Nuoria henkilöitä esiintymislavalla.

Säminuorâi taaiđâtábáhtus ovdeduvvoo tábáhtuskoijâdâllâm vuáđuld

/in , , /by

Sämitige škovlim- já oppâmateriaallävdikodde meridij čuákkimstis 8.6.2023, ete säminuorâi taaiđâtábáhtus juátká uássin Nuorâ Kulttuur–konsept já lii mieldi ive 2024 Nuorâ Kulttuur On Air–tábáhtusâst. Miärádâs tohhui säminuorâi taaiđâtábáhtuskoijâdâlmân puáttám vástádâsâi vuáđuld. Toos lasseen lävdikodde savâstâlâi taaiđâtábáhtus máhđulâšvuođâst maccâđ päikkikuudijd jottee tábáhtussân.

Säminuorâi taaiđâtábáhtus lii lamaš säminuorâi lávdástemaareen jo vittâ ihelove. Sämikielâlij láávdástmij lasseen tábáhtus lii ornim pargopáájáid já eres miäldustooimâ kuulmâ sämikielân. Säminuorâi taaiđâtábáhtus kulá väldikodálii Nuorâ Kulttuur–viärmádâhân, mon toimâhäämi lii ive 2021 muttum maaŋgâtaaiđâlâžžân já tot lii säminuorâi taaiđâtábáhtusâst spiekâstmáin čuosâttum 13–29-ihásáid nuoráid. Väldikodálâš tábáhtus uárnejuvvoo parâlij iivij maaŋgâ pääihi nettitábáhtussân já parâttes iivij aldatábáhtussân. Väldikodálii tábáhtus konseptnubástus já säminuorâi taaiđâtábáhtus táálái resursij asâttem ornimhástusij tiet lii lamaš tárbu smiettâđ, ete maht já mon häämist säminuorâi taaiđâtábáhtus puátteevuođâst uárnejuvvoo.

Sämitige stivrâ meridij čuákkimstis 10.2.2023 (1/2023) prosesist, mast selvâttuvvoo, ete magareh tuoivuuh sämiaalmugist láá säminuorâi taaiđâtábáhtus puátteevuođâ háárán. Stiivrâ vuálásâžžân Sämitige škovlim- já oppâmateriaallävdikodde meridij jieijâs čuákkimist 17.3.2023 (1/2023) olášuttiđ koijâdâllâm. Taaiđâtábáhtuskoijâdâllâm olášuttui kyehtin sierâ koijâdâlmin, main kääržib lâi 6–20–ihásáid párnáid já nuoráid sehe vijđásub koijâdâllâm čujosjuávhoid. Koijâdâlmeh lijjii ávus webropolist 15.- 26.5.2023. Párnái já nuorâi koijâdâlmân pottii meriääigi siste 48 vástádâssâd. Čujosjuávkkukoijâdâlmân vástádâsah pottii 31.

Koijâdâlmân västidâm ulmuuh tuáivuh, ete taaiđâtábáhtus kättee ärbivuovijd, mutâ uđâsmuvá

Ovdil koijâdâllâm uárnejum ive 2023 säminuorâi taaiđâtábáhtusâst lijjii mieldi väldikodálii konsept mield maaŋgah taiđuuh. Taaiđâtábáhtuskoijâdâllâm vuáđuld sehe párnááh já nuorah já meid čujosjuávhuh tuáivuh maaŋgâ taiđuu tábáhtus jyehi ive. Toos lasseen sehe párnááh já nuorah já meid čujosjuávhuh tuáivuh, ete säminuorâi taaiđâtábáhtusâst ličij máhđulâšvuotâ vuolgâttiđ jieijâs ovdâsteijee väldikodálii tábáhtusân meid puátteevuođâst, veikâ uccâ ucceebloho lâi ton mielâ, ete säminuorâi taaiđâtábáhtus ij veltihánnáá taarbâš leđe mieldi jieijâs satelliittábáhtussân.  Koijâdâllâm vuáđuld västideijeeh tuoivuu, ete säminuorâi taaiđâtábáhtus ličij argâpeeivi škoovlâ pargovuávám uássin, veikâ väldikodálâš tábáhtus uárnejuvvoo oholoopâ. Čujosjuávhui vástádâsâin oholoppâtábáhtus finnij-uv monnii verd kyedittem, mon vuáđustâllii ei. kuhes maađhijn.

