Sääʹmteʹǧǧ iʹlmmat ooccâmnalla mieʹrräiggsaž sääʹmnuõri čeäʹppvuõđpeeiʹv projeʹktt-tuejjla tuej

/in , , /by

Sääʹmteʹǧǧ iʹlmmat ooccâmnalla mieʹrräiggsaž

SÄÄʹMNUÕRI ČEÄʹPPVUÕĐPEEIʹV PROJEʹKTT-TUEJJLA TUEJ

Tuâjj älgg suåppmõõžž mieʹldd da juätkkai 30.04.2019 räijja. Projeʹktt-tuejjlaž vaʹsttad Sääʹmnuõri čeäʹppvuõđpeeiʹv plaanummžest, jäʹrjstumžin, õhttvuõđ ââʹnnmõõžžâst čõddmõõžž vuässõõttji da jäʹrjsteeji kõõskâst di teâđteʹmest, jeeʹres ouddǩiõʹtte valmštõõllmõõžžin da čõđđmõõžž lopptuejain. Čeäʹppvuõđpeiʹvv lij 10. – 11.4.2019 Aanrest Sajoozzâst. Projeʹktt-tuejjlaž tuejjad Sajoozzâst škooultõs- da mättmateriaalkoontrest, koon õuddooumžen toimmai škooultõspiisar.

Tuej oʹnnstam håiddmõš õõlǥat pueʹr sääʹmǩiõllsaž tääiđ. (sääʹmteeʹǧǧest uvddum asetõs 1727/1995). Ääʹrvastââʹnnep oodd jiõččlânji da tääʹrǩeʹld tuejjummža di pueʹrid õhttsažtuejj- da vuârrvaaiktõstääiđaid. Päʹlǩǩ meäʹrrââtt sääʹmteeʹǧǧ päʹlǩǩriâššâm õõlǥtemtääʹzz  V da tõʹst  II tääʹzz mieʹldd (vuâđđpäʹlǩǩ lij 2139,83 euʹrred/mp). Vuâđđpääʹlǩ lââʹssen määuʹset 24 % sääʹmvuuʹd lââʹss da tuejjtobddmõõžž mieʹldd meäʹrrõõtti tuâjjtobddâmlââʹzz.

Ooccmõõžž mätt’tõõttâm- da tuejjtuõđštõõzzineez âlgg tuåimted Sääʹmteeʹǧǧ piizarkådda seärad 13.2. čiâss 16.00 mõõneeʹst neʹttpååʹštin, addrõʹsse info(at)samediggi.fi. Lââʹssteâđaid tuejast oudd škoultõspiisar Ulla Aikio-Puoskari, ulla.aikio-puoskari(at)samediggi.fi, teʹlf. 010 839 3112. Sääʹmteeʹǧǧ tuåimmjumuʹšše vuäitt tobdstõõttâd addrõõzzâst www.samediggi.fi

Aanrest 30.1.2019
Sääʹmteʹǧǧ

Sääʹmteʹǧǧ kåčč tobdstõõttâd tuåimmses saaʹmi meersažpeiʹvven

/in , /by

Sääʹmteʹǧǧ reäšš ääv uusi peeiʹv Aanar Sajoozzâst saaʹmi meersažpeiʹvven 6.2.2019 č 10-15. Peeiʹv mieʹrren lij puʹhtted Sääʹmteeʹǧǧ tuåimmjummuž tobddsen. Puk lie tiõrv pueʹttmen peivva!

Saaʹmi meersažpeeiʹv prääʹzkjet juõʹǩǩ eeʹjj täʹlvvmannu 6. peeiʹv. Prääʹzniǩvuõđid riâššât teʹl ääʹrbvuâlželd pirr Sääʹmjânnam da tääʹl Sääʹmjânnam åålǥbeäʹlnn še. – Taʹnni haaʹleep jeäʹrben puʹhtted Sääʹmteeʹǧǧ tuåimmjummuž tobddsen da kåččap-i pukid ǩeäiʹd miõl ǩeäss, vuässõõttâd ääv uusi peivva Aanar Sajoʹsse, rämmaš Tiina Sanila-Aikio.

