Sämitigge valjij tuotâvuotâ- já sovâdâttâmkomissio komissaarin Anni-Siiri Länsman já Heikki Paltto

/in , /by

Sämitige čuákkim valjij 30.9.2022 sämmilij tuotâvuotâ- já sovâdâttâmkomissio jesânin ađai komissaarin ollâopâttâhlehtor, Oulu ollâopâttuv Giellagas-instituut jođetteijee Anni-Siiri Länsman já puásuiulmuu, irâtteijee Heikki Paltto.

Sämitige čuákkim kuulâi, ovdil ko toovâi miärádâs, statâčällee Henrik Haapajärvi. Čuákkim jienâstij aalgâst Sämitige stiivrâ já värijeessân Matti Aikio iävtuttâsâi kooskâst. Stivrâ iävtuttij, ete tievâsčuákkim čuávdá uđđâsist tuotâvuotâ- já sovâdâttâmkomissio komissaarij noomâtmân kyeskee ääši, ko ääšist láá tiettum uđđâ tiäđuh, sehe meerrid eres máhđulijn jotkâtooimâin. Sämitige oovdeb miärádâsâst iävtuttâm puudâ ij lamaš máhđulâš olášuttiđ nuuvt ko olesčuákkim meridij porgemáánust. Stiivrâ iävtuttâs vuoitij jienâstem jienâiguin 11-7 (1 kuárus jienâ).

Čuávuvâžžân čuákkim ovdánij ráđádâlmij maŋa komissaarij valjiimân. Orjâlâškielâ já -kulttuur ovdâsteijee komissaar uásild čuákkim jienâstij Anni-Siiri Länsman já Anne Nuorgâm kooskâst. Länsman väljejui komissaarin jienâiguin 10-4 (2 kuárus jienâ). Anarâškielâ já -kulttuur ovdâsteijee komissaar uásild čuákkim jienâstij Juha Lassila já Heikki Paltto kooskâst. Lassila já Paltto kuohtuuh uážžoin 6 jienâ (4 kuárus jienâ). Paltto väljejui komissaarin vuárbum puáđusin. Sämitiggelaavâ 18 ceehi mield vaaljâin annoo väljejum tot, kote uážžu enâmustáá jienâid. Jis jienah maneh táásá, te vyerbi čuávdá

Sämitige jesâneh Ulla-Maarit Magga já Tauno Ljetoff olášuttev vuárbádem.

Sämitige stivrâ macâttij sämmilij tuotâvuotâ- já sovâdâttâmkomissio tile já jotkâtooimâid uđđâsist čuávdimnáál tievâsčuákkimân, tastko tievâsčuákkimist ij lamaš miärádâs tovâdijn tiätu tast, ete pargo koskâldittem ij lah máhđulâš nuuvt, ete komissio já ton pargeeh iä luovâsmittuuččii pargostis já pargo návt nuvâččij. Sämitige čuákkim meridij oovdeb čuákkimist 9.8.2022 sirdeđ komissaarij valjim ovdâskulij já väldiđ tuotâvuotâ- já sovâdâttâmproosees joođhâ iähtun puudâ.

Stivrâ väridij sämiservijd já ovtâskâs sämmilâš ulmuid máhđulâšvuođâ šoddâđ kuulluđ já muštâliđ jieijâs uáivilis Sämitiigán tuotâvuotâ- já sovâdâttâmkomissio pargo juátkim háárán. Meriääigi räi Sämitiigán toimâttii ohtsis 32 uáivilid. Uáivileh lijjii uáinimnáál Sämitige čuákkimist.

Sämmilij tuotâvuotâ- já sovâdâttâmkomissio asâttui Staatârääđi tooimâst 28. roovvâdmáánu 2021. Asâttem maŋa komissio lii toimâm jiešráđálávt já sorjohánnáá. Vyesimáánust 2022 kuohtuuh Sämitige iävtuttem komissaareh Miina Seurujärvi sehe Heikki J. Hyvärinen pivdijn luovâsmittem komissaar pargostis staatârääđist. Staatârääđi mieđettij iäru Seurujäärvin já Hyvärisâžân komissaar pargoost 25.5.2022 rääjist.

Luuvâ tuotâvuotâ- já sovâdâttâmkomissio mandaat tääbbin.