Taaiđâtábáhtus láávdástmij háárán párnááh já nuorah kyedittii eenâb aalmugjienâstem. Čujosjuávhuh epidii eenâb aalmugjienâstem já tuoivuu, ete árvuštâllâm taheh puátteevuođâst-uv tuš äššitobdeetuámáreh. Kuohtuuh västideijeejuávhuh tuoivuu, ete láávdástmij vuolgâttem stream peht juátkoo meid puáttee iivij ääigi. Västideijeeh tuoivuu, ete pargopáájáh já eres miäldustoimâ pisoh taaiđâtábáhtus uássin.

Párnái já nuorâi vástádâsâin säminuorâi taaiđâtábáhtus onnui suotâs já maaŋgâpiälálâš tábáhtussân sehe pyerrin eidu tagarin ko tot lii tääl. Čujosjuávhui vástádâsâin puohtii oovdân, ete taaiđâtábáhtus lii tehálâš kulttuurtábáhtus uccâ siijdâi párnáid sehe tehálâš kielâ já kulttuur nanodeijee. Liijká västideijeeh tuoivuu, ete tieđettem ličij pyereeb já ete munetiätu teemain já äigimuddoost puáđáččij tááláást tolebáá, vâi puávtáččii valmâštâlškyettiđ láávdástmijd jo čohčuv. Toos lasseen iävtuttii, ete taaiđâtábáhtuspargee pálkkááttuuččij kuhheeb ááigán, vâi orniistâlmijguin ij šodâččii huáppu. Västideijeeh meid tuoivuu, ete tábáhtus máccá jottee tábáhtussân.

Sämitigge kijttá taaiđâtábáhtuskoijâdâlmân västideijeid já juátká säminuorâi taaiđâtábáhtus ovdedem ain. Ive 2024 Nuorâ Kulttuur On Air–tábáhtus uásild táátuh peelijd, kiäh uárnejeh sämikielâ já sämikielâlii máttááttâs varriidâttâđ máhđulii oholoppâtábáhtusân vyesimáánust 2024. Täärhib olášuttemvyevist tieđettuvvoo čohčuv.

Lasetiäđuh:

Bigga-Helena Magga
Škovlimčällee
puh. 010 839 3121
bigga–helena.magga@samediggi.fi

Ljetoff Tauno
lävdikode saavâjođetteijee
tauno.ljetoff@gmail.com

Saamelaisnuorten taidetapahtuma Inarissa.

Sämitigge uárnee koijâdâllâm Säminuorâi taaiđâtábáhtus oovdedmist

/in , , /by

Sämitigge uárnee webropol-koijâdâllâm Säminuorâi taaiđâtábáhtus oovdedmist. Párnáid já nuoráid lii sii jieijâs koijâdâllâmluámáttâh. Eres čujosjuávhoid, tego rehtoráid, máttáátteijeid já huolâtteijeid, koijâdâllâm lii vijđásub.

Säminuorâi taaiđâtábáhtus lii ärbivuáválâš tábáhtus, mast láá láávdástmij lasseen pargopáájáh já eres miäldustoimâ kuulmâ sämikielân. Jieš tábáhtus lii jo maaŋgâ ive vuolgâttum Stream peht, te tom lii puáhtám čuávvuđ vijđáht. Ko taaiđâtábáhtus uásálistei meeri já ornimkoloh láá stuárrum, te lii lamaš tárbu smiettâđ, ete maht tábáhtus puáhtá tááláá resursijguin olášuttiđ meid puátteevuođâst tienuuvt, ete tot lii pyereest juksâmnáál.

Sämitige stivrâ meridij čuákkimstis 10.2.2023 (1/2023) prosesist, mast selvâttuvvoo, ete magareh tuoivuuh sämiaalmugist láá säminuorâi taaiđâtábáhtus puátteevuođâ háárán. Stiivrâ vuálásâžžân Sämitige škovlim- já oppâmateriaallävdikodde meridij jieijâs čuákkimist 17.3.2023 (1/2023) algâttiđ proosees koijâdâllâm olášutmân stiivrâ miärádâs mield.

Säminuorâi taaiđâtábáhtus lii lamaš tehálâš čokkânemsaje sämipárnáid já -nuoráid jo 1970-lovo rääjist. Sämitigge lii ornim tábáhtus ive 1998 rääjist. Säminuorâi taaiđâtábáhtusâst lii stuorrâ merhâšume nuorâi ellee sämikulttuurân já tot lii maŋgii merhâšâm nuoráid vuossâmuuh jieijâskielâliih keččeeh já lávdástem jieijâs siärvádâhân. Tábáhtusân láá ovdebij iivij puávdejum puoh sämipárnááh já -nuorah sehe sämikielâ tâi sämikielâlii máttááttâsâst orroo párnááh já nuorah Suomâst. Tábáhtus kulá sämmilij päikkikuávlu škoovlâi pargo-ohjelmân, já ton mield uásálisteeh láá lamaš škovlâtaasij miäldásávt 6–20-ihásiih. Tábáhtus ruttâd Máttááttâs- já kulttuurministeriö, mon mieđettem torjuin láá luávdám jieš tábáhtus ornimkoloi lasseen uásálistei maađhijd já ijâstâlmijd sehe pálkkááttâm sierâ proojeektpargee orniđ tábáhtus.

