Taarrjânnam, Ruõccjânnam da Lääʹddjânnam sääʹmteeʹǧǧ reäʹšše õhttsaž ǩiõllseminaar tuulkid, jåårǥlõʹttjid da jeeʹres ǩiõlltuâjjlaid

Sääʹmteeʹǧǧ reäʹšše õõutveäkka 9.-10.10.2019 ǩiõllseminaar Aanrest õõuʹdmõsân siʹjjid, ǩeäk tuejjee sääʹmǩiõlivuiʹm: jåårǥlõʹttjen, tulkkân leʹbe jeeʹres ǩiõlltuâjjliʹžžen. Seminaar riâššât Taarrjânnam, Ruõccjânnam da Lääʹddjânnam sääʹmtiiʹǧǧi da Sääʹm Ǩiõllkaʹlddi õhttsažtuâjjan da tõt lij sääʹmtiiʹǧǧi beäʹlnn nääʹll väʹldded lokku ÕM alggmeerǩiõli eeʹjj.

Täi koolm sääʹmteeʹǧǧ õhttsanji riâššâm šõddmõõžž jurddjen lij tuärjjeed ǩiõlltuâjjlai ämmat-tääid, uʹvdded vueiʹttemvuõđ saǥstõõllâd čiŋŋlõbân ǩiõllaaʹšši pirr da vuäjjned tuulki, jåårǥlõʹttji da ǩiõlltuâjjlai tuâj kuõskki kõõččmõõžžid, vueiʹttemvuõđid da vaʹǯǯtõõzzid. Seminaar lij še päiʹǩǩ raajjâd ođđ säiʹmmõõzz da õhttsažtuâjjõhttvuõđid ǩiõlltuâjjlai kõõsk da nääiʹt nââneed sääʹmǩiõli õuʹdde tuejjuum ǩiõlltuâj pâʹjjel raaji.

Sääʹmteeʹǧǧ kåčča puk ǩiõlltuâjjlaid ǩiõllseminaaʹre 9.-10.10.2019 Aanra!

Seminaar prograamm da jeeʹres teâđaid iʹlmmtet mâʹŋŋlõbân.

Seminaaʹre vuässõõttâmiʹlmmtõõttmõš ävvan čõhččǩeässa 2019.

Lââʹssteâđ:

Anne Kirste Aikio, anne-kirste.aikio(at)samediggi.fi, mäʹtǩǩteʹlfon. +358 40 7075626

Mikkel Rasmus Logje, mikkel.rasmus.logje(at)samediggi.no, mäʹtǩǩteʹlfon: +47 412 65 375

Marie Louise Allas, marielouise.allas(at)sametinget.se, mäʹtǩǩteʹlfon +46 70-367 46 82

 

 

Kåčč vuässõõttâd Sääʹmǩiõli neäʹttla 21.-27.10.2019!

Sääʹmǩiõli neäʹttel ââʹnet 21.-27.10.2019 da Sääʹmteʹǧǧ kåčč pukid vuässõõttâd teeʹmmneäʹttla ouddmiârkkân riâžžeeʹl šõddmõõžžid leʹbe kampanjaid di poouʹteeʹl sääʹmǩiõl ouʹdde jeeʹres naaʹlin.

Eeʹjj 2019 viõʹttjet meeraikõskksaž alggmeerai ǩiõli teeʹmmeeʹjj da Sääʹmteʹǧǧ lij nânnsânji mieʹldd teeʹmmeeʹjj čõõđtummšest õhttsažtuâjast Taarrjânnam da Ruõccjânnam Sääʹmtiiʹǧǧivuiʹm. Sääʹmteʹǧǧ reäšš jiõčč tuåimmjummuž di õlmstâtt materiaalid teeʹmmeeʹjj poodd da haaʹlad smeʹllkâʹtted še jeeʹres tuåimmjeeʹjid vuässõõttâd teeʹmmekka.

Sääʹmteʹǧǧ kåčč põrggsid, organisaatioid, veʹrǧǧniiʹǩǩid da jeeʹres tuåimmjeeʹjid veiddsânji Lääʹddjânnmest vuässõõttâd sääʹmǩiõli kuâsttjemvuõđ lââʹzztummša obb jânnmest. Sääʹmǩiõlid vuäitt puʹhtted ouʹdde jm. tuejjeeʹl ǩeittsid/porrmõšliistid säämas, tiõrvteeʹl säämas, ââʹneeʹl sääʹmǩiõllsaž päiʹǩǩnõõmid. Ideâʹstted tuåimmjummuž, kååʹtt oouʹdad sääʹmǩiõli kuâsttjemvuõđ, mušttat ǩiõli määŋgnallšemvuõđâst di tuejjad ođđ ǩiõllââʹnnemaarenaid. Sääʹmǩiõl lie vaarvuâla da puk tuärjjõs lij tarbbsõs.