Lasetiäđuh:

Tuomas Aslak Juuso
Saavâjođetteijee
040 687 3394
tuomas.juuso@samediggi.fi 

Kalle Varis
Lahâčällee
050 384 7040
kalle.varis@samediggi.fi 

Saamelaiskulttuurikeskus Sajos Inarissa.

Sämitige stivrâ maaccât tuotâvuotâ- já sovâdâttâmkomissio tile já jotkâtooimâid uđđâsist čuávdimnáál tievâsčuákkimân

/in , /by

Sämitige stivrâ meridij čuákkimist 31.8.2022 macâttiđ sämmilij tuotâvuotâ- já sovâdâttâmkomissio tile já jotkâtooimâid uđđâsist čuávdimnáál tievâsčuákkimân. Tievâsčuákkimist ij lamaš miärádâs tovâdijn tiätu tast, ete pargo koskâldittem ij lah máhđulâš nuuvt, ete komissio já ton pargeeh iä luovâsmittuuččii pargostis já pargo návt nuvâččij. Stivrâ meridij lasseen kuullâđ kirjálávt sämiseervijd já ovtâskâs sämmilijd ääšist. 

Stivrâ pahudij, ete Sämitige čuákkim miärádâs sirdeđ tuotâvuotâ- já sovâdâttâmkomissio komissaarij valjim ovdâskulij já toollâđ proosees joođhâ uásild puudâ ij paste puoh oosij uásild olášuttiđ. Tuotâvuotâ- já sovâdâttâmkomissio pargo koskâldittem ij lah máhđulâš nuuvt, ete komissio já ton pargeeh iä luovâsmittuuččii pargostis já pargo návt nuvâččij. 

Taat tiätu ij lah lamaš Sämitige tievâsčuákkim kiävtust miärádâs tovâdijn já tondiet stivrâ meridij macâttiđ ääši Sämitige tievâsčuákkimân uđđâsist čuávdimnáál. Sämitige stivrâ valmâštâlškuát čohčâmáánu loopâst toollâmnáál paijeelmiärálii tievâsčuákkim tuotâvuotâ- já sovâdâttâmkomissio pargo háárán. 

Stivrâ tuárju Nuorttâlij sijdâčuákkim tuoivuu juátkiđ proosees nuorttâsämmilij uásild. Stivrâ tuáivu, ete tuotâvuotâ- já sovâdâttâmkomissio pargo ovdeduvvoo nuorttâsämmilij uásild Sämitige tievâsčuákkim miärádâsâst peerusthánnáá. 

Stivrâ pivdá kirjálijd kommentijd  

Sämitige stivrâ movtijdit sämiseervijd já ovtâskâs sämmilijd adelijd kirjálijd kommentijd sämmilij tuotâvuotâ- já sovâdâttâmkomissio tilán sehe uđđâ komissaarij valjiimân. 

Kommentijd puáhtá vuolgâttiđ sämitige čäällimkode kirjimkontturân 19.9.2022 tme 16 räi šleđgâpoostâ peht info@samediggi.fi tâi poostâ peht čujottâsân Sämitigge, Menesjärventie 2 A, 99870 Aanaar. 

Sämitige čuákkimäššikirjeh láá dokumentijn tääbbin. 

Lasetiäđuh: 

Tuomas Aslak Juuso 
Saavâjođetteijee  
040 687 3394 
tuomas.juuso@samediggi.fi  

Saamelaiskäräjien kokous.Kove: Ville Fofonoff

Sämitigge sirdá komissaarij valjim ovdâskulij

/in , /by

Sämitigge meridij pajemiärálii olesčuákkimist majebaargâ 9.8.2022 sirdeđ tuotâvuotâ- já sovâdâttâmkomissio komissaarij valjim ovdâskulij já väldiđ tuotâvuotâ- já sovâdâttâmproosees joođhâ iähtun puudâ. Puudâ ääigi selvâtteh ráávhust, moinnaalijn proosees pyehtih juátkiđ já juátkih meiddei tom selvâttem, maid sämmilâš siärvádâh ääšišt juurdâš. 

Sämitige čuákkim jienâstij stiivrâ iävtuttâs já värijeessân Matti Aikio iävtuttâs kooskâst. Aikio iävtuttâs komissaarij valjim sirdemist ovdâskulij vuoitij jienâiguin 10-9. Stiivrâ iävtuttâs olesčuákkimân lâi, ete olesčuákkim noomât kyehti uđđâ komissaar, main nubbe oovdâst anarâškielâ kielâjuávhu já nubbe tavesämikielâ kielâjuávhu sehe meerrid táárbu mield eres tooimâin proosees joođhâ tááhust. 