Säminuorâi taaiđâtábáhtus kulá väldikodálii Nuorâ Kulttuur–viärmádâhân, mon toimâhäämi lii ive 2021 muttum maaŋgâtaaiđâlâžžân já tot lii säminuorâi taaiđâtábáhtusâst spiekâstmáin čuosâttum 13–29-ihásáid nuoráid. Koččâmušâst orroo tábáhtus uárnejuvvoo parâlij iivij neetist já parâttes iivij aldatábáhtussân. Lávdásteijeeh väldikodálii tábáhtusân oceh ei. virtuaallii lávdástem peht. Sämitige čuákkim 22.12.2022 tuhhiittem ive 2023 toimâvuávám-budjet mield säminuorâi taaiđâtábáhtus lii uđâsmittum väldikodálii tábáhtus háárán. Uđâsmittem valdui huámmášumán ive 2023 tábáhtusâst maaŋgâtaaiđâlâšvuottân, mast teema ij lamaš räijejum tuš oovtâ taaiđâšlaajân – taat lii linjáást ive 2023 Nuorâ Kulttuur festivaaláin, kuus Säminuorâi taaiđâtábáhtusâst väljejui ovdâsteijee.

Ovdebij iivij Säminuorâi taaiđâtábáhtus lii jottáám vuáruluvâi sämikuávlu sierâ kieldâin, mutâ spiekâstâhlávt tábáhtus lii uárnejum tääl jo maaŋgâ ive Anarist, mast láá meid vuolgâttâm Stream peht spiekâstâhiivij tábáhtusâid. Suijâ toos lii lamaš tábáhtus stuárrum uásálistei meeri, mii lii piejâm iävtuid ei. saje stuárudâhân torvolâšvuotâmiärádâsâiguinis. Toos lasseen almolávt saje valjiimist kalga väldiđ huámmášumán tábáhtusteknisii kiärgusvuođâ. Jienâ já visuaallâšvuođâ tááhust ollâ tääsi tábáhtus váátá meid äššitobdee já olášuttem háárán tuárvi ennuv pargeid. Jottee taaiđâtábáhtusâst teknisâš olášuttem lii ostum ulguupiäláin palvâluspyevtitteijein.

Säminuorâi taaiđâtábáhtusân lohtâseijee koijâdâlmist láá viggâm väldiđ huámmášumán nuuvt pyereest ko máhđulâš ovdiibeln mainâšum, tábáhtusorniistâlmáid lohtâseijee aašijd. Taaiđâtábáhtuskoijâdâllâm liäkkoo 15.5.2023 já tot lii ávus 26.5.2023 räi.

  • Čujosjuávhoid uáivildum webropol–koijâdâlmân piäsá västidiđ tääbbin
  • Párnáid já nuoráid uáivildum webropol–koijâdâllâm juáhhoo oppâlájádâssáid, moh uárnejeh sämikielâ já sämikielâlii máttááttâs. Liŋkkâ koijâdâlmân kávnoo meid tääbbin

Lasetiäđuh:

Bigga–Helena Magga
Škovlimčällee
puh. 010 839 3121
bigga–helena.magga@samediggi.fi

Säminuorâi taaiđâtábáhtusâst palhâšuvvojii uásálisteeh lávdástem- já tyejijuávhuin

/in , /by

Ive 2023 Säminuorâi taaiđâtábáhtus teema lâi taan ive oovdânpyehtee taiđuuh já eromâšteeman sämityeji. Kuohtuin teemain äššitobdeetuámáreh palhâšii uásálisteid sierâ ahejuávhuin. Láávdástmij 13–20-ihásij juávhust väljejui ovdâsteijee väldikodálii Nuorâ Kulttuur-tábáhtusân, mii tuálloo Kuopiost vyesimáánust.