– Peeiʹv ääiʹj tobdstõõđât Sääʹmteeʹǧǧ tuåimmeeʹjj ääiʹjpoddsaž teeʹmid, mâʹte meeraikõskksaž alggmeerai ǩiõli teeʹmmekka. Puki Lääʹddjânnmest mainstum sääʹmǩiõli vueʹǩǩ lij sträššjeei da tuejj mõõn tuejjeet sääʹmǩiõli ouʹdde lij samai vääžnai, juätkk Sanila-Aikio.

Ääv uusi peiʹvven prograammâst lij tobdstõõttmõš Sääʹmteeʹǧǧ konttrid da poliittlaž vaikktummuž vuäittmõõžžid. Sääʹmteʹǧǧ taʹrjjad pukid kuõʹssid kaaʹf da Sajoozz poorrâmpäiʹǩǩ Čaijust vuäitt vuäʹstted meersažpeeiʹv peiʹvvporrmõõžž. Peivva vuässõõttji kõõsk vuârbat fanimateriaal da sizzpiâssâmliipp eeʹjj 2019 Iinnteʹmes Inn -festivaaʹle.

Programm »

Saaʹmi meersažpeiʹvv lij õhtt saaʹmi liiʹpptempeeiʹvin. Prääʹzniǩpeiʹvven meersažpeiʹvv lij õinn nuõrr, läʹddlaž kaʹlndaaʹre tõn mieʹrǩǩeeš eman eeʹjjest 2004. Meersažpeeiʹvest tuʹmmješ kuuitâǥ juʹn eeʹjjest 1992, da prääʹzniǩpeeiʹv preddan lie pâʹjjel čueʹtt eeʹǩǩed mââiåʹrnn, eeʹjjest 1917. Teʹl Taarrjânnam Trondheimist rieʹššeš vuõssmõs tâʹvvjânnmallaš sääʹmsåbbar, koon mieʹrren leäi smiõttâd saaʹmi jieʹllemvuäittmõõžžid da väʹldded beäʹl saaʹmid kuõskki kõõččmõõžžid.

Teâtt saaʹmi pirr mättjummša da jeärrsid ǩeäiʹd miõl ǩeäss: www.oktavuohta.com.

Sääʹmnuõri čeäʹppvuõđpeeiʹv 2019 riâššât Sajoozzâst Karigasnjaarǥ škooul siiʹsǩäimmvaiggâdvuõđi diõtt

/in , , /by

Sääʹmnuõri čeäʹppvuõđpeeiʹv riâššât Sääʹmkulttuurkõõskõs Sajoozzâst njuhččmannu 10.-11. peeiʹvin. Šõddmõõžž jeäʹt riõššu ääiʹjab teâđain čooʹreeʹn Uccjooǥǥ Karigasnjaarǥ škooulâst da Njálla-määŋgtuåimpõõrtâst škooulâst očndõõttâm tuõttšõs siiʹsǩäimmvaiggâdvuõđi diõtt. Ääʹššest lij suåppum škooul, kååʹdd da Sääʹmteeʹǧǧ škoouʹlʼjem- da mättmateriaal-luʹvddkååʹdd kõõsk.

Sääʹmteʹǧǧ vuäǯǯai nelljdpeeiʹv 10.1. teâđ Karigasnjaarǥ škooul tuõttšõs siiʹsǩäimmvaiggâdvuõđin. Seämmast kååʹddest tuåivvuš, što šõddmõõžž jeäʹt ääiʹjben suåppum vueʹjjest čooʹreeʹn riõššu Karigasnjaarǥâst. Nuʹtt Sääʹmteʹǧǧ ko Uccjooǥǥ kåʹdd proʹsttje vueʹjj. – Pueʹtted tiõrvân Karigasnjaʹrǧǧe teʹl, ko meeʹst lie puõʹttivuõđâst tiõrvâs sââʹj leʹbe ođđ škooul, ceälkk Uccjooǥǥ čuõvtemjååʹđteei Laura Arola.

Šõddmõõžž äiʹǧǧ da teeʹm seilla seämmanallšeeʹmen.  – Šõddmõš älgg ääʹveempooddin seäradjeäʹǩǩää 10.4. da juätkkai nelljdpeeiʹv 11.4. jeäʹǩǩespeeiʹv räjja, maainâst Sääʹmteeʹǧǧ škoouʹlʼjempiisar Ulla Aikio-Puoskari.

