Sämitige nuorâirääđi lii finnim Aseman Lapset ry Walkers-tooimâ jottee nuorâipargo auto (Walkers auto, ađai wauto) kiävttusis čohčâmáánust juovlâmáánu räi 2018. Ulmen lii keččâliđ, ete maht jottee nuorâipargo sovâččij sämikuávlun. Auto jotá toi neelji mánuppaje ääigi sämikuávlust  ađai Ucjuv, Aanaar, Iänuduv já Suáđigil Laapi palgâs kuávlust. Walkersij toimâ vuáđuduvá ááigán, maid torvoliih rijjâtátuliih rävisulmuuh adeleh nuoráid.

Sämikuávlust jođedijn Wauto lii maaŋgâkielâlâš já -kulttuurlâš tile, kost juáhháást lii vuoigâdvuotâ sárnuđ jieijâs eenikielân. Autost lii ain ucemustáá ohtâ rävisolmooš, kote máttá sämikielâ, mii addel máhđulâšvuođâ kevttiđ sämikielâ. Autost pargeh kieldâi já servikuudij nuorâipargeeh oovtâst rijjâtátulij ulmuiguin. Auto ohtâ ulmen lii-uv västidiđ stuorrâ táárbun finniđ sämikielâlii nuorâipargo sämikuávlun.

Sämitige nuorâirääđi ocá-uv tääl sämikielâlijd rijjâtátulijd Walkers-tooimân. Aseman Lapset ry škuávlee rijjâtátulijd Walkers-toimâprinsiipáid já rijjâtátulâžžân pyehtih ucâluđ puoh paijeel 18-ihásiih. Ulmen lii finniđ fáárun orjâlâš-, anarâš- já nuorttâlâškielâ sárnoo rijjâtátulijd. Wauto jođáččij iänááš kuávlust, kost iä lah nuorâitileh.

Wauto konsept lii oovtkiärdán: moonnâp toho, kost nuorah láá já pyehtip torvolijd rävisulmuid mieldi sii astoááigán. Fáállun láá käähvi, korttâspeelah já rävisulmuuh savâstâllâmskipárin. Táárbu mield nuorâ finnee meid vuáđulub stivrim eellimtilásis. Aseman Lapset ry. oomâst Wauto já koordinist ton tooimâ. Auto, mii puátá tavas, lii seervi kuálmád, já tot lii hahhum Suomâ Lions-lito skeŋkkâruđâiguin.

Sämikielâlâš nuorâipargo ij lah ennuv uárnejum Suomâst. Ucjuv kieldâst tooimâi sämikielâlâš nuorâipargee máttááttâs- já kulttuurministeriö mieđettem proojeektruttâdem vievâst pajeláhháá ive, toimâ nuuvâi čohčuv 2015. Nuorâi mielâst sämikielâlâš nuorâipargee lâi šiev äšši, ko vuossâmuu keerdi nuorâin lâi máhđulâšvuotâ kevttiđ jieijâs eenikielâ nuorâipargoost.

Wauto tooimân puáhtá uápásmuđ Säminuorâi taaiđâtábáhtusâst Anarist 12.4.2018. Uđđâivemáánust kesimáánu räi Wauto tuáimá Kittâl já Suáđigil kuávlust, kost ton tooimâst västideh kieldâi nuorâipalvâlusah.

Lasetiäđuh:

Kaisa Tapiola-Länsman
Sämitige nuorâičällee
kaisa.tapiola-lansman@samediggi.fi
050 382 5179

Niilo Karjalainen
Wauto-toimâvästideijee, Aseman Lapset ry
niilo.karjalainen@asemanlapset.fi
040 575 9364

Sämitigge almoot uuccâmnáál

MERIÁIGÁSII IÄLÁTTÂSČÄLLEE

pargo. Čällee pargon lii ei. valmâštâllâđ sämmilij iäláttâssáid já sämikuávlu eennâmkevttimân lohtâseijee aašijd oosijn, moh kuleh suu toimâsuárgán, sehe toimâđ iäláttâs- já vuoigâdvuotâlävdikode oovdânpyehten. Pargo álgá sopâmuš mield já pištá aainâs 31.12.2018 räi. Ruttâdem visásmittem maŋa pargo juátkoo ive 2019. Viggeh finniđ tooimâst fastâ virge ive 2019 ääigi.

Siäđusvuáđustâslâš tohálâšvuotâvátámâš lii virge vaattâm škovlim já lasseen váttoo sämikielâ táiđu (asâttâs 1727/95). Pargo miänástuvvee hoittám váátá šiev sämikulttuur, sämikuávlu já -iäláttâsâi tubdâm. Pälkki meriduvvoo Sämitige pálkkááttemvuáháduv vátávâšvuotâtääsi IV/IV-II mield (vuáđupälkki kooskâst 2 466,87 – 2 570,81 eurod/mp). Vuáđupäälhi lasseen máksoo 24 % sämikuávlu lase, jis pargee parga sämikuávlust sehe hárjánemlaseh, moh meriduvvojeh pargohárjánem mield.

Ucâmušâid lahtosijdiskuin kalga toimâttiđ Sämitige čäällimkoodán 4.4.2018 tme 16.00 räi čujottâsân Sajos, 99870 Aanaar teikâ čujottâsân info@samediggi.fi. Lasetiäđuid pargoost addel haldâttâhhovdâ Pia Ruotsala-Kangasniemi puh. 010 839 3106. Sämitige tooimân puáhtá uápásmuđ nettičujottâsâst www.samediggi.fi

Anarist 19.3.2018 Sämitigge