Sääʹmteʹǧǧvaal tååimtet 4.9.-2.10.2023. Täi-aa sääʹmteʹǧǧvaali vaal-loǥstõõǥǥâst åårrai jiõnnvuõiggâdvuõttniiʹǩǩid liâ vuõlttuum vaaläʹššǩeeʹrj pååʹštin ǩeeʹrjuum ǩeʹrjjvuõlttõssân čõhččmannu 4. peeiʹvest looǥǥeeʹl.

Ooumže, kååʹtt ouddâl jiõnilaʹsǩǩummuž alttummuž čuäʹjat vaal-luʹvddkådda ââʹlmõs vaaldšemvuõiggâz tuʹmmstõõǥǥ jiõnstemvuõiggâdvuõđâst eeʹjj 2023 vaali vaal-loǥstõõǥǥ kuõskki läittmõõžž diõtt, vaʹrrjet vuäittmõš vuäǯǯad vaaläʹššǩiiʹrjid da jiõnsted.

Suudišttâm tuʹmmstõõǥǥ vuâđald jiõnsteen ooumaž lij õõlǥtum luõvted vaal-luʹvddkådda tuʹmmstõõǥǥ leʹbe tõn vuõiggân tuõđštum kopio vaal-loǥstõʹǩǩe ääʹššest tuejjeem meärkkmõõžž diõtt.

Raukkâp äʹššvuäʹmsteeʹj oummuid leeʹd õhttvuõđâst vaal-luʹvddkååʹdd konttra, koʹst vuäǯǯ tääʹrǩab teâđaid vaaläʹššǩiiʹrji vuäǯǯmõõžžâst.

Vääʹld lokku! Vaalautt ij leäkku jiõnstempäiʹǩǩ – toʹben ij vueiʹt jiõnsted ij-ǥa toʹben vueiʹt viǯǯâd vaaläʹššǩiiʹrjid. Vaalauʹtte vuäitt tåʹlǩ maaccted vaaläʹššǩiiʹrjid.

Lââʹssteâđaid vaalid õhttneei aaʹššin vuäǯǯ https://www.samediggi.fi/vaal-2023

Õhttvuõđteâđ:

Saamelaiskäräjät vaalilautakunta
Saamelaiskulttuurikeskus Sajos

Sajos, Menesjärventie 2 A, 99870 Inari,

teʹl. 010 839 3153, 010 839 3174, 010 839 3177, 010 839 3155

Suõjjuum neʹttpååʹšt: https://secmail.com/send/m7jcWH7B, vuâsttavaʹlddi: vaalit@samediggi.fi

Vaaläʹššǩiiʹrjid  pååʹštʼtet ǩeʹrjjuum vuõlttõssân juõʹǩǩ jiõnnvuõiggâdvuõttnekka 4.9.2019 ääʹljeeʹl.

Jiõnnvuõiggâdvuõttneǩ vuäitt jiõnsted maaccteeʹl vaaläʹššǩiiʹrjid pååʹšt mieʹldd leʹbe maaccteeʹl vaaläʹššǩiiʹrjid jooʹtti vaalauʹtte leʹbe vuõiʹǧǧest vaal-luʹvddkååʹdd konttra. Pååʹšt mieʹldd vuõlttuum äʹššǩeeʹrj âʹlǧǧe leeʹd vaal-luʹvddkååʹdd konttrest Aanrest mââimõssân 2.10.2023 jiõnnlaʹsǩǩeem alttummša mõõneeʹn. Jiõnnvuõiggâdvuõttneǩ vuäitt še jiõčč maaccted jiiʹjjes vaaläʹššǩiiʹrjid 18.9.–29.9.2023 kõskksaž äiʹǧǧen vaal-luʹvddkååʹdd konttra; Inari, Sajos, Menesjärventie 2A leʹbe säʹmvuuʹdest jooʹtti vaalauʹtte teʹl: 010 8339 3199.

