilálâšvuođâ celkkiđ tuše riehtijotteemkoloin, ige ollágin jieš väidimist. Te väidim válduääšist iä kuullâm valjâlävdikode ollágin, mii oppeet rikoi vuoigâlii riehtijotteem vuáđuprinsiipijd, tego äššiomâhái oovtâitosii prosessuaallii sajattuv já kuullâm vátámâš.

AHR maŋaluvâi adelum miärádâsah aneh sistees siämmáá stuárusii riehtijotteemkoloi sajanmáksusume. Iänááš uási riehtijotteemkolovátámâš siskeldeijee väidimijn lâi oovtâ já siämmáá äššialmai rähtim. Väidimijn riehtijotteemkolovátámâš ij vuáđustâllum tuođâlijn koloin, peic ulmen lâi panâštiđ sämitige já valjâlävdikode nuuvt, ete toh iä eeppid jo pahudum AHR oovdeb miärádâsâid olmoošvuoigâdvuođâid luávkkájeijen. Tággáár jurdâččem lii Suomâ riehtioornigân vieres, veikâ AHR oro tääl riemmâm ton toorjân.

Valjâlävdikodde lii jieijâs räijejum toimâvääldi siste viggâm huolâttiđ OA olmoošvuoigâdvuotâkomitea Suomân adelum laŋgâtteijee miärádâsâi olášutmist já uđđâ olmoošvuoigâdvuotâluávkkámij velttimist. Áinoo já alemuš nubástusuuccâmtäässin AHR lii riemmâm suojâliđ jieijâs árvuvääldi sämmilij olmoošvuoigâdvuođâin peerusthánnáá. Valjâlävdikodde lii páguttum kuoddâliđ AHR:n ko mihheen eres peelijd ko AHR jieš ij pyevti čuávdiđ feeilâid.

Lasetiäđuh

Valjâlävdikode saavâjođetteijee Janne Näkkäläjärvi, +358 10 839 3190 / +358 40 626 7255, janne.nakkalajarvi(at)samediggi.fi

Valjâlävdikode čällee Antti Aikio, +358 10 839 3127 / +358 40 184 6829, antti.aikio(at)samediggi.fi

Uáppáásm huolâlávt jienâstemravvui!

 

• Merkkii stemppâlistum jienâstemliipun tuu iävtukkâs nummeer čielgâsávt. Ele räähti eres merkkiimijd.
• Piejâ jienâstemliipu valjâkovertân já toopâ kooveert. Piejâ tuše jienâstemliipu valjâkovertân.
• Vuáláčääli vuolgâttâsreeivâ.
• Piejâ toppum valjâkooveert sehe vuolgâttâsreeivâ macâttâskovertân já toopâ kooveert.
• Tuálvu macâttâskooveert poostâ palvâlemsajan (ij reivâloován) nuuvt ääigild, ete tot kiergân valjâlävdikode toimâttâhân Anarân majemustáá vuossaargâ 30.9.2019 tme 18 ovdil ko jienârekinistem algâttuvvoo. Postâmáksu lii maksum tuu peeleest.
• Tun puávtáh meid toimâttiđ jieijâd macâttâskooveert persovnlávt valjâlävikode toimâttâhân Anarân Sajosân 16.-27.9.2019 koskâsii ääigi.

 

Luuvâ lase:

• Sämitige vaaljâi toimâttem
• Sämitige vaaljâi jienâirekinistem
• Valjâäššikiirjij siäiluttem
• Sämitige vaaljâi puátusij meridum

Ohtâvuotâtiäđuh:

Sämitige valjâlävdikodde
Sämikulttuurkuávdáš Sajos
Menesjärventie 2A
99870 AANAAR

+358 10 839 3120 | +358 10 839 3138
vaalit(at)samediggi.fi

Vaaljâäššikirjeh postâduvvojeh kirjejum reivân jyehi jienâstemvuoigâdvuođâlâžân 2.9.2019 rääjist.