Šõddmõõžž väʹlddkååddlaž teeʹmmen lij teaʹtter da sääʹm teeʹmmen “Mušttlummuž määŋg hääm/Kertomisen monet muodot”. Šõddmõõžž õhttvuõʹtte  jäʹrjstet še âʹlddmättʼtõspeiʹvv mättʼtõõttjid, kookk loʹǩǩe sääʹmǩiõlid dommvuud kooddi oouǥpeäʹlnn. Väʹlddkååddlaž teeʹm vuäʹppõõzz käunnʼje https://nuorikulttuuri.fi/ -seeidain. Sääʹm teeʹmm vuäitt leeʹd õm. juõigg, livđđ, leuʹdd, mainnâz mušttlummuš leʹbe jeeʹres kriiʹlc âʹlnn čuäʹjtum sääʹnnčeäppõs. Tääʹrǩab vuässõõttâmvuäʹppõõzzid iʹlmmtet alggǩiiđâst, leša valmštõõttmõš kannat altteed juʹn ååʹn! Čuâv Sääʹmteeʹǧǧ säiʹmmseeidaid www.samediggi.fi

Âʹlddmättʼtõspeiʹvv 10.4 jäʹrjstet mättʼtõõttjid, kook loʹǩǩe sääʹmǩiõlid ougglõsmättʼtõõzz pääiʹǩ sääʹmvuuʹd oouǥpeäʹlnn, tän peeiʹv pirr teâđad pilotthaʹŋǩǩõõzz koordinaattor. Čuâv haʹŋǩǩõʹsse ävvneei säiʹmmseeidaid še!

Sääʹmteeʹǧǧ škooultõs- da mättmateriaalkoontâr lij šõddmõõžž väʹlddjäʹrjsteejen. Šõddmõõžž riâššmõõžžâst lie mieʹldd še, Lappi ǩeʹrjjpõõrt Jutaava kirjasto-haʹŋǩǩõs, Sääʹmteeʹǧǧ Päärnaikulttuurkõõskõs Mánnu, Sääʹm-musikk-kõõskõs da Nuõrisuåvtõs.

Šõddmõõžž äiʹǧǧtaull:
  • tääʹrǩab teâđ šõddmõõžž šlaajin, iʹlmmtõõttmõõžžâst, säättain da instummšin täʹlvv-pâʹsslašttâm-mannust;
  • iʹlmmtõõttmõš di ǩeâšttõõttmõõžžid vuässõõttjid, da jeeʹres vuässõõttjid ävvan neeʹttest 1.3. da poott 15.3.;
  • čeäʹppvuõđpeeiʹv puuʹtʼteei alttad tuejas Sääʹmteeʹǧǧ škooultõs- da mättmateriaalkonttrest nuʹt kueʹhtt määnpââi õuʹddel šõddmõõžžâst ;
  • Sääʹmnuõri čeäʹppvuõđpeiʹvv Aanrest 10.-11.4.2019 da
  • Väʹlddkååddlaž TEATRIS-šõddmõš Jyväskyläst 24.-26.5.2019.
Lââssteâđ:
  • škooultõs- da mättmateriaalkoontâr: anni.nakkalajarvi(at)samediggi.fi, 040 511 1821; ulla.aikio-puoskari(at)samediggi.fi, 040 767 3101;
  • Sääʹmǩiõli ougglõsõhttvuõđid õõʹnni mättʼtõõzz pilotthaʹŋǩǩõs: arla.magga(at)samediggi.fi, 040 198 5033;
  • Jutaava kirjasto-haʹŋǩǩõs: minna.nakkalajarvi(at)rovaniemi.fi, 016 322 21 77;
  • Sääʹm päärnaikulttuurkõõskõs Mánnu: petra.magga(at)samediggi.fi, 040 732 5503.

Saǥstõõllâmpodd säʹmmlai tuõttvuõtt- da suåvâdvuõttproseeʹss pirr 17.12.

/in , , /by

Saǥstõõllâmpodd säʹmmlai tuõttvuõtt- da suåvâdvuõttproseeʹss pirr Sajoozz auditoriost, Aanrest vuõssaarǥ 17.12.2018 čiâss 1730–1830.

Pääiʹǩ âʹlnn saǥstõõllâmpooddâst lie riikksuåvtõõzz pravleeʹnnʼja riikkpiisar Paula Lehtomäki da vuõiggâdvuõttministeria jååʹđteei Johanna Suurpää.

