Guoktenuppelot teáhterbihtá Sámenuoraid dáiddadáhpáhussii!

Sámenuoraid dáiddadáhpáhussii almmuheapmi nogai 15.3., ja dáhpáhussii almmuhuvvojedje olu čájálmasat! Dáhpáhusa váldobeaivve, duorastaga 11.4., oaidnit 12 sámegielat čájálmasa, main leat fárus oktiibuot badjel čuođi máná ja nuora. Dáhpáhusa ordnejeaddjit illudit sakka ná valjis oassálastiid mearis.

Lassedieđut dáhpáhusa áigetávvaliin almmuhuvvojit maŋimustá bearjadaga 29.3. Dál lea goit juo sihkar, ahte duorastaga prográmma álggahuvvo árabut go ovdal lea almmuhuvvon, namalassii juo dmu 9.00, vai buot ovdanbuktimiidda lea doarvái áigi ja guhkesmátkkálaččat besset ruovttumátkái áiggil.

Prográmma bottuin lea vejolaš oahpásnuvvat sámegielat mánáidgirjjálašvuhtii, mas bohtet muitalit Dávvi Girji, Kolttakulttuurisäätiö, Anarâškielâ servi ja Kieletär. Dasa lassin sáhttá čákŋat “máinnaslávvui” guldalit máidnasiid dahje guovlalit bargobájiin ja duddjot alcces vaikko dáiddadáhpáhuspinssa dahje iežas girjji! Dáiddadáhpáhussii boahtá maid “iežárseaidni” ja oahpisteapmi dasa, mot luđet sámegielaid bustávaid iežas telefovdnii dahje tablehttii. Bargobájiide ii dárbbaš almmuhit ovddalgihtii.

Dáiddadáhpáhusa rahpandoalut leat gaskavahku 10.4. dmu 18 Sadjosa stuorra auditorias. Dáhpáhussii leat almmuhuvvon joavkkut Helssegis gitta Ohcejohkii, nu ahte vuordimis lea vuot ivdnái ja ilolaš sámegielat ávvubeaivi! Buresboahtin! Oaidnalit Sadjosis!

Lassedieđut:

Anna Lumikivi
010 839 3174, 040 684 1957
anna.lumikivi(at)samediggi.fi
Facebook: @saamelaisnuortentaidetapahtuma
Instagram: @samenuoraid_daiddadahpahus
Dáhpáhusa hashtagit: #sndd2019 / #sntt2019

Sámegielaid gáiddusoahpahusfitnu ohppiidlohku lassána – ain geargá almmuhit oahpahussii

Sámegielaid gáiddusoahpahusa pilohttafitnu ohppiid- ja studeanttaidlohku lassána. Lohkanjagi 2018–2019 fidnu gáiddusoahpahusa leat ožžon oktiibuot sullii 50 oahppi. Lohkanjahkái 2019–2020 oahppit ja studeanttat leat almmuhuvvon badjelaš 60. Almmuhanáigi čuovvovaš lohkanjagi oahpahussii nogai guovvamánus ja almmuheamit dahkkojedje eanaš elektrovnnalaš skoviin. Fitnu oahpahus lea vuođđooahpahusa ja logahatskuvlejumi dievasmahtti sámegiela oahpahus 2 vd/oahpahusjoavku. Lohkanjagi 2019–2020 fidnu pilotere sámegielaid oahpahusa maiddái ovdaoahpahusas.

Vaikke aitosaš almmuhanáigi oahpahussii lea nohkan, de fidnu váldá ain ođđa ohppiid mielde dán giđđalohkanbaji ja lohkanjagi 2019–2020 oahpahussii. Fuolaheaddjit, geat háliidit mánáidasaset anáraš- nuortalaš- dahje davvisámegiela oahpahusa sámiid ruovttuguovllu olggobealde, sáhttet váldit oktavuođa Arla Maggai, arla.magga(at)samediggi.fi, 040 1985 033. Ulbmilin lea, ahte fidnu ráhkada vuogas oahpahusjoavkkuid ja sámegielaid oahpahusbeivviid ja -áiggiid cuoŋománu rádjai, man maŋŋel dat sáddejuvvojit diehtun ohppiid ruovttuskuvllaide.