Säʹmmlai dommvuuʹd stroiʹttlin håiddamnalla åårrai oummu, di tõk dååma håiddamnalla åårrai oummu,  kook jie muđoi vuäitči jiõnsted, vuäǯǯa taarb mieʹldd vieʹǩǩteei håiddampääiʹǩest jiõnstem vääras. Ääʹšš diõtt âlgg väʹldded õhttvuõđ vaal-luʹvddkååʹdd konttra addrõs Sajos, Menesjärventie 2A, 99870 Aanar, teʹlfon 010 839 3155, 010 839 3177 leʹbe vaalit@samediggi.fi.

Aanrest 11.8.2023

Vaal-luʹvddkåʹdd

Sääʹmteeʹǧǧ vaal-luʹvddkåʹdd mušttʼtat sääʹmteeʹǧǧ vaali 2023 võboršeeʹǩǩi piijjmõõžž puuttâm pi 4.8. čiâss 16. Vaʹlljeemõhttõõzz vuâđđeemäʹššǩeʹrjj/võboršeǩooccmõš feʹrttai leeʹd vaal-luʹvddkååʹddest Aanrest Sajoozz tåimmpääiʹǩest peäggtum mieʹrräigga mõõneeʹst (addrõs: Saamelaiskulttuurikeskus Sajos, Menesjärventie 2A, 99870 INARI).

Vaʹlljeemõhttõõzzin kaʹnnat väʹldded tän lokku jeäʹrben tâʹl, ǥu äʹššǩiiʹrjid tååimtet pååʹšt mieʹldd. Vaal-luʹvddkååʹddest ij leäkku jeeʹres tåimmpäiʹǩǩ, koʹst äʹššǩiiʹrjid vääldčeš vuâstta.

Jiõnnvuõiggâdvuõttneǩ vuäitt kuullâd tåʹlǩ õõut vaʹlljeemõhttõʹsse, leʹbe muđoi suu nõõm vääʹldet meädda pukin vaʹlljeemõhttõõzzin. Vaʹlljeemõhttõõzz äʹššoummust lij vueiʹttemvuõtt tiuddeed leʹbe vuõiǥeed ooccmõõžž teâđaid 8.8. čiâss 16 räjja.

Võboršeeʹǩǩ piijjmõʹšše kuulli lomaakk käunnʼje Sääʹmteeʹǧǧ interneʹttseeidain addrõõzzâst www.samediggi.fi/vaalit-2023/ da tõid vuäǯǯ še vaal-luʹvddkååʹdd konttrest Sääʹmkulttuurkõõskõs Sajoozzâst.

• Lomaakk võboršeeʹǩǩ piijjmõõžž vääras

Vaaläʹššǩiiʹrji tååimtummuž ainsmâttmõššân vaal-luʹvddkåʹdd räukk 1.6.2023 mâŋŋa siirdčõõttâm oummuid da ålggjânnmin siirdčõõttâm oummuid tååimted peiʹvvuum addrõsteâđeez vaal-luʹvddkådda juʹna neʹttpååʹštin vaalit@samediggi.fi, suõjjuum neʹttpååʹšt pääiʹǩ: https://secmail.com/send/m7jcWH7B, teʹlfoonin 010 839 3155, 010 839 3177, 010 839 3174 leʹbe pååʹšt mieʹldd Saamelaiskäräjät / vaalilautakunta, Menesjärventie 2A, 99870 AANAR.

Sääʹmteeʹǧǧ vaal-luʹvddkåʹdd raaji da raavii 28.2.2023 eeʹjj 2023 sääʹmteʹǧǧvaalin ââʹnnemnalla åårrai vaal-loǥstõõǥǥ õõuʹdab vaali lääʹjjviõkksa vaal-loǥstõõǥǥ da meerteâttriâšldõõǥǥâst åårrai teâđai vuâđald.

Eeʹjj 2023 vaal-loǥstõõǥǥ raajjmen vaal-luʹvddkåʹdd lij õlggâm väʹldded lokku vuõiggâdvuõttvueʹjjest eeʹjj 2019 vaal-loǥstõõǥǥ raajjmõõžž mâŋŋa šõddâm miârkteei muttsid. Õõlmâs vääʹld õõʹnnʼjen vaal-luʹvddkååʹdd âlgg ââʹnned huõl tõʹst, što vaal-loǥstõk lij siiskõõzz peäʹlnn lääʹjj meâldlaž da stään oummui õõutverddsaž âânnmõõžž. Vaal-luʹvddkååʹdd âlgg peäʹlstes Lääʹdd vuâđđlääʹjj 22 § meâldlânji staanâd vuâđđvuõiggâdvuõđi da ooumažvuõiggâdvuõđi teâuddjummuž.

