Sámi šuoŋat! Säämi šuoŋah! Sääʹm suõm! -virtuaalliih muusikpuudah sämmilij aalmugpeiviohhoost

Kove: Sunna Kitti 2021

Sämikielâi káidusmáttááttâs piiloothaahâ uárnee Saamen sävelet! Sámi šuoŋat! Säämi šuoŋah! Sääʹm suõm! -virtuaallijd muusikpuudâid sämmilij aalmugpeiviohhoost 2.–4.2. Muusikpuudâi tárguttâssân lii uápásmittiđ já movtijdittiđ uásálisteid sämmilij ärbivuáválii olgospyehtimân, mii tábáhtuvá muusik peht. Muusikpuudâi fáddán lii ärbivuáválijn vookaalmuusikšlaajâin nuorttâlâš leu’dd, anarâš livđe já orjâlâš luohti já puudâi stivrejeijen tuáimih muusiktaaiđâreh Hanna-Maaria Kiprianoff, Anna Morottaja já Risten Anine Kvernmo Gaup.

Muusikpuudah uárnejuvvojeh káidusohtâvuođâiguin Microsoft Teams peht. Puudah láá čuosâttum vuáđutääsi uáppeid. Škovlâlij lasseen toid láá tiervâpuáttim puoh, kiäh halijdeh oppâd sämmilii muusikärbivyevist ja joba váhá leu’ddjed, livđuđ teikâ juoiggastit!

Äigitavlu

Ma 2.2. tme 10–11

Nuorttâlâš leu’dd, stivrejeijen Hanna-Maaria Kiprianoff

Ko 3.2. tme 10–11

Anarâš livđe, stivrejeijen Anna Morottaja

Tu 4.2. tme 14–15

Orjâlâš luohti, stivrejeijen Risten Anine Kvernmo Gaup

Puudâi ääigi lii máhđulâš koijâdiđ já savâstâllâđ chat peht. Puddáid uásálisteh stivrejeijee lasseen kaidusmáttááttâshaavâ máttáátteijeeh já pargeeh. Muuneeld almottâttâm ij váttoo. Puudah päddejuvvojeh já almostittojeh Sämitige Youtube-kanavast. Paadijd puáhtá keččâđ kuovâmáánu.

Tärhibeh ravvuuh já liiŋkah muusikpuudâi uásálistem várás.

Muusikpuudah láá nuuvtá já toh láá sämikielân.

Lasetiäđuh:

Hanna Helander, proojeekthovdâ
hanna.helander(at)edu.utsjoki.fi,
040 7012 094

Arla Magga, proojeektkoordinaattor
arla.magga(at)samediggi.fi,
040 1985 033

Unna-Maari Pulska, proojeektkoordinaattor
unna.pulska(at)samediggi.fi,
+358 40 614 5949

www.saamenetaopetus.com
www.oktavuohta.com/

Petra Kuuva Sämitige oppâmateriaalčällen

Sämitige stivrâ nomâttij čuákkimistis 10.12.2020 šoddâdemtiettuu maister Petra Kuuva oppâmateriaalčällee viirgán. Meriääigi räi viirgán pottii kulmâ ucâmuš. Kuuvâ porgâškuát ive 2021 aalgâst, ko kuhesáigásâš oppâmateriaalčällee Hannu Kangasniemi páácá iäláttâhân.

Kuuva lii ovdil porgâm kuhháá anarâškielâlii máttááttâs já anarâškielâ máttáátteijen eres luokkataasijn ovdâmáttááttâsâst ain nube tääsi škovliittâsân, já majemustáá Sämitiggeest kielâpiervâlstivrejeijen sehe tađe ovdil sämikielâlii párnáimateriaalhaavâ vuávájeijen.

Kuuva lii ilolâš, ko uážžu porgâškuát sämikielâlij oppâmateriaalijguin. – Lii šiev tobdo, ko piäsá porgâđ oppâmateriaalpargo uássin vijđes viärmáduv já čepis toimâttuv. Haanu porgâm kuhesäigásâš pargo lii šiev vuáđu juátkiđ merhâšittee já tergâdis pargo. Mun vááldám stuorrâ váimoin taam movtijdittee pargo vuástá, iätá Kuuva.

