Sää’mtee’gg te’lfonkõõskõs lij kidd 27.-29.12.2017.

Sää’mtee’gg te’lfonkõõskõs lij kidd 27.-29.12.2017.

Sámedikki telefonguovddáš lea gitta 27.-29.12.2017.

Sämitige puhelinnummeer lii kiddâ 27.-29.12.2017.

Saamelaiskäräjien puhelinvaihde on kiinni 27.-29.12.2017.

Sääʹmteʹǧǧlääʹjj oođummuš jåttai

Vuõiggâdvuõttministeria lij šiõttääm tuåimmkååʹdd, koon tuâjjan lij valmštõõllâd sääʹmteeʹǧǧest uvddum lääʹjj oođummuž. Tuåimmkååʹdd tuâjast vuâđđan lie vuâđđvuõiggâdvuõđ, jeeʹres vuâđđlääʹjj õõlǥtõõzz da Lääʹddjânnam meeraikõskksaž ooumažvuõiggâdvuõttõõlǥtõõzz di Õhttõõvvâm meerkooʹddi alggmeerai vuõiggâdvuõđi čõõđtõs.

Tuåimmkååʹdd saaǥǥtuõʹllʼjeeʹjen tuåimmai ââʹlmõs vaaldâšmvuõiggâz presideʹntten iiʹjjin 1993–2012 tuåimmjam vuõiǥâstiõđ dåhttar Pekka Hallberg.

Lââʹssen lääʹjj muttsi valmštõõllmõõžž tuärjjeed šiõtteet parlamentaarlaž praavâmjoouk. Praavâmjoouk tuâjjan lij viikkâd parlameʹnttjooukid teâđ lääʹjj valmštõõllmest, ooudeed saǥstõõllmõõžž di praavâd da arvvtõõllâd tuåimmkååʹdd tuâj.

Tuåimmkååʹdd lij mieʹrr vuäǯǯad õõutmiõllsaž eʹtǩǩõõzz njuhččmannu 2018 loopp räjja mõõneeʹst. Mieʹrren lij, što lääʹǩǩmuttâz puäʹtte viõʹǩǩe juʹn ouddâl eeʹjj 2019 õnnum puõʹtti sääʹmteʹǧǧvaalid.

Lââʹssteâđ:
Jååʹđteei Johanna Suurpää, vuõiggâdvuõttministeria, teʹl. 02951 5053, johanna.suurpaa(at)om.fi
Saǥstõõlli veʹrǧǧneǩ Yrsa Nyman, vuõiggâdvuõttministeria, puh. 02951 50293, yrsa.nyman(at)om.fi
Saaǥǥjååʹđteei Tiina Sanila-Aikio, sääʹmteʹǧǧ, teʹl. 050 300 1780, tiina.sanila-aikio(at)samediggi.fi

Lââʹssteâđ haʹŋǩǩõõzz pirrhttp://oikeusministerio.fi/hanke?tunnus=OM077:00/2017

E´tǩǩed vuä´ssla sää´mtee´ǧǧ nuõrisuåvtõ´sse 2018–2019

Sää´mtee´ǧǧ õhttvuõđâst tuåimmai nuõrisuåvtõs. Suåvtõõzz šiõtt’teem-mie´lddlaž tuâjjan lij ooudâsviikkâd sää´mnuõri ǩiõll’laž da kulttuursaž vuõiggâdvuõđid di ravveed sää´mnuõri identee´tt nuõrituâi pääi´ǩ. Lââ´ssen suåvtõs âlgg valmštõõllâd tõid sää´mtee´ǧǧ e´tǩǩõõzzid, čuä´jtõõzzid, aalttõõzzid, ceâlklmid da jee´res peä´lestvälddmõõžžid, kook kuâ´sǩǩe sää´mnuõrid.

Suåvtõ´sse va´lljeet vitt šiõtt’teem-mie´lddlaž vuä´ssla da si´jjid personnallšem vää´rrvuässlaid. Vuä´ssla fe´rttje lee´d 18–28-âkksa älššas sää´mnuõr. Lââ´ssen suåvtõ´sse va´lljeet vitt põõšši ä´šštobddi. Ä´šštobddivuä´ssla fe´rttje lee´d va´lljeem poodd 15–17- âkksa. Suåvtõõzz vuä´ssla jiâ taarbâž lee´d sää´mtee´ǧǧ vuä´ssla, ij-ǥa see´st taarbâž jälsted sää´mvuu´dest. Sää´mǩiõll jie´nnǩiõllân ij leäkku sami vääžnai, leâ´ša sää´mǩiõl silttumuužž ǩeâittõõlât šiõǥǥ ouddõssân. Nuõrisuåvtõõzz va´lljumuužžâst puä´đet vä´lddet lokku tõn, što vuä´ssla voddâ´tte nu´tt puârast ko vuei´tte obb sää´mvuu´d di jee´res ǩiõlljooukid.

