Sämmilij parlament 50 ive juhle juhloo skammâmáánust 2023 

/in , /by

Sämmilij parlament 50 ive juhle juhloo Säämi kulttuurkuávdáš Sajosist Anarist majebaargâ 28. skammâmáánu 2023 tme 11 rääjist. Puohah láá tiervâpuáttim čuávvuđ juhle njuolgâ vuolgâttâs peht.  

– Lii tehálâš, ete mij peessâp juhlođ sämmilij parlament 50 ive purdo Suomâst. Taan muddoost lii pyeri adeliđ tubdâstâs sämmilâšpolitiik oovdâstjotteid já puoh sämipolitikkáráid, kiäh láá lamaš mieldi vaaigutmin sierâ iheluuvij ääigi, iätá Sämitige saavâjođetteijee Tuomas Aslak Juuso. – Kyevti aalmug koskâsii tuáimee oovtâstpargo meid váátá diplomaatlii toimâkulttuur já tom, ete kuábbáágin pele ovdâstuslâš rooli ij lah uhkedum, Juuso juátká. 

Sämitige oovdâstjotten iivij 1973–1995 tooimâi Säämi Parlament, mii lâi vuáđudum tast adelum staatârääđi asâttâssáin 9. skammâmáánu 1973. Sämmilij parlamentaarlâš toimâ peesâi-uv joton Suomâst tolebáá, ko eres tave-enâmijn.  

Sämitigge vuáđudui ive 1996 aalgâst jieijâs lavváin ive 1995 uđâsmittum vuáđulaavâ vuáđuld. Onnáá peeivi Sämitige váldutoimâttâh lii Anarist Säämi kulttuurkuávdáš Sajosist, kost meid Sämitige čuákkimeh tuállojeh jieijâs parlamentsalist. 

– Sämitige toimâkieddi lii vijđánâm já pargoh láá lasanâm merhâšitteht iivij ääigi. Sämitigge lii-uv ohtâ sämmilij päikkikuávlu merhâšittee pargoadeleijee já Sämitigge addel pargo aldasáid 80 ulmui sierâlágán fastâ já meriáigásijn pargoin, iätá Sämitige haldâttâhhovdâ Pia Ruotsala-Kangasniemi. 

Sämmilij parlament 50 ive juuhlán pääihi oolâ láá puávdejum Säämi parlament sehe Sämitige jesâneh sierâ valjâpoojijn, sämisiärváduv vaigutteijeeh, Suomâ staatâ já sierâ oovtâstpargopeelij ovdâsteijeeh sehe Sämitige pargeeh.  

Juhle ohjelm almostittoo Sämitige nettisiijđoin www.samediggi.fi. Juhle puáhtá čuávvuđ njuolgâ vuolgâttâssân.

Lasetiäđuh: 

Tuomas Aslak Juuso 
Saavâjođetteijee  
040 687 3394 
tuomas.juuso@samediggi.fi  

Pia Ruotsala-Kangasniemi 
Haldâttâhhovdâ 
010 839 3106 / 040 726 2688 
pia.ruotsala@samediggi.fi 

Muu suuhâ, muu sokkân, mu sohka, minun sukuni – virtuaalliih oppâtiijmeh Säämi aalmugpeeivi kunnen7.–9.2.2023

/in , , /by

Sämikielâi káidusmáttááttâs piiloothaahâ áávvud Säämi aalmugpeeivi 6.2. já uárnee virtuaallijd oppâtiijmijd 7.–9.2.2023. Oppâtiijmeh láá ohtsis kulmâ, já tai fáddán lii suuhâ. Oppâtiijmij ääigi selvân, ete maht suuvah uáinojeh säämi ärbimuusikist, sämikielâlii sánáduvâst já sämimááccuhijn. 

Oppâtiijmeh láá čuosâttum sierâ luokkatassijd, mutâ tijmijd láá tiervâpuáttim puohah, kiäid sämikielah já sämikulttuur kiäsutteh. Tijmijd puáhtá uásálistiđ jieškote-uv uáppee jiečânávt tâi oles luokka puáhtá uásálistiđ siämmáá puudân oovtâst ohtsii piergâsijn. Máttááttâs lii iänááš sämikielân (anarâš-, nuorttâlâš- tâi tavesämikielâ), toorjâkiellân lii suomâkielâ. Tiijmeh heivejeh te meid sämikielâ uáppeid.