Oppâmateriaalčällee pargon lii valmâštâllâđ sämikielâlii oppâmateriaal pyevtitmân kyeskee aašijd, toimâđ škovlim- já oppâmateriaallävdikode já sämmilij škovlimaašij oovtâstpargo-orgaan oovdânpyehten, čällen já valmâštâllen oppâmateriaalaašijn sehe olášuttiđ lävdikode, oovtâstpargo-orgaan, Sämitige stiivrâ já tige čuákkim toohâm jieijâs toimâsyergi miärádâsâid.

Oppâmateriaalčällee čuávu já haaldâš oppâmateriaalmeriruuđâ kevttim já materiaalhaavâid, kocá meriáigásij oppâmateriaalpargei pargo, huolât oppâmateriaalhaavâi toimâttempargoost, iššeed tige saavâjođetteijee jieijâs toimâsuárgán kullee pargoin sehe tuálá ohtâvuođâ eres sämmilâšornijduumijd raajij rasta já sierâ virgeomâháid.

Škovlim já oppâmateriaal

Lasetiäđuh

Haldâttâhhovdâ Pia Ruotsala-Kangasniemi, 010 839 3106 / 040 726 2688, pia.ruotsala(at)samediggi.fi

Škovlimčälleee Ulla Aikio-Puoskari, 010 839 3112 / 040 767 3101, ulla-aikio-puoskari(at)samediggi.fi

Sämitigge mieđeet stipendijd kuuđâ ollâškovlâuáppei

Oula Järvensivu, Paula Rauhala, Minna Länsman, Rauna Saijets, Ida Maria Helander ja Jonna Kesti finnejeh taan ive Sämitige ollâškovlâuáppeid uáivildum stipendijd. Sämitigge almottij roovvâdmáánu 12. peeivi uccâmnáál ohtsis kuttâ 500 euro stiipeend, moh lijjii uáivildum sämikielâ já/teikkâ sämikulttuur válduaamnâs- já uálgiaamnâsuáppeid sehe uáppeid, kiäh uásálisteh ollâtääsi škovliittâsân, mii vaalmâšt sämikielâlâš pargoelimân.

Stiipeenducâmušah pottii ohtsis 8. Stiipeend uuccâmäigi nuuvâi 11. skammâmáánu. Škovlim- já oppâmateriallävdikodde meridij stipendij jyehimist 25.11. čuákkimist.

Oula Järvensivu lohá Oulu ollâopâttuvvâst tavesämikielâ uáiviamnâsin. Paula Rauhala lohá Taažâ Arktisâš ollâopâttuvvâst Tromsâst Indigenous Studies -oppâolesvuođâ. Minna Länsman uáivi-aamnâs Oulu ollâopâttuvvâst lii sämmilâš kulttuur, já uálgiamnâsin sun lohá tavesämikielâ já museologia. Rauna Saijets lohá sämikielâ já sämmilâš kirjálâsvuođâ Sámi Allaskuvlast Kuovdâkiäinust. Ida Maria Helander lohá sämmilâs kulttuur já tavesämikielâ Oulu ollâopâttuvvâst. Jonna Kesti lohá sosionoomuápuid Laapi áámmátollâškoovlâst Kiemâst.

Sämitigge kijttá puoh stiipeendocceid já tuáivut juáhážân luho já miänástume sehe uápuin et puáttee pargoelimist!

Máttááttâshaldâttâs Cygnaeus-palhâšume sämikielâi káidusmáttááttâshaahân

Máttááttâshaldâttâs palhâšij Ucjuv kieldâ já Sämitige ohtsii sämikielâi káidusmáttááttâshaavâ ive 2020 Cygnaeus-palhâšuumáin. Palhâšume uážžoo almostittii 23.11.2020 viermist uárnejum juhletilálâšvuođâst. Palhâšume keigij Máttááttâshaldâttâs uáivihovdâ Olli-Pekka Heinonen.

