Anáraš- ja davvisámegiela bustávvatávvalat leat almmustuvvan

Oahpaheaddjiid guhká sávvan anáraš- ja davvisámegielaid bustávvagovvatávvalat leat almmuhuvvon. Anárašgiela bustávvatávvalat leat almmuhuvvon fiermmis, davvisámegiela bustávvatávvalat sihke fiermmis ja printejuvvon hámis.

Anárašgiela bustávvagovaid lea ráhkadan oahpaheaddji-govvadáiddar Tania-Maria Moilanen. Bustávvatávvaliid sáhttá luđet ja printet dás.

Davvisámegiela bustávvatávvaliid govaid lea ráhkadan Nora Bäck, gii lea govvadahkkin maiddái Sámedikki almmuhan Gea-oahppamateriálaráidui. Bustávvatávvaliid sáhttá luđet ja printet dás, dahje diŋgot skuvlen- ja oahppamateriáladoaimmahagas printejuvvon hámis.

Govvatávvaliid lea doaimmahan Gáijon Issát Ánne/ Anni Näkkäläjärvi Sámedikki skuvlen- ja oahppamateriáladoaimmahagas.

Diŋgojumit: kirjatilaus(at)samediggi.fi

Mearreáigásaš prošeaktabargi Dihtosis-sámeskuvlagalledeamit joatkkaprošektii

Bargu álgá 5.8.2019 ja bistá 15.3.2020 rádjai.

Dihtosis-prošeavttas dahkkojuvvo sápmelašvuohta ja sámekultuvrra oahpisin skuvllain. Prošeavttas beaiváduvvo jo gárvves materiála skuvlagalledemiid várás, dahkkojuvvojit skuvlagalledeamit sihke ráhkaduvvo sámefáttáin mobiilaspeallu, mii almmustahttojuvvo sámi álbmotbeaivve riikkaviidosaččat Suoma skuvllain.

Prošeaktabargi bargun lea Dihtosis-sámeskuvlagalledeamit prošeavtta ollašuhttin ja hálddašeapmi prošeaktaplána mielde ovttasbarggus stivrenjoavkkuin, nuoraidčálliin ja Nuoraid Akademiijain.

Barggu ceavzilis dikšuma veahkehit heivvolaš skuvlejupmi, sámekultuvrra dovdan, hárjánupmi viiddes materiálaid hálddašeamis sihke máhttu bargat iehčanassii ja ovttas eará doibmiiguin. Prošeaktabargis eaktuduvvo sámegiela dáidu.

Prošeaktabargi bálkkámáksin mearrašuvvá Sámedikki bálkávuogádaga gáibádusdási V/II mielde (vuođđobálká 2 180,06 euro/mb). Vuođđobálkká lassin máksojuvvojit sámeguovllus barggadettiin 24 % sámeguovllu lassi ja bargohárjánumi mielde ahkelasit.

Ohcamušaid duođaštusaiguin galgá doaimmahit sámedikki čállingoddái 1.7.2019 dmu 16.00 rádjai čujuhusain https://www.sympahr.net/public/pq.aspx?3daeb547

Lassidieđuid barggus addá vs. nuoraidčálli Elli-Marja Hetta, elli-marja.hetta(at)samediggi.fi, tel. 010 839 3134. Sámedikki doibmii sáhttá oahpásmuvvat čujuhusas www.samediggi.fi.

Anáris 13.6.2019 Sámediggi

Evttohasa ásaheapmi sámedikki válggain

Válgalávdegoddi válmmaštallá sámediggeválggaid áigetávvala mielde. Sámediggeválggat doaimmahuvvojit 2.9.–30.9.2019.

Sámedikkis addojuvvon lága (974/95, nupp.1279/02) 27 §:a mielde evttohasa Sámediggeválggain sáhttet ásahit uhcimustá golbma olbmo, geat leat merkejuvvon jietnavuoigadahtton sápmelažžan Sámedikki válgalogahallamii. Evttohasásaheami várás devdojuvvojit válljensearvvi vuođđudanáššegirji ja evttohasa miehtanskovvi, mat máhcahuvvojit, nu ahte leat vuollái čállojuvvon válgalávdegoddái maŋimustá borgemánu 2. beaivve 2019 dmu 16.00. Skoviid ja dárkilut dieđuid oažžu válgalávdegotti doaimmahagas

čuj. Sajos, Menesjärventie 2A, 99870 Anár, tel. 010 839 3120, 010 839 3138 dahje šleađgapoasttain vaalit@samediggi.fi. Skoviid sáhttá maiddái printet  www.samediggi.fi.