 

Lassedieđut:

Prošeaktahoavda Eila Tapiola, eila.tapiola(at)utsjoki.fi, 040 7012 094

Prošeaktakoordináhtor Arla Magga, arla.magga(at)samediggi.fi, 040 1985 033

https://www.saamenetaopetus.com/

Sámenuoraid dáiddadáhpáhussii almmuheapmi álggii

Almmuheapmi Sámenuoraid dáiddadáhpáhussii lea álgán, ja dat dáhpáhuvvá neahtas, Webropolis. Almmuheapmi lea rabas 1.-15.3. Buohkat, geat oassálastet dáhpáhussii, galget deavdit almmolaš almmuhanskovi – maiddái sii, geat eai oassálastte teáhter- dahje máinnastangilvvuide.  

Guovttebeaivásaš dáiddadáhpáhus ordnejuvvo dán giđa Anáris Sámekulturguovddáš Sadjosis 10.-11.4. Dáhpáhusa riikaviidosaš temán lea teáhter ja sámetemán Máinnasteami máŋggat hámit. Dáhpáhusa rahpan dollojuvvo gaskavahku 10.4. diibmu 18.00 rájes.

 

Almmuhanskovit gávdnojit dáppe:

  • Skovvi, mainna almmuhuvvojit buot dáhpáhussii oassálastit sáhtuid ja borademiid ordnema dihte.

https://link.webropolsurveys.com/Participation/Public/6f884505-fa16-479c-9065-b881b90d470a?displayId=Fin1718134&surveyLocale=fi

Dasa lassin teáhter- ja muitalangilvvuide oassálasti joavkkut galget deavdit vel sierra almmuhanskoviid.

 

  • Skovvi, teáhtertemái oassálasti joavkkut.

https://link.webropolsurveys.com/Participation/Public/c02b5d28-dd11-4a4f-97e4-48f04ddd03ca?displayId=Fin1716734

Teáhtertemás gávdno eanet diehtu TEATRIS -dáhpáhusa siidduin:  https://nuorikulttuuri.fi/teatris/

  • Skovvi, máinnasteami máŋggat hámit -temái oassálastit.

https://link.webropolsurveys.com/Participation/Public/1a71a970-17ae-406d-b00f-9381d257fc99?displayId=Fin1718038

Máinnasteami máŋggat hámit lea temán hui viiddis, ja das lea lohpi geavahit miellagovahusa! Deháleamos lea, ahte muitaleapmi lea sámegillii ja dan vuolggasadji lea sámekultuvrras. Temái heivvolaš ovdanbuktin sáhttá leat ovdamearkka dihte máinnasteapmi, divtta lohkan, stand-up -komihkka, luohti, leuʹdd dahje livde – sátnedáidda, man ovdanbuktit lávddi nalde!

Dáiddadáhpáhusbargin lea álggahan 25.2. Anna Lumikivi, geainna sáhttá leat oktavuođas buot dáhpáhussii guoski áššiin. Sámediggi ordne dánnai jagi oassálastiid sáhtuid, dárbbu mielde idjadansajiid ja dáhpáhusa váldobeaivvi boradeami.

Dáiddadáhpáhusa plakáhtat leat boahtán ja daid oažžu Sámedikki skuvlen- ja oahppamateriáladoaimmahagas Sajosis. Plakáhta gova lea sárgon 13-jahkásaš Aslak Pieski Gáregasnjárgga skuvllas.

Lassedieđut:

Anna Lumikivi

010 839 3174, 040 684 1957

anna.lumikivi(at)samediggi.fi

Facebook: @saamelaisnuortentaidetapahtuma

Instagram: @samenuoraid_daiddadahpahus

Dáhpáhusa hashtagit: #sndd2019 / #sntt2019

Anna Lumikivi álggahii dáiddadáhpáhusbargin

Sámenuoraid dáiddadáhpáhusa ordnen vuolgá dál duođas johtui. Nuortalašgielat musihkkár Anna Lumikivi lea álggahan dáiddadáhpáhusbargin skuvlen- ja oahppamateriáladoaimmahagas. Dáiddadáhpáhus ordnejuvvo Anáris Sadjosis cuoŋománu 10.-11. beivviin, temán leat teáhter ja muitaleami máŋggat hámit.