Sääʹmteʹǧǧ meâtt eeʹjj looppâst Sääʹmǩiõlltuâjj -ciist. Ciist miõđât veʹrǧǧnekka leʹbe õõutstõʹsse, kååʹtt lij tuåimmjummšeʹstes välddam lokku teeʹmmeeʹjj leʹbe jeeʹresnalla reâuggam puârast sääʹmǩiõli oouʹdeem diõtt Lääʹddjânnmest. Ǩiõllneäʹttel poodd aktiivlânji tuåimmâm tuåimmjeeʹjid vääʹldet lokku Sääʹmǩiõlltuâjj -ciist miõttmest.

Sääʹmteʹǧǧ reäšš infopoodd auktorisõsttum jåårǥlõõʹtti tuʹtǩǩõõzzâst 29.5.2019

Sääʹmteʹǧǧ reäšš infopoodd auktorisõsttum jåårǥlõõʹtti tuʹtǩǩõõzzâst 29.5.2019, č 14.00-14.45 Sajoozzâst Soljust. Pooddâst mõõnât čõõđ mii tuʹtǩǩõs lij da mäʹhtt tõõzz vuäitt valmštõõttâd. Jiõčč tuʹtǩǩõʹsse iʹlmmtõõttmõš lij påʹrǧǧmannust. Infopooddâst tuʹtǩǩõõzz pirr mainste ǩiõllstaanpiisar Anne Kirste Aikio da auktorisõsttum jåårǥlõõʹtti Merja Fofonoff da Arla Magga. Infopodd lij jurddum pukid ǩeäi miõl tuʹtǩǩõs ǩeäss.

Mättʼtõshalltõõzz vaaldšmem auktorisõsttum jåårǥlõõʹtti tuʹtǩǩõõzz riâššât puõʹtti vuâra skamm-mannust 2019. Auktorisõsttum jåårǥlõõʹtti tuʹtǩǩõõzz vuäitt spraavâd pukin Lääʹddjânnmest mainstum sääʹmǩiõʹlle da tõt lij veerǥlaž tuõđštõs jåårǥlõõʹtti ämmat-tääidast. Tuʹtǩǩõõzz siiskõõzzâst vuäitt lookkâd tääʹrǩben mättʼtõshalltõõzz seeidain: https://www.oph.fi/koulutus_ja_tutkinnot/auktorisoidut_kaantajat

Sääʹmteʹǧǧ reäšš mâʹŋŋlest čâhčča jeeʹrab valmštõõttâmpoodd tuʹtǩǩõʹsse.

Infopoʹdde vuäitt vuässõõttâd ougglõsõhttvuõđin, iʹlmmtak ât tõʹst ǩiõllstaanpiisra.

Lââʹssteâđaid oudd ǩiõllstaanpiisar Anne Kirste Aikio:

anne-kirste.aikio(at)samediggi.fi
Mob. +358 40 707 5626
Teʹl. 010 839 3124

Sääʹmtegga teäggtõs alggmeerai ǩiõli eeʹjj vääras

Eeʹjj 2019 viõʹttjet meeraikõskksaž alggmeerai ǩiõli teeʹmmeeʹjj da Sääʹmteʹǧǧ lij nânnsanji mieʹldd teeʹmmeeʹjj čõõđtummšest. Sääʹmteeʹǧǧ tuâjjan lij riâššâd jiõčč tuåimmjummuž teeʹmmeeʹjj poodd di smeʹllkâʹtted jeeʹres tuåimmjeeʹjid vuässõõttâd teeʹmmekka.

– Mättʼtõs- da kulttuurministeria mieʹrrtieʹǧǧ vuäkka Sääʹmteʹǧǧ vuäitt ooudeed sääʹmǩiõli kuâsttjemvuõđ Lääʹddjânnmest mušttʼteeʹl ǩiõli määŋgnallšemvuõđâst di raajjâd ođđ ǩiõllââʹnnemareenaid. Lij samai vääžnai, što riikk vuässââtt veäʹǩǩvuõđin teeʹmmekka, rämmaš Sääʹmteeʹǧǧ saaǥǥjååʹđteei Tiina Sanila-Aikio.