Saǥstõõllâmpoodd tuʹlǩǩee lääʹdd – sääʹmǩiõl – lääʹdd da tõn vuäitt seuʹrrjed še stream pääiʹǩ addrõõzzâst sogku.fi/live.

Pueʹtted tiõrvân!

 

Saamelaisten asioita koskeva sovintoprosessi -kuulemisraportti

Lisätietoa saamelaisten totuus- ja sovintoprosessin valmistelusta

Riikksuåvtõõzz teâđtõs kuullâmrapoort õlmstâʹttmest (26.11.2018): https://vnk.fi/documents/10616/11086133/559+Sovintokomission+valmistelu+-raportti+koltansaame.pdf

Puäʹđ saǥstõõllâd ääiʹjpoddsaž aaʹšši pirr Aanra mââibaarǥ 4.12.     

/in , /by

Sääʹmteeʹǧǧ halltõõzz riâššâm saǥstõõllâmpoodd juätkkje. Halltõs reäšš såbbres õhttvuõđâst saǥstõõllâmpoodd Aanrest mââibaarǥ 4.12. čiâss 18-20. Poodd mieʹrren lij kaaunõõttâd vuuʹd säʹmmlaivuiʹm da uʹvdded vuäittmõõžž saǥstõõllâd ääiʹjpoddsaž aaʹšši pirr.

Sääʹmteeʹǧǧ halltõs tuäivat Aanar vuuʹd säʹmmlaid tiõrv pueʹttmen vaalpoodd  viiđad saǥstõõllâmpoʹdde! Poodd riâššât Sääʹmkulttuurkõõskõs Sajoozzâst mââibaarǥ 4.12. č. 18-20.

Sääʹmteeʹǧǧ tuåimmplaan-tällõsarvvlõõzz 2018 mieʹldd halltõõzz såbbrid riâššât vuäittmõõžž mieʹldd Uccjooǥǥâst, Vuõccust, Heʹlssnest, Jeänõõǥǥ Karesâvvnest da Aanrest. Såbbri õhttvuõđâst riâššât päiʹǩǩ-kååʹddest saǥstõõllâmpoodd, koʹst halltõs kaaunââtt vuuʹd säʹmmlaivuiʹm, mušttal õʹhtte ǩieʹzzeeʹl halltõspââʹj tuåimi pirr da oudd pannveerǥlab vuäittmõõžž saǥstõõllâd ääiʹjpoddsaž aaʹšši pirr.

Lââʹssteâđ:

Sääʹmteeʹǧǧ saaǥǥjååʹđteei Tiina Sanila-Aikio teʹl. 050 300 1780, tiina.sanila-aikio(at)samediggi.fi

 

Kuva: Mika Huisman / Sajos

Äävai podd sääʹmǩeerjlažvuõđ vueʹjjest

/in , , /by

Sääʹmteʹǧǧ reäšš õõutsââʹjest Kulttuuria kaikille (Kulttuur pukid) -kääzzkõõzzin ođđ sääʹmǩeerjlažvuõđ čiõlǥtõõzz “Čálli giehta ollá guhkás” čuäʹjtempoodd Sajoozzâst 27.11.2018 č. 13-16. Pooddâst puuʹtet ouʹdde ođđ sääʹmǩeerjlažvuõttčiõlǥtõõzz da saaǥǥstõõlat sääʹmǩeerjlažvuõđ vueʹjjest. Pooddâst čiõlǥtõõzz  poʹhtte ouʹdde Kulttuuria kaikille -kääzzkõõzz tuåimmjååʹđteei Rita Paqvalén da haʹŋǩǩõskoordinaattor Helga West. Podd lij äävai pukid.

Čiõlǥtõõzz sääʹmǩeerjlažvuõttsueʹrj vueʹjjest lij raajjam ǩeerjlažvuõtt-tuʹtǩǩeei da jåårǥlõʹtti Johanna Domokos. Čiõlǥtõs âânn seʹst še jeeʹres tuʹtǩǩeeʹji ǩiõl meâldlaž ǩiõččmõõžžid juõʹǩǩ sääʹmǩiõl ǩeerjlažvuõđ vueʹjjest da oudd tääʹrǩes siâzztõõzzid sääʹmǩeerjlažvuõttsueʹrj ooudâsviikkma.