Nuõrisuåvtõs tuejjad sää´mtee´ǧǧ halltõ´sse alttõõzz nuõrisuåvtõ´sse va´lljeem vuä´sslain, da loopplaž tu´mmstõõǥǥ tuejjad sää´mtee´ǧǧ sååbbar.

Vuei´ttve´ted e´tǩǩeed tobddmõõžži mie´ldd nuõrisuåvtõ´sse suåppi 18–28-âkksaid älššas sää´mnuõrid da ä´šštobddivuä´ssli´žžen suåppi 15–17-âkksaid nuõrid. Nõõmtumuužžid vuâđđõõttmõõžžineez vuei´ttve´ted vuõltteed ne´ttpåå´štest nuõripiisra addrõ´sse kaisa.tapiola-lansman(at)samediggi.fi le´be påå´štest Nuõrisuåvtõs, Sajos, 998700 Inari/Aanar, 13.11.2017 räjja.

Lââ´ssteâđaid vuä´ǯǯve´ted nuõripiisrest, te´l. +358 50 382 5179.

Sääʹmteeʹǧǧ eeʹttkõʹstti sääʹmteʹǧǧlääʹjj muttâz valmštõõlli tuåimmkååʹddest da parlamentaarlaž seuʹrrjemjooukâst

Sääʹmteeʹǧǧ halltõs nõõmti eeʹttkõʹsttjid sääʹmteʹǧǧlääʹjj muttâz valmštõõlli tuåimmkådda di parlamentaarlaž seuʹrrjemjouʹǩǩe såbbreʹstes 9.10.2017.

Halltõs nõõmti sääʹmteʹǧǧlääʹjj muttâz valmštõõlli tuåimmkådda Tiina Sanila-Aikio (vääʹrrneʹǩǩen Petra Magga-Vars), Tuomas Aslak Juuso (vääʹrrneʹǩǩen Pentti Pieski) da Kalle Varis (vääʹrrneʹǩǩen Pekka Sammallahti) di äʹšštobddi-aaʹšši ouʹddepuʹhttjen Oula Antti Labba. Halltõs nõõmti parlamentaarlaž seuʹrrjemjouʹǩǩe äʹšštobddivuäzzliʹžžen Pentti Pieski da vääʹrrneʹǩǩen Heikki Paltto.

Vuõiggâdvuõttministeria da Sääʹmteʹǧǧ saǥstõʹlle sääʹmteʹǧǧlääʹjj oođummšest vuõiggâdvuõttminister Antti Häkkänen jååʹđteʹmen. Saǥstõõllmõõžžâst sueʹppe, što sääʹmteʹǧǧlääʹjj oođummuž čõõđtet vuâđđvuõiggâdvuõđi da Lääʹddjânnam meeraikõskksaž ooumažvuõiggâdvuõttõõlǥtummši raamin.

Ko 6.9.2017 õnnum sääʹmteʹǧǧlääʹjj 9 paragraaff meâldlaž saǥstõõllmõõžž taʹrǩǩuum påʹrddǩeʹrjj ij leämmaž halltõõzz såbbrest vueiʹnnemnalla, halltõs tuʹmmji lââʹssen sääʹmteʹǧǧlääʹjj oođeemtuâj alttummuž mäinnan, što saǥstõõllmõõžž påʹrddǩeʹrjj âlgg leeʹd taʹrǩǩuum vaʹstteed saǥstõõllmõõžž, što sääʹmteʹǧǧlääʹjj oođummuž vueiʹtet altteed, Sääʹmteeʹǧǧ saaǥǥjååʹđteei Tiina Sanila-Aikio teäʹddad.

Vuõiggâdvuõttministeria mieʹrren lij aazzted tuåimmkååʹdd valmštõõllâd taarbšum muttsid sääʹmteeʹǧǧest uvddum läkka (974/1995) di aazzted haʹŋǩǩõʹsse seuʹrrjemjoouk. Oođeemtuâj altteet nuʹtt jåʹttlõnji ko vueiʹtlvaž. Tuåimmkååʹddest lie saaǥǥjååʹđteei, vuäzzlaž da vääʹrrvuäzzlaž juõʹǩǩ halltõspeällõõǥǥâst di koumm vuäzzla da vääʹrrvuäzzla Sääʹmteeʹǧǧest.