Cygnaeus-palhâšume ovtâskâs ulmui, haahân tâi siärvádâhân, kote lii ovdedâm täsiárvusijd já oovtviärdásijd oppâmmáhđulâšvuođâid Suomâst. Palhâšumekriterijn tiäduttii taan ive toimâvuovijd, moh ovdedeh kuáskulâšvuođâ, juksâmvuođâ já inkluusio.

– Taat lii merhâšittee tubdâstâs haahân, mii lii lamaš joođoost já ovdedâm tooimâs eskân muáddi ive, iätá haavâ jođetteijee Hanna Helander Ucjuv kieldâst. Haahâ lii ornim čoovčâ 2018 rääjist anarâš-, nuorttâlâš- já tavesämikielâ máttááttâs sämmilij päikkikuávlu ulguubel. Uáppeemeeri lii lasanâm jyehi ive muáddilov uáppeiguin já tääl tot lii suulân 90 uápped ohtsis 67 škoovlâst. Oovtâstpargoost láá mieldi 36 máttááttâs uárnejeijed.

Haavâ máttáátteijen pargeh taan luuhâmive Henna Aikio, Satu-Marjut Nieminen, Joni Saijets, Sirkka Sanila Sonja Moshnikoff. Haavâ máttááttâsâst láá mieldi mainâstâllâm já sierâdem. – Meid luándupedagogiik puáhtá anneeđ máttááttâsâst, muštâl Helander.

Haahâ taha máhđulâžžân puoh Suomâ sämikielâi já sämmilii kulttuur máttááttâs. Siämmást tot oovded eidu taan máttááttâsân hiäivulii káidusmáttááttâspedagogiik. – Lopâlii ulmen lii sämikielâi já sämikielâlii máttááttâs fastâdem oles enâmist, iätá Sämitige škovlimčällee Ulla Aikio-Puoskari. – Káidusmáttááttâs ovdedemhaahâ lâi vuossâmuš konkreetlâš lävkki täst. Haahâ juátkoo ive 2021 loopâ räi, mon maŋa vyerdip, ete toimâ juátkoo fastâtoimân.

– Mij tuáivup, ete tiätu sämikielâi oppâmmáhđulâšvuođâin oles staatâst finnee palhâšume mield eenâb huámmášume, illood haavâ koordinaattor Arla Magga Sämitiggeest. Tavesämikielâ uáppeeh láá tääl ohtsis 45, anarâškielâ 27 já nuorttâlâškielâ 18. – Ennuv kalga vala porgâđ, vâi mij pastep visásmittiđ sämipárnáid já -nuoráid oovtviärdásii vuoigâdvuođâ jieijâs kielâ máttááttâsân. Mij ovdedep tääl máttááttâs káidusin já viggâp finniđ ááigán nuuvt pyeri tääsi já pedagogisávt pyereest vuávájum olesvuođâ, ko máhđulâš, iätá haavâst ton algârääjist porgâm Magga.

Cygnaeus-palhâšume lii juohhum ive 1981 rääjist. Škovlâhaldâttâs vuáđudij palhâšume kunnijâttiđ Suomâ oppâkenigâsvuođâ eeji Uuno Cygnaeus (1810–1888) mušto. Škovlâhaldâttâs lopâttii ive 1991, já sajan vuáđudum Máttááttâshaldâttâs joođhij palhâšume jyehim. Palhâšume mieđettemvuáđđusijd uđâsmittii ive 2019. Cygnaeus-palhâšuumijn tiädutteh tääl tooimâ, mii oovded täsiáárvu já oovtviärdásâšvuođâ.

Máttááttâshaldâttâs Cygnaeus-palhâšumetoimâkodde valjij sämikielâi káidusmáttááttâs piiloothaavâ ohtsis 29 iävtuttâs já kuuđâ finalist juávhust. Palhâšume väljejeijen tooimáin taan ive proojeektäššitobdee Michaela Moua riehtiministeriöst já professor Markku Jahnukainen Helsig ollâopâttuvâst.