Čiõlǥtõs lij vueʹss Multilingualism and diversity as a resource in the cultural field – employment and integration through literature in the Nordic Countries (Määŋgǩiõllsažvuõtt da määŋgnallšemvuõtt resurssân kulttuursueʹrjest – tuâjjvuõtt da integraatio Tâʹvvjânnmin ǩeerjlažvuõđ čõõđ)  -haʹŋǩǩõõzz, koon teäggat Tâʹvvjânnmi ministersuåvtõs. Haʹŋǩǩõõzzâst vaʹsttad Kulttuuria kaikille -kääzzkõs. Čiõlǥtõõzz õlmstõʹtteš 25.10.2018.

Čiõlǥtõõzz puåđõssân Johanna Domokos eʹtǩǩad 15 konkreettlaž siâzztõõzz, kooi veäkka instituutio da ǩeerjlažvuõttsueʹrj tuåimmjeei vueiʹtte nââneed sääʹmǩeerjlažvuõđ sââʹj, kuâsttjemvuõđ da jieʹllemviõǥǥ. Siâzztõõzz sääʹmǩeerjlažvuõđ sueʹrj pueʹrummša vuâđđâʹvve čiõlǥtõõzzâst mieʹldd leämma vuässõõttji, mâʹte sääʹmǩeʹrjjniiʹǩǩi ǩiõččlâsttmõõžžid, Taarrjânnam da Ruõccjânnam sääʹmtiiʹǧǧi da Sääʹmrääʹđ arvvlõõzzid di čiõlǥtõõzzâst åårrai ǩiõl meâldlaž ǩiõččmõõžžid.

Čiõlǥtõõzzâst puuʹtet ouʹdde tõn, što sääʹmǩeerjlažvuõđâst väjja jiiʹjjes mieʹrrkõskksaž ǩeerjlažvuõttšõddmõõžž, viikkâmkõõskõs, ǩeerjlažvuõttgaʹzeâʹt di sääʹmǩeerjlažvuõttarkiiv, kook tuärjjeʹče sääʹmǩeerjlažvuõđ mieʹldd åårrmõõžž da vaajtõõzz meeraikõõsǩeld še. Sääʹmǩeerjlažvuõđ mieʹldd åårrmõõžž še jeäʹnbõõzz da sääʹmpäärnai da -nuõri mättʼtemplaanin õõlǥči lââʹzzted.

Pueʹtted tiõrvân kulddled da saaǥǥstõõllâd ääʹššest jäänab Aanra! Pooddâst lij tuʹlǩǩõs tâʹvvsääʹmǩiõʹlle.

Lââʹssteâđ:

Rita Paqvalén, tuåimmjååʹđteei, Kulttuuria kaikille -kääzzkõs
rita.paqvalen@cultureforall.fi
040 674 3528

Helga West, haʹŋǩǩõskoordinaattor, Kulttuuria kaikille -kääzzkõs
helga.west@cultureforall.fi
040 594 6596

Anne Kirste Aikio, ǩiõllstaanpiisar, Sääʹmteʹǧǧ
anne-kirste.aikio(at)samediggi.fi
010 839 3124

Riitta Orti-Berg, vs. kulttuurpiisar, Sääʹmteʹǧǧ
riitta.orti-berg(at)samediggi.fi
010 839 3103

Ulla Aikio-Puoskari, škoouʹlʼjempiizar, Sääʹmteʹǧǧ
ulla.aikio-puoskari(at)samediggi.fi
010 839 3112

Puäʹđ saǥstõõllâd ääiʹjpoddsaž aaʹšši pirr Uccjoʹǩǩe vuõssaarǥ 5.11.

/in , /by

Sääʹmteeʹǧǧ halltõõzz riâššâm saǥstõõllâmpoodd juätkkje. Halltõs reäšš såbbres õhttvuõđâst saǥstõõllâmpoodd Uccjooǥǥ kåʹddpõõrtâst vuõssaarǥ 5.11. čiâss 18-20. Poodd mieʹrren lij kaaunõõttâd vuuʹd säʹmmlaivuiʹm da uʹvdded vuäittmõõžž saǥstõõllâd ääiʹjpoddsaž aaʹšši pirr.