Sämitigge meridij oovdeb čuákkimist kesimáánust 2022 tuárjuđ tuotâvuotâ- já sovâdâttâmkomissio juátkim. Čuákkim kuulâi ovdil ko toovâi miärádâs äššitobdein Sämmilij psykososiaallii torjuu ohtâduv hoovdâ Heidi Eriksen, vittâ sämmilij tuotâvuotâ- já sovâdâttâmkomissio algâ aalgâst nomâttum jeessân sehe oovtâ komissio čäällimkode vuávájeijee. 

– Mij kolgâp olesčuákkim linjim mield seelvâtškyettiđ čieŋŋâlubboht uáinuid sämisiärváduvâst sehe tuotâvuotâ- já sovâdâttâmproosees joođhâst. Jesânijn pajanii huámášumeh komissaarmuulsâiävtui meereest sehe proosees ovdedem iävtuin, ko iävtuttâs sämitiggelaavâst ij lah ovdánâm vala ovdâskode kieđâvušmân, iätá Sämitige saavâjođetteijee Tuomas Aslak Juuso.  

Sämmilij tuotâvuotâ- já sovâdâttâmkomissio asâttui Staatârääđi tooimâst 28. roovvâdmáánu 2021. Asâttem maŋa komissio lii toimâm jiešráđálávt já sorjohánnáá. Vyesimáánust 2022 kuohtuuh Sämitige iävtuttem komissaareh Miina Seurujärvi sehe Heikki J. Hyvärinen pivdijn luovâsmittem komissaar pargostis staatârääđist. Staatârääđi mieđettij iäru Seurujäärvin já Hyvärisâžân komissaar pargoost 25.5.2022 rääjist. 

Sämmilij tuotâvuotâ- já sovâdâttâmkomissio 

Sämmilij tuotâvuotâ- já sovâdâttâmproosees ulmen lii tubdâstiđ já árvuštâllâđ historjálii já tááláá olgoštem, mieldi luhâmáin staatâ suddâluttempolitiik, sehe vuoigâdvuođâi luávkkámijd, selvâttiđ maht taah vaigutteh sämmiláid já sii siärvádâhân tááláá tiileest já iävtuttiđ, ete maht puávtáččii ovdediđ ohtâvuođâ sämmilij já Suomâ staatâ kooskâst sehe sämmilij juávhust. 

Tuotâvuotâ- já sovâdâttâmkomissio jesâneh láá vijđes luáttámuš navdâšeijee ulmuuh sämmilij já syemmilii ohtsâškoddeest. Jesâneh láá sorjomettum iäge oovdâst tom pele, mii lii sii iävtuttâm tâi sii valjim. Komissio noomâtmist váldojeh täsipiälásávt huámmášumán jieškote-uv sämikielâjuávhuh. Komissio noomâtmist viggeh väldiđ huámmášumán suhâpeelij täsipiälásâš ovdâstus. 

Luuvâ tuotâvuotâ- já sovâdâttâmkomissio mandaat tääbbin. 

Lasetiäđuh: 

Tuomas Aslak Juuso 
Saavâjođetteijee 
040 687 3394 
tuomas.juuso@samediggi.fi 

Sämitige almosčuákkim uđđâ komissaarij valjiimân tuotâvuotâ- já sovâdâttâmkomission uárnejuvvoo 9.8.2022

/in , /by
Luuvâ lase

Sämitigge tuárju sämmilij tuotâvuotâ- já sovâdâttâmkomissio juátkim – väljee komissaarijd paijeelmiärálii tievâsčuákkimist porgemáánust

/in , /by

Sämitige čuákkim meridij 23.6.2022 tuárjuđ sämmilij tuotâvuotâ- já sovâdâttâmkomissio juátkim, mutâ väljee kyehti komissaar paijeelmiärálii tievâsčuákkimist porgemáánust. Paijeelmiärálâš čuákkim uárnejuvvoo káidusohtâvuođâiguin.

Sämitige čuákkim kuulâi ovdil ko toovâi miärádâs äššitobdein Sämmilij psykososiaallii torjuu ohtâduv hoovdâ Heidi Eriksen, vittâ sämmilij tuotâvuotâ- já sovâdâttâmkomissio algâ aalgâst nomâttum jeessân sehe oovtâ komissio čäällimkode vuávájeijee.