Dáhpáhusas válljejuvvojit sámenuoraid ovddasteaddjit riikka dási Teatris-dáhpáhussii, mii ordnejuvvo Jyväskyläs  miessemánus. Dasa lassin bálkkašuvvojit buoremus muitaleaddjit. Muitaleami hámit sáhttet leat iešguđetlágán sátnedáidaga hámit sihke luohti, livđe ja le´udd.

Dáiddadáhpáhus lea Annai oahpis juo ovddežis. – Lean mánnán oassálastán gilvui ja dan maŋŋá lean guktii bargan dáhpáhusa duopmárin ja oktii láidesteaddjin, muitala Anna. – Lea hávski beassat ordnet Sámenuoraid dáiddadáhpáhusa, mas leat nu guhkes árbevierut ja mas lea leamaš nu stuorra mearkkašupmi sámeguovllu mánáide ja nuoraide – nugo maiddái munnjege.

Dáhpáhussii almmuheapmi rahpasa fargga Webropolis. Čuovo Sámedikki fierbmesiidduid, dáhpáhusa iežas Facebook-siidduid ja oassálaste!

Riikka dási Teatris-dáhpáhusa njuolggadusat leat gávdnamis dáppe:

https://nuorikulttuuri.fi/wp-content/uploads/sites/111/2018/12/saannot-teatris-2019.pdf

 

Oktavuohtadieđut

anna.lumikivi(at)samediggi.fi

tel. 010 8393 174 ja 040 684 1957

Facebook: @saamelaisnuortentaidetapahtuma

Instagram: @samenuoraid_daiddadahpahus

Sámegielaid gáiddusoahpahusfidnu galledii Etäkoulu Kulkuri -gáiddusskuvllas

Sámegielaid gáiddusoahpahusa pilohttafidnu prošeaktabargi guovttos Eila Tapiola ja Arla Magga galledeigga 24.–26.1. Helssegis Etäkoulu Kulkuris, Pasila vuođđoskuvlla suoma-sáme-luohkás ja oahpahus- ja bajásgeassinsuorggi dáhpáhusas Educas. Erenomáš galledan- ja oahppanbáikin lei Etäkoulu Kulkuri, mii fállá earret eará iežas eatnigiela oahpahusa gáiddusoahpahussan suopmelaš mánáide, geat ásset miehtá máilmmi.

Prošeaktabargi guovttos deaivvadeigga Etäkoulu Kulkuris skuvlla jođiheaddji Tuija Tammelander, oahpporávvejeaddji Minna Myllymäki ja suomagiela ja girjjálašvuođa oahpaheaddji Virpi Soini. Deaivvadeamis Kulkuri bargit ovdanbukte iežaset neahttaskuvlla, dan kursasiidduid ja maid iežaset geavatlaš barggu neahttadiimmuid doallamis dahje neahttaskuvlla sisdoaluid ráhkadeamis. Maiddái sámegielaid gáiddusoahpahusa pilohttafidnu oaččui ođđa jurdagiid doaimmas ovddideapmái, bistevaš sámegielaid gáiddusoahpahussii Suomas. Sihke Etäkoulu Kulkuri ja sámegielaid gáiddusoahpahusfidnu vásáhus lea, ahte iežas giela oahppamii lea stuorra dárbu ja beroštupmi, ja ahte gáiddusoahpahus láhčá dása erenomáš vejolašvuođa.

Govas gurut rávddas Arla Magga, Tuija Tammelander, Eila Tapiola, Minna Myllymäki ja Virpi Soini

Lassedieđut:

Prošeaktahoavda Eila Tapiola, eila.tapiola(at)utsjoki.fi, 040 7012 094

Prošeaktakoordináhtor Arla Magga, arla.magga(at)samediggi.fi, 040 1985 033

www.saamenetaopetus.com/

Ministeriija ja Oahpahusráđđehus ávžžuhit skuvllaid váldit vuhtii sámiid álbmotbeaivvi

Sámi álbmotbeaivi lea heivvolaš beaivi oahpásnuvvat buorebut Eurohpá uniovnna áidna eamiálbmogii ja dan kultuvrii. Oktavuohta.com -siidduin gávdno valjis materiála oahpahussii. Álbmotbeaivve sáhttá čuovvut Sámi oahpahusguovddáža live-oahppodiimmu. Sápmelašvuhtii sáhttá vuojulduvvat maiddái nuvttá hárjehusgihppagiin dahje skuvlagalledemiiguin.