Tiijmijd puáhtá čuávvuđ njuolgâ vuolgâttâssân spokkâlmáin servâmliiŋkâid tâi nuuvt, ete kiäččá tiijmij paddiimijd. Tiijmijd puáhtá čuávvuđ nuuvtá ige taarbâš almottâttâđ muuneeld. Tiijmij ääigi lii meid máhđulâš koijâdiđ já savâstâllâđ chatist. Paddiimij keččâmäigi lii 10.–24.2. čujottâsâst https://www.saamenetaopetus.com/tapahtumat-ja-tallenteet.

Äigitavlu: 

majebargâ 7.2. tme 10.00–10.45
Suuhâ já leu’dd nuorttâlâškielân
Luokkaid 3–6
Máttáátteijen Hanna-Maaria Kiprianoff 
Servâmliŋkkâ

koskokko 8.2. tme 10.00–10.45
Suuhâ já sánádâh anarâškielân
Luokkaid 0–2
Máttáátteijee Heli Aikio
Servâmliŋkkâ

tuorâstâh 9.2. tme 10.00–10.45
Suuhâ já mááccuh tavesämikielân
Paješkovlâliih já nubbe tääsi
Máttáátteijen Anne Olli
Servâmliŋkkâ

Pyeri puáttim! Tiõrv pueʹttem! Bures boahtin! Tervetuloa! 

Lasetiäđuh: 

Hanna Helander, hahâhovdâ
hanna.helander@edu.utsjoki.fi  
040 701 2094  

Arla Magga, hahâkoordinaattor 
arla.magga@samediggi.fi  
040 687 5989 

Säämi aalmugpeivi ávuduvvoo jyehi ive kuovâmáánu 6. peeivi. Ávutuáluh láá ärbivuáválávt sierâ kuávluin Säämist já meid Säämi ulguubeln.  

Tun puávtáh uásálistiđ Säämi aalmugpiäiván meid návt: 

  • Uáppáásm Sämitige maaŋgâpiälásii tooimân Säämi kulttuurkuávdáš Sajosist Anarist ávus uuvsâi peeivi 6.2.
  • Uáppáásm Oktavuohta – saamelaistietoa opetukseen -sijđoid. Siijđoin láá jieškote-uv škovlâ- já luokkatáásán vuávájum fáddáuásih já pargopitáh.  
  • Tiiláá video-oppâtiijmijd sämifáádái kieđâvušmân škoovlâst. 
  • Uáppáásm sämikulttuur kieđâvuššee moobiilspelláid já hárjuttâspaakân Nuorâi Akatemia siijđoin.  
  • Uáppáásm Sano se saameksi -eđâldâhsänikiirján orjâlâš-, anarâš- já nuorttâlâškielân. Siijđoin láá meid vittâ uánihisdokument, almoliih tiäđuh sämikulttuurist, soundboard sehe kyehti artikkâl kielâfáádást. 
  • Máttááttâl tavesämikielâ Sämirääđi IndyLan-kielâoppâmheiviittâssáin. Heiviittâs puáhtá luođiđ Apple Storest já Google Playst.
  • Máttááttâl tavesämi-, anarâš- tâi nuorttâlâškielâ párnáid čuosâttum Kaavpugfiäráán-spelláin, moos láá ovtâstittâm lävdi- já korttâspeelâ. Heiviittâs puáhtá luođiđ Apple Storest já Google Playst.
  • Keejâ Muumileehi-rááiđu Yle Areenast tavesämikielân, anarâškielân tâi nuorttâlâškielân.

Säämi aalmugpeivi ávuduvvoo 6.2. – Sämitige tooimân piäsá uápásmuđ Anarist

/in , /by

Säämi aalmugpeivi ávuduvvoo jyehi ive kuovâmáánu 6. peeivi. Ávutuáluh láá ärbivuáválávt sierâ kuávluin Säämist já meid Säämi ulguubeln. Sämitige maaŋgâpiälásii tooimân piäsá uápásmuđ Säämi kulttuurkuávdáš Sajosist Anarist Sämitige ávus uuvsâi peeivi.

Sämitige saavâjođeteijee Tuomas Aslak Juuso tuáivut puohâid tiervâvpuáttim uápásmuđ Sämitige tooimân. – Veikkâ sämmilij vuáđulavâlâš jiešhaldâšem lii majemui aaigij lamaš ennuv savâstâlmijn, ij ain lah mijjân sämmiláidgin veltihánnáá aaibâs čielgâs, ete maid puoh tot mijjân keevâtlávt uáivild, Juuso iätá. Lii-uv eromâš suotâs návt aalmugpeeivi peessâđ pyehtiđ puohháid oovdân tom tehálii pargo, mii Sämitiggeest stuorrâ váimoin já äššitubdâmuššain pargoo, Juuso juátká.