– Mij savâstâlâim čuákkimist vuáđulávt tuotâvuotâ- já sovâdâttâmkomissio pargo joođhâst, já jesânij kooskâst komissio joođhâst lijjii meid sierâ uáivileh. Mij juátkip ääši kieđâvuššâm porgemáánust, iätá Sämitige saavâjođetteijee Tuomas Aslak Juuso.

Sämmilij tuotâvuotâ- já sovâdâttâmkomissio asâttui Staatârääđi tooimâst 28. roovvâdmáánu 2021. Asâttem maŋa komissio lii toimâm jiešráđálávt já sorjohánnáá. Vyesimáánust 2022 kuohtuuh Sämitige iävtuttem komissaareh Miina Seurujärvi sehe Heikki J. Hyvärinen pivdijn luovâsmittem komissaar pargostis staatârääđist. Staatârääđi mieđettij iäru Seurujäärvin já Hyvärisâžân komissaar pargoost 25.5.2022 rääjist.

Sämitige tiäđáttâs 13.6.2022: Sämitigge árvuštâl tuotâvuotâ- já sovâdâttâmkomissio tile já toimâiävtuid huolâlávt

Lasetiäđuh:

Tuomas Aslak Juuso
Saavâjođetteijee
040 687 3394
tuomas.juuso@samediggi.fi 

Anni Koivisto 
I värisaavâjođetteijee 
040 415 5969 
anni.koivisto@samediggi.fi  

Kove: Ville Fofonoff

Sämitigge árvuštâl tuotâvuotâ- já sovâdâttâmkomissio tile já toimâiävtuid huolâlávt

/in , /by

Sämmilij tuotâvuotâ- já sovâdâttâmkomissio asâttui staatârääđi tooimâst 28. roovvâdmáánu 2021. Kiiđâ 2022 ääigi kuohtuuh Sämitige iävtuttem komissaareh láá iäránâm luáttámuštoimâstis já meid komissio váldučällee lii kuáđđám tooimâs. Sämitiggeest eellih tile čoođâ huolâlávt. Äšši kieđâvuššui 8.6.2022 tollum stiivrâ čuákkimist, mast meridii meid tuálvuđ ääši Sämitige čuákkimân meridemnáál.

Sämmilij tuotâvuotâ- já sovâdâttâmkomissio asâttui Staatârääđi tooimâst 28. roovvâdmáánu 2021. Asâttem maŋa komissio lii toimâm jiešráđálávt já sorjohánnáá.  Kiiđâ 2022 ääigi tuotâvuotâ- já sovâdâttâmkomissio lii ornim äššitobdeekulâmijd, moid láá pivdám meid Sämitige ovtâskâs virgeulmuid kuullâmnáál. Sämmilij tuotâvuotâ- já sovâdâttâmkomissio teeivâi Sämitige stiivrâ 9.5.2022 uárnejum teivâdmist vuossâmuu tove. 

Vyesimáánust 2022 kuohtuuh Sämitige iävtuttem komissaareh Miina Seurujärvi sehe Heikki J. Hyvärinen lává pivdám luovâsmittem komissaar pargostis Staatârääđist.  Staatârääđi mieđettij iäru Miina Seurujäärvin já Heikki J. Hyvärisâžân komissaar pargoost 25.5.2022 rääjist. Komissio váldučällee almottij staatârääđi kanslian keččâlemääigi raččomist Sämmilij tuotâvuotâ- já sovâdâttâmkomissio váldučällee virgeest 22.5.2022 rääjist.

Komissio asâtteijeepeelij, ađai Sämitige, Nuorttâlij sijdâčuákkim sehe Staatârääđi kanslia ovdâsteijeeh láá savâstâllâm komissiost tábáhtum nubástusâin já jotkâtooimâin vyesi-kesimáánust 2022 neljii ađai 13.5.2022, 18.5.2022, 25.5.2022 já 2.6.2022. Lasseen komissio asâttâm peleh láá 18.5.2022 kuullâm tiileest puoh vittâ algâ aalgâst komissaarin nomâttum ulmuu sehe 25.5.2022 kulmâ čäällimkode vuávájeijee.