Sápmelašvuhtii sáhttá oahpásnuvvat ovdamearkka dihte filmma, musihka dahje iešguđegelágan sápmelašvuođa gieđahalli temáid, degomat sámegielaid, sámi gárvvuid, sámi ealáhusaid dahje álbmogii laktáseaddji dovddaldagaid bokte. Oahpahusgeavahussii gávdnojit valjis materiála ja gárvves hárjehusat www.oktavuohta.com-siidduin. Daid lea buvttadan Sámediggi ja ruhtadan Oahpahusráđđehus.

Álbmotbeaivve fállojuvvo sápmelašvuođa live-oahppodiibmu

Sámi oahpahusguovddáš Anáris sádde njuolggosáttan 6.2 dii 12.0012.45 oahppodiimmu, mii gieđahallá sámi kultuvrra. Sátta lea dárkkuhuvvon buohkaide, muhto erenomážit 5.-9. luohkálaččaide čujuhuvvon oahppodiibmu sámi kultuvrras ja sápmelašvuođas. Liveosiid lassin čájehuvvojit oanehisvideot ja -filmmat ja gullat musihka. Sáddaga sáhttá čuovvut čujuhusas sogku.fi/live/.

Sámenuorat galledit badjeskuvllaid

Giđa áigge sápmelaš kultuvrii sáhttá vuojulduvvat nu ahte diŋgo skuvlagalledeaddji muitalit fáttá birra. Sámedikki Nuoraidráđi ja Nuoraid Akademiija (Nuorten Akatemia) Dihtosis-fidnu 12 skuvlagalledeaddji galledit skuvllain muitaleame sámi fáttáid birra nuvttá guovvamánu álggus miessemánu lohppii. Skuvlagalledeami sáhttá diŋgot badjeskuvllaide oaivegávpotguvlui, Turkui, Tamperei, Jyväskyläi, Oului, Roavvenjárgii ja maid Soađegillái ja dan lagaš guovlluide. Galledeamit leat leamašan bivnnuhat, nu ahte giđa galledeamit leat buohkat juo measta várrejuvvon.

Eará guovlluid oahppolágádusat ja eará luohkkádásit sáhttet diŋgot alcceseaset nuvttá hárjehusgihppaga. Gihpa sisttisdoallá oanehis info sápmelašvuođas ja lassin 18 doaimmalaš hárjehusa, maid mielde fáddái sáhttá vuojulduvvat eanet. Skuvlagalledeami dahje hárjehusgihppaga sáhttá diŋgot čujuhusas www.nuortenakatemia.fi. Hárjehusgihppaga sáhttá maid luđet ja printet.

Sápmelaččat leat EU-guovllu áidna eamiálbmot

Sámi álbmotbeaivi ávvuduvvo jahkásaččat 6. guovvamánu. Dat lea ain viehka nuorra ávvobeaivi, daningo suopmelaš kaleandarii beaivi merkejuvvui jagi 2004. Álbmotbeaivvis dahkkui mearrádus liikká juo jagi 1992 ja ávvobeaivvi ruohttasat ain čuođi jagi geahčái, jahkái 1917. Dán jagi ávvuduvvo maiddái ON:id riikkaidgaskasaš eamiálbmotgielaid jahki 2019.

Oahpahus- ja kulturministeriija ja Oahpahusráđđehus dorjot ja ruhtadit iešguđetládje sápmelaš kultur- ja searvedoaimma, árrabajásgeassima ja sámegielaid ja sámegielat oahpahusa.