Sämitige ávus uuvsâi peivi álgá Saijoos auditoriost tme 9.45 Sämitige saavâjođetteijee aalmugpeeivi tiervâttâssáin. Sämitige muusikkuávdáš, párnáikulttuurkuávdáš Mánnu já elleekovekuávdáš Skábma västideh peeivi ohjelmist. Sämitigge fáálá kuosijd juhlekäähvi já Saijoos raavâdviäsu Čaijust puáhtá uástiđ juhlepeivimáállás. Pääihi alne lii meid máhđulâš uásálistiđ vuárbumân, mast puáhtá vyeittiđ kyehti liipu Ijâttes ijjâ -festivaalân. Tilálâšvuotâ lii puohháid ávus.

Ohjelm:

Tme 9.45, Sajos auditorio (45 min)
Aalmugpeeivi videotiervâttâs | Sämitige saavâjođetteijee Tuomas Aslak Juuso
Konsert: Vildá | Muusikkuávdáš

Tme 9.45, Sajos, Silba (45 min)
Vuálá škovlâahasij párnáiohjelm | Säämi párnáikulttuurkuávdáš Mánnu

Tme 10.30-15.00, Sajos aula
Uáppáásm Sämitige tooimân! Sämitige almos toimâttâh, škovlim-já oppâmateriaaltoimâttâh já sämikielâ toimâttâh oovdânpuáhtojeh. Mieldi ei. pinssipáájá já spellâmnurkke.

Tme 10.30 já 13.00, vyelgim Saijoos aulast
Oppâmateriaal uápistemrieggee | Škovlim- já oppâmateriaaltoimâttâh

Tme 11.30 já 12.30, Sajos aula
Livđum: Anna Morottaja | Muusikkuávdáš

Tme 14.00, Sajos auditorio (30 min)
Dokument Isoisäni kieli (Äijihân kielâ) | Elleekovekuávdáš Skábma

Tme 15.00 Sajos auditorio (15 min)
Saijoos oovdânpyehtimvideo

Tme 18.00 Sajos auditorio
Revontulten räppäri (Kuovsâkkâsâi ráppár) dokumentelleekove | Elleekovekuávdáš Skábma

Säämi aalmugpeivi

Säämi aalmugpeivi ávuduvvoo jyehi ive kuovâmáánu 6. peeivi. Tot lii ohtâ sämmilij liputtempeeivijn, mut lasseen nuuvt Suomâ, Ruotâ ko Taažâ-uv virgeomâhááh avžuutteh almolâš liputtem.

Säämi aalmugpeivi lii vala nuorâ juhlepeivi. Sämmilij kalenderân tot merkkejui ive 2004. Aalmugpeeivist meridui kuittâg jo ive 1992, já ton madduuh oleh paijeel čyeđe ive tuáhá, ihán 1917. Talle Taažâ Truándimist tollui vuossâmuš tave-eennâmlâš sämičuákkim, mon uáivilin lâi suogârdâllâđ sämmilij eellimmáhđulâšvuođâid já väldiđ pele sämmilijd kyeskee koččâmâššáid. Kieđâvuššum aartâin tehálumoseh lijjii jotemân, enâmij kevttimân, puásuituálun já škovlâjotemân lohtâseijee koččâmušah.

Lasetiäđuh: 

Tuomas Aslak Juuso
Saavâjođetteijee
040 687 3394
tuomas.juuso@samediggi.fi 

Pia Ruotsala-Kangasniemi
Haldâttâhhovdâ
010 839 3106 / 040 726 2688
pia.ruotsala@samediggi.fi

Johanna Alatorvinen
Viestâdemčällee
puh. 010 839 3140 / 040 663 4493
johanna.alatorvinen@samediggi.fi

Liiŋkah:

Tiervâttâsah sämikielân

https://www.flickr.com/photos/samediggi-saamelaiskarajat/albums

  • Sämitige Flickr-tilist tun kaavnah kuuvijd ei. Sämitige tooimâst, jesânijn já tábáhtusâin. Kuuvijd puáhtá kevttiđ tiäđusirdem palvâleijee tárguttâssáid šiev taavij mield. Merkkii kove käldee já kovvejeijee noomâ.