Seuʹrrjemjoouk tuâjjan lij tuärjjeed sääʹmteeʹǧǧest uvddum lääʹjj muttsi valmštõõllmõõžž di uʹvdded riikkpeeiʹvjooukid vuõiggäiggsaž teâđ lääʹjj valmštõõllmest di ooudeed äʹšštobddi da ceâl saǥstõõllmõõžž äʹšš-sueʹrj pirr. Seuʹrrjemjoukk âlgg seuʹrrjed da ärvvtõõllâd sääʹmteeʹǧǧest uvddum lääʹjj muttâz valmštõõlli tuåimmkååʹdd tuâj. Seuʹrrjemjooukâst lie vuäzzlaž da vääʹrrvuäzzlaž juõʹǩǩ riikkpeeiʹvjooukâst di äʹšštobddivuäzzlaž da vääʹrrvuäzzlaž Sääʹmteeʹǧǧest.

Lââʹssteâđaid oudd Sääʹmteeʹǧǧ saaǥǥjååʹđteei Tiina Sanila-Aikio teʹl. 050 300 1780, tiina.sanila-aikio(at)samediggi.fi

Sääʹmteʹǧǧ čõõđad sääʹm kultturveäʹǩǩvuõđid 2018 ooccâm diõtt

Sääʹmteʹǧǧ čõõđad sääʹmǩiõllsa kulttuur ooudâsviikkmõʹšše da sääʹmorganisaatiai tuåimmjumuʹšše čuäʹjtum mieʹrrtieʹǧǧest eeʹjjest 2018 (Opetus- ja kulttuuriministeriön sääʹm kultturmieʹrrteäʹǧǧ) miõttâmvuâlaž veäʹǩǩvuõđid ooccâm diõtt.

Veäʹǩǩvuõttooccmõõžž âʹlǧǧe vuõltteed Sääʹmtegga mââimõõzzâst kålggmannu 31. peeiʹv 2017 čiâss 16.15 räjja addrõõzzin: Sääʹmteʹǧǧ, Sajos, 99870 Aanar.  Veäʹǩǩvuõttooccmõõžžid vuäitt tuåimted personnalla leʹbe äʹššoummu mieʹldd leʹbe vuõltteet pååʹštest, ǩeeʹrjid da jeeʹres vuõlttõõzzid mieʹrrpäikka viikki päkldõõzz mieʹldd leʹbe neʹttpååʹštest.Ooccâmblaaŋkid da lââʹssteâđaid vuäǯǯ kultturpiisrest teʹl. 010 839 3103 da neʹttpååʹštest riitta.orti-berg(at)samediggi.fi. Ooccâmblaaŋk tä´st.

Sääʹmteʹǧǧ kõʹllai Singaporest

Sääʹmteeʹǧǧ saaǥǥjååʹđteei Tiina Sanila-Aikio kõʹllai Singaporest sueiʹnnmannu 3.-7. peeiʹv 2017. Taar da Ruõcc Sääʹmtiiʹǧǧi saaǥǥjååʹđteei da veʹrǧǧoummu še vuässâʹtte seämma mätkka.

Sääʹmtiiʹǧǧi saaǥǥjååʹđteei kaaunâʹtte määʹtǩ õhttvuõđâst jeäʹrbi mieʹldd Singapore ålggminiʹstter Vivian Balakrishnanin da miniʹstter Sam Tanin.

Singapore riikk lij observaattorvuäzzlaž Aarktlaž rääʹđest da miniʹstter Tan lij kõʹllʼjam Taar Sääʹmteeʹǧǧest eeʹjj 2015 di leäi kueʹssen Trondheeiʹm juhllneäʹttlest täʹlvvmannust 2017. Prograammâst lij lââʹssen tobdstõõttmõš da mainstummuš turiism, äʹrbbvuõđ suõjjlummuž, määdd vaaldšummuž, määŋgkulttuurlažvuõđ di õõlmlaž vaaldšummuž pirr.

Lââʹssteâđaid määʹtǩ pirr oudd Sääʹmteeʹǧǧ saaǥǥjååʹđteei Tiina Sanila-Aikio teʹl. 050 300 1780, tiina.sanila-aikio(at)samediggi.fi

Sääʹmteeʹǧǧ piisarkåʹdd lij ǩidd 3.7.- 4.8.2017 kõõskâst

Sääʹmteeʹǧǧ piisarkåʹdd lij ǩidd 3.7.- 4.8.2017 kõõskâst.