Ođđa árrabajásgeassinláhka dorvvasta ain vuoigatvuođa sámegielat árrabajásgeassimii. Ministeriija lea dorjon sámegielat árrabajásgeassima oahpaheddjiid skuvlema lasiheami. Dán doaimma dievasmahttet sámi giellabeasit, main lea dehálaš bargu sámegielaid ealáskahttimis. Ministeriija ruhtada maid sámegielaid gáiddusoahpahusa pilohttafidnu 2018–2020, ja dát ovddida hui olu sámegielaid oahpahusa oažžuma sámiid ruovttuguovllu olggobealde. Dán lassin ministeriija lea dorjon sámedikki sámegielat mánáidmateriála ráhkadeamis. Fidnu buvttaduvvo digi- ja speallanmateriála vuollel skuvlaahkásaš mánáide golmma sámegillii.

Oahpahusministtar Sanni Grahn-Laasosa ja Oahpahusráđđehusa hoavdda Olli-Pekka Heinosa videodearvvahusat almmustahttojit oktavuohta.com-siidduin sámi álbmotbeaivve 6.2.

Lassedieđut

Oahpahusráđđehus: Oahpahusráđđeaddi, ovttadaga hoavda Leena Nissilä, leena.nissila(at)oph.fi, tel. 029 533 1035
Oahpahus- ja kulturministeriija: Oahpahusráđđeaddi Anne Onnela, anne.onnela(at)minedu.fi, tel. 029 533 0010

Oktavuohta.com: Skuvlenčálli Ulla Aikio-Puoskari, ulla.aikio-puoskari(at)samediggi.fi, tel. 010 839 3112

Sápmelašvuođa live-oahppodiibmu:
Rektor Eeva-Liisa Rasmus-Moilanen, eeva-liisa.rasmus-moilanen(at)sogsakk.fi, tel. 050 571 9562

Dihtosis-fidnu (skuvlagalledeamit ja hárjehusgihpa):
Prošeaktabargi Minna Lehtola, minna.lehtola(at)samediggi.fi, tel. 010 839 3132

Sámediggi almmuha ohcan láhkái mearreáigásaš sámenuoraid dáiddadáhpáhusa prošeaktabargi doaimma

Sámediggi almmuha ohcan láhkái mearreáigásaš

SÁMENUORAID DÁIDDADÁHPÁHUSAPROŠEAKTABARGI DOAIMMA

Bargu álgá soahpamuša mielde ja joatkašuvvá 30.4.2019 rádjái. Prošeaktabargi bargun lea vástidit Sámenuoraid dáiddadáhpáhusa plánema, lágideami, oktavuođa doallama dáhpáhusa oassálastiiguin ja lágideddjiiguin, dieđiheami, eará ovdaválmmaštallama ja dáhpáhusa loahppabargguid. Dáiddadáhpáhus lágiduvvo 10.-11.4. Sadjosis. Prošeaktabargi bargá Sadjosis skuvlen- ja oahppamateriáladoaimmahagas, man ovdaolmmožin bargá skuvlenčálli.

Doaimma ceavzilis dikšun eaktuda sámegiela máhtu (sámedikkis addojuvvon ásahus 1727/1995). Mii adnit árvvus iehčanas ja fuolalaš bargovuogi ja buriid oktasašbargo- ja gulahallandáidduid. Bálká mearrašuvvá sámedikki bálkávuogádaga gáibádusdási V ja das II luohká mielde (vuođđobálká 2139,83 euro/mb). Vuođđobálkká lassin máksojuvvojit 24 % sámeguovllu lassi ja bargohárjánumi mielde mearrašuvvan vásáhuslasit.

Ohcamušaid oahppo- ja bargoduođaštusaiguin galgá doaimmahit Sámedikki čállingoddái gaskavahku 13.2. dii 16.00 rádjai čujuhusain info(at)samediggi.fi. Lassidieđuid doaimmas addá skuvlenčálli Ulla Aikio-Puoskari, ulla.aikio-puoskari(at)samediggi.fi, tel. 010 839 3112. Sámedikki doibmii sáhttá oahpásmuvvat čujuhusas www.samediggi.fi.