Lasetiäđuh Sämitiggeest:

Sämitigge lii sämmilij ovdâsteijeevâš jiešhaldâšemorgaan Suomâst. Jieijâs lavváin (L974/1995) vuáđudum Sämitigge torvee toimâinis sämmilij algâaalmugkulttuur siäilum já ovdedem. Sämitigge vuáváá já olášut sämmilij kielâlii já kulttuurlii jiešhaldâšem sehe kocá já oovded sämmilij vuoigâdvuođâid já eellimtile.

Mii mááccuh, mij sääʹmpihttâz, min gávttit – virtuaalliih oppâtiijmeh sämmilij aalmugpeeivi kunnen 8.–10.2.2022

/in , , , , /by

Sämikielâi káidusmáttááttâs piiloothaahâ áávvud sämmilij aalmugpeeivi 6.2. já uárnee virtuaallijd oppâtiijmijd sämimááccuhijn 8.–10.2.2022. Oppâtiijmeh láá ohtsis kulmâ, já tai fáddán láá mááccuh, sääʹmpihttâz já gákti. Oppâtiijmij ulmen lii lasettiđ tiäđu sämmilijn jieškote-uv kuávlu sämipihtâsij peht. Tiijmij ääigi selvân ovdâmerkkân, ete moh oosijd kuleh pivtâsolesvuotân, moh iivnijd jieškote-uv sämipihtâsis táválávt láá já maid aašijd puáhtá uáiniđ sämipiivtâs kevttest.

Tiijmijd puáhtá čuávvuđ njuolgâ vuolgâttâssân uásálistemliiŋkâi peht tâi nuuvt, ete kiäččá paddiimijd tiijmij maŋa. Paadijd puáhtá keččâđ 10.–24.2. čujottâsâst https://www.saamenetaopetus.com/tapahtumat-ja-tallenteet. Tiijmijd puáhtá čuávvuđ nuuvtá ige taarbâš almottâttâđ muuneeld. Tiijmij ääigi lii meid máhđulâš koijâdiđ já savâstâllâđ chatist.

Äigitavlu:

majebargâ 8.2. tme 10–11
Gákti
Máttáátteijen Teija Kaartokallio
Servâmliŋkkâ

koskokko 9.2. tme 10–11
Mááccuh
Máttáátteijen Essi Morottaja
Servâmliŋkkâ

tuorâstâh 10.2. tme 15–16
Sääʹmpihttâz
Máttáátteijen Heini Wesslin
Servâmliŋkkâ

Oppâtijmijd láá tiervâpuáttim puohah, kiäid sämmilij aalmugpihtâseh kiäsutteh. Tijmijd puáhtá uásálistiđ jieškote-uv uáppee jiečânávt tâi oles luokka puáhtá uásálistiđ siämmáá puudân oovtâst ohtsii piergâsijn. Tiijmeh láá suomâkielân, mutâ tiijmij ääigi uápásmep meid pihtâsij sämikielâláid nomâttâssáid.

Tärhibeh ravvuuh tijmijd uásálistmân láá tääbbin.

Bures boahtin! Pyeri puáttim! Tiõrv pueʹttem! Tervetuloa!

Lasetiäđuh:

Anni-Sofia Niittyvuopio, hahâhovdâ
anni-sofia.niittyvuopio@edu.utsjoki.fi
040 701 2094

Arla Magga, hahâkoordinaattor
arla.magga@samediggi.fi
040 687 5989


Sämmilij aalmugpeeivi viettip jyehi ive kuovâmáánu 6. peeivi. Ávutuáluh uárnejuvvojeh talle ärbivuáválávt pirrâ Sämieennâm já onnáá peeivi meid Sämieennâm ulguubeln.

Tun puávtáh uásálistiđ sämmilij aalmugpiäiván meid návt:

  • Čuávu Aalmuglâšmuseo virtuaaltábáhtus vástuppeeivi 4.2. tme 9.15 rääjist.
  • Čuávu sämmilij aalmugpeeivi njuolgâ nettivuolgâttâs Sajosist pasepeeivi 6.2. tme 16 rääjist.
  • Uáppáásm Oktavuohta – saamelaistietoa opetukseen-sijđoid. Siijđoin láá jieškote-uv škovlâ- já luokkatáásán vuávájum fáddáuásih já pargopitáh.
  • Tiiláá video-oppâtiijmijd sämifáádái kieđâvušmân škoovlâst.
  • Uáppáásm sämikulttuur kieđâvuššee moobiilspelláid já hárjuttâspaakân Nuorâi Akatemia siijđoin.
  • Uáppáásm Sano se saameksi-eđâldâhsänikiirján orjâlâš-, anarâš- já nuorttâlâškielân. Siijđoin láá meid vittâ uánihisdokument, almoliih tiäđuh sämikulttuurist, soundboard sehe kyehti artikkâl kielâfáádást.
  • Máttááttâl orjâlâškielâ Sämirääđi IndyLan-kielâoppâmheiviittâssáin. Heiviittâs puáhtá luođiđ Apple Storest já Google Playst.
  • Máttááttâl orjâlâš-, anarâš- tâi nuorttâlâškielâ párnáid čuosâttum Kaavpugfiäráán-spelláin, moos láá ovtâstittâm lävdi- já korttâspeelâ. Speelâ puáhtá luođiđ Apple Storest já Google Playst.

Lasetiäđuh Sämikielâi káidusmáttááttâs piiloothaavâst:

Haavâ haaldâš Ucjuv kieldâ já koordinist Sämitigge. Piiloothaavâ ruttâd máttááttâs- já kulttuurministeriö. Piiloothaavâ ulmen lii pyerediđ sämimáttááttâs finnim sämmilij päikkikuávlu ulguubeln. Haahâ addel kyehti oppâtiijme vuáđumáttááttâs/luvâttâhškovlim tievâsmittee sämikielâ máttááttâs káidusohtâvuođâ peht pirrâ Suomâ. Tääl haavâ peht sämikielâ máttááttâs finnejeh 109 uápped. Haahâ lii finnim jotkâruttâdem 31.8.2023 räi. Almottâttâm luuhâmihán 2022–2023 lekkâs oppeet kuovâmáánust 2022.

https://www.saamenetaopetus.com/

https://www.oktavuohta.com/

Uásálist Sämmilij aalmugpiäiván kost peri

/in , /by

Virtuaaltábáhtus vuolgâttuvvoo Sajosist pasepeeivi 6.2. tme 16 rääjist. Sämitige saavâjođetteijee Tuomas Aslak Juuso puávdee puohâid viettiđ Sämmilij aalmugpeeivi oovtâst njuolgâ vuolgâttâs peht.

– Mij viettip sämmilij aalmugpeeivi tääl nube ive virtuaallávt. Mij halijdep čokkiđ Sämiaalmug juhlođ oovtâst taam tehálii peeivi já siämmást kolliđ virtuaallávt ei. mii kulen Sämitiggeest sehe Sämmilij päikkikuávlu jieškote-uv kuávluin, iätá saavâjođetteijee tábáhtusâst

Tábáhtus ääigi mij kuullâp saavâjođetteijee aalmugpeeivi tiervâttâs, sämipárnái tiervuođâid já peessâp navdâšiđ muusikist sehe uánihisfiilmâin. Eidu maailm vuossâmuu livđeskiäru almostittâm Anna Morottaja oovdânpuáhtá ärbivuáválii anarâš muusik. Ulla Pirttijärvi & Ulda -juávhu Käävci iveäigid -konsert puáhtá uáinusân tave luándun kullee teemaid Ulla Pirttijärvi persovnlij muštoi peht já tuálá muusiklii vuárusavâstâllâm ärbivuáválii sämikulttuur já tááláá maailm kooskâ. Toos lasseen mij uáinip ei. Čevetjäävri škovlâlij ráp-video.

Aalmugpeeivi tábáhtus tun peesah čuávvuđ čujottâsâst www.sajos.fi/live.

Tun puávtáh uásálistiđ tábáhtusân já vuolgâttiđ jieijâd aalmugpeeivi tiervâttâs numerân +358 40 663 4493 tekstâviestáin tâi Whatsapp peht. Tun puávtáh meid kyeđđiđ jieijâd tiervâttâs Twitterist tubdâldâssáin #SäämiAalmugpeivi.

Fálusist škovláid já oppâlájádâssáid

Sämitige nuorâirääđi já Nuorâi Akatemia Dihtosis-haahâ juáhá tiäđu sämmilijn já fáálá toimâlijd pargopáájáid oppâlájádâssáid. Pargopáájáid puáhtá tiiláđ vyeli- já paješkoovlân sehe nube tääsi oppâlájádâssáid. Dihtosis-haahâ fáálá uđđâ äššin video-oppâtiijmijd sämmilâšfáádá kieđâvušmân. Video-oppâtiijmijn säminuorah tuáimih máttáátteijen já jođetteh uáppeid sämikulttuurân sierâ uáinui peht. Toos lasseen siijđoin puáhtá tiiláđ pedagogisijd speelâid sämikulttuurist tâi luođiđ Dihtosis-hárjuttâspaakâ tâi iiđeedlekkâm.