Säminuorâi taaiđâtábáhtus lâi taan ive väldikodálii teema mield maaŋgâtaiđâlâš. Läävdi alne oinui já kullui lávlum, juoigâm, ráp, tánssám já teatter ton jieškođe-uv häämist. Kuopio väldikodálii Nuorâ Kulttuur festivaalân väljejui ovdâsteijen Ucjuv sämiluvâttuv teatterčáitálmâs ´Čiččâm viljâžid Ucjuuvâst´. Nuorâ Kulttuur Festivaal tuálloo Kuopiost 26.-27.5.2023. Láávdástmij äššitobdeetuámárin toimii Wimme Saari, Katja Gauriloff já Heli Aikio.

Eromâšteeman lâi taan ive sämityeji, mast 6-12-ihásij juávhust vuossâmuu palhâšume finnijn kyehti tyeje, Anna-Frida Vars šišnelavhâinis já Nils-Máhte Paltto nijbijnis. Kietâtyeji-teema 13-20-ihásij juávhust vuossâmuu palhâšume finnij Mággá Eriksen šišnelavhâinis. Puoh juávhui tyejeh lijjii uáinimnáál Sajosist Säminuorâi tyejičáitálduvâst. Tyeje äššitobdeetuámárin toimii Yrjö Musta, Heini Wesslin já Korinna Korsström-Magga.

Säminuorâi taaiđâtábáhtus ooleest uárnejuvvojii meid pargopáájáh. Siida ornij lájukappeerpargopáájá já toimâlii čáitáldâhrieggee. Sajosist vuod Säämi párnáikulttuurkuávdáš Mánnu já Nuorâirääđi ornii siärvuslii pargopáájá, mon fáddán lâi piirâs já Aanaar kieldâ nuorâitoimâ ornij pinssipáájá. Toos lasseen Nuorisokeskus Vasatokkast uárnejui toimâlâš disco. Säämi máttááttâskuávdáš luoihâi taaiđâtábáhtusân tyejičáitálduv vitriinijd.

Sämitigge kijttá pargopáájái tuálleid, äššitobdeetuámárijd, laiđiisteijeid já oovtâstpargokuoimijd uásálistmist orniistâlmáid. Eromâškijttosijd Sämitigge haalijd celkkiđ puoh párnáid já nuoráid, kiäh uásálistii säminuorâi taaiđâtábáhtusân.

 

Taaiđâtábáhtusâst palhâšum tyejeh já láávdástmeh

 

Sämityeje juávhust äššitobdeetuámáreh palhâšii čuávuváid tuojijd:
6-12-ihásiih

I palhâšume, juohhum: Anna–Frida Vars, šišnelavkkâ
I palhâšume, juohhum: Nils–Máhte Paltto, nijbe
Kunneemainâšume: Kärigâsnjaargâ 1–2–luokkaliih, kyeli- já riävskátyeji

13–20-ihásiih

I palhâšume: Mággá Eriksen, šišnelavkkâ
Kunneemainâšume: Ellen Hannele Olsen, kesimááccuh

 

Oovdânpyehtee taiđuuh- juávhust palhâšuvvojii čuávuvááh láávdástmeh:

6–9-ihásiih

I palhâšume: Kärigâsnjaargâ škoovlâ 1-2 lk, muusik, lávlum
II palhâšume: Kärigâsnjaargâ škoovlâ ovdâ-2 lk, muusik, juoigâm
III palhâšume: Aanaar škoovlâ 1-2 lk, muusik, lávlum
Kunneemainâšume: Kärigâsnjaargâ škoovlâ 1-2 lk, tánssám

9–12-ihásiih

I palhâšume: Anni–Siviä já Helmi Länsman, Njuárgám, suoivâteatter
II palhâšume: Laura Virtanen, Tolppaniemi škovlâ, tánssám
III palhâšume: Käresavvoon škoovlâ 3. já 5. lk, teatter
Kunneemainâšume: Avveel škoovlâ 4. lk, muusik, ráp

13-20-ihásiih

I palhâšume: Ucjuv sämiluvâttâh, teatter
II palhâšume: Heta vuáđuškoovlâ juávkku, teatter
III palhâšume: Kärigâsnjaargâ škoovlâ 6-9 lk, muusik

 

 

Lasetiäđuh:
Miia Ruokojärvi
miia.ruokojarvi@samediggi.fi
010 839 3169|+358 (0) 403521549

 

Kove: Taaiđâtábáhtus 2019. Ville-Riiko Fofonoff / Sämitigge

Säminuorâi taaiđâtábáhtus tuorâstuv äigitavlu nubbáásm

/in , , /by

Stuorrâ uásálisteemere keežild Säminuorâi taaiđâtábáhtus tuorâstuv äigitavlu nubbáásm. Tábáhtus álgá tme 9:30 já pištá tme 15:30 räi.