Uáppáásm Cygnaeus-palhâšume 2020 kuuđâ finalistân! Máttááttâshaldâttâs uuđâs 13.10.2020 (suomâkielân) 

 

Lasetiäđuh:

Proojeekthovdâ Hanna Helander, ovdânommâ.suhânommâ@edu.utsjoki.fi

Koordinaattor Arla Magga, ovdânommâ.suhânommâ@samediggi.fi

Škovlimčällee Ulla Aikio-Puoskari, ovdânommâ.suhânommâ@samediggi.fi

Čuávu Máttááttâshaldâttâs Cygnaeus-palhâšume jyehimtilálâšvuođâ viermist!

Máttááttâshaldâttâs nomâttij roovvâdmáánust sämikielâi káidusmáttááttâs piiloothaavâ ohtân Cygnaeus-palhâšume 2020 finalistin. Finalisteh láá ohtsis kuttâ. Palhâšume uážžoo almostittoo viermitilálâšvuođâst vuossaargâ 23.11. tme 12, mon puáhtá čuávvuđ njuolgist taan liiŋkâst. Palhâšume juáhá Máttááttâshaldâttâs uáivihovdâ Olli-Pekka Heinonen.

Sämikielâi káidusmáttááttâshaahâ iävtukkâssân Cygnaeus-palhâšume uážžon (16.10)

Uáppáásm kuuđâ Cygnaeus-palhâšume finalistân täst (13.10.)

Lasetiäđuh:

Proojeekthovdâ Hanna Helander, ovdânommâ.suhânommâ@edu.utsjoki.fi

Koordinaattor Arla Magga, ovdânommâ.suhânommâ@samediggi.fi

Škovlimčällee Ulla Aikio-Puoskari, ovdânommâ.suhânommâ@samediggi.fi

 

Kove: Máttááttâshaldâttâs

Oopâ saanijd -kovesänikirje almostuvá digikirjen

Pivnohis Oopâ saanijd -kovesänikirje almostuvá tääl digiversion. Algâalgâlii kirje rähtee lii Matti Morottaja já kirje kuuvijd lii sárgum Sirpa Seppänen. Matti Morottaja meid lohá saanijd digikiirján. Digikirjeest láá kevttum algâalgâlii kirje koveh já teevstah.

Digikiirján lii kove já teevstâ lasseen lasettum jienâ. Saanijd lii tääl máhđulâš máttááttâllâđ meid jienâdiđ.

Digikirje lává teknisávt olášuttâm Anne Seipiharju já Miina Seurujärvi, suoi västidáin meid jienâi paddiimist. Jienâpaadij čuoppâmist já jienâi kietâdâlmist lii västidâm Janne Lappalainen.

Sämitige oppâmateriaaleh

https://www.samediggi.fi/tuote/oopa-saanijd-jienakirje/?lang=an

Sämitigge almoot uuccâmnáál oppâmateriaalčällee virge

Sämitigge almoot uuccâmnáál oppâmateriaalčällee virge. Oppâmateriaalčällee pargoh láá miäruštâllum Sämitige pargo-oornig 40 §:st. Oppâmateriaalčällee pargon lii valmâštâllâđ sämikielâlii oppâmateriaal pyevtitmân kyeskee aašijd, toimâđ škovlim- já oppâmateriaallävdikode já sämmilij škovlimaašij oovtâstpargo-orgaan oovdânpyehten, čällen já valmâštâllen oppâmateriaalaašijn sehe olášuttiđ lävdikode, oovtâstpargo-orgaan, Sämitige stiivrâ já tige čuákkim toohâm jieijâs toimâsyergi miärádâsâid. Oppâmateriaalčällee čuávu já haaldâš oppâmateriaalmeriruuđâ kevttim já materiaalhaavâid, kocá meriáigásij oppâmateriaalpargei pargo, huolât oppâmateriaalhaavâi toimâttempargoost, iššeed tige saavâjođetteijee jieijâs toimâsuárgán kullee pargoin sehe tuálá ohtâvuođâ eres sämmilâšornijduumijd raajij rasta já sierâ virgeomâháid.