Ko tiilááh nuuvtá Dihtosis-materiaalijd ääigild, te kiergânah finniđ movtijdittee, sämmilij pyevtittem oppâmateriaal tuu jieijâd luokan.

Oktavuohta.com-siijđoh fäälih materiaal sämmilâštiäđu máttááttâsân škoovlâin. Sijđoid láá toimâttâm fáádái mield uárnejum oosijd já hárjuttâsâid, moh láá vuávájum jieškote-uv škovlâ- já luokkatassijd.

Säämi aalmugpeivi

Säämi aalmugpeivi ávuduvvoo jyehi ive kuovâmáánu 6. peeivi. Ávutuáluh uárnejuvvojeh talle ärbivuáválávt Sämieennâm jieškote-uv kuávluin já tááláá ääigi meid Sämieennâm ulguubeln.

Säämi aalmugpeivi lii ohtâ sämmilij liputtempeivi. Juhlepeivin aalmugpeivi lii vala nuorâ, tastko syemmilii almenáákán tot merkkejui eskân ive 2004. Aalmugpeeivist meridui kuittâg jo ive 1992, já juhlepeeivi historjá uulât paijeel čyeđe ive keččin, ihán 1917. Talle Taažâ Ruándimist uárnejui vuossâmuš tave-eennâmlâš sämičuákkim, mon ulmen lâi suogârdâllâđ sämmilij eellimmáhđulâšvuođâid já väldiđ pele sämmiláid kyeskee koččâmuššáid.

Lasetiäđuh

Saavâjođetteijee Tuomas Aslak Juuso puh. 040 687 3394 / 010 839 3101, tuomas.juuso(at)samediggi.fi 

Viestâdemčällee Johanna Alatorvinen puh. 010 839 3140 / 040 663 4493, johanna.alatorvinen(at)samediggi.fi

Ijâttes ijjâ -festivaal uárnejuvvoo puáttee oholoopâ Anarist

/in , /by

Ijâttes ijjâ -festivaal uárnejuvvoo Anarist puáttee lávurduv 14.8.2021. Festivaal uárnejuvvoo taan ive oovtâ peeivi ääigi.

Festivaal ääigi lávdásteh ei. Jon Henrik Fjällgren, Ulla Pirttijärvi & Ulda sehe Ailu x Amoc. Jo ärbivuáválâžžân šoddâm njuárustemkišto lii ohjelmist meid taan ive. Toos lasseen ohjelmist lii nuorâikonsert, pop-up -pargopáájáh já festivaal ääigi pištee sämityeje markkâneh.

Festivaal uárnejuvvoo koronatorvolâšvuotâavžuuttâsâi mield. Festivaalkuávlu lii viijđes já torvokooskâi toollâm lii máhđulâš. Meid wc-kapasiteet lii lasettum taan ihán. Festivaal táttu, ete ulmuuh puátih tábáhtusân tuš tiervâsin já ete sij nuávditteh koronatorvolâšvuotâravvuid kooskâin já hygieniast. Tuáivup meid, ete ulmuuh mäksih festivaalkuávlust mielâstubbooht korttáin ko kietâruuđáin.

Festivaal vuolgâttuvvoo maailmvijđosávt stream peht, te fáárun piäsá meid pääihist. Livestream lii čujottâsâst www.sajos.fi/live.

Festivaal ohjelm já lasetiäđuh láá čujottâsâst www.ijahisidja.fi.

Liipuh láá vyebdimnáál čujottâsâst www.lippu.fi.

Ijâttes iijâ uárnejeh oovtâstpargon Anára Sámisearvi ry, Sämitigge, Säämi kulttuurkuávdáš Sajos, Kähviviäsu Čaiju, Säämi máttááttâskuávdáš já Aanaar kieldâ.

Lasetiäđuh:

Pyevtitteijee
Oula Guttorm
oula.guttorm(at)samediggi.fi
+358 40 667 4545

Katja Gauriloff, Sáárá Seipiharju já Sunna Nousuniemi taaiđâtábáhtus tuámárin – tábáhtus ohjelm almostittum

/in , , , , , /by

Elleekovestivrejeijee Katja Gauriloff, freelance-toimâtteijee Sáárá Seipiharju já elleekoverähtee Sunna Nousuniemi tuáimih tuámárin Säminuorâi taaiđâtábáhtusâst, mii uárnejuvvoo puáttee majebaargâ 18.5.2021. 

