Muumlieʹjj häämai jiõnnroolid taarbšet lââʹzz nuõrttsääʹmǩiõllsaž oummid

Nuõrttsääʹmǩiõllsaž Muumlieʹjj jiõnnrooli teʹsttčuäjtõõzzid  jäʹrjstet sueiʹnnmannu aalǥâst Aanrest. Jiõnnteeʹstid ââʹnet 1.-5.7.2020 Sajoozz studiost. Jiõk taarbaš leeʹd ääiʹjben tuejjääm jiõnnroolâst, puäʹđ smellkânji kåittad jiõnnroolâst čuäʹjtõõllmõõžž. Häämain måtam läulla, nuʹtt-ba mieʹldd taarbšet še laaulčieʹppid. Ođđeeʹjjmannust 2020 jiõnnteeʹstid ouddam oummi ij taarbâž pueʹtted oʹđđest teeʹstid, tõid vääʹldet lokku vaʹlljummšin. Ååʹn lij veâl lââʹsstarbb jiõnid, ko hääm lie jiânnai.

Nuõrttsäämas tuejjeet nuuʹbb pââʹj vueʹzzid 1 di 9 – 13. Muumleäkka vuäitt tobdstõõttâd Yle Areenast https://areena.yle.fi/1-4529479. Vaʹlljuum jiõnnroolid jäʹrjstet veâl harjjtõõzzid sueiʹnnmannu mââimõs neäʹttlest, kuäʹss harjjtõõlât õõutsââʹjest nuʹtt jiõnnroolid ko jiõnnummuž ǩiõttǩeeʹrjtõõzz meâldlanji.

Puäʹđ mieʹldd tuejjeed nuõrttsääʹmǩiõllsa Muumlieʹjj!

Lââʹssteâđ da iʹlmmtõõttmõõžž Sääʹmteeʹǧǧ jieʹllikarttkõõskõõzz plaaneei Tarja Porsanger:

  • tarja.porsanger(at)samediggi.fi
  • teʹl. 050 569 6065

Hoʹhsse! 19.-28.6.2020 kõskksaž äiʹǧǧen neʹttpååʹšt leʹbe teʹksttsaakk, muđoi še teʹlfoonsåitt.

Snimldõk: Gutsy Animations

GOLLEGIELLA – Tâʹvvjânnmallaš sääʹmǩiõl ǩiõllciist jueʹjjet čâhčča 2020

GOLLEGIELLA – tâʹvvjânnmallaš sääʹmǩiõl ǩiõllciist jueʹjjet ååucad vuâra čâhčča 2020 sääʹmaaʹššin vaʹstteei ministeeʹri da sääʹmtiiʹǧǧi saaǥǥjååʹđteeʹji kaaunõõttmest Heʹlssnest skamm-mannust. Ǩiõllciist miõđât õõutoummid leʹbe õõutstõõzzid Taarâst, Ruõccâst, Lääʹddjânnmest leʹbe Ruõššjânnmest sääʹmǩiõl ooudâsviikkmest.

Ǩiõllciist miõttmõõžž lie alttääm Taar, Lääʹddjânnam da Ruõcc sääʹmaaʹššin vaʹstteei ministeeʹr da täi jânnmi sääʹmtiiʹǧǧi saaǥǥtuõʹllʼjeei. Ciist juõʹǩǩeš vuõssvuâra eeʹjjest 2004 da tõn jueʹjjet juõʹǩǩ nuuʹbb eeʹjj. Ciist šorradvuõtt lij 15 000 euʹrred.

Ǩiõllciist täävtõs

Ǩiõllciist täävtõssân lij pueʹreed sääʹmǩiõl ooudâsviikkmõõžž âânnmõõžž da seillmõõžž Taarâst, Ruõccâst, Lääʹddjânnmest da Ruõššjânnmest.

Ǩii vuäitt vuäǯǯad ciist?

Ǩiõllciist miõđât privattoummid (ml. joouk) leʹbe õõutstõõzzid (ml. õhttõõzz, stroiʹttel), kook lie tuåimmâm miârkteei nalla sääʹmǩiõl oouʹdeem, ooudâsviikkâm da seillmõõžž diõtt. Ǩiõllciist vueiʹtet miõttâd ouddmiârkkân ǩeerjlaž, njäälmlaž leʹbe jeeʹres tuâjai diõtt, kook vuäiʹtte kuõskkâd veiddsânji jeeʹres tuåimmsuõʹrjid. Ciist vueiʹtet jueʹǩǩed määŋg cisttvuäǯǯai kõõskâst.