Jienâstemvuoigâdvuođâlâš puáhtá jienâstiđ maaccâtmáin vaaljâäššikiirjijd poostâ pehti teikkâ maacâtmáin vaaljâäššikiirjijd nuolgist vaaljâlävdikode toimâttâhân. Poostâ pehti vuolgâttum äššikirjeh kalgeh leđe vaaljâlävdikode toimâttuvâst Anarist majemustáá 30.9.2019 ovdil jienâirekinistem algâttem. Jienâstemvuoigâdvuođâlâš puáhtá meid macâttiđ jieijâs vaaljâäššikiirjijd persovnlávt 16.9.–27.9.2019 koskâsii ääigi vaaljâlävdikode toimâttâhân; Aanaar, Sajos, Menesjärventie 2A.

Ulmuuh, kiäh láá sämikuávlu lájádâsâin tipšoost sehe toh ulmuuh, kiäh láá pääihist tipšoost, ege mudoi puávtáččii jienâstiđ, uážžuh táárbu mield išedeijee tipšosaajeest jienâstem várás. Ääšist kalga väldiđ ohtâvuođâ vaaljâlävdikode toimâttâhân čuj. Sajos, Menesjärventie 2A, 99870 Aanaar, puh 010 839 3120, tâi vaalit@samediggi.fi

Anarist 8.8.2019 Vaaljâlävdikodde

www.samediggi.fi/vaaljah-2019/?lang=an

Sämitige valjâlävdikodde muštoot, et sämitige vaaljâi 2019 iävtukkâsasâttâllâm nohá vá 2.8. tme 16. Väljejeijeeseervi vuáđudemäššikirje/iävtukkâsucâmuš kalga leđe valjâlävdikoddeest Anarist Saijoos toimâsaajeest ovdil nomâttum äigirääji (čujottâs: Säämi kulttuurkuávdáš Sajos, Menesjärventie 2A, 99870 AANAAR).

Väljejeijeeseervih kalgeh väldiđ taan ääši huámmášumán eromâšávt talle, ko toimâtteh äššikiirjijd poostâ peht. Valjâlävdikoddeest ij lah eres toimâsaje, mast äššikiirjijd váldáččii vuástá.

Jienâvuoigâdvuođâlâš puáhtá kuullâđ tuše oovtâ väljejeijeesiärván, tâi mudoi suu nommâ sihâstuvvoo meddâl puoh väljejeijeeseervijn. Väljejeijeeseervi äššialmast lii máhđulâšvuotâ tievâsmittiđ tâi njuolgiđ ucâmuš tiäđuid ma 6.8. tme 16 räi.

Iävtukkâsasâttâllâmluámáttuvah kávnojeh Sämitige internetsiijđoin čujottâsâst www.samediggi.fi/vaaljah-2019/?lang=an já taid finnee valjâlävdikode toimâttuvâst säämi kulttuurkuávdáš Sajosist.

Lasetiäđuh

Sämitige valjâlävdikodde
Sämikulttuurkuávdáš Sajos
Menesjärventie 2A
99870 Aanaar
+358 10 839 3120, +358 10 839 3138
vaalit@samediggi.fi

Valjâlävdikodde valmâštâl sämitige vaaljâid äigitaavlu mield. Sämitiggevaaljah toimâttuvvojeh 2.9–30.9.2019.

Sämitiggeest adelum laavâ (974/95, nubástum 1279/02) 27 § mield iävtukkâs sämitige vaaljâin pyehtih asâttiđ ucemustáá kulmâ ulmuu, kiäh láá merkkejum jienâstemvuoigâdvuođâlâžžân sämitige valjâluvâttâlmân. Iävtukkâsasâttâllâm várás tiävdoo väljejeijeeseervi vuáđudemäššikirje já iävtukkâs miettâmluámáttâh, mon kalga macâttiđ vuáláčallum häämist valjâlävdikoodán majemustáá porgemáánu 2. peeivi 2019 tme 16.00. Luámáttuvâid já tärhibijd tiäđuid finnee valjâlävdikode toimâttuvâst čuj. Sajos, Menesjärventie 2A, 99870 Aanaar, puh. 010 839 3120, 010 839 3138 tâi šleđgâpostâ  vaalit@samediggi.fi. Luámáttuvâid puáhtá meiddei printtiđ www.samediggi.fi.

Valjâlävdikodde

Luámáttâh iävtukkâsasâttem várás

Sämitige vaaljah 2019

 

Kove: Juha Kauppinen