Uđđâ äigitaavlu miäldásâš ohjelm lii čuávuvâš:

tme 9:30 Tábáhtus álgá

tme 12–13:00 Purâdem

tme 13–14:00 Tábáhtus juátkoo

tme 14:15–15:00 Artistkyessi, Muusikkuávdáš

tme 15:00 Puátusij almostittem

tme 15:30 Tábáhtus nohá

Taaiđâtábáhtus puáhtá keččâđ stream-vuolgâttâssân. Sajosist lii meid streamkejâttâh, moos kalga almottâttâđ muuneeld.

Lasetiäđuh:

Miia Ruokojärvi
miia.ruokojarvi@samediggi.fi
010 839 3169 | 0403521549

Säminuorâi taaiđâtábáhtusân almottâttii 320 uásálisted – táttup meid keččeid almottâttâđ

/in , /by

Säminuorâi taaiđâtábáhtusân almottâttâm lii nuuhâm. Tábáhtusân almottâttii 320 uásálisted. Läävdi alne mij uáinip 20 oovdânpyehtimid já sämmilii tyejičáitálduvâst 23 kietâtyeijid.

Taan ive taaiđâtábáhtus poster lii kovečuágáldâh. Kovečuágáldâh šadda sämiluokai sargum tuojijn, main ivnen láá Säämi ivneh já fáádáin uáinoo taaiđâtábáhtus taan ive teema. Sämitigge haalijd kijtteđ puoh sämiluokaid, moh láá uásálistám poster rähtimân.

Räijejum saje já torvolâšvuođâ tiet mij táttup sii, kiäh halijdeh tuorâstuv puáttiđ keččâđ tábáhtus, almottâttâđ šleđgâpoostâ peht čujottâsân sntaidetapahtuma@samediggi.fi. Saijoos salin lii vuosâsaajeest peessâm sist, kiäh láá almottâttâm tolebáá almostittum almottâttâm- já lávdástemluámáttuvváin.

Säminuorâi taaiđâtábáhtus vuolgâttuvvoo stream-vuolgâttâssân. Stream-vuolgâttâs puáhtá keččâđ neeti peht čujottâsâst https://www.sajos.fi/live

Sajosân lii väridum stream-vuolgâttâsân sierâ kejâttâh, moos kalga meid almottâttâđ muuneeld.

Lasetiäđuh:

Miia Ruokojärvi
miia.ruokojarvi@samediggi.fi
010 839 3169|+358 (0) 403521549

Säminuorâi taaiđâtábáhtus aldan – láávdástmij almottem sehe uásálistem pargopáájáid lii tääl ávus

/in , , /by

Säminuorâi taaiđâtábáhtusân puáhtá tääl almottiđ láávdástmijd sehe uásálistem pargopáájáid. Láávdástmij já pargopáájá almottâttâmäigi lii 4.-12.4.2023 já tyejiuási 4.-19.4.2023.  Almottâttâm tahhoo Webropol-ohjelm peht (liiŋkah vyelni).

Tärhis ravvuuh láávdástmij já tyejirááiđu várás kávnojeh tábáhtus njuolgâdusâin.

 

Väldiđ huámmášumán, ete láávdástmij, tyejiuási já pargopáájái uásálistem tahhoo sierâ luámáttuvâiguin.

 

Liŋkkâ láávdástmij almottâtmân: https://link.webropolsurveys.com/S/3EE9F6811C5CD3CA

Liŋkkâ tyeje almottâtmân: https://link.webropolsurveys.com/S/B38F7C9075CC84FE

Liŋkkâ pargopáájái almottâtmân: https://link.webropolsurveys.com/S/9AAF074FC466F9DC

 

Lasetiäđuh:

Miia Ruokojärvi

miia.ruokojarvi@samediggi.fi

010 839 3169|+358 (0) 403521549

 

Kove: Taaiđâtábáhtus 2019. Ville-Riiko Fofonoff / Sämitigge

Almottâttâm Säminuorâi taaiđâtábáhtusân aalgij

/in , , /by

Säminuorâi taaiđâtábáhtusân puáhtá almottâttâđ 24.–31.3.2023 koskâsii ääigi Webropol -ohjelm peht. Almottâttâmluámáttâh sáátui já ijâstâlmij várás vuolgâttuvvoo sämikuávlu kieldâi škovláid 24.3.2023. Iäráseh pyehtih tiäđuštâllâđ luámáttuv čujottâsâst sntaidetapahtuma(at)samediggi.fi. Almottâttâm taaiđâtábáhtus lävdioovdânpyehtimáid, tyejiuásán já páájáid lekkâs ohhoost 14.