Nõõmât jiijjad võboršeeʹǩǩ!

Õõutooumaž, joukk leʹbe õõutstõs Taarâst, Ruõccâst, Lääʹddjânnmest da Ruõššjânnmest vuäitt eʹtǩǩeed eeʹjj 2020 ǩiõllciist vuäǯǯai. Eʹtǩǩõõzz ǩiõllciist vuäǯǯjen da jäänmõsân 1-2 seeid ǩeerjlaž vuâđđõõttmõõžž âlgg tuåimted mââimõsân 16.8.2020 addrõʹsse:

Gollegiella-ärvvtõõllâmkomitea piisar
Anne Kirste Aikio
Lääʹddjânnam Sääʹmteʹǧǧ
anne-kirste.aikio(at)samediggi.fi

Sääʹmteʹǧǧ vuârdd räämmain Muumlieʹǩǩ-programmrääid tâʹvvsääʹmǩiõllsaž vueʹzzi õlmstâttmõõžž da valmštââvv tuärjjeed õinn nuõrtt- da aanarsääʹmǩiõllsaž puuʹtʼtõõzzid

Eʹjjpeeiʹv ääiʹj, 13.4.2020 čuäʹjtet Muumlieʹǩǩ-programmrääid vuõssmõs tâʹvvsääʹmǩiõllsaž vueʹzz televisiost čiâss 8.25 Yle TV2 -kanaalâst da Yle Areenast. Lääʹddjânnam Sääʹmteʹǧǧ lij leämmaž õhttsažtuâjjkueiʹmmen programmrääid sääʹmǩiõllsaž versioi puuʹtʼtõõzzâst. Programmrääid lij puuʹtʼtam Gutsy animations. Sääʹmteeʹǧǧ rool lij taʹrjjeed sääʹmǩiõʹlle õhttneei äʹšštobddmõõžž puuʹtʼtõʹsse. Tuâjast lij leämmaž õhttân täävtõssân kaunnâd ođđ sääʹmǩiõllsaž jiõnnčuäjtõõllʼjid da nââneed duʹbbjemsilttõõzz Sääʹmest. Programmrääidast õlmstââʹttet ååʹn tâʹvvsääʹmǩiõʹlle 13 vueʹssed, kååʹtt lââʹzzat jiânnai tâʹvvsääʹmǩiõllsaž mediataʹrjjummuž, tuâtt Sääʹmteeʹǧǧ ǩiõllaaʹššin vaʹstteei I väärrsaaǥǥjååʹđteei Anni Koivisto.

– Mij Sääʹmteeʹǧǧest leäʹp späʹssballaž, što Yle da Gutsy animations vaʹldde vaʹǯǯtõõzz vuâstta duʹbbjed programmrääid sääʹmǩiõlid, håʹt tiõʹtteš, što tõt vuäitt leeʹd jäänab kaiʹbbjeei da vaiggâd. Mij miõlâst tännallšem õhttsažtuâjj vuäitt leeʹd še heđlmallaš programmrääid puuʹtʼtemõhttõõzzid. Rämmšep tõʹst, što põõʹstim taʹrjjeed tuärjjõssan sääʹmǩiõlid õhttneei kõõččmõõžžin, leâša åskkap še, što tät tuejjad vuâđ pueʹtti duʹbbjemhaʹŋǩǩõõzzid. Sääʹmteʹǧǧ tuäivv-i, što tät älšmââttči jeärrsid še duʹbbješkueʹtted sääʹmǩiõlid.

Snimldõk: Gutsy Animations

Yle da Sääʹmteʹǧǧ lie suåppâm, što programmrääid puuʹtʼtet pukid Lääʹddjânnmest mainstum sääʹmǩiõlid. Vuõssmõs 13 vueʹssed lie tâʹvvsääʹmǩiõʹlle, da tõn mâŋŋa 6 vueʹzz aanrõšǩiõʹlle da 5 säämas. Tâʹvvsääʹmǩiõllsaž vueʹzzid õlmstââʹttet ǩeâđđa 2020 da aanar- da nuõrttsääʹmǩiõllsaž vueʹzzi puuʹtʼtõs älgg ǩeässa.

– Vueʹrddep jeäʹrben uuʹccab sääʹmǩiõlid puuʹtʼtum vueʹzzid, ko tõt lij mii-ne aivv oođâs. Juõʹǩǩ ođđ puuʹtʼtõs täi ǩiõlivuiʹm miârkkšââvv samai jiânnai. Tieʹttep še, mõõn ooccanj mediasiiskõs lij sääʹmǩiõʹlle da tät puätt tuärjjeed vueʹzzstes ǩiõli jeälltemtuâj.