Válgalávdegoddi

Lomake ehdokkasasettelua varten

Skovvi evttohasásaheami várás

 

Govva: Juha Kauppinen

Sajos ohcá lágádusfuolaheaddji sadjásačča

Lágádusfuolaheaddji bargun lea fuolahit Sajosa lanjaid beaivválaš čorgemis ja lassin dárbbu mielde veahkehit dálus ordnejuvvon čoahkkimiid ja dáhpáhusaid geavada ordnemiin.

Sadjásašvuohta álgá 10.7.2019 ja bistá 23.8.2019 rádjai. Barggu ceavzilis dikšuma veahkehit lágádusfuolaheaddji dutkkus dahje vástideaddji skuvlejupmi ja doarvái buorre hárjánupmi ođđaáigásaš almmolaš lanjaid čorgemis. Atnit árvvus buriid gulahallandáidduid, positiivvalašvuođa sihke njuovžilis ja iehčanas bargovuogi. Bálká mearrašuvvá sámedikki bálkávuogádaga gáibádusdási VII/IV mielde, vuođđobálká lea 1575,81 euro/mb, man lassin máksojuvvojit 24 %:a sámeguovllu lassi ja ahkelasit, mat mearrašuvvet bargohárjánumi mielde.

Oza bargosaji 21.6. rádjai mielčuovvu liŋkka bokte https://www.sympahr.net/public/pq.aspx?43f9605e

Lassidieđuid barggus addá márkanastinhoavda Katariina Guttorm, katariina.guttorm(at)samediggi.fi, tel. 010 839 3109.

Sajosa doibmii sáhtát oahpásmuvvat čujuhusas www.sajos.fi

Bovdehus searvat Sámi giellavahkkui 21.-27.10. 2019!

Sámi giellavahkku lágiduvvo 21.-27.10.2019 ja Sámediggi bovde buohkaid oassálastit temavahkkui ovdamearkka dihte ordnemin dáhpáhusaid, kampanjaid dahje ovdanbuktimin sámegielaid iešguđetgeláhkái.

Jahki 2019 lea riikkaidgaskasaš eamiálbmogiid gielaid temájahki ja Sámediggi lea nannosit mielde temájagi ollašuhttimis ovttas Norgga ja Ruoŧa sámedikkiiguin. Sámedikki ordne ieš doaimmaid ja dahká materiáladi temájagi áigge sihke hálida movttiidahttit maiddái eará doibmiid oassálastit temájahkái.

Sámediggi bovde fitnodagaid, servviid, virgeoapmahaččaid ja eará doibmiid viidát Suomas oassálastit sámegielaid oidnoma lasiheapmái olles riikkas. Sámegielaid sáhttá buktit ovdan eaea. čállimin máidnumiid/borranlistuid sámegillii, dearvvaheamin sámegillii, geavaheamin sámi báikenamaid. Hutket dakkár doaimma, mii buktá sámegielaid oidnosii, muituha gielaid máŋggahápmásašvuođas sihke hábme ođđa giellageavahansajiid. Buot sámegielat leat áitatvuložža ja juohkelágán doarjja dárbbašuvvo.

Sámediggi mieđiha jagi loahpas Sámi gielladahku -bálkkašumi. Bálkkašupmi mieđihuvvo virgeoapmahažžii dahje servošii, mii lea doaimmastis fuopmášahttán temájagi dahje eará láhkái ánssolaččat bargan sámegiela ovddideami ovdii Suomas. Doaibmit, geat leat áŋgiruššan giellavahku áigge, váldojit vuhtii bálkkašumi válljejeddiin.

Searvva sámi giellavahkkui 21.-27.10. 2019!