Sääʹmteeʹǧǧ halltõs valmštõõli pueʹtti Sääʹmteeʹǧǧ såbbar

Sääʹmteeʹǧǧ pueʹtti, jiârǥ mieʹldd nuuʹbb såbbar ââʹnet 19.6.2017. Sääʹmteeʹǧǧ halltõs valmštõõli såbbreʹstes 2.6.2017 aaʹššid eʹtǩǩeemnalla tiuddsåbbra. Tääʹrǩmõs äʹššen tiuddsåbbrest lie vuõlttõs-saǥǥstõõllmõõžž nuʹtt Tâʹvvjânnmallaš sääʹmsuåppmõõžžâst ko še tuõttvuõtt- da suåvâdvuõttpro-seeʹssest di nõõmted vuäzzlaid Sääʹmvuuʹd škooultemkõõskõʹsse.

”Eeʹjj nuʹbb Sääʹmteeʹǧǧ sååbbar lij miârkteei, ko såbbrest lie kueʹhtt tääʹrǩes vuõlttõs-saǥǥstõõllmõõžž”, Sääʹmteeʹǧǧ saaǥǥjååʹđteei Tiina Sanila-Aikio teäʹddad. Taar, Ruõcc da Lääʹdd Sääʹmteeʹǧǧ ǩiõttʼtâʹlle nuʹtt Tâʹvvjânnmallaš sääʹmsuåppmõõžž ko še tuõttvuõtt- da suåvâdvuõttproseeʹss, kook kueʹsǩǩe puk säʹmmlaid peäggtum riikkin. ”Lij vääžnai, što kuhttuid aaʹššid ooudeep čââpp õhttsažtuâjast puki Sääʹmtiiʹǧǧi kõõskâst”, Sanila-Aikio looppat.

Sääʹmteeʹǧǧ såbbrest ǩiõttʼtâʹlle lââʹssen eeʹjj 2016 tiillpââʹj tiillǩiõrǥtõõzz di eʹtǩǩõõzzid riikk tällõsarvvlõʹsse 2019 kulttuur, mättʼtõõzz, ouddpeâmm di sosiaal- da tiõrvâsvuõttkääzzkõõzzi suõʹrjid. Sääʹmteeʹǧǧ såbbrest ǩiõttʼtâʹlle še eʹtkkõõzz Sääʹmteeʹǧǧ saakkeemstrategian di eʹtǩǩõõzz Sääʹmteeʹǧǧ sååbbarvueʹjj ooudummšen.

Halltõs nõõmti eeʹttkõʹsttjid čõõnâsjoukktuåimmjummša

Sääʹmteeʹǧǧ halltõs nõõmti Malla luâttärvvtuâjj-jouʹǩǩe II väärrsaaǥǥjååʹđteei Tuomas Aslak Juuso. Luâttärvvtuâjj-joouk täävtõssân lij pirrõsministeria eʹtǩǩõõzz meâldlânji suåppâd pääiklânji vuõʹjjin, koivuiʹm vueiʹtet ainsmâʹtted, što Malla luâđsuõjjeemvuuʹd luâttäärv jie huânnan. Lââʹssen Tuomas Aslak Juuso eeʹttkâstt Sääʹmteeʹǧǧ Alggmeerai vuõiggâdvuõđi äʹšštobddimekaniism (EMRIP) såb-brest Genevest sueiʹnnmannust.

Lââʹssteâđaid oudd Sääʹmteeʹǧǧ saaǥǥjååʹđteei Tiina Sanila-Aikio teʹl. 050 300 1780, tiina.sanila-aikio(at)samediggi.fi

Säʹmmlai äʹrbbvuõđlaž jieʹllemvuõʹjji ânnʼjõžvueʹǩǩ Lääʹddjânnmest – Biodiversiteʹttsuåppmõõžž vuåppamindikaattori tuâǥǥa čiõlǥtõs -raportt vaalmâš

Sääʹmteeʹǧǧ čõõđtem haʹŋǩǩõõzz mieʹrren leäi väʹldded seeʹlv säʹmmlai äʹrbbvuõđlaž jieʹllemvuõʹjji sââʹjest da ouddnummšest. Haʹŋǩǩõõzz äiʹǧǧen leäi haall vuäǯǯad teâđ äʹrbbvuõđlaž sääʹmjieʹllemvuõʹjji harjjteeʹji mieʹrest Lääʹddjânnmest di teâđ dommvuuʹdest jeälsteei säʹmmlai jieʹllemvueʹǩǩraajõõzzâst. Haʹŋǩǩõs tuärjjad Lääʹddjânnam meeraikõskksaž õõlǥtõõzzi tuåimmapiijjmõõžž biodiversiteʹttsuåppmõõžž beäʹlnn da lââzzad ânnʼjõžteâđ sääʹmkulttuur da sääʹmjieʹllemvuõʹjji vueʹjjest Lääʹddjânnmest. Haʹŋǩǩõõzz puʹhttem teâđaid vueiʹtet ââʹnned äuʹǩǩen ooudeʹmmen sääʹmjieʹllemvuõʹjjid kuõskki lääʹjjšeâttmõõžž da vaaldâšm.