Sääʹmǩiõli vaarvuâlaž vueʹjj diõtt Sääʹmteʹǧǧ lij tuʹmmjam ǩiõllpoliittlaž linnjummuž kuõskeeʹl Muumlieʹǩǩ-programmrääid ǩiõl. Linnjummša vuäitt tobdstõõttâd tääiʹben.

Lââʹssteâđ:

Anni Koivisto
I väärrsaaǥǥjååʹđteei
anni.koivisto@samediggi.fi / +358 40 415 5969

Anne Kirste Aikio
ǩiõllstaanpiisar
anne-kirste.aikio@samediggi.fi / 010 839 3124 | +358 40 707 5626

Tarja Porsanger
plaaneei / Jieʹllikarttkõõskõs Skábma
tarja.porsanger@samediggi.fi / 010 839 3182 | +358 50 569 6065

Sääʹmǩiõli tuʹlǩǩeemškooultõs älgg – Sääʹmteʹǧǧ äjšmâtt ooccâd škooultõʹsse

Sääʹmteeʹǧǧ kuʹǩesäiggsaž tuõiv sääʹmǩiõli tuʹlǩǩeemškooultõõzzâst šâdd mââimõsân tuõttân, ko Sääʹm škooultemkõõskõs alttad tuʹlǩǩeemškooultõõzz čâhčča õõutveäkka Diakonia-ämmatõllškooulin da Oulu universiteeʹtt Giellagas-instituuttin. Haʹŋǩǩõõzz teäggtet Euroopp sosiaalteäggõõǥǥ väärain da haʹŋǩǩõõzz lie teäggteʹmen še säʹmmlai dommvuuʹd kooʹddin Aanar, Uccjokk da Jeänõk di Sääʹmteʹǧǧ.

Haʹŋǩǩõõzzâst čõõđtet määŋghääʹmmškooultõssân 25 mättceäkkaz veiddsõs sääʹmǩiõli tulkkškooultõsobbvuõđ lookkâmeeʹjj 2020–2021. Škooultõs lij jurddum jeäʹrben vuuʹdest juʹn tuåimmi sääʹmǩiõli tuulkid, leâša tõt ââʹnat še jeeʹres mõõn-ne nuuʹbb tääʹzz škooultõõzz spraavâm oummid, koin lij riʹjttjeei njäälmlaž da ǩeerjlaž ǩiõllsilttõs lääʹddǩiõlâst da mõõn-ne kooum sääʹmǩiõlâst.

Sääʹmteeʹǧǧ ǩiõllstaanpiisar Anne Kirste Aikio

Sääʹmteʹǧǧ äjšmâtt sääʹmǩiõllsaid ooʒʒõõttâd škooultõʹsse, ko sääʹmǩiõli tuulki tarbb lij jõnn. Sääʹmteʹǧǧ vieʹǩǩat veʹrǧǧniiʹǩǩid kaunnâd tuulkid, leâša teâtt, što vueʹǩǩ tuulki vuäǯǯamvuõđ peäʹlest lij väʹǯǯel, ko tuulk jie leäkku jiânnai. Tuulk tuâjj suäpp puârast sääʹm jieʹllemnälla, ko tuâjj lij suåvtemnalla äʹrbbvuõđlaž jieʹllemvuõʹjji lââʹssen še mättʼtõõttjid leʹbe põõrǥâsniiʹǩǩid, peäggat jiõčč-i tulkkân kuuʹǩǩ ääiʹjben tuåimmâm ǩiõllstaanpiisar Anne Kirste Aikio.

– Tuulk tuâj leʹjje samai šiõǥǥ lââʹsstuâj mättʼtõõttmõõžž paʹldde, seämmanalla tõt lij šiõǥǥ nääʹll vuäǯǯad lââʹsstiânnsid jeeʹres tuâjai lââʹssen, håʹt mâka ǩiõtt-tuâjai tuejjeeʹjid leʹbe jåårǥlõʹttjid. Tuulk tuâjj lij miõlǩiddsaž, kaiʹbbjeei da taʹrjjad še vueiʹttemvuõđ seuʹrrjed da mättjed määŋgi aaʹšši pirr lââʹzz. Tuulk tuâjast leäm piâssâm maatkčed, kaaunõõttâd jiânnai jeeʹres oummivuiʹm da veeideed silttummuž jeeʹres õhttsažkååʹdd suõʹrjin.