Asâttâsân vuáđuduvvee tohálâšvuotâvátámâš lii virge vaattâm škovlim já lasseen váttoo sämikielâ táiđu (asâttâs 1727/95). Virge miänástuvvee hoittám váátá hiäivulii ollâškovlâtotkos, škovlimaašij já  haaldâtlij pargoi tubdâm sehe šiev oovtâstpargo- já vuáruvaikuttâstááiđuid.

Pälkki meriduvvoo Sämitige pälkkivuáháduv vátávâšvuođâtääsi IV/II mield (vuáđupälkki losijttáá 2653,96 eurod/mp). Vuáđupäälhi lasseen máksojeh pargohárjánem mield hárjánemlaseh sehe 24 % sämikuávlu lase. Virge tiävdoo 1.1.2021 rääjist já virge tevdimist nuávditteh kuuđâ mánuppaje keččâlemääigi.

Ucâmušâid lahtosijguin kalga toimâttiđ Sämitige čäällimkoodán 23.11.2020 räi čujottâsân https://www.sympahr.net/public/pq.aspx?dfb15561

Lasetiäđuid adelává škovlimčällee Ulla Aikio-Puoskari 010 839 3112 já oppâmateriaalčällee Hannu Kangasniemi 010 839 3115. Sämitige tooimân puáhtá uápásmuđ nettičujottâsâst www.samediggi.fi.

Anarist 20.10.2020 Sämitigge

Sämikielâi káidusmáttááttâshaahâ lii iävtukkâssân Cygnaeus-palhâšume uážžon

Máttááttâshaldâttâs lii nomâttâm sämikielâi káidusmáttááttâs piiloothaavâ ohtân Cygnaeus-palhâšume finalistân. Haahâ lii ornim čoovčâ 2018 rääjist anarâš-, nuorttâlâš- já tavesämikielâ máttááttâs sämmilij päikkikuávlu kieldâi ulguubeln. Taan luuhâmive haahâ uárnee máttááttâs suulân 92 uáppeid ohtsis 65 škoovlâst pirrâ eennâm. Oovtâstpargoost láá mieldi 35 máttááttâs uárnejeijed.

– Taat lii tuođâi ilolâš uuđâs, iätá haavâ jođetteijee Hanna Helander Ucjuv kieldâst. – Haahâ lii pyereest joođoost já uáppeemeeri lii lasanâm masa kyevtkiärdásâžžân čoovčâ 2018 rääjist. Jo tuš iävtukkâssân nomâttem lii merhâšittee mijjân hahâpargeid, iätá Helander. – Taat movtijdit vissásávt mii máttáátteijeid, kiäh jo mudoi-uv uáli iäljárávt ovdedeh mii máttááttâs.

Haavâ máttáátteijen taan luuhâmive pargeh Henna Aikio, Satu-Marjut Nieminen, Joni Saijets, Sirkka Sanila já Sonja Moshnikoff. Tavesämikielâ uáppeeh láá ohtsis 44, anarâškielâ 28 já nuorttâlâškielâ 20. – Haahâ uárnee máttááttâs pedagogisávt sehe kielâ- já ahetääsi mield nuuvt hiäivulijn juávhuin, ko máhđulâš. Feerimeh láá pyereh, iätá Helander.

Haavâ Sämitiggeest pargee koordinaattor Arla Magga ana iävtukkâsvuođâ tehálâžžân haavâst rahtum pargo oinum tááhust. – Viehâ maŋgii mij kuullâp kommentijd, moi tuáváást lii imâštâllâm tast, ete puáhtá-uv sämikielâ máttááttâs kuoskâd mijjân, Maadâ-Suomâst tuáimee máttááttâs uárnejeijeid. Sämmilâšpárnáin já -nuorâin kuittâg jo 2/3 áásá já jotá škoovlâ eres saajeest ko sämmilij päikkikuávlust, iätá Magga.