Anáris 30.1.2019

Sámediggi almmuha ohcan láhkái mearreáigásaš doaimmahatčálli barggu

Sámediggi almmuha ohcan láhkái mearreáigásaš

DOAIMMAHATČÁLLI BARGGU

Bargu álgá soahpamuša mielde ja bistá 31.12.2019 rádjai. Doaimmahatčálli bargá Sajosis skuvlen- ja oahppamateriáladoaimmahagas, man ovdaolmmožin bargá skuvlenčálli. Doaimmahatčálli bargguin lea mearriduvvon sámedikki bargoortnega 41 §:s. Seađáhusvuđđosaš gelbbolašvuođagáibádussan lea barggu eaktudan skuvlejupmi ja lassin gáibiduvvo sámegiela dáidu (sámedikkis addojuvvon ásahus 1727/1995).

Virggi ceavzilis dikšuma veahkeha máŋggabealat hárjánupmi doaimmahatbargguide. Mii adnit árvvus iehčanas ja fuolalaš bargovuogi, buriid oktasašbargo- ja gulahallandáidduid. Bálká mearrašuvvá sámedikki bálkávuogádaga gáibádusdási VI ja das II luohká mielde (vuođđobálká 1879,22 euro/mb). Vuođđobálkká lassin máksojuvvojit 24 % sámeguovllu lassi ja bargohárjánumi mielde mearrašuvvan vásáhuslasit.

Ohcamušaid oahppo- ja bargoduođaštusaiguin galgá doaimmahit Sámedikki čállingoddái bearjadaga 22.2.2019 dmu 16.00 rádjai čujuhusain info(at)samediggi.fi. Lassidieđuid virggis addá skuvlenčálli Ulla Aikio-Puoskari, ulla.aikio-puoskari(at)samediggi.fi, tel. 010 839 3112. Sámedikki doibmii sáhttá oahpásmuvvat čujuhusas www.samediggi.fi

Anáris 23.1.2019
Sámediggi

Sámegielaid gáiddusoahpahusfidnu neahttasiiddut rahppojedje – oahpahussii almmuheapmi álgán

Sámegielaid gáiddusoahpahusa pilohttafidnu neahttasiiddut leat rahppojuvvon. Siidduide beassá dán liŋkkas. Oahpahussii lohkanjahkái 2019-2020 sáhttá almmuhit skoviin, mii gávdno siidduin.

Neahttasiiddut fállet áigeguovdilis dieđu sámegielaid gáiddusoahpahusfidnus, dan bargiin ja oahpaheddjiin ja maiddái sámegielat oahppamateriálain. Siidduin gávdnojit maiddái erenomážit skuvllaide ja fuolaheddjiide dárkkuhuvvon fidnu áššegirjjit ja lassin ságastallansiidu ohppiide ja studeanttaide.

Siidduide beaiváduvvojit fidnu áigeguovdilis dáhpáhusat, ođđasat ja dieđáhusat ja maiddái materiálat, maid oahppit ráhkadit. Neahttasiidduid bokte sáhttá maid almmuhit gáiddusoahpahussii lohkanjahkái 2019–2020. Almmuhanáigi lea 22.2.2019 rádjai.

Neahttasiidduid sisdoalu ja gráfalaš plánema vástidedje prošeaktabargit Arla Magga, Eila Tapiola ja Sámedikki skuvlenčálli Ulla Aikio-Puoskari ovttas neahttabuvttadeaddji Eeva Mäkisiin.

 

Lassedieđut:

Prošeaktahoavda  Eila Tapiola, eila.tapiola(at)utsjoki.fi, 040 7012 094

Prošeaktakoordináhtor Arla Magga, arla.magga(at)samediggi.fi, 040 1985 033

Skuvlenčálli Ulla Aikio Puoskari, ulla.aikio-puoskari(at)samediggi.fi, 010 8393 112

https://www.saamenetaopetus.com

Sámenuoraid dáiddadáhpáhus 2019 ordnejuvvo Sajosis Gáregasnjárgga skuvlla sisáibmováttisvuođaid dihte

Sámenuoraid dáiddadáhpáhus 2019 ordnejuvvo Sámekulturguovddáš Sajosis cuoŋománu 10.-11. beivviin. Dáhpáhus ii ordnejuvvo Ohcejoga Gáregasnjárgga skuvllas ja máŋggadoaibmahálla Njálas nugo ovdal lea dieđihuvvon. Skuvllas leat gávnnahan duođalaš sisáibmováttisvuođaid. Skuvla, Ohcejot gielda ja Sámedikki skuvlen- ja oahppamateriálalávdegoddi leat soahpan áššis.