Sääʹmteʹǧǧ taarbaš tuulkid såbbrid, seämmanalla mâʹte kååʹdd da jeeʹres veʹrǧǧneeʹǩǩ. Looǥǥ lââʹzz tulkkškooultõõzz da tõn siiskõõzz pirr Sääʹm škooultemkõõskõõzz seeidain.

 

Ooccâmäiʹǧǧ škooultõʹsse lij 3.4.2020 räjja.

Ooccâmlomaakk käunnʼje tääiʹben.

 

Lââʹsteâđ haʹŋǩǩõõzz da škooultõʹsse ooʒʒõõttmõõžž pirr käunnʼje SOGSAKK neʹttseeidain da

Iiris Mäenpää, SOGSAKK, iiris.maenpaa@sogsakk.fi, 040 487 6887

Tiisu-Maria Näkkäläjärvi, SOGSAKK, tiisu-maria.nakkalajarvi@sogsakk.fi, 040 378 0304

leʹbe

ǩiõllstaanpiisar Anne Kirste Aikio, anne-kirste.aikio@samediggi.fi, 010 839 3124 / 040 707 5626

MKM sääʹm-mättʼtõõzz ooudâsviikkâmäʹrttel alttad tuâjas Aanrest

Mättʼtõsminister Li Andersson da tiõđ- da kulttuurminister Hanna Kosonen liâ mieʹrrääm sääʹmǩiõli da sääʹmǩiõllsa mättʼtõõzz ooudâsviikkâmääʹrtel. Ääʹrtel tuâjjan lij taʹrǩstõõllâd sääʹmǩiõllsa ouddpeâmm, kulttuur- da ǩiõllpieʹsstuåimmjummuž, sääʹm-mättʼtõõzz da -škooultõõzz sââʹj õhttân obbvuõttân. Äʹrttel noorââtt vuõssmõs vuâra Aanrest pâʹsslašttâm-mannu 11. peiʹvven.

Sääʹmteeʹǧǧ saaǥǥjååʹđteei Tiina Sanila-Aikio âânn ääʹrtel mieʹrrummuž miârkteei äššan da tõõzz mieʹrruum tuâjaid vääžnʼjen. – Lij samai vääžnai, što ouddpeâmm, mättʼtõõzz da škooultõõzz ǩiõččât õhttân väʹlddkååddliʹžžen obbvuõttân da sääʹm-mättʼtõʹsse ääʹljet raajjâd põõšši vuâđ še saaʹmi dommvuuʹd åålǥbeälla, särnn Sanila-Aikio.

”Ǥu saaʹmi ǩiõllʼla vuõiggâdvuõđ liâ meäʹrtõllum lääʹjjšiõttummšest saaʹmi dommvuuʹdest da tõn åålǥbeäʹlnn jeeʹrestäässʼsiʹžžen, lij taarblaž taʹrǩstõõllâd sääʹm-mättʼtõõzz vueʹjj õhttân obbvuõttân väʹlddkååddlânji da pukin škooultaaʹzzin”, tuõđât mieʹrreemtuʹmmstõõǥǥâst.

Ääʹrtel tuâjjan lij tuejjeed taarbšeei eʹtǩǩõõzzid:

  1. Sääʹmǩiõli da sääʹmǩiõllsa mättʼtõõzz da škooultõõzz ooudâsviikkmõššân di vuäǯǯamvuõđ raʹvvjummšen puk jânnmest, da mättʼtõstuâjjlažkååʹdd vuäǯǯamvuõđ raʹvvjummšen;
  2. Sääʹmǩiõllsa ouddpeâmm da saaʹmi kulttuur- da ǩiõllpieʹsstuåimmjummuž ooudâsviikkmõššân da vuäǯǯamvuõđ raʹvvjummšen di ouddpeâmmtuâjjlažkååʹdd vuäǯǯamvuõđ raʹvvjummšen;
  3. Sääʹmǩiõllsa mättmateriaal vuäǯǯamvuõđ tuõrvveem diõtt;
  4. Sääʹm ǩiõli, saaʹmi historia da kulttuur tobddâmvuõđ lââʹzztummšen jeäʹrben škooulmättʼtõõzzâst;
  5. Tâʹvvjânnamlaž škooulõhttsažtuâj raʹvvjummšen sääʹm-mättʼtõõzzâst, da
  6. Sääʹmǩiõllsai sosiaal- da tiõrvâsvuõtt tuâjjlažkååʹdd vuäǯǯamvuõđ   tuõrvveem diõtt da škooultõstaarbi ouddtuʹmmjummšen.