Sääʹmteeʹǧǧ toimmplaan-tällõsarvvlõõzz 2018 mieʹldd halltõõzz såbbrid riâžžât vuäittmõõž mieʹldd Uccjooǥǥâst, Vuâččast, Heʹlssnest, Jeänõõǥǥ Karesâvvnest da Aanrest. Såbbri õhttvuõđâst riâžžât päiʹǩǩ-kååʹddest saǥstõõllâmpoodd, koʹst halltõs kaaunââtt vuuʹd säʹmmlaivuiʹm, mušttal õʹhtte ǩieʹzzeeʹl halltõspââʹj tuåimi pirr da oudd pannveerǥlab vuäittmõõžž saǥstõõllâd ääiʹjpoddsaž aaʹšši pirr.

Čõõuč sååbbarkalenter :

5.11.2018 halltõõzz sååbbar da saǥstõõllâmpoodd Uccjooǥǥâst
4.12.2018 halltõõzz sååbbar da saǥstõõllâmpoodd Aanrest
18.12.2018 Sääʹmteeʹǧǧ sååbbar

Lââʹssteâđ:

Sääʹmteeʹǧǧ saaǥǥjååʹđteei Tiina Sanila-Aikio teʹl. 050 300 1780, tiina.sanila-aikio(at)samediggi.fi

 

NEKK – Noveʹllnorldõk 2 – ǩeeʹrj õlmmeempodd Čeʹvetjääuʹr škooul juhll-lõõnjâst 31.10.2018 čiâss 12.00

/in , , /by

Sääʹmteʹǧǧ lij čõõđtam Niilo Aikion ǩeeʹrjtem da Marketta Nilsen kartteem novelnorldõõǥǥ  nuuʹbb vueʹzz tâʹvv-, aanar- da nuõrttsääʹm ǩiõlin. Tâʹvv- da aanarsääʹmǩiõllsa ǩeeʹrj iʹlmstõʹvve  juʹn mõõnni ǩiiđ ääiʹj. Ââʹnnep nuõrttsääʹmǩiõllsa ǩeeʹrj õlmmeemjuuhl Čeʹvetjääuʹr škooul juhll-lõõnjâst seärad 31.10.2018 čiâss 12.00. Puk ǩeäin miõll ǩeäss tän ǩerjja, lie tiõrvpuättam õlmmeempoʹdde.

Ǩeʹrjjrääid nuuʹbb vueʹzz noveeʹll lie juâtkalm vuõssmõs vueʹzz mainnsid nuõrr pääʹrn jieʹllmest Polmakjääuʹr uʹcc meäʹccsiidâst. Ǩeeʹrj ǩeeʹrjteei Niilo Aikio lij jiõčč jeällam ǩeeʹrj Neekk nalla päʹrnn- da nuõrrvuõđâs Polmakjääuʹrest, di mainnsin šâdd tuõtt kuõsktõs tuâlʼjõž äigga da jieʹllma.

Suu eunnai da soojjlõs ǩiõll rääjj mij čõõʹlmi õuʹdde ååskteʹmes da jieʹrštõtti šõddmõõžžid, kook ǩeäʹsse mieʹldez, ǥo lie nuʹt jiijjâsnallšemvuõttsa di tuõđmeâlddsa. Kueʹllšeeʹllma da mieʹcstummša di žeeʹvet-tallu kuulli tuejai pirr Aikio mušttal jiijjâs jieʹllem vuâđald tääʹrǩeld di äʹšštobddmõõžžin.

Karttčeäppneǩ Marketta Nilsenist lij pâi leämmaž miõllǩiõssjen tõt, štõ mäʹhtt sääʹm ooumaž lij silttääm šiõtteed jieʹllmes da piʹrǧǧeemvuõđâs tääʹssteäddast luâđin, vääʹldǩani luâđast tõn jäänab mii lij tarbb. Juõʹǩǩpeiʹvvsa tuej da jieʹllemvueʹjj lie jiânnai mõõnnâm peeiʹv da mannu uʹvddem čuõv meäʹr vaaitõõllmõõžži mieʹldd.  Nilsen veekk kaarti mieʹldd mainnsid čõõđ eeʹjj-jårrõõzz skammpoodd sǩeeʹrmest kõskk-ǩieʹzz iinnteʹmes iʹnne.