Säminuorâi taaiđâtábáhtus uárnejuvvoo káidusin tijme 10 rääjist. Erke Eriksen lekkâs tábáhtus jieijâs muusikáin. Meid Ravggon čuojât uđđâ muusik já Talent Suomâst oinum ráppár Mihkku Laiti kolliistâl vuolgâttâsâst! Tun puávtáh uápásmuđ ohjelmân tärhibeht vuoluubeln. 

Ravggon-juávkku lii ráhtám uđđâ skiäru oovtâst pyevtitteijein Duomis Heandaratijn. Skiärru lii masa vaalmâš. Juávhu jesâneh láá siämmááh ko ovdil, mutâ muusik lii muttum aakuustlii folk-pop -muusikist váhá ruávásub já joba keččâleijee suundán. Nuotah láá finnim inspiraatio sovđâ muštoin, persovnlijn kaašmârdmijn já ibbeerdmijn sehe paaloost, ete mii tábáhtuvá luándun, ko mihheen ij innig pijssáá. Taan tábáhtusâst Ravggon čuojât ucceeb juávkkun já čuojât meid uđđâ pittáid, moh iä lah ovdil almolávt čuojâttum. 

Mij vyerdip Säminuorâi taaiđâtábáhtusân paijeel 300 pärnid já nuorâd pirrâ eennâm já uáinip tábáhtusâst 38 videod. Toos lasseen vyerdip čuávvoid taaiđâtábáhtus almolii Youtube-streamvuolgâttâsân, mon liiŋkâ jyehip taaiđâtábáhtus sosiaallii mediast.  

Tábáhtus jođettuvvoo kuulmâ sämikielân. Jođetteijen tuáimih nuorttâlâškielân Anna Lumikivi, anarâškielân Satu Aikio já tavesämikielân Teija Kaartokallio. 

 

Ohjelma tiistaina 18.5.

9.45 Linjáh lekkâseh 
10.00 Viermitábáhtus ohjelm álgá 
Erke Eriksen muusik 
Säämi párnáikulttuurkuávdáá Mánnu video poccui čoorvijn 
Vuossâmuuh videoh 
10.55 Ohtsâš puddâjumppa 
11.00 Ravggon čuojât 
11.30 Peivimäälispuddâ – Sukkâršooki sketsih já koveh ovdebijn tábáhtusâin
12.30 Viermitábáhtus ohjelm juátkoo 
Kyessin Mihkku Laiti 
12.45 Loopah videoh 
14.00 Puátusij almostittem já tábáhtus lopâttem 

Ohjelmân sättih vala puáttiđ nubástusah. Uáinip forgâ! 

 

Lasetiäđuh:
Anni-Sofia Niittyvuopio
anni-sofia.niittyvuopio(at)samediggi.fi
+358 40 620 1917 / +358 10 839 3132

Anni-Sofia Niittyvuopio porgâškuođij taaiđâtábáhtus pargen

/in , , , , /by

Säminuorâi taaiđâtábáhtus orniistâlmeh pessii aalgân, ko Anni-Sofia Niittyvuopio porgâškuođij tábáhtus pargen. Taan ive tábáhtus uárnejuvvoo live stream -vuolgâttâssân majebaargâ vyesimáánu 18. peeivi.

Tábáhtusân puáhtá uásálistiđ tienuuvt, ete kovvee jieijâs uánihisfiilmâid, moi teeman lii ”Mun lam čeppi…”, ”Muái láán čeepih…” teikâ ”Mij lep čeepih…”.

Uásálistee kalga juátkiđ paječalluu ucemustáá ovttáin saanijn, ovdâmerkkân ´Muái láán čeepih tánssáđ…´. Teema ij lah räijejum tärhibeht, mutâ videoh kalgeh leđe sämikielâliih já muštâliđ säminuorâi elimist. Škoovlah uásálisteh já čuávuh tábáhtus stream peht.

Videoid kalga toimâttiđ taaiđâtábáhtuspargojuávkun 3.5. räi. Toos lasseen ornip škovláid škovlim videoi rähtimist nuuvt jotelávt ko máhđulâš.