Säminuorâi taaiđâtábáhtus uárnejuvvoo 26.–27.4.2023 Anarist, Säämi kulttuurkuávdáš Sajosist. Tábáhtus teeman láá taan ive oovdânpyehtee taiđuuh já tagareh láá ovdâmerkkân muusik, teatter, tanssâ, stand up já läävdi alne tivtâstem. Nubben teeman lii sämityeji – säminuorâi tyejeh láá uáinimnáál tábáhtus ääigi Sajosist. Oovdânpyehtee taiđuu já sämityeje puátuseh árvuštâllojeh sierâ, ahejuávhui mield.

Tábáhtus álgá koskoho 26.4. pargopájáiguin já lávdásteijei sound check-tärhistmijguin. Fáállun lii Siida lájukappeer-pargopáájá já toimâlâš čáitáldâhrieggee. Siida pargopáájáh láá uáivildum 7-ihásáid já tađe puárásubboid. Toos lasseen Sajosist Säämi párnáikulttuurkuávdáš Mánnu já nuorâirääđi fäälih siärvuslii taaiđâpargopáájá pirâsfáádást. Mánnu já nuorâirääđi taaiđâpargopáájá lii 5.-luokkaláid já tađe puárásubboid. Koskoho ehidist ličij algâvuáváámij mield disco Anarist, mutâ taat äšši visásmuvá maŋeláá.

Tuorâstâhiiđeed 27.4. lii majemuš sound check. Jieš tábáhtus lii algâlávt vuávájum tijme 10–12.30, tast maŋa lii purâdem, palhâšuumij jyehim já konsert, mon maŋa vyelgim pááikán tijme 15.00. Peeivi ääigi lii máhđulâš uápásmuđ tyejiuásán puáttám tuojijd sierâ čáitáldâhsaajeest.

Sämitigge máksá uásálistei maađhijd já táárbu mield ijâstâllâm.

Ohjelm algâvuávám:

Koskokko 26.4.
13 Sound check ohjelm mield, Sajos
13-17 Purâdem juávhui mield
13–18 Pargopáájáh já čáitáldâhrieggeeh juávhui mield, Siida
15–18.30 Pargopáájáh juávhui mield, Sajos
18–21 Algâväridem disco, Aanaar

Tuorâstâh 27.4.
8–9 Iiđeedpittá
13 Sound check ohjelm mield, Sajos
10–12.30 Taaiđâtábáhtus
12.30–14.00 Purâdem, raati čokkân
14.00 Palhâšuumij jyehim já konsert
15.00 Pááikán vyelgim

Lasetiäđuh:
Miia Ruokojärvi
miia.ruokojarvi(at)samediggi.fi
010 839 3169|+358 (0) 403521549

Kove: Taaiđâtábáhtus 2022. Ville-Riiko Fofonoff / Sämitigge

Säminuorâi taaiđâtábáhtus njuolgâdusah 2023

/in , , /by

Ive 2023 säminuorâi taaiđâtábáhtus njuolgâdusah láá tääl valmâšeh. Tolebáá algâivveest almottui, ete taaiđâtábáhtus aherääji aleduvvoo. Sämitige škovlim- -já oppâmateriaallävdikodde meridij kuittâg čuákkimstis 17.3.2023 ravviđ Säminuorâi taaiđâtábáhtus, ete tot muttá tábáhtus aheraajijd tienuuvt, ete tábáhtus ličij aheräjittem. Taat ravvim vuáđuduvá Sämitige stiivrâ mieđettem laseruttâdmân, mast tot meridij čuákkimstis 10.2.2023. Taat uđđâ aherääjilinjim lii siskálmittum taaiđâtábáhtus njuolgâdussáid tienuuvt, ete 6-9- ihásáid lii jieijâs juávkku. Toos lasseen 13-20- ihásiih láá ovtâstittum ohtân juávkkun. Majemužžân mainâšum nubástus lii linjáást väldikodálii Nuorâ Kulttuur- tábáhtussáin, mast toh ahejuávhuh kuleh siämmáá juávkun.