Mättʼtõstueʹjstes Nilsen särnn, štõ lij jiânnai ooʒʒääm lââʹssaunnsid, koivuiʹm tâʹvv Lääʹddjânnam  eman lookkad mättjam päärna da lookkmõõžž vaiʹǧǧeen tuõttâm nuõr, kook lie määŋg vuâra ââʹlj, vuäǯǯči loŋŋned lookkad da koon maaiʹlm seeʹst leʹčči aʹlǩǩi jieʹlled mainnsi mieʹldd. “Tieʹttem, štõ määŋgas seeʹst vuõʹrdde tåʹlǩ tõn štõ škooulpeiʹvv puuđči da sij piâzzče kueʹl šeeʹlled, meäcca leʹbe tuõddra. Niilo Aiko Nekk-pääʹrn hååmmain da teempain mainsteei noveeʹll lie puättam mâʹte tiʹllʼjõõzzâst tiuddeed tän vääʹnnvuõđ.” Marketta Nilsen ceälkk.

Säʹmmlaž kulttuuräʹrbbvuõđ seʹrddmõš sookkpuõlvâst nobba lij še ǩeeʹrj täävtõssân. Tät täävtõs lij ǩiõččlõddum raajjâd še kaartʼtõõzzâst. Niilo Aikio noveeʹll mainste aaʹššin da tuejain, kook lie Teänreedd da Polmakjääuʹr päiʹǩǩhistoor da äʹrbbteâđ, koid tåʹlǩ ââʹǩǩoummu teänab moʹštte. Tõn diõtt lij vääžnai, štõ ääʹšš da šõddmõõžž lie puhttum vuõinnsa tuõđeʹld. Tät oʹnnstummuš lij tuejjuum ǩeeʹrjteei da piirsteei kõskksaž õhttsažtuejast.

Nuõrttsäämas ǩeeʹrj lij jåårǥlâttam Raija Lehtola, aanrõšǩiõʹlle Ilmari Mattus da tâʹvvsäämas Niilo Aikio.

Lââʹssteâđ

Škoouʹlʼjem- da mättʼtemaaunâskoontâr

Puäʹđ saǥstõõllâd ääiʹjpoddsaž aaʹšši pirr Karesâvvna vuõssaarǥ 8.10.

/in , /by

Sääʹmteeʹǧǧ halltõõzz riâššâm saǥstõõllâmpoodd juätkkje. Halltõs reäšš såbbres õhttvuõđâst saǥstõõllâmpoodd Karesâvvan ceessnest vuõssaarǥ 8.10. čiâss 18-20. Poodd mieʹrren lij kaaunõõttâd vuuʹd säʹmmlaivuiʹm da uʹvdded vuäittmõõžž saǥstõõllâd ääiʹjpoddsaž aaʹšši pirr.

– Saǥstõõllâmpooddi mieʹrren lij nââneed sääʹmõõutstõõzz da Sääʹmteeʹǧǧ kõskksaž dialoog õhttsaž aaʹšši ooudeem diõtt. Heʹlssen da Vuâčč saǥstõõllâmpoodd lie čuäʹjtam tõn, što näkam pannveerǥlaž saǥstõõllâmpooddid lij tarbb, särnn Sääʹmteeʹǧǧ saaǥǥjååʹđteei Tiina Sanila-Aikio.

Sääʹmteeʹǧǧ halltõs tuäivat Karesâvvan vuuʹd säʹmmlaid tiõrvpueʹttjen vaalpââʹj kuälmad saǥstõõllâmpoʹdde! Poodd riâššât Karesâvvan ceessnest vuõssaarǥ 8.10. čiâss 18-20.

Puõʹtti halltõõzz saǥstõõllâmpooddid riâššât 5.11. Uccjooǥǥâst da 4.12. Aanrest. Pooddi pirr teâđtet mâʹŋŋlõbân lââʹzz.

Sääʹmteeʹǧǧ toimmplaan-tällõsarvvlõõzz 2018 mieʹldd halltõõzz såbbrid riâššât vuäittmõõžž mieʹldd Uccjooǥǥâst, Vuâččast, Heʹlssnest, Jeänõõǥǥ Karesâvvnest da Aanrest. Såbbri õhttvuõđâst riâššât päiʹǩǩ-kååʹddest saǥstõõllâmpoodd, koʹst halltõs kaaunââtt vuuʹd säʹmmlaivuiʹm, mušttal õʹhtte ǩieʹzzeeʹl halltõspââʹj tuåimi pirr da oudd pannveerǥlab vuäittmõõžž saǥstõõllâd ääiʹjpoddsaž aaʹšši pirr.