Plaaneemnalla lie materiaal õmmǥain puärrsab oummuid: sääʹmǩiõllsaž õmmǥažǩeeʹrj, sääʹmǩiõllsaž euʹnnlauggi, euʹnneemǩeʹrjj, škooulniiʹǩǩid nuõri sääʹnnǩeʹrjjprogramm da ǩiõllkampanja, vuäʹppõõzz ǩiõllvaʹlljummšid puärrsid da ääkkaid da ääʹjjid, konseeʹrt, ǩiõllââʹnnma älšmõʹtti materiaal, ǩeeʹrj da jiânnai jeeʹres ääʹšš.

– Veäʹǩǩvuõđin vueiʹttep tuejjeed määŋgid aaʹššid, koid ij leäkku ääiʹjben leämmaž vueiʹttemvuõtt tuejjeed. Sääʹmǩiõli jeälltemtuâjj piârrjin di päärnai da nuõri kõõskâst lij ouddnam jiânnai da vueiʹnnep, što lij tuõđi vuõigg äiʹǧǧ puʹhtted positiivlaž smeʹllkâttmõõžž da älšmâttmõõžž ǩiõl ââʹnnma jeeʹres taaʹzzin da nääiʹt vuässõõttâd mij peäʹlest teeʹmmekka, juätkk haʹŋǩǩõõzzâst vaʹstteei ǩiõllstaanpiisar Anne Kirste Aikio.

Lââʹssen Sääʹmteʹǧǧ puätt teeʹmmeeʹjj poodd smeʹllkâʹtted põrggsid, veʹrǧǧniiʹǩǩid da jeeʹres tuåimmjeeʹjid veiddsânji Lääʹddjânnmest vuässõõttâd sääʹmǩiõli kuâsttjemvuõđ lââʹzztummša obb jânnmest. Tâʹvvjânnmi Sääʹmteeʹǧǧ reäʹšše-i õõutsââʹjest Sääʹmǩiõl neäʹttel (Sámi Giellavahkku) 21. – 27.10.2019. Neäʹttel mieʹrren lij, što jeeʹres tuåimmjeei Lääʹddjânnmest, Taarrjânnmest da Ruõccjânnmest vääldče koon-ne nalla lokku sääʹmǩiõlid tuåimmjummšeʹstez.

Sääʹmteʹǧǧ meâtt eeʹjj looppâst Sääʹm ǩiõlltuâjj-ciist. Ciist miõttât veʹrǧǧnekka leʹbe õõutstõʹsse, kåått lij tuåimines välddam lokku teeʹmmeeʹjj leʹbe jeeʹresnalla reâuggam puârast sääʹmǩiõl ooudeem diõtt Lääʹddjânnmest.

Mättʼtõs- da kulttuurministeria miõtti Sääʹmtegga teäggtõõzz ÕM:i alggmeerai ǩiõli eeʹjj ouʹdde puʹhttem diõtt. Teäggtõõzz miõʹtteš ministeria õlmmsaž čeäʹppõõzz da kulttuur ooudeei haʹŋǩǩõõzzi spesiaalveäʹǩǩvuõđin da veäʹǩǩvuõđ mieʹrr lij õhttsiʹžže nuʹtt 47 000 euʹrred.  Haʹŋǩǩõõzzâst lij mieʹrren čõõđted sääʹmǩiõli ââʹnnma älšmõʹtti kampanjaid, lââʹzzted sääʹmǩiõli kuâsttjemvuõđ Lääʹddjânnmest da raajjâd jeeʹrab päärnaid da nuõrid ǩiõl mättʼtõõttma da ââʹnnma tuärjjeei šõddmõõžžid da materiaalid. Haʹŋǩǩõõzz jeeʹres vueʹssvuuʹdid čõõđtet õõutsââʹjest jeeʹres tuåimmjeeʹjivuiʹm, mâʹte Sääʹmteeʹǧǧ nuõrisuåvtõõzzin da päärnaikulttuurkõõskõs Mánnuin.

Meeraikõskksaž alggmeerai ǩiõli teeʹmmeeʹjjest lij jiiʹjjes seiddõs, koozz noorât pukid šõddmõõžžid teeʹmmeeʹjj poodd.