Säminuorâi taaiđâtábáhtus 2023 njuolgâdusah:

  1. Säminuorâi taaiđâtábáhtusân pyehtih uásálistiđ puoh sämikielâliih já sämikielâlii tâi sämikielâ máttááttâsâst orroo tâi orroom párnááh já nuorah.
  2. Taaiđâtábáhtus válduteeman láá oovdânpyehtee taiđuuh já taggaar puáhtá leđe ovdâmerkkân muusik, teatter, tanssâ, stand up já läävdi alne tivtâstem.
  3. Oovdânpyehtimeh kalgeh leđe sämikielâliih (anarâš-, nuorttâlâš- tâi orjâlâškielâ).
  4. Tábáhtusâst puáhtá oovdânpyehtiđ meid nuubij pyevtittem taiđuu.
  5. Lävdioovdânpyehtimij enâmuskukkoduvah láá:
    • Muusik, tanssâ, tivtâstem, stand up já eres toi sullâsiih oovdânpyehtimeh: max 5 miinut
    • Teatter já ton sullâsiih oovdânpyehtimeh, mast lii juonâ: max 15 minuttid.
  6. Lävdioovdânpyehtimeh árvuštâllojeh ahejuávhui mield. Ahejuávhuh láá:
    • 6–9-ihásiih
    • 9–12-ihásiih
    • 13–20-ihásiih
  7. Vuálá 13-ihásiih pasteh uásálistiđ rävisulmuu laiđiittâsâst.
  8. Lävdioovdânpyehtimijd tuoivuiguin kalga almottiđ Sämitiigán 12.4.2023 räi.
  9. Taaiđâtábáhtus nubbe teema lii sämityeji.
  10. Sämityeje ahejuávhuh láá
    • 6–12-ihásiih
    • 13–20-ihásiih
  11. Kuohtuin sämityeje juávhuin palhâšuvvoo ucemustáá ohtâ tyeji.
  12. Tyeji-rááidun vuolgâttemnáál tuojijd kalga toimâttiđ Säämi kulttuurkuávdáš Sajosân majemustáá 26.4.2023.
  13. Tyeji-rááiđun puáttee tyejeh piäijojeh taaiđâtábáhtus ääigi uáinimnáálá sierâ čáitáldâhsajan, kost ulmuuh pyehtih eelliđ keččâmin taid.
  14. Tuoijum tyejeest váldoo muuneeld 1-2 čuovâkove. Čuovâkove/kuuvijd kalga toimâttiđ Sämitiigán 19.4.2023 räi čujottâsân sntaidetapahtuma(at)samediggi.fi
  15. Tyejeest valdum čuovâkove ohtâvuođâst kalga leđe tuáijár nommâ, ahe, päikkikodde, kevttum materiaal sehe uánihâš kuvvim tast, mast tyeji lii finnim inspiraatio tâi maid tuáijár haalidj tuojijnis čäittiđ.  

Almottâttâm taaiđâtábáhtus lävdioovdânpyehtimáid, tyejiuásán já páájáid lekkâs ohhoost 13.  Almottâttâmluámáttâh sáátui já ijâstâlmij várás vuolgâttuvvoo sämikuávlu kieldâi škovláid 24.3.2023. Iäráseh pyehtih tiäđuštâllâđ luámáttuv čujottâsâst sntaidetapahtuma(at)samediggi.fi 

Saamelaisnuorten taidetapahtuma Inarissa 2022.

Säminuorâi taaiđâtábáhtusâst meid taan ive aheräjittem – Sämitige stivrâ mieđettij laseruttâdem

/in , , , /by

Sämitige stivrâ meridij čuákkimstis 10.2.2023, ete tot väärrid kerdiluándusii 15 000 euro lasattâs ive 2023 Säminuorâi taaiđâtábáhtus orniimân. Stivrâ rävvee, ete taaiđâtábáhtus uárnejuvvoo taan-uv ive aheräjittemmin tego ovdebij iivij-uv. Škovlim- já oppâmateriaaltoimâttâh kieđâvuš ääši čuávuváá čuákkimstis 17.3.2023.

Tábáhtus orniistâlmijd lii häittidâm tot, ete máttááttâs- já kulttuurministeriö mieđettem sierânâstoorjâ já tábáhtusân väridum tile iä lah pijssám eromâš orniistâlmijttáá. Tolebáá tieđettii vuáváámijn alediđ taaiđâtábáhtus aherääji 9–20-ihásáid nuoráid.

– Mij iberdep pyereest tivroo koloi já lasaneijee jotteemeerij pyehtim hástusijd tábáhtus vuáváámist. Mij halijdijm liijká kieđâvuššâđ ääši vala stiivrâst já uuccâđ oovtâst eres čuávdusijd, vâi puoh sämipárnááh pesâččii uásálistiđ. Taan ive äšši čuávdoo laseruttâdem vievâst mutâ puátteevuođâ várás kalga selvâttiđ, ete mii lii pyeremus vyehi toimâđ, iätá Sämitige saavâjođetteijee Tuomas Aslak Juuso.