Lââʹssteâđ:

Sääʹmteeʹǧǧ saaǥǥjååʹđteei Tiina Sanila-Aikio teʹl. 050 300 1780, tiina.sanila-aikio(at)samediggi.fi

Sääʹmteʹǧǧ jääʹrjast valmštõõttâmpeeiʹv auktorisõsttum jåårǥlõʹtti tuʹtǩǩõʹsse 5.10.

/in , /by

Sääʹmǩiõllsa auktorisõsttum jåårǥlõʹtti lie occanj da sääʹmteeʹǧǧ sääʹmǩiõl koontâr haaʹlad tuärjjeed da älšmâʹtted sääʹm jåårǥlõʹttjid čõõđted auktorisõsttum jåårǥlõʹtti tuʹtǩǩõõzz. Auktorisõsttum ǩiõlljåårǥlõʹtti tuʹtǩǩõs vuäitt leeʹd väʹǯǯel valmštõõttâmtaa da valmštõõttâm tuärjjan Sääʹmteʹǧǧ jääʹrjast valmštõõttâmpeeiʹv, koon mieʹrren lij tobdstâʹtted auktorisõsttum ǩiõlljåårǥlõʹtti tuʹtǩǩõʹsse. Valmštõõttâmpeiʹvv lij vuõss-sââʹjest tuʹtǩǩõʹsse iʹlmmtõõttjid, leša valmštõõttâmpeivva vuäiʹtte pueʹtted še jeärraz, ǩeäi miõll ǩeäss tuʹtǩǩõõzz da jåårǥlâʹttemsueʹrj årra.

Mättʼtõshalltõõzz vaaldšem auktorisõsttum ǩiõlljåårǥlõʹtti tuʹtǩǩõõzz jääʹrjstet juõʹǩǩ eeʹjj, tän eeʹjj tuʹtǩǩõspeiʹvv lij sueʹvet 10.11.2018 da iʹlmmtõõttmõš tuʹtǩǩõʹsse lij puuttâm. Auktorisõsttum ǩiõlljåårǥlõʹtti tuʹtǩǩõõzz vuäitt čõõđted pukin Lääʹddjânnmest mainstum sääʹmǩiõlin da tõt lij veerǥlaž tuõđstõs jåårǥlõʹtti ämmat-tääidast. Auktorisõsttum jåårǥlõʹtti lij äʹšštobddi, ǩeäʹst lij vuõiggâdvuõtt raajjâd auktorisõsttum jåårǥlõõzzid. Tuʹtǩǩõõzz siiskõõzz pirr vuäitt lookkâd tääʹrǩben mättʼtõshalltõõzz seeidain: https://www.oph.fi/koulutus_ja_tutkinnot/auktorisoidut_kaantajat

Valmštõõttâmpeeiʹv jäʹrjstet 5.10.2018 čiâss 13-17 Sajoozzâst. Peeiʹv programm  lij kuõʹhtten vueʹzzest, vuõssmõs vueʹzzest čiâss 13-15 tobdstõõđât tuʹtǩǩõõzz siiskõʹsse da raajõʹsse di jåårǥlâʹttem etiiʹǩǩe. Nuuʹbb vueʹzzest čiâss 15-17 tuejjeet ooudǩiõʹtte uvddum tuâjai vuâđald jåårǥlâʹttemharjtõõzzid da sannõstuâj. Peeiʹv äiʹǧǧen vuässõõtti vuäǯǯa vuäʹppõõzzid tuʹtǩǩõʹsse valmštõõttma da ǩiõllhuõllmallaš tuärj. Škooulteeʹjen valmštõõttâmpeeiʹvest lie auktorisõsttum jåårǥlõʹtti Maiju Saijets da Merja Fofonoff.

Iʹlmmtõõttmõš valmštõõttâmpeivva da lââʹssteâđ ǩiõllstaanpiisar Anne Kirste Aikiost:

anne-kirste.aikio@samediggi.fi
Mob. +358 40 707 5626
Teʹl. 010 839 3124