 

Lââʹssteâđ:

Saaǥǥjååʹđteei Tiina Sanila-Aikio, teʹl. 050 300 1780, tiina.sanila-aikio(at)samediggi.fi

Ǩiõllstaanpiisar Anne Kirste Aikio, teʹl. 010 839 3124, anne-kirste.aikio(at)samediggi.fi

Sääʹmteʹǧǧ iʹlmmat ooccâmnalla mieʹrräiggsaž ǩiõllpieʹssohjjeei tuâj

Sääʹmteʹǧǧ iʹlmmat ooccâmnalla mieʹrräiggsaž ǩiõllpieʹssohjjeei tuâj. Tuâjj älgg 3.6.2019 leʹbe suåppmõõžž mieʹldd da peštt 31.12.2019 räjja, da vuäitt juätkkjed kuuʹǩǩben ååreeʹl ǩidd jeäʹrab teäggtõõzz vuäǯǯmest. Ǩiõllpieʹssohjjeei tuâjaid kooll jm. säʹmmlai ǩiõllpieʹsstuåim ohjjummuš, koordinâsttmõš da õõudâsviikkmõš di ǩiõllpieʹzzi riikkveäʹǩǩvuõđ vaaldšma õhttneei tuâj.

Šiõttõsvuâđlaž ââʹntemõõlǥtõssân lij veeʹrj õõlǥtem škoouʹlʼjummuš da sääʹmǩiõl täidd (asetõs 1727/95). Tuâj šiõǥǥ håiddmõš õõlǥat obbväʹlddsaž pedagooglaž vuäinlmõõžž säʹmmlaž ouddpeâmmast, ǩiõl jeälltem-mõõntõõllmi tobddmõõžž,    härjjnummuž sääʹmkulttuuʹre di riikkveäʹǩǩvuõđi vaaldšma õhttneei tuâjaid. Tuõjju vaʹlljuum oummust tuäivat päärnaikaardâsuʹčteeʹl ââʹntemvuõđ. Päʹlǩǩõs meäʹrtââvv sääʹmteeʹǧǧ päʹlǩǩriâšldõõǥǥ väʹǯǯelvuõtt-tääʹzz IV/II-III mieʹldd (vuâđđpäʹlǩǩ 2625,08 – 2 565,88). Vuâđđpääʹlǩ lââʹssen määuʹset 24 % sääʹmvuuʹd lââʹzz da tuâjjǩiõččlâsttmõõžž mieʹldd meäʹrtõõvvi ǩiõččlâʹsttemlõõʹzzid. Tuâjast jääʹǩǩtet kueiʹt määnpââʹj ǩiččlõddâmääiʹj. Tuåimmpäiʹǩǩ lij sääʹmkulttuurkõõskõs Sajoozzâst, Aanrest.

Ooccmõõžžid mieʹlddõõzzeezvuiʹm âlgg tuåimted sääʹmteeʹǧǧ piisarkådda 30.4.2019 čiâss 16.00 mõõneeʹst addrõõzzin info@samediggi.fi.  Lââʹssteâđaid tuâjast oudd ǩiõllstaanpiisar Anne Kirste Aikio teʹl. 010 839 3124. Sääʹmteeʹǧǧ tuåimmjummša vuäitt tobdstõõttâd neʹttaddrõõzzâst www.samediggi.fi

Aanrest 9.4.2019 Sääʹmteʹǧǧ

Sääʹmteeʹǧǧ valmštâʹttmest ođđ auktorisõsttum sääʹmǩiõl jåårǥlõõʹtti

Sääʹmteʹǧǧ riâšši mõõnni kålggmannust valmštõõttâmpeeiʹv auktorisõsttum jåårǥlõõʹtti tuʹtǩǩõʹsse. Valmštõõttma vuässâʹtte vitt oummu. Auktorisõsttum jåårǥlõõʹtti tuʹtǩǩõõzz rieʹššeš skamm-mannust 2018 da tuʹtǩǩõõzz puåđõõzzid õlmstõʹtteš ǩeâđđa 2019. Tuʹtǩǩõõzz spraʹvve kueʹhtt sääʹmǩiõllsaž jåårǥlõõʹtti. Arla Magga spraavi lääʹdd-tâʹvvsääʹmm ǩiõllpaʹrre auktorisõsttum jåårǥlõõʹtti tuʹtǩǩõõzz da Terhi Harju lääʹdd-nuõrttsääʹmm ǩiõllpaʹrre.