Mättʼtõs da kulttuurministeria lij nõõmääm ääʹrtel saaǥǥjååʹđteeʹjen jååʹđteei Tiina Silander mättʼtõs- da kulttuuriministeriast da vuäzzliʹžžen täid oummuid: mättʼtõsduumšeǩ Anna Mikander, projeʹkttplaanraajji Erno Hyvönen da spesiaalplaanraajji Mikko Cortes-Tellez mättʼtõs- da kulttuurministeria, halltõspiisar Maija lles vuõiggâdvuõttministeria, mättʼtõsduumšeǩ Leena Nissilä Mättʼtõshalltõs, čuõvtemtuåim pâʹjjtaʹrǩǩeei Kari Torikka Lappi vuʹvddvaaldšemkoontâr, škooultempiisar Ulla Aikio-Puoskari da ǩiõllstaanpiisar Anne-Kirste Aikio Sääʹmteʹǧǧ, spesiaaläʹšštobddi Jarkko Lahtinen Lääʹddjânnam Kåʹddlett, rehtor Eeva-Liisa Rasmus-Moilanen Sääʹmvuuʹd škooultemkõõskõs, Sinikka Labba Jeänõõǥǥ kåʹdd, čuõvtemjååʹđteei likka Korhonen Aanar kåʹdd, čuõvtemtuåimmjååʹđteei Anne Onnela Suäʹđjel kåʹdd, čuõvtemtuåimmnjååʹđteei-rehtor Laura Arola Uccjooǥǥ kåʹdd, peiʹvvpõõrt jååʹđteei Eija Salmi Oulu gåårad, kääzzkõsvuʹvddšurr Kai Väistö Ruäʹvnjaarǥ gåårad da universiteʹttlehtor Marja-Liisa Olthuis Oulu universiteʹtt.

Ääʹrtel äʹšštobddipiisren tuåimmje sääʹm ougglõsmättʼtõshaʹŋǩǩõõzz koordinaattor Arla Magga da sääʹm ǩiõllpieʹssjååʹđteei Petra Kuuva Sääʹmteeʹǧǧest di Mättʼtõsduumšeǩ Susanna Rajala Mättʼtõshalltõõzzâst.

Äʹrttel noorââtt vuõssmõs vuâra Aanrest Sajoozzâst pâʹsslašttâm-mannu 11. peiʹvven.

 

Lââʹssteâđ:

Ulla Aikio-Puoskari, ulla.aikio-puoskari(at)samediggi.fi

Ánne-Kirste Aikio, anne-kirste.aikio(at)samediggi.fi

Arla Magga, arla.magga(at)samediggi.fi

Petra Kuuva, petra.kuuva(at)samediggi.fi

Saaʹmi meersažpeiʹvv 6.2.

Sääʹmteʹǧǧ reäšš ääv uusi peeiʹv Aanar Sajoozzâst saaʹmi meersažpeiʹvven 6.2.2020 čiâss 11-15. Puäʹđ tobdstõõttâd Sääʹmteeʹǧǧ tuåimmjummša!

Sääʹmteeʹǧǧ takai koontâr, škooultem- da mättmateriaalkoontâr da sääʹmǩiõl koontâr mainste konttreez pirr Sajoozz jõnnkääʹrdest. Sääʹmteʹǧǧ kuâssad kuõʹssid prääʹzniǩ-kaaʹfin da Sajoozz poorrâmpäiʹǩǩ Čaijust vuäitt vuäʹstted meersažpeeiʹv peiʹvvporrmõõžž.

Sääʹm meersažpeeiʹv 6.2. programm Aanrest

Pueʹtted tiõrvân puk!

čiâss 7.00 rääʹjest
Yle Sääʹm vuõlttad sääʹmǩiõllsaž radioprograamm koolm sääʹmǩiõʹlle.
Neʹttradio: yle.fi/sapmi

9 Liippkaggmõš da Sääʹmsooǥǥ laaul, SIIDA

9-17 Siida čuäjtõõzzid peäss määustaa obb peeiʹv, SIIDA

9.30-11 SAJOS, auditorio
• Aanar škooul sääʹmklaass läulla, čuäʹjtâʹlle da taʹnssje.
• Õhttsaž laaul da musikk, Sääʹm päärnaikulttuurkõõskõs Mánnu
• Jieʹllikartt, Sääʹmvuuʹd škooultemkõõskõs

10.30-13 Sääʹm meersažpeeiʹv porrmõš, SIEʹBRRKÅʹDDPÕRTT, Sami Soster Rõ da Aanar sieʹbrrkåʹdd