Iiʹjjin 2011 – 2021 ââʹlmõs vaaldâšmvuõiǥâs lij čåuddam jõnn meäʹr  jeeʹres iiʹjji sääʹmteʹǧǧvaali vaal-loǥstõõǥǥ kuõskki aaʹššid. Vueʹss tõin lij meeraikõskksaž tääʹzzest tuõttum Lääʹdd meeraikõskksaž ooumažvuõiggâdvuõttõõlǥtõõzzid čuõʒʒteeʹjen. Tuʹmmstõõǥǥi seuʹrrjõsân vaal-loǥstõʹǩǩe mieʹrrummuž kuõskki suåvldemvueʹjjest lij šõddâm pannmeäʹrmeâldlaž da siiskõõzz peäʹlnn risttreiddsaž. Måtam vueʹjjest ââʹlmõs vaaldâšmvuõiǥâs lij tuʹmmääm oummu mieʹrrummšest nåkam vaal-loǥstõʹǩǩe, koonn raajjmõõžž ij leämmaž ni alttuum. Ââʹlmõs vaaldâšmvuõiǥâs lij še jååʹđtam vuõiggâdvuõttvaaiktõõzzid õhttnaž oummid kuõskki da määŋg vueʹjjest Lääʹdd meeraikõskksaž ooumažvuõiggâdvuõttõõlǥtõõzzid čuõʒʒteei čåuddmõõžžsteez kõskkvuõđâst täi oummui kåårmlai vuõiggâdvuõʹtte šõddâd valddum vaal-loǥstõʹǩǩe. Ââʹlmõs vaaldâšmvuõiǥâs lij kuuitâǥ määŋgain eeʹjj 2019 sääʹmteʹǧǧvaalid kuulli tuʹmmstõõǥǥines čuäʹjtam muʹttmes sääʹmteʹǧǧlääʹjj 3 § tuʹlǩǩummuž nuʹtt, što Lääʹdd meeraikõskksaž ooumažvuõiggâdvuõttõõlǥtõõzz täʹst õõudâs vääldčeš lokku vueʹǩǩsânji. Vuõiggâdvuõttvueʹǩǩ lij määŋgain naaʹlin miârkteeinalla mottjam tõʹst, måkkmen ââʹlmõs vaaldâšmvuõiǥâs tõn vuõiʹni pååđ tuʹmmstõõǥǥ tuejjeeʹn.

Nääiʹt ååreeʹn vaal-luʹvddkåʹdd lij ǩiõččâm jiijjâs õõlǥtummšen põrggâd staanâd, što eeʹjj 2023 vaal-loǥstõk lij siiskõõzz peäʹlnn lääʹjj da meeraikõskksaž ooumažvuõiggâdvuõttsuåppmõõžži meâldlaž da ǩiõttʼtââll õhttnaž oummid seämmanallšem da priimmâmnallšem vuâđđtõõllmõõžživuiʹm, da što juõʹǩǩ õhttnaž oummu mõõntõõllmallaš vuõiggâdvuõttsuâjast ââʹnet huõl tärkka.

Tän diõtt vaal-luʹvddkåʹdd ij leäkku vuäittam täʹlvvmannu 28. peeiʹv mieʹrräigga mõõneeʹst siiʹsǩeet eeʹjj 2023 sääʹmteʹǧǧvaali vaal-loǥstõʹǩǩe pukid nåkam oummuid, koi vaal-loǥstõʹǩǩe mieʹrǩǩummuž vuâđđan lie ââʹlmõs vaaldâšmvuõiggâz uʹvddem da mâʹŋŋlubust mottjam vuõiggâdvuõttvueʹjj sizz šiõtti ääiʹjab čåuddmõõžž.