Ǩiõllstaanpiisar Anne Kirste Aikio tuäivat leekk Arla Maggaaʹje auktorisõsttum jåårǥlõõʹtti tuʹtǩǩõõzzâst.

Valmštõõttâmpeeiʹv riâššâm Sääʹmteeʹǧǧ ǩiõllstaanpiisar Anne Kirste Aikio rämmaš jåårǥlõʹttji meäʹr lâssnummšest.

– Lij šiõǥǥ, što valmštâʹttempeiʹvvem veäkka kueʹhtt ođđ jåårǥlõõʹtti spraʹvve tuʹtǩǩõõzz. Nuõrttsääʹm auktorisõsttum jåårǥlõõʹtti lie leämma pâi õhtt ooumaž obb maaiʹlmest, ååʹn sij lie kueiʹtes. Tâʹvvsääʹm tuʹtǩǩõõzz lie spraavam mõõnni lååi eeʹjj seʹst pâi muäʹdd oummu, de tõʹst še lââzztõs lij samai miârkteei.

Tuʹtǩǩõõzz spraavam Terhi Harju da Arla Magga miõlâst Sääʹmteeʹǧǧ valmštâʹttempeeiʹvest leäi jõnn miârktõs tuʹtǩǩõʹsse valmštõõvvâm diõtt.

– Valmštâʹttempeeiʹvest vuäǯǯai vääžnai teâđ tuʹtǩǩõõzz pirr da šiõǥǥ viiŋkid tuʹtǩǩõʹsse valmštõõttma. Leäi snäätnʼjab toobd, ko tuʹtǩǩõʹsse õhttneei aaʹššid leäi vuäǯǯam mõõnnâd čõõđ äʹšštobddjivuiʹm ouddǩiõʹtte, kommentâstt Terhi Harju.

Mättʼtõshalltõõzz vaaldšmem auktorisõsttum jåårǥlõõʹtti tuʹtǩǩõõzz riâššât puõʹtti vuâra skamm-mannust 2019. Sääʹmteʹǧǧ reäšš puõʹtti čõõuč še valmštõõttâmpeeiʹv, jõs tõt ǩeäss miõlid.

– Tuʹtǩǩõs lij väʹǯǯel da tuʹtǩǩõʹsse valmštõõttmõõžž kannat altteed ääiʹjeld. Kannat tobdstõõttâd tuʹtǩǩõõzz siiskõʹsse da ââʹnned äuʹǩǩen Sääʹmteeʹǧǧ valmštõõttâmpeeiʹv, vuäʹppast ođđ auktorisõsttum jåårǥlõʹtti Arla Magga.

Sääʹmteʹǧǧ reäšš ǩiiđ poodd še tobdstõõttâmškooultõõzz tõid, ǩeäi miõl ǩeäss tuulk tuâjj. Tobdstõõttâmškooultõõzz riâššât tõn diõtt, ko jåårǥlõʹttji lââʹssen še tuulkin lij jõnn vääʹnn. Škooultõõzz pirr teâđtet jeeʹrab.

Lââʹssteâđ:

ǩiõllstaanpiisar Anne Kirste Aikio
anne-kirste.aikio@samediggi.fi
teʹl. 010 8393124

Muumlieʹǩǩ-rääid duʹbbjet sääʹmǩiõlid Sääʹmteeʹǧǧ aalǥtõõzzâst

Sääʹmteʹǧǧ eʹtǩǩii rosttovmannu looppâst Õõlmâsradiooʹje, što tõt altteʹči ođđ Muumlieʹǩǩ-rääid (Muumilaakso) duʹbbjummuž sääʹmǩiõlid. Yle čuäʹjat ǩeâđđa 2019 ođđ Muumlieʹǩǩ-rääid pueʹrmõs ǩiiččeemäiggan televisiost da Yle Areenast lääʹdd- da ruõccǩiõllsaž version. Sääʹmteʹǧǧ eʹtǩǩii teʹl, što Õõlmâsradio duʹbbjeʹči lââʹssen rääidast versio, kåått vääldči lokku pukid Lääʹddjânnmest mainstum sääʹmǩiõlid.