Saavâjođetteijee Juuso illood, ete tábáhtus kiäsut puohahasijd sämipárnáid ivveest nuubán. – Tábáhtus tehálâšvuođâst muštâl meid tot, ete mij finnijm maaŋgâid huolâstum ohtâvuotâväldimijd aheraajij háárán, Juuso juátká.

Säminuorâi taaiđâtábáhtus uđâsmitmân tuáivuh Sämiaalmug uáinuid

Sämitigge seelvâtškuát, ete magareh tuoivuuh sämmilijn láá jieijâs taaiđâtábáhtus puátteevuođâ háárán. Ulmen lii suogârdiđ, ete maht tábáhtus puáhtá táálái resursijguin olášuttiđ meid puátteevuođâst tienuuvt, ete nuuvt maaŋgâs ko máhđulâš pyehtih juksâđ tom.

– Mun lam tuđâvâš, ete mij pastep taan-uv ive orniđ taaiđâtábáhtus aherajijttáá. Čuávuvâžžân mij kolgâp selvâttiđ, ete magareh tuoivuuh Sämiaalmugist láá taan ärbivuáválii taaiđâtábáhtus puátteevuotân. Mij áigup kuullâđ vijđáht sämmilijd párnáid, nuorâid, máttáátteijeid já vaanhimijd, muštâl vs. škovlimčällee Bigga-Helena Magga.

Säminuorâi taaiđâtábáhtus kulá väldikodálii Nuori Kulttuuri (Nuorâ kulttuur) -viärmádâhân, mon toimâmmalli lii muttum ive 2021. Viärmáduv maaŋgâ taiđuu tábáhtusah láá čuosâttum säminuorâi taaiđâtábáhtusâst spiekâstmáin 13–29-ihásáid nuoráid, já toh uárnejuvvojeh jyehi nubbe ive neetist, jyehi nubbe ive ohtsii tábáhtusâst. Taan ive Kuopiost 25.–27.5. ornimnáál festivaalân vuolgâttuvvojeh ovdâsteijeeh meid säminuorâi cuáŋuimáánu taaiđâtábáhtusâst.

Säminuorâi taaiđâtábáhtus uárnejuvvoo Anarist 26.-27.4.2023.

Lasetiäđuh:

Tuomas Aslak Juuso
Saavâjođetteijee
040 687 3394
tuomas.juuso@samediggi.fi 

Bigga-Helena Magga
Vs. škovlimčällee
010 839 3121 / 040 570 2786
bigga-helena.magga@samediggi.fi

Sämitigge almoot uuccâmnáál meriáigásii säminuorâi taaiđâtábáhtus proojeektpargee tooimâ

/in , , /by

Pargo álgá sopâmuš mield já juátkoo 31.5.2023 räi. Pargo olášume iähtun lii, ete taaiđâtábáhtus ruttâdem mieđettuvvoo iävtuttâs mield.

Proojeektpargee pargon lii västidiđ Säminuorâi taaiđâtábáhtus vuáváámist, ornimijn, ohtâvuođâ tolâmist tábáhtus uásálistei já uárnejeijei kooskâ, tieđeetmist, eres munevalmâštâlmijn já tábáhtus loppâpargoin. Taaiđâtábáhtus uárnejuvvoo 26.-27.4.2023 Anarist Sajosist.

Pargo miänástuvvee hoittám váátá sämikielâ tááiđu (sämitiggeest adelum asâttâs 1727/1995). Mij anneep áárvust jiečânâs já huolâlii pargovyevi sehe šiev ohtsâšpargo- já vuáruvaikuttâstááiđuid. Pälkki meriduvvoo sämitige pälkkivuáháduv vátávâšvuotâtääsi V-II mield (vuáđupälkki 2292,63 eurod/mp). Vuáđupäälhi lasseen máksojeh 24 % sämikuávlu lase já hárjánemlaseh pargohárjánem mield.

Ucâmušâid kalga toimâttiđ Sämitige čäällimkoodán 28.2.2023 räi čujottâsân: https://www.sympahr.net/public/pq.aspx?640bd4a6

Lasetiäđuid pargoost addel vs. škovlimčällee Bigga-Helena Magga, puh. 010 839 3121

Sämitige tooimân puáhtá uápásmuđ čujottâsâst www.samediggi.fi.

Anarist 14.2.2023
Sämitigge