-Sämitigge váldá tile tuođâlávt. Kalga pyehtiđ hammiđ vistig kelijdeijee oleskove tábáhtusâin já ton vuáđuld árvuštâllâđ, ete magarijd čuávdusijd juátkim váátá, paahud Sämitige saavâjođetteijee Tuomas Aslak Juuso.

Tuotâvuotâ- já sovâdâttâmkomissio joođhâst merideh Sämitige čuákkimist

Sämitige stivrâ savâstâlâi tuotâvuotâ- já sovâdâttâmkomissio tiileest já jotkâtooimâin čuákkimistis 8.6.2022. Stivrâ meridij povdiđ 23.6.2022 toollâmnáál Sämitige čuákkimân kuullâmnáál puoh vittâ jeessân, kiäh láá algâ aalgâst nomâttum tuotâvuotâ- já sovâdâttâmkomission, tuotâvuotâ- já sovâdâttâmkomissio čäällimkode vuávájeijeeh, sehe tooimâs kuáđđám váldučällee. Lasseen Sämitige čuákkimân puávdejuvvoo kuullâmnáál sämmilij psykososiaallii torjuu palvâlemohtâduv hahâhovdâ Heidi Eriksen.

Sämitige stivrâ meridij tuálvuđ tievâsčuákkimân meid uđđâ komissaarij valjim iäránâm komissaarij sajan já táárbu mield miärádâs eres tooimâin proosees joođhâ háárán. Toos lasseen stivrâ avžuut saavâjođetteijeid savâstâllâđ proosees sierâ uásipelijguin tooimâin, moiguin visásmiteh proosees luhostummáhđulâšvuođâid já toimâiävtuid. Saavâjođetteijee raportist tievâsčuákkimân äigikyevdilis tile.

-Tile já oleskove čielgâsmittem tiet mij anneep tehálâžžân, ete Sämitige jesânijn lii máhđulâšvuotâ kuullâđ tuotâvuotâ- já sovâdâttâmkomissio pargoost ulmuid, kiäh láá taan räi lamaš mieldi, sehe meid sämmilij psykososiaallii torjuu äššitobdee. Tast maŋa Sämitige jesâneh pyehtih tuáivui mield pyerebeht árvuštâllâđ uđđâ komissaarij nomâttem já tárbulijd tooimâid, juátká I värisaavâjođetteijee Anni Koivisto.

Lasetiäđuh:

Tuomas Aslak Juuso
Saavâjođetteijee
040 687 3394
tuomas.juuso@samediggi.fi 

Anni Koivisto
I värisaavâjođetteijee
040 415 5969
anni.koivisto@samediggi.fi

Saamelaiskäräjien puheenjohtaja Tuomas Aslak Juuso.Kove: Ville Fofonoff

Saavâjođetteijee Juuso tiäddut Sämiaalmug luáttámuš merhâšume vâi tuotâvuotâ- já sovâdâttâmproosees luhostuvá

/in , , /by

Sämitige saavâjođetteijee Tuomas Aslak Juuso toolâi oovtâ lekkâmsahâvuáru Sämmilij tuotâvuotâ- já sovâdâttâmkomissio algâttemseminaarist onne 8.2.2022. Sahâvuárustis Juuso tiäduttij, ete suu uáinu mield Sämiaalmug luáttámuš prosesân lii ohtâ tehálumosijn aašijn tuotâvuotâ- já sovâdâttâmproosees  luhostume tááhust.

– Luáttámuš vuáđudem ij lah veltihánnáá älkkees pargo já tot sáttá väldiđ ääigi. Toos lasseen, ete Sämiaalmug kalga pyehtiđ lyettiđ komission, te mij kolgâp pyehtiđ lyettiđ meid Suomâ staatân já merideijeid. Mij kolgâp pyehtiđ lyettiđ toos, ete taan prosesist čuávu nubástus pyereeb já meid sämmilij uáinust vuoigâlub ohtsâškoodán, iätá Juuso jieijâs saavâst.

Luuvâ saavâ tääbbin tavesämikielân já suomâkielân.

Puheenjohtaja Tuomas Aslak Juuso ja Pääministeri Sanna Marin lehdistötilaisuudessa

Sämmilij tuotâvuotâ- já sovâdâttâmkomissio porgâškuát Suomâst

/in , /by

Staatârääđi lii asâttâm Sämmilij tuotâvuotâ- já sovâdâttâmkomissio staatârääđi čuákkimist 28. roovvâdmáánu. Pargo Sämmilij tuotâvuotâ- já sovâdâttâmkomissio vuáđudem várás lii jotkum uáiviminister Sanna Marin haldâttâsohjelm miäldásávt.