Oummu, kookk ǩeäʹčče pueʹttmes vuõiggâdvuõđtää kuõđđum meädda eeʹjj 2023 vaal-loǥstõõǥǥâst, vuäiʹtte ooccâd ääʹššest vuõiǥummuš sääʹmteʹǧǧlääʹjj § 26 meâldlânji. Vaal-luʹvddkåʹdd puätt ǩiõttʼtõõllâd vuõiǥeemkaiʹbbjõõzzid objektiivlânji, õõutverddsânji da lääǥǥlânji, ärvvtõõleeʹl vuõiǥeemkaiʹbbjõõzz tuejjeei õuʹdde puʹhttem vuâđđtõõllmõõžžid vaal-loǥstõʹǩǩe väʹlddma.

Sääʹmteeʹǧǧ eeʹjj 2023 vaalin lij jäänmõsmieʹrr jiõnnvuõiggâdvuõttniiʹǩǩin, vuõss vuâra pâʹjjel 6 000. Ođđ jiõnsteeʹjid mieʹrǩǩeeš vaal-loǥstõʹǩǩe pâʹjjel kuõiʹt vuâra jäänab ko eeʹjj 2019.

Lââʹssteâđ sääʹmteʹǧǧlääʹjj pirr: https://www.samediggi.fi/vaal-2023/?lang=nuo

Aanrest 16.3.2023
Vaal-luʹvddkåʹdd

Tuâjj älgg suåppmõõžž mieʹldd vueiʹtlva sõrgg da juätkkai vueiʹtlvânji 31.10.2023 räjja.

Vaal-luʹvddkååʹdd tåimmpäiʹǩǩ lij sääʹmkulttuurkõõskõs Sajoozzâst, Aanrest.

Koontârpiisar tuâjjan lij vaal-luʹvddkååʹdd vuâllsiʹžžen ââʹnned huõl eeʹjj 2023 sääʹmteʹǧǧvaali valmštõõllma da tiuʹddepiijjma kuulli tuâjain, kook lie jm. pueʹtti da vuõʹlǧǧi pååʹšt diariâsttmõš, addrõsteâđai peeiʹvtummuš da addrõskoorti priʹnttjummuš, äʹššǩiiʹrji kopiâsttmõš da pååštʼtummuš di jeeʹres takai koontârtuâj da vaal-luʹvddkååʹdd piisar jeäʹrben mieʹrreem tuâj.

Šiõttõsvuâđlaž ââʹntemkaiʹbbjõssân lie tuõjju šiõttlõs škooultõs da sääʹmǩiõlltäidd (asetõs 1727/95). Haʹrjjnummuš vaal-luʹvddkååʹdd tuõjju ǩiõččât pueʹrren.
Päʹlǩǩ meäʹrtââvv Sääʹmteeʹǧǧ päʹlǩǩriâšldõõǥǥ väʹǯǯlõsvuõtt-tääʹzz VI da II joouk mieʹldd (vuâđđpäʹlǩǩ 2017,90 euʹrred/mp). Vuâđđpääʹlǩ õõl määuʹset 24 % sääʹmvuuʹd lââʹzz da tuõjju haʹrjjnem mieʹldd meäʹrtõõvvi lõõʹzzid.

Ooccmõõžžid meâlddõõzzines âlgg tooiʹmted Sääʹmteeʹǧǧ piisarkådda 16.3.2023 mõõneeʹst addrõʹsse: https://www.sympahr.net/public/pq.aspx?17fa1df6

Lââʹssteâđaid tuâjast ouʹdde vaal-luʹvddkååʹdd piisar Antti Aikio teʹl.+ 358 10 839 3148, vaal-luʹvddkååʹdd valmštõõllipiisar Sinikka Mäkinen +358 ‭10 839 3138‬‬.‬‬‬‬‬‬‬‬‬‬

Sääʹmteeʹǧǧ toiʹmmjummša vuäitt tobdstõõttâd neʹttaddrõõzzâst www.samediggi.fi.

Aanrest 2.3.2023
Sääʹmteʹǧǧ