Sämitige škovlimčällee Ulla Aikio-Puoskari muštâl, ete káidusmáttááttâshaahâ lii vuossâmuš lävkki sämikielâi máttááttâs fastâditmân päikkikuávlu kieldâi ulguubeln. – Máttááttâs- já kulttuurministeriö asâttem sämikielâi já sämikielâlii máttááttâs ovdedempargojuávkku parga eidu ääši ooleest. Pargojuávkku almostit iävtuttâsâs täst já maaŋgâ eres ääsist puáttee ive aalgâbeln.

Cygnaeus-palhâšume 2020 uážžoo almostittoo 23.11.2020 palhâšumejyehimtilálâšvuođâst, mii uárnejuvvoo neetist. Palhâšume juáhá Máttááttâshaldâttâs uáivihovdâ Olli-Pekka Heinonen.

Tiätu Cygnaeus-palhâšuumeest já eres finalistein Máttááttâshaldâttâs tiäđáttâsâst, mon puáhtá luuhâđ täst.

https://www.saamenetaopetus.com/

Säämi kielâlávgum puohháid – ávus oppâtijmeh sämikielâi ohhoost

Lasetiäđuh:

Hanna Helander, hanna.helander(at)edu.utsjoki.fi

Arla Magga, arla.magga(at)samediggi.fi

Ulla Aikio-Puoskari, ulla.aikio-puoskari(at)samediggi.fi

Sämitigge almoot uuccâmnáál kuttâ stipend

ALMOTTÂS 

Sämitigge almoot uuccâmnáál ohtsis kuttâ (6) 500 euro stipend, moh láá uáivildum sämikielâ já/teikâ sämikulttuur válduaamnâs- já uálgiaamnâsuáppeid ollâtääsi škovliimist ja uáppeid kiäh uásálisteh ollâtääsi škovliittâsân, mii vaalmâšt sämikielâlâš pargoelimân. Occein pivdojeh eromâš vuáđustâsah stipend uážžumân. Vuáđustâssân pyehtih leđe el. oppâčáituspargo rähtimân lohtâseijee eromâš koloh teikâ aassâmpäikkikode já oppâmpäikkikode kuhes kooskâst šaddee mätkikoloh.

Rijjâhámásiih ucâmušah pivdojeh toimâttiđ koskoho 11.11.2020 tme 16 räi šleđgâlávt čujottâsân info(at)samediggi.fi. Ucâmušân kalga lahteđ kopio oppâregisterváldusist.

Váijuvâš teikâ maŋanum ucâmušah iä kieđâvuššuu.

Anarist 12.10.2020 

Sämitigge/ škovlim- já oppâmateriaallävdikodde

Uđđâ oppâmaterial anarâškielân

Anarâškielâ vuáđuškovlâmáttááttâsân láá almostum uđđâ oppâmaterialeh. Uđđâ materialeh láá almostum sehe eenikielâ- ete viereskielâmáttááttâsân. Materialijd lává hammim oppâmateriaal kesipargee Anne Seipiharju já vuávájeijee Miina Seurujärvi.

Eenikielâ Virkkuuvääri-ráiđu lii tievâsmittum nube luoka kuldâlempitáigijn, niäljád luoka uáppee tekstâkiirjijn já viiđâd luoka digihárjuttâsâigijn. Viereskielâ Hitruu-rááiđun láá valmâštum lasematerialeh: Hitruus sánádâh digihárjuttâsah, Hitruus kielâoppâ já sánádâh pdf-siijđoh printtim várás sehe Hitruu 1, 2, 3 já 4 digimaterial sánáduv hárjuttâllâm várás.