Aalǥtõõzz tueʹǩǩen leäi juurd smeʹllkâʹtted Yle vuässõõttâd ÕM:i meeraikõskksaž alggmeerai ǩiõli teeʹmmekka, koon viõʹttjet eeʹjj 2019. Eeʹjj mieʹrren lij piijjâd vuâmmšummuž maaiʹlm alggmeerai ǩiõlid, koin jäänbõs lie vaarvuâla. Puk Lääʹddjânnmest mainstum sääʹmǩiõl lie še klasstõllum samai vaarvuâlaž leʹbe vaarvuâlaž ǩiõllân, da ǩiõlljeälltemtuâj oouʹdeet viõkkšânji tän poodd, što ǩiõl seeilče.

Yle iʹlmmti 15.3.2019, što puuʹtat Muumlieʹǩǩ-rääidast še sääʹmǩiõllsaž versioid Sääʹmteeʹǧǧ eʹtǩǩõõzz meâldlânji:

-Leäm samai kuärǥaž, što YLE vaaʹldi alggmeerai ǩiõli eeʹjj vuâmmšâʹttemkåččan vuâstta da piâssâp kuullâd aanar-, nuõrtt- da tâʹvvsääʹmǩiõl muumfiguuri njaaʹlmin, rämmaš Sääʹmteeʹǧǧ saaǥǥjååʹđteei Tiina Sanila-Aikio.

Sääʹmteeʹǧǧ miõlâst lij vääžnai, što jeeʹrab päärnaid leʹčči jäänab jiijjâsǩiõllsaž programmtaʹrjjummuš.

– Duʹbbjummuš lij viõkkšõs puuʹtʼtemnääʹll lââʹzzted sääʹmǩiõllsaž prograammi meäʹr, mõõn õõlǥči ââʹnned jäänab äuʹǩǩen. Tät lij tääʹrǩes äiggmõš Ylest sääʹmǩiõli oouʹdeem diõtt, tuâtt Sääʹmteeʹǧǧ ǩiõllstaanpiisar Anne Kirste Aikio.

– Lij samai vääžnai, što sääʹmǩiõl kuâsttje da kollʼje pâi jäänab da jeeʹrab media lij samai kõskksaž neävv ǩiõli jieʹllemviõkkvuõđ raavummša, Aikio juätkk.

Duʹbbjem- da jåårǥlâʹttemtuâj altteeškuäʹđet ååʹn da Sääʹmteʹǧǧ lij låppääm taʹrjjeed äʹšštobddmõõžžâs veäʹǩǩen duʹbbjummuž raajjâm diõtt.

Aalǥtõs Muumlieʹǩǩ-rääid duʹbbjummšen lij lookkâmnalla obbvuõđstes Sääʹmteeʹǧǧ dokumeʹnttbaaŋkâst.

Lââʹssteâđ

Saaǥǥjååʹđteei Tiina Sanila-Aikio, teʹl. 050 300 1780, tiina.sanila-aikio(at)samediggi.fi

Ǩiõllstaanpiisar Anne Kirste Aikio, teʹl. 010 839 3124, anne-kirste.aikio(at)samediggi.fi

Sääʹm ǩiõll-lääʹjj 31 § meâldlaž vieʹǩǩtõõzz ooccâmnalla

Vuõiggâdvuõttministeria iʹlmmat ooccâmnalla sääʹm ǩiõll-lääʹjj (1086/2003) 31 §:st jurddum veäʹǩǩtieʹǧǧ. Veäʹǩǩtieʹǧǧi vääras liâ tän eeʹjj ââʹnnemnalla õhttseʹžže 150 000 euʹrred.

Veäʹǩǩtieʹǧǧid vueiʹtet miõttâd saaʹmi dommvuuʹd kooʹddid, sieʹbrrkooʹddid da paalǥâskooʹddid di lääʹjj 18 §:st jurddum privattniiʹǩǩid peäggtum lääʹjj suåvldummšest šoddi takai jeäʹrbi lââʹsskuuli käʹttem diõtt.

Ååʹn ooccâm vueʹlnn åårrai veäʹǩǩtieʹǧǧ liâjurddum 1.1.2019 mâŋŋa šõddâm leʹbe šõddi lââʹsskuulid.Luõvâldǩeeʹrjtum ooccmõõžž aʹlǧǧe tooimted vuõiggâdvuõttministeriaaʹje mââimõõzzâst 1.4.2019 čiâss 16:15 liâdǥlânji addrõʹsse oikeusministerio@om.fi.