Äšši lii valmâštâllum noonâ oovtâstpargoost Suomâ staatâ, Sämitige já Nuorttâlij sijdâčuákkim ovdâsteijeiguin. Komissio ulmen lii nuurrâđ sämmilij feerimijd Suomâ staatâ já sierâ virgeomâhái tooimâin sehe toohâđ taam tiäđu uáinojeijen. 

Puheenjohtaja Tuomas Aslak Juuso ja Pääministeri Sanna Marin lehdistötilaisuudessa
Saavâjođetteijee Tuomas Aslak Juuso já uáiviminister Sanna Marin tieđettemtilálâšvuođâst 28.10.2021. Kove: Laura Kotila | staatârääđi kanslia

”Mun tuáivum miänástus Sämmilij tuotâvuotâ- já sovâdâttâmkomission ton tehálii pargoost. Mii ohtsâš ulmen lii, ete komissio pargo puáđusin savâstâllâm já luáttámuš sämmilij já staatâ kooskâst lassaan. Tuše tienuuvt, ete mij iberdep maid sämmiliih láá feerim, mij pyehtip tuođâlávt kavnâđ čuávdusijd puátteevuotân”, uáiviminister Sanna Marin iätá.

”Onne vuálgá joton merhâšittee pargo sämmilij teivâm olgoštem sehe staatâ suddâluttempolitiik tovâttem čuávumušâi selvâttem oovdân. Sämmilij algâaalmugvuoigâdvuođâi tuubdâstmist já olášutmist láá ain čuolmah Suomâst. Mun tuáivum, ete taan lusis proosees čoođâ jotemist čuávuh konkreetliih tooimah, moh tuođâlávt ovdedeh sämmilij sajattuv syemmilii ohtsâškoddeest”, paahud Sämitige saavâjođetteijee Tuomas Aslak Juuso.

”Sämmilij tuotâvuotâ- já sovâdâttâmkomissio porgâškuát tehálii já siämmást meid lusis pargo. Komissio pargo älgidijn lii jo tyehin maaŋgâ ive huolâlâš valmâštâllâmpargo sämmilij já staatâ koskâsii ibárdâs já luáttámuš lasettem várás. Mij tuáivup komissio paargon miänástus já tuárvi resursijd tuárjuđ luhostum pargo”, iätá Nuorttâlij ovdâolmooš Veikko Feodoroff.

Sämmilij tuotâvuotâ- já sovâdâttâmkomissio lii toimâstis jiečânâs já jiešráđálâš. Toos kuleh vittâ komissaar, main kyevtis lává asâttum staatârääđi iävtuttâsâst, kyevtis Sämitige iävtuttâsâst já ohtâ Nuorttâlij sijdâčuákkim iävtuttâsâst.

Komissio jesâneh láá: 

  • náguskirjetotkee, riehtitiettui kandidaat Heikki J. Hyvärinen
  • haldâttâhtiettui maister Irja Jefremoff
  • arkkâpispe emeritus, teologia tuáhtár Kari Mäkinen
  • pargoeellimprofessor, riehtitiettuu tuáhtár Hannele Pokka
  • filosofia maister Miina Seurujärvi 

Sämmilij tuotâvuotâ- já sovâdâttâmproosees mittomeerrin lii:

  • Tubdâstiđ já árvuštâllâđ sämmilij historjálii já tááláá olgoštem, mieldiluhâmáin staatâ suddâluttempolitiik, sehe vuoigâdvuođâi luávkkimijd.
  • Selvâttiđ, ete maht taat vaaigut sämmiláid já sii siärvádâhân tááláá tiileest.
  • Iävtuttiđ, ete maht puávtáččii ovdediđ ohtâvuođâ sämmilij já Suomâ staatâ kooskâ sehe sämmilij juávhust.
  • Lasettiđ tiäđuid sämmilijn Suomâ algâaalmugin. 