Tábáhtusâst väljejuvvojeh säminuorâi ovdâsteijeeh väldikodálii Nuori Kulttuuri -festivaalân, mii uárnejuvvoo káidusin. Toos lasseen uásálistest lii máhđulâšvuotâ finniđ videos uássin Skábmagovat -festivaal párnái já nuorâi peeivi.

Anni-Sofia lii uásálistám škovlâahasâžžân masa jyehi taaiđâtábáhtusân. – Lii suotâs orniđ tábáhtus, mii lii lamaš ohtâ škovlâive stuárráámus tábáhtusâin. Tábáhtus lii vaiguttâm ennuv meid muu jieččân pärnivuotân.

Ánne-Sofen puáhtá leđe ohtâvuođâst puoh aašijn, moh lohtâseh taaiđâtábáhtusân. Toos lasseen mij táttup, ete škoovlah almotteh taaiđâtábáhtuspargei ohtâvuođâulmuu, kote tuáimá liŋkkân taaiđâtábáhtuspargee já škoovlâ kooskâst. Almostittep lasetiäđuid äigitaavluin, almottâtmist já škovlimijn nuuvt jotelávt ko máhđulâš. Mušte meid čuávvuđ taaiđâtábáhtus:

saamelaisnuortentaidetapahtuma.com
instagram: @samenuoraid_daiddadahpahus,
facebook peht: Saamelaisnuorten taidetapahtuma
já tábáhtus hastag: #dáiddadáhpahus, #taaiđâtábáhtus, #čeaäppvuõđpeeiv ja #sntaidetapahtuma

Lasetiäđuh:
Anni-Sofia Niittyvuopio
anni-sofia.niittyvuopio(at)samediggi.fi
+358 40 620 1917 / +358 10 839 3132

Nuori Kulttuuri -festivaal: https://nuorikulttuuri.fi/festival/

2.3. Suomâ Sämitige vuáđudempeivi (1996)

/in , /by

Sämitigge lii ive 1996 aalgâst jieijâs lavváin vuáđudum sämmilij jiešhaldâšemorgaan, mii oovdâst sämmilijd pargoidis kullee aašijn nuuvt aalmuglávt ko aalmugijkoskâsávt-uv. Sämitigge vuáđudui ive 1995 uđâsmittum vuáđulaavâ vuáđuld. Ovdil Sämitige iivijn 1973-1995 tooimâi säämi parlament, mii lâi vuáđudum tast adelum staatârääđi asâttâssáin.

Sämitige 21 jesânid já nelji värijeessân väljejuvvojeh sämmilij kooskâst jyehi niäljád ive olášuvvee vaaljâin. Jyehi sämikuávlu kieldâst kalga valjiđ ucemustáá kulmâ ovdâsteijee Sämitiigán.

Sämitige váimustoimâ

Savâstâllâmtilálâšvuotâ Oulust 12.11. ja Ruávinjaargâst 13.11.

/in , /by

Puáđi savâstâllâđ äigikyevdilis aašijn!
Sämitige stiivrâ ornim savâstâllâmtilálâšvuođah juátkojeh Oulust já Ruávinjaargâst.

Oulu, majebargâ 12.11. tme 17-19,
Bar & Café Keltainen Aitta, Aittatori 25, 90100 Oulu

Ruávinjargâ, koskokko 13.11. tme 18-20,
Santa’s Hotel Santa Claus (-1. krs), Korkalonkatu 29, 96200 Rovaniemi

Tilálâšvuođâ tárguttâssân lii teivâđ kuávlu sämmilijguin já savâstâllâđ äigikyevdilis aašijn.
Tiervâpuáttim! Faallâp käähvi.

”Halijdep stivráin juátkiđ vala savâstâllâmtilálâšvuođâi ornim návt loppâ toimâpaje ääigi. Savâstâllâmtilálâšvuođah láá šiev tilálâšvuotâ peessâđ savâstâllâđ já lonottiđ jurduid Sämitige já eromâšávt stiivrâ pargoost sierâ kuávlu sämmilijguin. Tilálâšvuođâin lii meid šiev máhđulâšvuotâ adeliđ evvisijd čuávvoo Sämitiigán, iätá saavâjođetteijee Sanila-Aikio já tuáivut ääšist kiddiistum ulmuid tiervâpuáttim tilálâšvuođáid.

Vaaljâpaje majemuš savâstâllâmtilálâšvuotâ tuálloo Čevetjäävrist 1.12.2019.

Lasetiäđuh:
Saavâjođetteijee Tiina Sanila-Aikio puh. 050 300 1780, tiina.sanila-aikio(at)samediggi.fi