11-15 SAJOS
• Sääʹmteeʹǧǧ ääv uus. Sääʹmteʹǧǧ kuâssad kuõʹssid prääʹzniǩ-kååʹffin.
• Sääʹmarkiv ääv uus

12 ”Njuuč suäjaivuiʹm – Ǩeʹrjjneǩ Yrjö Kokko ǩieʹjji mieʹldd”, Yrjö Kokko -seäʹbrr/Ilkka Vaura, SAJOS

12 Siida ođđsmââvv 2020-2022, SIIDA auditoriost

12.30 Sääʹm preddan seeilteeʹl, pop up -čuäjtõõzz ääʹveempeiʹvv, SIIDA pâʹjjkääʹrdest

13- Sluuʹžv, Aanar sieʹbrrkåʹdd, Aanar ceerkav
Sluuʹžv mâŋŋa ceerkavkååʹf sieʹbrrkåʹddpõõrtâst, Sámisoster Rõ da Aanar sieʹbrrkåʹdd

18 Fiʹlmmjeäʹǩǩääž, SAJOS
Čuäjtõõzz jäʹrjstet õhttsažtuâjast Sääʹmčeäppõõzz tuärjjõhttõs Visuálalaš Sápmi-Leader haʹŋǩǩõõzzin.

  • Siuttajoen erotus 2019, 2 min, Ville-Riiko Fofonoff, Sääʹmmjânnam / Lääʹddjânnam
  • Čáhcerávga 2019, 5 min, Suvi West, Sääʹmmjânnam / Lääʹddjânnam
  • Seavdnjadasa ja čuovgga gaskka 2019, 7 min, Sara Beate Eira Person, Sääʹmmjânnam / Tarr
  • Jearrat máttaráhkus 2019, 4 min, Marja Viitahuhta / Anna Näkkäläjärvi-Länsman, Sääʹmmjânnam / Lääʹddjânnam
  • Eadni, juoiggastivččet go? 2019, 9 min, Máret Inger Aslaksdatter Anti, Sääʹmmjânnam / Tarr
  • Bántafáŋga 2019, 4 min, Ingá Márjá Sarre, Sääʹmmjânnam / Tarr
  • dissociate (gáidat / máhccat) 2019, 3 min, Sunna Nousuniemi, Sääʹmmjânnam / Lääʹddjânnam
  • Jaakko Gauriloff – Laulan sinulle 2019, 12 min, Heli Valkama, Sääʹmmjânnam / Lääʹddjânnam
  • Giitu giitu 2019, 6 min, Elle Sofe Sara, Sääʹmmjânnam / Tarr
  • Sámás muinna 2019, 3 min, Ville-Riiko Fofonoff, Sääʹmmjânnam / Lääʹddjânnam
  • Fanas Jovnna 2019, 9 min, Sakari Maliniemi, Sääʹmmjânnam / Lääʹddjânnam
  • Ribadit 2019, 10 min, Elle Sofe Sara, Sääʹmmjânnam / Tarr

   

      

 

Šiõǥǥ saaʹmi meersažpeiʹvv pukid!

Pyeri säämi aalmugpeivi puohháid!

Buori sámi álbmotbeaivvi buohkaide!

Sääʹm ǩiõll-lääʹjj 31 § meâldlaž vieʹǩǩtõõzz ooccâmnalla

Vuõiggâdvuõttministeria iʹlmmat ooccâmnalla sääʹm ǩiõll-lääʹjj (1086/2003) 31 §:st jurddum veäʹǩǩtieʹǧǧ. Veäʹǩǩtieʹǧǧi vääras liâ tän eeʹjj ââʹnnemnalla õhttseʹžže 150 000 euʹrred.

Veäʹǩǩtieʹǧǧid vueiʹtet miõttâd saaʹmi dommvuuʹd kooʹddid, sieʹbrrkooʹddid da paalǥâskooʹddid di lääʹjj 18 §:st jurddum privattniiʹǩǩid peäggtum lääʹjj suåvldummšest šoddi takai jeäʹrbi lââʹsskuuli käʹttem diõtt. Ååʹn ooccâmvuâllsa veäʹǩǩvuõđ liâ miârktum 1.1.2020 mâŋŋa šõddi lââʹsskuulid.