Geassebargu Sámedikki skuvlen- ja oahppamateriáladoaimmahagas

Sámediggi bálkáha geassit 2019 guovtti mánotbadjái ovtta sesoŋgabargi ráhkadit nuortalašgielat oahppamateriála ja ovtta digimateriálabargi. Digimateriálabargi bargun lea bidjat davvisáme- ja anárašgielat materiálaid Cloubi-vuođu ala. Álggahanáigi sohppojuvvo sierra. Geassebargguide sáhttá ohcat maiddái hárjehallin, juos ii leat ovdal bargan Sámedikkis. Hárjehalli barggu eaktun lea, ahte oahppi/ stuđeanta oažžu iežas oahppolágádusas hárjehallandoarjaga.

Juos leat beroštuvvan bajábealde máinnašuvvon geassebargguin deavdde ja sádde ohcamuša vuolábeale liŋkkas Sámediggái maŋimuštá 31.5.2019. Lassedieđuid doaimmain addá oahppamateriálačálli Hannu Kangasniemi, hannu.kangasniemi@samediggi.fi, tel 010 839 3115.

Bálká máksojuvvo Sámedikki bálkáortnega dási V ja dan II luohká mielde (vuođđobálká 2163,83 euro/mb). Vuođđobálkká lassin máksojuvvo 24 % sámeguovllu lassi ja bargohárjáneami mielde bálvalanlassi. Hárjehalli bálká meroštallojuvvo sierra.

Nuortalašgiela oahppamateriálabargin sáhtát ohcat dán liŋkkas.

Digimateriálabargi sáhtát ohcat dán liŋkkas.

Sámediggi ordne infodilálašvuođa auktoriserejuvvon jorgaleaddji dutkosa birra 29.5.2019

Sámediggi lágida infodilálašvuođa auktoriserejuvvon jorgaleaddji dutkosa birra 29.5.2019, dmu 14.00-14.45 Sajosis Soljjus. Dilálašvuođas muitaluvvo mii dutkkus lea ja man láhkai dasa sáhttá ráhkkanit. Ieš dutkosii almmuheapmi lea borgemánus. Infodilálašvuođas dutkosa birra muitalit gielladorvočálli Anne Kirste Aikio ja auktoriserejuvvon jorgaleaddjit Merja Fofonoff ja Arla Magga. Infodilálašvuohta lea dárkkuhuvvon buohkaide, geat leat beroštuvvan dutkosis.

Oahpahusráđđehusa hálddašan auktoriserejuvvon jorgaleaddji dutkkus ordnejuvvo čuovvovaš geardde skábmamánus 2019. Auktoriserejuvvon jorgaleaddji dutkosa sáhttá čađahit Suomas hállon buot sámegielain ja dat lea virggálaš duođaštus jorgaleaddji ámmátdáiddus. Dutkosa sisdoalus sáhtát lohkat dárkilabbot oahpahusráđđehusa siidduin: https://www.oph.fi/koulutus_ja_tutkinnot/auktorisoidut_kaantajat

Sámediggi lágida maŋŋelabbos čakčat sierra ráhkkanandilálašvuođa dutkosis.

Infodilálašvuhtii sáhttá oassálastit gáiddusoktavuođain, almmut das gielladorvočállái.

Lassidieđuid addá gielladorvočálli Anne Kirste Aikio:

anne-kirste.aikio(at)samediggi.fi
Mob. +358 40 707 5626
Tel. 010 839 3124

Sámediggi almmuha ohcan láhkai riikkaidgaskasaš áššiid čálli virgesadjásašvuođa

Sámediggi almmuha ohcan láhkai riikkaidgaskasaš áššiid čálli virgesadjásašvuođa, mii álgá 3.6.2019 ja nohka 31.12.2019.

Čálli barggut leat meroštallon Sámedikki bargoortnegis 26 d §. Bargun lea ee.  fuolahit, koordineret, plánet sihke ovddidit sámedikki riikkaidgaskasaš doaimma, válmmaštallat sámedikki, stivrra ja lávdegottiid čoahkkimis doaibmasuorgásis gullevaš áššiid sihke dikšut Sámi parlamentáralaš ráđi guoski doaimma.