Occmõõžž vuäitt še tooimtedpååʹštaddrõʹsse Oikeusministeriö, Demokratia-, kieli- ja perusoikeusasioiden yksikkö, PL 25, 00023 Valtioneuvosto. Pâi mieʹrräigga mõõneeʹstpuättam ooccmõõžž vääʹldet lokku.Ooccmõõžžâst âʹlgge seʹlvted tõk takai jeäʹrab lââʹsskuul, kooi käʹttem diõtt veäʹǩǩtieʹǧǧ vuäǯǯeet.

Lââʹssteâđ vuõiggâdvuõttministeria veäʹǩǩtõõz pirr

Lââʹssteâđaid ouʹdde:

Ǩiõllstaanpiisar Anne Kirste Aikio, 010 839 3124, anne-kirste.aikio(at)samediggi.fi

Sääʹmteʹǧǧ iʹlmmat ooccâmnalla ouddčiõlǥtõshaʹŋǩǩõõzz plaaneei mieʹrräiggsaž tuâj

Ouddčiõlǥtõshaʹŋǩǩõõzzâst čiõlǥeet, måkam määinin da tuåimin saaʹmi kulttuur- da ǩiõllpieʹsstuåimmjummuž vueiʹtet seʹrdded kooʹddin da õhttõõzzin Sääʹmteeʹǧǧ vuâlla. Kulttuur- da ǩiõllpieʹsstuåimmjummuš lij ǩiõll-laauǥmõõntõõllmin čõõđteei sääʹm ouddpeâmm. Tän poodd tuåimmje õhttsiʹžže 12 aanar-, nuõrtt- da tâʹvvsääʹmǩiõllsaž ǩiõllpieʹssjoukkâd. Plaaneei tuâjjan lij čiõlǥeed da valmštõõllâd ǩiõllpieʹsstuåim vaaldšemvuõđlaž seerd õõlǥteei tuåimid. Tuâjj älgg suåppmõõžž mieʹldd nuʹtt sõrgg, ko vueiʹtlvaž da peštt 4 määnpââʹj.

Ââʹntemõõlǥtõssân lij tuâj ooudldem ââʹnteei škooultõs. Tuâj oʹnnsteeʹjjes håiddmõš õõlǥat veiddsõs ouddpeâmmsueʹrj tobddmõõžž, oodd jiõččnaž čiõlǥeemtuõjju di plaaneem- da organisâʹsttemoodd. Čiõlǥtõshaʹŋǩǩõõzzâst vaʹsttad sääʹmǩiõl koontâr da ouddooumžen tuåimmai ǩiõllstaanpiisar. Tuâjast jääʹǩǩtet kuõiʹt määnpââʹj ǩiččlõddâmääiʹj.

Plaaneei päʹlǩǩõs meäʹrtââvv Sääʹmteeʹǧǧ päʹlǩǩriâšldõõǥǥ väʹǯǯelvuõtt-tääʹzz IV/IV mieʹldd (vuâđđpäʹlǩǩ 2 491,54 e). Vuâđđpääʹlǩ lââʹssen määuʹset 24 %:tt sääʹmvuuʹd lââʹzz da tuâjjǩiõččlâsttmõõžž mieʹldd meäʹrtõõvvi ǩiõččlâʹsttemlõõʹzzid. Frijjååʹblkallaš tuâjjooccmõõžžid âlgg tuåimted Sääʹmteeʹǧǧ piisarkådda 15.2.2019 mõõneeʹst addrõʹsse info(at)samediggi.fi. Lââʹssteâđaid oudd ǩiõllstaanpiisar Anne Kirste Aikio, anne-kirste.aikio(at)samediggi.fi / teʹl. 010 839 3124. Sääʹmteeʹǧǧ tuåimmjummša vuäitt tobdstõõttâd addrõõzzâst www.samediggi.fi.