Ooccâmäiʹǧǧ älgg 20.1.2020 da põõtt 13.2.2020 čiâss 16.15. Veäʹǩǩvuõđ äänat ooccâmlomaakkin, kååʹtt käunnai tääiʹben. Ooccâmlomaʹǩǩe õhtteet lomaakk õhttvuõđâst raukkum mieʹlddõõzz. Oocci tuåimat ooccâmlomaakk mieʹlddõõzzineez vuõiggâdvuõttministeria rekisterâʹsttempäikka (vuõiggâdvuõttministeria@om.fi, leʹbe Vuõiggâdvuõttministeria Ritarikatu 2 B, 00170 Heʹlssen) mieʹrräigga mõõneeʹst. Oocci vaʹsttad ooccmõõžž tuåimmtummšest mieʹrräigga mõõneeʹst. Mieʹrrääiʹj mâŋŋa puättam ooccmõõžžid jeät vääʹld lokku.

Occmõõžž vuäitt še tooimtedpååʹštaddrõʹsse Oikeusministeriö, Demokratia-, kieli- ja perusoikeusasioiden yksikkö, PL 25, 00023 Valtioneuvosto. Pâi mieʹrräigga mõõneeʹstpuättam ooccmõõžž vääʹldet lokku.Ooccmõõžžâst âʹlgge seʹlvted tõk takai jeäʹrab lââʹsskuul, kooi käʹttem diõtt veäʹǩǩtieʹǧǧ vuäǯǯeet.

Lââʹssteâđ vuõiggâdvuõttministeria veäʹǩǩtõõz pirr

Lââʹssteâđaid ouʹdde:

Ǩiõllstaanpiisar Anne Kirste Aikio, 010 839 3124, anne-kirste.aikio(at)samediggi.fi

Sääʹmteeʹǧǧ sääʹm ǩiõl koontâr iʹlmmat ooccâmnalla plaaneei mieʹrräiggsaž tuâj

Sääʹmteeʹǧǧ sääʹm ǩiõl koontâr ååcc mieʹrräiggsaž plaaneei, koon tuâjjan lij raajjâd teâđtem-materiaal sääʹm ǩiõll-lääʹjj da säʹmmlai jeeʹres ǩiõlʼlaž vuõiggâdvuõđi pirr nuʹtt sääʹmnarooʹde, ko veʹrǧǧniiʹǩǩid neʹttseeidaid da jeeʹres kanaaʹlid.  Tuâjj älgg suåppmõõžž mieʹldd da peštt kolmm määnpââʹj.

Ââʹntemkaiʹbbjõsân lij tuâj oudldem škooultõs da lââʹssen kaiʹbbjet sääʹm ǩiõl tääid (asetõs 1727/95). Tuâj oʹnstam håiddmõš oudldâstt šiõǥǥ säʹmmlai ǩiõlʼlaž vuõiggâdvuõđi, sääʹmkulttuur da vaaldšmallaš tuâjai tobddmõõžž di šiõǥǥ saaǥǥtemtääidaid. Härjjnummuž vaʹstteei tuâjaid ǩiõččât pueʹrren.

Päʹlǩǩ meäʹrrââvv Sääʹmteeʹǧǧ päʹlǩǩriâšldõõǥǥ väʹǯǯelvuõtt-tääʹzz IV/III mieʹldd (vuâđđpäʹlǩǩ 2565,88 euʹrred /mp). Vuâđđpääʹlǩ õõl määuʹset tuâjast härjjnem mieʹldd meäʹrrõõvvi härjjnemlõõʹzzid di sääʹmvuuʹdest tueʹjjeeʹn 24 % sääʹmvuuʹd lââʹzz. Tuâjast ââʹnet kuõiʹt neäʹttel ǩiõččlõddâmääiʹj.

Ooccmõõžž mieʹlddõõzzeezvuiʹm âlgg tuåimted Sääʹmteeʹǧǧ piisarkådda 10.1.2020 mõõneeʹst addrõʹsse: https://www.sympahr.net/public/pq.aspx?05c8db1e

Lââʹssteâđaid tuâj pirr oudd ǩiõllstaanpiisar Anne Kirste Aikio teʹl. 010 839 3124. Sääʹmteeʹǧǧ tuåimmjummša vuäitt tobdstõõttâd neʹttaddrõõzzâst www.samediggi.fi

Aanrest 20.12.2019

Sääʹmteʹǧǧ reäšš škooultõõzz vueʹssen Muumlieʹǩǩ-rääid sääʹm ǩiõli duʹbbjempuuʹtʼtõõzzâst

Yle, Gutsy Animations da Sääʹmteʹǧǧ tuejjee õhttsažtuâj ämmtallaš duʹbbjemkulttuur raajjmõʹšše pukin koolm sääʹmǩiõlin. “Juõʹǩǩ tuåimmjeei pohtt õhttsaž pårdda jiiʹjjes pueʹrmõs silttummšes”, särnn Sääʹmteeʹǧǧ ǩiõllstaanpiisar Anne Kirste Aikio. 