Haʹŋǩǩõõzz aalǥâst kaartʼte kõõččmõšpõʹmmjin äʹrbbvuõđlaž jieʹllemvuõʹjjin vuåǯǯum tiânnsid, tõid õnnum ääiʹj, jieʹllemvuõʹjji miârktõõzzid vaʹstteeʹjid di pueʹttiääiʹj vueiʹnlmid. Vaʹsttõõzzi analysâʹsttmest kõskkneš säʹmmlai dommvuuʹd puåđõõzzi taʹrǩstõõllmõʹšše.

Haʹŋǩǩõõzz mieʹldd šõõddi raportt, koozz lie norrum haʹŋǩǩõõzz ouddnummuš, mõõntõõllmõõžž, aunstõs da puåđõõzz. Puåđõõzzin pueʹđi ouʹdde jm. što äʹrbbvuõđlaž jieʹllemvuõʹjjin vuåǯǯu miârkteei tiânnaz tåʹlǩ puäʒʒhåiddmest. Äʹrbbvuõđlaž jieʹllemvuõʹjji miârktõs vueʹssen sääʹm jieʹllemnääʹlest da kulttuurâst pueʹđi čiõlggsânji ouʹdde da säʹmmlai jiõččmeäʹrreemvuõiggâdvuõđ äʹrbbvuõđlaž jieʹllemvueʹjjin toʹbdde vääžnai äʹššen pueʹttiääiʹj juuʹrdeeʹl.

Haʹŋǩǩõõzz čõõđteeʹjen da vueʹssteäggteeʹjen tuåimmji Sääʹmteʹǧǧ da tõn väʹlddteäggteei leäi mädd- da meäʹcctäällministeria.

Haʹŋǩǩõõzz mieʹldd šõddâm lopprapoort vuäitt lookkâd tääiʹben.

Lââʹssteâđaid haʹŋǩǩõõzz da rapoort pirr oudd Sääʹmteeʹǧǧ saaǥǥjååʹđteei Tiina Sanila-Aikio teʹl. 050 300 1780, tiina.sanila-aikio(at)samediggi.fi  

Ååʹn lij neäʹttel äiʹǧǧ iʹlmmted vuässõõttjid da pleässjemjooukid mieʹldd čeäʹppvuõđpeivva!

Ååʹn lij neäʹttel äiʹǧǧ iʹlmmted vuässõõttjid da pleässjemjooukid mieʹldd čeäʹppvuõđpeivva!

Sääʹmnuõri čeäʹppvuõđpeivva vuässõõtti pleässjemjoouk di vuässõõttjid feʹrttai iʹlmmted mââimõssân piâtnâc 7.4. Iʹlmmtõõttmõõžžid väʹlddep vuâsta tåʹlǩ Webropol-neʹttkääzzkõõzz pääiʹǩ. Webropoʹlle peäss tääiǥ.

Ǩiõtt-tuejjǩeâšt tuej âʹlǧǧe leeʹd tooimtum õuʹddel eeʹjjpeeiʹvi

Sääʹmǩiõtt-tuejj ǩiõšttu õlgg ǩiõtt-tuejaid toimmted 13.4. mõõneeʹst sääʹmkultturkõõskõs Sajoʹsse Aanra, leʹbe Hetta škooulkõõskõʹsse. Ǩiõtt-tuejaid Sajoozzâst väldd vuâstta Xia Torikka da Hetta škooulâst Maarit Magga.

Ǩiõtt-tuej mieʹldd âʹlǧǧe leeʹd teâđ ǩiõtt-tuejast di tueʹjjeeʹjest. Di õlgg leeʹd selfie ǩiõtt-tuej tueʹjjeejast õõutâst vaalmâš ǩiõtt-tuejain. Mudoi ǩiõtt-tuejj tueʹjjeemnääʹll iʹllakku meäʹrruum da tõõzz vuäǯǯa vuässõõttâd juõʹǩǩ âkksa päärna di nuõr. Vuäitt vuässõõttâd še joukkan.

Mij tuäivvap pueʹr valmštõõttâm ääiʹj di šiõǥǥ eeʹjjpeeiʹvid tiʹjjid pukid!

Xia Torikka
Puuʹtʼteei
xia.torikka(at)samediggi.fi
0406411533
facebook