Virggi sajustanbáiki lea sámiid ruovttuguovlu. Seađusvuđot gelbbolašvuođagáibádussan lea virggi eaktudan skuvlejupmi ja lassin  gáibiduvvo sámegiela dáidu (ásahus 1727/95). Virggi ceavzilis dikšun eaktuda sámekultuvrra, sámiid riikkaidgaskasaš áššiid ja hálddahusbargguid buori dovdamuša, njuovžilis čálalaš ja njálmmálaš eaŋgals- ja ruoŧagiela dáiddu sihke buriid ovttasbargan- ja gulahallandáidduid. Vuordit maiddái máhtu iešráđálaš bargamii, buriid organiseren- ja streassa gierdannávccaid. Virggis čuvvojuvvo guđa mánotbaji geahččalanáigi. Bálkkámáksin mearrašuvvá Sámedikki bálkávuogádaga gáibádusdási IV/II mielde (vuođđobálká 2625,08 euro/mb). Vuođđobálkká lassin máksojuvvojit ahkelasit, mat mearrašuvvet bargohárjánumi mielde, ja sámeguovllus barggadettiin 24 %:a sámeguovllu lassi.

Lassidieđuid barggus addá hálddahushoavda Pia Ruotsala-Kangasniemi tel. 010 839 3106. Sámedikki doibmii sáhttá oahpásmuvvat neahttačujuhusas www.samediggi.fi

Ohcamušaid duođaštusaiguin galgá doaimmahit Sámedikki čállingoddái 24.5.2019 dmu 16.00 rádjai čujuhusas https://www.sympahr.net/public/pq.aspx?6c594992

Anáris 10.5.2018 Sámediggi

Ságajođiheaddji Sanila-Aikio oassálastá Venetsia 58. riikkaidgaskasaš dáiddabiennálii (La Biennale di Venezia)

Suoma Sámedikki ságajođiheaddji Tiina Sanila-Aikio oassálastá Venetsia 58. riikkaidgaskasaš dáiddabiennálii (La Biennale di Venezia) miessemánu 7.-9. beaivve 2019. Ságajođiheaddji oassálastá dáhpáhussii ovttas Norgga ja Ruoŧa Sámedikkiid ságajođiheaddjiiguin Aili Keskitaloin ja Per-Olof Nuttiin sihke Norgga Sámedikki stivrra lahtuin Henrik Olseniin.

Ságajođiheaddji Sanila-Aikio oassálastá ee. Modearnadáidaga musea Kiasma buvttadan Davviriikkalaš paviljonga čájáhusa sihke Suoma Alvar Aalto -paviljongas čájehuvvon A Greater Miracle of Perception -čájáhusa rahpamiidda.

– Vuorddán buorre mielain go beasan oaidnit sámedáiddáriid bargguid dáiddabiennála oassin. Sámedáidaga máŋggabealatvuohta ja -dássásašvuohta geasuhit riikkaidgaskasaččat, ja lea duođaige fiinna ášši, ahte Pieski ja West oassálastiba biennálii, illuda ságajođiheaddji Sanila-Aikio.

Miracle Workers -kollektiivva vuosttas oktasaščájáhusas A Greater Miracle of Perception, mii lea oaidnin láhkai Suoma Alvar Aalto –paviljoŋgas, leat mielde dáiddár Outi Pieski sihke muitaleaddji ja filbmadahkki Suvi West. Outi Pieski báikái čadnon bargu Ovdavázzit – Forewalkers (2019) bajida ovdan riikkaid rájáid badjel ollašuvvan sámiid dáistaleami iešmearridanvuoigatvuođas ássanguovlluset eatnamiidda ja čáziide. Dagus deattuha, ahte eallin ja johtaleapmi galget vuođđuduvvat suvdilis rattát eallimii guovllu luonddudárbbuiguin.

Lassin čájáhusas lea ovdan viđa oanehisfilmmas čohkkejuvvon dagus The Killing of Čáhcerávga (2019), mas Miracle Workers kollektiivva lahtut dutket jeagatmeahttunvuođa potentiála boares jurddašanmálliin. Filmmas ovdanbuktojit bođu, searvvušlaš muitalusat. Loga lasi čájáhusas Frame Finland -siidduin.

Venetsia dáiddabiennáli lea juohke nuppi jagi lágiduvvon modearnadáidaga riikkaidgaskasaš stuorračájáhus. Biennáli čohkiida eanaš čájáhusain paviljoŋgain, maid stáhtat leat jagiid mielde lágidan. Vuosttas Venetsia dáiddabiennáli ordnejuvvui jagi 1895.