Sääʹmteʹǧǧ juäʹtǩǩ ooccâmääiʹj vaʹstteei ouddpeâmmohjjeei mieʹrräiggsaž tuõjju

Sääʹmteʹǧǧ iʹlmmat ooccâmnalla

Vaʹstteei ouddpeâmmoʹhjjeei mieʹrräiggsaž tuâj

Tuâjj älgg suåppmõõžž mieʹldd da peštt 31.12.2019 räjja. Tuâj älggmõõžž oudldõssân lij teäggtõõzz raʹvvjummuš da Sääʹmteeʹǧǧ da Anarâškielâ servi rõ kõskksaž õhttsažtuâjjsuåppmõõžž viõǥǥâståårrmõš. Vaʹstteei ouddpeâmmoʹhjjeei vaʹsttad Anarâškielâ servi rõ tuõʹllʼjam kooum ǩiõllpieʹzz – Aanar Piervâl da Piäju di Âʹvvlest åårrai Kuáti – ouddpeâmm vuäʹpstummšest, ooudâsviikkmest da tuâjjlažkåʹddvaaldšmest. Õhttõõzzâst lie õhttsiʹžže 10 ǩiõllpieʹsstuâjjliʹžžed da õhtt vaaldâšmjååʹđteei. Vaʹstteei ouddpeâmmoʹhjjeei tuåimmai Sääʹmteeʹǧǧ tuâjjliʹžžen, leša õõldâs õhttsažtuâjast Anarâškielâ servi ouddoummui- da tuâjjlaivuiʹm.

Ââʹntemõõlǥtõssân lij tuâj ooudldem ââʹnteei škooultõs, mâʹte pedagogtiõđ kandidaatt tuʹtǩǩõs leʹbe sosiaal- da tiõrvâsvuõttsueʹrj ämmatõllškooultuʹtǩǩõs, kook âʹnne seʹst ouddpeâmm mättjummuž. Lââʹssen õõlǥtet sääʹmǩiõl silttummuž (asetõs sääʹmteeʹǧǧest 1727/95). Tuâj oʹnnsteeʹjjes håiddmõõžž ooudâsveʹǩǩe tuâjjǩiõččlâsttmõš ouddpeâmm da vaaldâšm sueʹrjin da tuâjjlažkåʹddjååʹđtummšest. Tuâjast âlgg tobddâd säʹmmlaž ouddpeâmm vueʹlǧǧemsõõʹjid, taarbid da täävtõõzzid. Tuâjast taarbšet šiõǥǥ vuârrvaikktemooddid di oodd tuejjeed õhttsažtuâj piârrjin, ǩiõllpieʹzzi jeeʹres tuâjjlažkooʹddin da jeeʹres õhttsažtuâjjkueiʹmivuiʹm. Vaʹstteei ouddpeâmmoʹhjjeei reâugg sääʹmǩiõl konttrest, koon ouddooumžen tuåimmai ǩiõllstaanpiisar. Tuâjast jääʹǩǩtet kuõiʹt määnpââʹj ǩiõččlõddâmääiʹj. Vaʹlljuum oummust âlgg čuäʹjted priimteei väʹlddõõǥǥ kriminaalrekisteeʹrest (L 504/2002).

Oʹhjjeei päʹlǩǩõs meäʹrtââvv Sääʹmteeʹǧǧ päʹlǩǩriâšldõõǥǥ väʹǯǯelvuõtt-tääʹzz IV da I mieʹldd (vuâđđpäʹlǩǩ 2 713,63 euʹrred/mp). Vuâđđpääʹlǩ lââʹssen tuâjast määuʹset sääʹmvuuʹd lââʹzz 24 % da tuâjjǩiõččlâsttmõõžž mieʹldd meäʹrtõõvi ǩiõččlâʹsttemlõõʹzzid. Vaʹstteei oʹhjjeei tuåimmpäiʹǩǩ lij sääʹmkulttuurkõõskõs Sajoozzâst, da tuâjj lij vueʹzzi ǩiõllpieʹzzin Aanrest da Âʹvvlest še. Jiiʹjjes autt lij tuâjast viâltʼteʹm. Frijjååʹblkallaš tuâjjooccmõõžžid mieʹlddõõzzeezvuiʹm âlgg tuåimted Sääʹmteeʹǧǧ piisarkådda 22.2.2019 č 16.00 mõõneeʹst addrõõzzin info(at)samediggi.fi. Lââʹssteâđaid oudd ǩiõllstaanpiisar Anne Kirste Aikio, anne-kirste.aikio@samediggi.fi / teʹl. 010 839 3124.

Sääʹmteeʹǧǧ tuåimmjummša vuäitt tobdstõõttâd addrõõzzâst www.samediggi.fi.

Aanrest 17.1.2019 Sääʹmteʹǧǧ (iʹlmmtõs lij peeiʹvtum 30.1.2019)