Virkkuuvääri 2 kuldâlempitáh čohčâkiđđâ

Kuldâlempitáh láá uási Virkkuuvääri 2 -kirje mainâsijn. Sehe digimaterialist et eidusâš kirjeest láá kuldâlempitái koveh já siskáldâskoččâmušah. Čohcâkirje teevstâid loheh Heli Huovinen, Ritva Kangasniemi já Hannu Kangasniemi. Kiđđâkirje lohheeh láá Martta Alajärvi já Jussa Seurujärvi. Mainâsijd lii čáállám Petter Morottaja.

Virkkuuvääri 4 eenikielâ já kirjálâšvuotâ -kirje

Niäljád luoka eenikielâ já kirjálâšvuođâ máttááttâsân uáivildum kirje vuáđđun lii Otava Kipinä 4 material. Virkkuuvääri-kirje jotkâmainâsijd lii čáállám Petter Morottaja. Eres rähteeh láá Miina Seurujärvi já Mika Kolehmainen (kuvvim já tuáijim).

Virkkuuvääri 5 digihárjuttâsah

Viiđâd luoka material vuossâmuš uási láá digihárjuttâsah. Materialist láá uánehis máttááttâsteevstah já toid labdâšeijee hárjuttâsah sehe válduseh kirjálâšvuođâst. Hárjuttâsâi rähtim vuáđđun láá Otava Kipinä 5 hárjuttâsah já taid lii anarâškielân já kulttuurân heiviittâm Henna Aikio. Digihárjuttâsâid lii ráhtám Miina Seurujärvi.

Hitruus sánádâh digihárjuttâsah

Hitruus sánádâh digihárjuttâsah -material lii paarâ Hitruus kielâoppâ digihárjuttâsah -materialin. Digihárjuttâsâin puáhtá máttááttâllâđ meid saanij jienâdem, luuhâm já čäällim lasseen. Siämmáá material puáhtá kevttiđ pävirháámist ko printtee Hitruus kielâoppâ já sánádâh pdf-siijđoh printtim várás -material. Digimaterialijn láá lasematerialeh (muštokoortah já biŋŋovuáđuh printtim várás sehe liiŋkah quizlet-hárjuttâssáid), moh iä lah pävirmaterialist.

Hitruus kielâoppâ já sánádâh pdf-siijđoh printtim várás

Hitruus kielâoppâ já sánádâh -material tievâsmit Hitruu-rááiđu sierânâs kielâopâlâš já sánádâh hárjuttâsâigijn. Material lii uáivildum vuáđuškoovlâ 3-6 luokkaid. Material puáhtá kevttiđ pävirhäämist (pdf-siijđoh printtim várás) teikkâ digihäämist (Hitruus kielâoppâ digihárjuttâsahHitruus sánádâh digihárjuttâsah). Material lává ráhtám Miina Seurujärvi já Petter Morottaja, koveh Riitta Ahonen.

Hitruu 12 digimaterialeh

Hitruu 1 2 digimaterialijn puáhtá luuhâđ já kuldâlid Hitruu 1 já 2 kiirjij teevstâid sehe hárjuttâllâđ kuuvij sánáduv. Hitruu-rááiđu lii čáállám Teija Linnanmäki já kuvvim Riitta Ahonen. Digimaterial lii ráhtám Anne Seipiharju já sun meid lohá kuuvij saanijd materialist.

Hitruu 34 digimaterialeh

Hitruu 34 digimaterialijn puáhtá luuhâđ Hitruu 3 já 4 kiirjij teevstâid sehe hárjuttâllâđ kuuvij sánáduv. Hitruu-rááiđu lii čáállám Teija Linnanmäki já kuvvim Riitta Ahonen. Digimaterial lii ráhtám Anne Seipiharju já sun meid lohá kuuvij saanijd materialist.

Lasetiäđuh:

oppâmateriaalčällee Hannu Kangasniemi, 010 839 3115 / 050 364 1385, hannu.kangasniemi(at)samediggi.fi

anaraškielâ oppâmaterialvuávájeijee Miina Seurujärvi, 010 839 3193 / 050 344 0504, miina.seurujarvi(at)samediggi.fi

Sämitige oppâmateriaaleh