Tárguttâssân lii meid, ete tuotâvuotâ- já sovâdâttâmproosees puáđusin Suomâ staatâ kuádá ovdâsvástádâs já oovtâst Sämitiggijn, Nuorttâlij sijdâčuákkimáin já eres sämmilâštuáimeiguin naanood sämmilij vuoigâdvuođâi olášume Suomâst. Psykososiaallâš toorjâ lii tehálâš uási Sämmilij tuotâvuotâ- já sovâdâttâmproosees olášume.

Komissio čáálá pargostis raapoort, mii ana sistees meid toimâiävtuttâsâid. Raapoort adeluvvoo staatârááđán, Sämitiigán já Nuorttâlij sijdâčuákkimân 30.11.2023 räi. 

Sämmilij sajattâh algâaalmugin lii torvejum Suomâ vuáđulaavâst. Vuáđulaavâ 17 § 3 moomeent mield sämmilijn algâaalmugin lii vuoigâdvuotâ paijeentoollâđ já ovdediđ jieijâs kielâ já kulttuur.

Aalmugijkoskâsiih ovdâkoveh

Tuotâvuotâ- já sovâdâttâmkomissioinstituutio madduuh láá 1970-lovvoost. Aalmugijkoskâsávt tuotâvuotâkomission tâi tuotâvuotâ- já sovâdâttâmkomission kočodeh prosesijd, main tárkkojeh historjást tábáhtum kollektivlijd verivuođâid. Tuotâvuotâ- já sovâdâttâmkomissioh láá olášuttum suulân 40 staatâst.

Lasetiäđuh:

sierânâsäššitobdee Nina Brander, p. 0295 160 347, vuávájeijee Maiju Ranta, p. 029 160 272, staatârääđi kanslia

Sämitige saavâjođetteijee Tuomas Aslak Juuso, p. 040 687 3394

nuorttâlij ovdâolmooš Veikko Feodoroff, p. 050 396 1297,

Sämitigge tuhhiittij staatâ iävtuttâsâid komissaariävtukkâssân

/in , /by

Sämitigge tuhhiittij čuákkimistis 18.2.2021 oovtmielâlávt staatâ iävtuttem tuotâvuotâ- já sovâdâttâmkomissio komissaariävtukkâsâid. Staatâ komissaariävtukkâsah lává arkkâpispe emeritus, TT Kari Mäkinen já pargoeellimprofessor, OTT Hannele Pokka. 

Staatâ komissaariävtukkâsâi karttim lii tohhum virgeolmoošvalmâštâlmin já äšši kieđâvuššui Sämitige čuákkimist ij-almolâš äššin, tastko ääši kieđâvuššâm lii ain koskân. Nuorttâlij sijdâčuákkimeh kieđâvuššii ääši 20.-21.2.2021.   

Čuávuvâžžân komissio jesânij oohtânheiviittem juátkih Sämitiggijn, Nuorttâlij sijdâčuákkimáin já staatârääđi kansliain. Tuotâvuotâ- já sovâdâttâmkomissio jesâneh nomâttuvvojeh pargosis komissio asâttem ohtâvuođâst.  

Lasetiäđuh ääšist Sämitige nettisiijđoin.

Sämitige čuákkim 1/2021 pevdikirje  

Lasetiäđuh: 

Saavâjođetteijee Tuomas Aslak Juuso, 040 687 3394, tuomas.juuso(at)samediggi.fi 

I värisaavâjođetteijee Anni Koivisto, 040 415 5969, anni.koivisto(at)samediggi.fi 

Saavâjođetteijee išedeijee Laura Olsén-Ljetoff, 010 839 3190 / 040 617 5113, laura.olsen-ljetoff(at)samediggi.fi 

Lähikuva Sajoksen parlamenttisalin pyöreästä pöydästä ennen Saamelaiskäräjien kokousta.Kove: Ville Fofonoff

Sämitigge iävtut tuotâvuotâ- já sovâdâttâmkomissio jesânin Heikki Hyvärinen já Miina Seurujärvi

/in , /by

Sämitige čuákkim meridij 18.12.2020 iävtuttiđ sämmilij tuotâvuotâ- já sovâdâttâmkomissio jesânin ađai komissaarin Heikki Hyvärinen já Miina Seurujärvi. Nuorttâlij sijdâčuákkim lii meridâm iävtuttiđ komissio jesânin Irja Jerfremoff. Lasseen staatârääđi iävtuttâsâst väljejuvvoo kyehti jeessân komission.