 

Lassidieđut: 

Sámedikki ságajođiheaddji Tiina Sanila-Aikio tel. 050 300 1780, tiina.sanila-aikio(at)samediggi.fi

Sámediggái ruhtadeapmi eamiálbmogiid giellajagi várás

Jagis 2019 ávvuduvvo riikkaidgaskasaš eamiálbmogiid gielaid temájahki ja Sámediggi lea nannosit mielde temájagi ollašuhttimis. Sámedikki bargun lea ordnet ieš doaimmaid temájagi áigge sihke movttiidahttit eará doibmiid oassálastit temájahkái.

– Oahpahus- ja kulturministeriija mearreruhta sihkkarastá, ahte Sámediggi sáhttá ovddidit sámegielaid oidnoma Suomas ja dainna lágiin muittuhit gielaid máŋggahápmásašvuođas sihke hábmet ođđa giellageavahansajiid. Lea dehálaš, ahte stáhta oassálastá veahkkeruđain temájahkái, illuda Sámedikki ságadoalli Tiina Sanila-Aikio.

Plána vuolde lea materiála nu njuoratmánáide go ahkeolbmuide: sámegielat njuoratmánágirjjit, sámegielat ivdnelávgun, fergengirji, skuvlalaččaide nuoraid sátnegirjeapplikašuvdna ja giellakampánjat, rávvagat giellaválljejumiide vánhemiidda ja ádjáide ja áhkuide, konsearttat, giellageavaheapmái movttiidahtti materiála, girjjit ja ollu eará.

– Veahkkeruđain mii bastit ollašuhttit máŋggaid áššiid, maid mis ii leat ovdal leamaš vejolašvuohta dahkat. Sámegielaid ealáskahttinbargu bearrašiin sihke mánáid ja nuoraid gaskkas lea ovdánan olu ja mii oaidnit, ahte lea aiddo rivttes áigi buktit positiivvalaš arvvosmahttima ja movttiidahttima giela geavaheapmái iešguđege dásiin ja ná oassálastit iežamet oasis temájahkái, joatká gielladorvočálli Anne Kirste Aikio, guhte vástida prošeavttas.

Dasa lassin Sámediggi boahtá temájagi áigge movttiidahttit fitnodagaid, virgeoapmahaččaid ja eará doibmiid viidát Suomas oassálastit sámegielaid oidnoma lasiheapmái olles riikkas. Davviriikkaid Sámedikkit ordnejitge ovttas Sámi Giellavahku 21.–27.10.2019. Vahku ulbmilin lea, ahte sierra doaibmit Suomas, Norggas ja Ruoŧas válddášedje doaimmasteaset sámegielaid vuhtii juoga nu lágiin.

Sámediggi mieđiha jagi loahpas Sámi gielladahku -bálkkašumi. Bálkkašupmi mieđihuvvo virgeoapmahažžii dahje servošii, mii lea doaimmastis fuopmášahttán temájagi dahje eará láhkái ánssolaččat bargan sámegiela ovddideami ovdii Suomas.

Oahpahus- ja kulturministeriija mieđihii Sámediggái ruhtadeami ON:id eamiálbmogiid gielaid jagi fuopmášahttimii. Ruhtadeapmi mieđihuvvui almmolaš dáidaga ja kultuvrra ovddideaddji prošeavttaid erenomášruhtadeamis ja veahkkeruđa sturrodat lea oktiibuot sullii 47 000 euro. Prošeavttas lea dárkkuhus ollašuhttit sámegielaid geavaheapmái movttiidahtti kampánjjaid, lasihit sámegielaid oidnoma Suomas ja buvttadit erenomážit mánáide ja nuoraide dáhpáhusaid ja materiálaid, mat dorjot giela oahpahallama ja geavaheami. Prošeavtta sierra oasit ollašuhttojuvvojit ovttas iešguđege doibmiiguin, dego Sámedikki nuoraidráđiin ja mánáidkulturguovddáš Mánnuin.

Riikkaidgaskasaš eamiálbmogiid gielaid temájagis lea iežas siidu, gosa čohkkejuvvojit buot dáhpáhusat temájagi áigge.

 

Lassedieđut:

Ságadoalli Tiina Sanila-Aikio, tel. 050 300 1780, tiina.sanila-aikio(at)samediggi.fi

Gielladorvočálli Anne Kirste Aikio, tel. 010 839 3124, anne-kirste.aikio(at)samediggi.fi

Govva: Kevin Francett/ Sámediggi