Sámediggi oaččui duorastaga 10.1. dieđu Gáregasnjárgga skuvlla duođalaš sisáibmováttisvuođain. Seammás gieldda bealis sávve, ahte dáhpáhus ii ordnejuvvošii Gáregasnjárggas nugo ovdal lei sohppojuvvon. Sihke Sámediggi ja Ohcejot gielda šallosit dili. – Buresboahtin Gáregasnjárgii boahttevaš jagiin dasto go mis leat dearvvaš sajit dahje ođđa skuvla, dadjá Ohcejoga čuvgehushoavda Laura Arola.

Dáhpáhusa áigi, šlájat ja temát bissot seammán. – Dáhpáhus álggahuvvo rahpandoaluiguin gaskavateahkes 10.4. ja dat joatkkašuvvá duorastaga 11.4. eahketbeaivvi rádjái, muitala Sámedikki skuvlenčálli Ulla Aikio-Puoskari.

Riikaviidosaš temán dáhpáhusas lea teáhter ja sápmelaš temán ”Muitaleami máŋggat hámit / Kertomisen monet muodot”. Dáhpáhusa oktavuođas ordnejuvvo maiddái lagašoahpahusbeaivi oahppiide, geat lohket sámegielaid ruovttuguovllu olggobealde.

Riikaviidosaš temá rávvagat leat https://nuorikulttuuri.fi/ – siidduin. Sápmelaš temá sáhttá leat ovdamearkka dihte juoigan, livđe, leʹudd, máinnasteapmi dahje eará lávddi alde ovdanbuktojuvvon sátnedáidda. Dárkilut oassálastinrávvagat almmustahttojuvvojit álgogiđa áigge, muhto ráhkkaneami gánneha álggahit dál! Čuovo Sámedikki neahttasiidduid www.samediggi.fi

Sámegielaid lagašoahpahusbeaivi 10.4.ordnejuvvo oahppiide, geat lohket sámegielaid gáiddusoahpahusfidnu bokte sámeguovllu olggobealde ja dán beaivvi birra dieđiha fidnu koordináhtor.  Čuovo maiddái fidnu neahttasiidduid, mat rahpasit lagašáiggiid!

Sámedikki skuvlen- ja oahppamateriáladoaimmahat lea dáhpáhusa váldoordnejeaddji. Dáhpáhusa ordnemis leat mielde maiddái Lappi girjerájuid Johtti girjerádju-fidnu, Sámedikki Mánáidkulturguovddáš Mánnu, Sámemusihkkaguovddáš ja Nuoraidráđđi.

Dáhpáhusa áigetávval:

  • dáhpáhusa surggiin, almmuheamis, sáhtuin ja idjademiin dieđihuvvo dárkilappot guovva-njukčamánus;
  • almmuheapmi gilvvu oasseváldiide ja eará oassálastiide rahpasa neahtas 1.3. ja nohká 15.3.;
  • dáiddadáhpáhusa buvttadeaddji álggaha barggus Sámedikki skuvlen- ja oahppamateriáladoaimmahagas sullii guovtti mánotbaji ovdal dáhpáhusa;
  • sámenuoraid dáiddadáhpáhus Anáris Sajosis 10.-11.4.2019 ja
  • riikaviidosaš TEATRIS-dáhpáhus Jyväskyläs 24.-26.5.2019.

Lassedieđut:

  • Skuvlen- ja oahppamateriáladoaimmahat: anni.nakkalajarvi(at)samediggi.fi, 040 511 1821;  ulla.aikio-puoskari(at)samediggi.fi, 040 767 3101;
  • Sámegielaid gáiddusoahpahusa pilohttafidnu: arla.magga(at)samediggi.fi, 040 198 5033;
  • Johtti girjerádju -fidnu: minna.nakkalajarvi(at)rovaniemi.fi, 016 322 21 77;
  • Sámi mánáidkulturguovddáš Mánnu: petra.magga(at)samediggi.fi, 040 732 5503;
  • Sámedikki nuoraidráđđi: elli-marja.hetta(at)samediggi.fi, 050 382 5179.