Sämitige čuákkim kuulâi ovdil ko toovâi miärádâs staatârääđi ovdâsteijen riehtiminister Anna-Maja Henriksson já olgominister Pekka Haavisto, Sämitige I värisaavâjođetteijee Anni Koivisto, kuullâmtilálâšvuođâi saavâjođetteijee Niila Rahko sehe vuávájeijee Heli Aikio. Sämitige čuákkim jienâstij miärádâsâst.

Ovdil komissaarij nomâttem Sämitigge, Nuorttâlij sijdâčuákkim já staatârääđi taheh komissaariävtukkâsâi oohtânheiviittem. Tuotâvuotâ- já sovâdâttâmkomissio jesâneh láá ulmuuh, kiäid lii vijđes luáttámuš sehe sämmilii já syemmilii siärváduvâst. Jesâneh láá jiešmerideijeeh iäge oovdâst ton uásipele, mii lii sii iävtuttâm teikâ valjim. Komissiost kalgeh leđe jesâneh, kiäin lii eromâš máttu sämmilij eellimtiilijn, kielâst já kulttuurist. Komissio noomâtmist väldih täsipiälásávt huámmášumán jieškote-uv säämi kielâjuávhuid já viggeh väldiđ huámášumán suhâpelij täsipiälásii ovdâstem. Staatârääđi aasât komissio čapo ohtsâšpargoost Sämitiggijn já Nuorttâlij sijdâčuákkimáin já tárguttâs lii, ete komissio aalgât pargo ive 2021 ääigi.

Sämitigge táátui sämisiärváduvâst iävtuttâsâid komissaarin, kiäid siärvádâh ana hiäivulâžžân tooimân já kiäi mietâmâš tooimân lii muuneeld visásmittum. Iävtuttâsâid koolgâi miäruštâllâđ. Meriääigi räi komissio jesânijn pottii ohtsis 16 iävtuttâssâd, 14 Sämitiigán já kyehti Nuorttâlij sijdâčuákkimân. Iävtuttum ulmuuh lijjii ohtsis 10, main 9 olmožid láá iävtuttum Sämitiigán.

Lasseen Sämitigge ornij kulâmijd iävtuttum komissaarij valjiimist. Kuullâmtilálâšvuođah uárnejuvvojii káidusohtâvuođâiguin koronatile tiet. Kuullâmtilálâšvuođah uárnejuvvojii kielâjuávhui mield čuávvoo náál: kulmâ tavesämikielâlii kuullâmtilálâšvuođâ (Ucjuv já Iänuduv kuávlu, Aanaar kuávlu, Vuáču kuávlu já eres Suomâ), ohtâ anarâškielâlâš kuullâmtilálâšvuotâ, ohtâ nuorttâlâškielâlâš kuullâmtilálâšvuotâ sehe ohtâ suomâkielâlâš kuullâmtilálâšvuotâ. Meid nuorâirääđi ornij jieijâs kuullâmtilálâšvuođâ säminuorâid.

Káiduskuullâm lasseen Sämitigge ornij máhđulâšvuođâ adeliđ uáivilis komissaariävtukkâsâin meid puhelin peht sehe šleđgâpoostâ já poostâ peht.

Káiduskuullâmtilálâšvuođâi saavâjođetteijen lâi psykiatrâlâš pyecceitipšoo Niila Rahko já čällen Sämitige meriáigásâš vuávájeijee Heli Aikio. Kulâmijn lii čuákkejum raapoort, mast váldojeh huámmášumán ulmui adelem uáivileh tuotâvuotâ- já sovâdâttâmkomissaarijn vattum jiešvuođâin já máátust sehe toorjâ iävtukkâssân orroo ulmui. Raportist láá váldám huámmášumán puoh 17.11.2020 räi puáttám uáivilijd.

Sämmilij tuotâvuotâ- já sovâdâttâmkomissio

Komissio jesânin Sämitiigán iävtuttum ulmuuh já vuáđustâsah

Lasetiäđuh

Saavâjođetteijee Tuomas Aslak Juuso puh. 040 687 3394 / 010 839 3101, tuomas.juuso(at)samediggi.fi

I värisaavâjođetteijee Anni Koivisto puh. 040 415 5969, anni.koivisto(at)samediggi.fi

Saavâjođetteijee išedeijee Laura Olsén-Ljetoff puh. 010 839 3190 / 040 617 5113, laura.olsen-ljetoff(at)samediggi.fi