Sääʹmteeʹǧǧ sääʹmǩiõl koontâr da jieʹllikarttkõõskõs Skábma reäʹšše duʹbbjummša kuulli škooultõõzz ođđeeʹjjmannust. Škooultõõzz mieʹrren lij ainsmâʹtted, što pueʹtti ǩiiđâst ääʹljeeʹl Muumid kuulât pukin koolmin Lääʹddjânnmest mainstum sääʹm ǩiõlin.  

Tuåimmjeei lie suåppâm, što tâʹvvsääʹmǩiõllsaž Muumlieʹǩǩ-rääid puuʹtʼtem paaldâst puäʹđet vueiʹnned še vuõʹzzi puuʹtʼtempõõʹjid aanar- da nuõrttsääʹmǩiõʹlle. Muumlieʹǩǩ-rääid valmštõõvvmõš puki sääʹm ǩiõlivuiʹm oudldâstt duʹbbjeeʹji ooccmõõžž da škooultõõzz aktiivlanji.  Kuõiʹt puuʹtʼtempââʹj obbvuõtt koolm ǩiõʹlle õõlǥât lââʹssteäggtõõzz. Sääʹmteeʹǧǧ čåuddmõš lij duʹbbjeeʹji da läullʼji duʹbbjemškooultõõzz lââʹssen åålǥbeällsaž teäggtõõzz ainsmâttmõš. 

“Meeʹst lie jiânnai čieʹppes da älššas tuejjeei. Ååskam, što kaunnâp pukid ǩiõlid duʹbbjeeʹjid Muumi mailmma”, mušttal Anne Kirste Aikio.  “Nuʹtt-ba jieʹllikarttkõõskõs Skábma kåčč pukid duʹbbjem årra miõl ǩieʹssi oummid ǩiõččlõddâd, måkam tuâjj ämmtallaš duʹbbjummuš sääʹm ǩiõlivuiʹm lij”, auʹǯǯai Aikio. 

Jos miõll ǩeäss škooultõʹsse, vuõlttâd vuäʹnkõs neʹttpååʹšt mieʹldd õhttvuõtt-teâđääd addrõʹsse anne-kirste.aikio(at)samediggi.fi 8.1.2019 mõõneeʹst. Škooultõõzz tääʹrǩab aaiʹjid iʹlmmtet ođđeeʹjjmannust.  

Gutsy Animations

Lââʹssteâđ: 

Anne Kirste Aikio, ǩiõllstaanpiisar, teʹl 010 839 3124, anne-kirste.aikio(at)samediggi.fi 

Tarja Porsanger,jieʹllikarttkõõskõs Skábma, teʹl +358 10 839 3182, tarja.porsanger(at)samediggi.fi

Sääʹmteeʹǧǧ saaǥǥjååʹđteei Tiina Sanila-Aikio teʹl. 050 300 1780, tiina.sanila-aikio(at)samediggi.fi

Sääʹm ǩiõlltuâjj -PAʹLǨǨUMMUŠ Pasila vuâđđškoouʹle da tõn tâʹvvsääʹm-lääʹdd klaʹsse

Sääʹmteeʹǧǧ sääʹm ǩiõllsuåvtõs lij miõttâm sääʹm ǩiõlltuâjj -paʹlǩǩummuž Pasila vuâđđškoouʹle da tõn kuõiʹtǩiõllsaž tâʹvvsääʹm-lääʹdd-klaʹsse. Sääʹm ǩiõlltuâjj -paʹlǩǩummuž jueʹjjet viiđad vuâra.

Sääʹm ǩiõlltuâjj -paʹlǩǩummšin uuʹdet tobdstõõzz sääʹmǩiõllsai kääzzkõõzzi da sääʹm ǩiõl sââʹj ooudeem pueʹrren tuejjuum tuâjast Lääʹddjânnmest. Sääʹm ǩiõlltuâjj -paʹlǩǩummuš lij sääʹm ǩiõtt-tuâjj (duodji) da diplom. Paʹlǩǩummuž jueʹjjet Pasila škooulâst mââibaarǥ 17.12. čiâss 10.00.

– Pasila  škooul tâʹvvsääʹm-lääʹdd klass lij ouddmiârkk tõn kaallšõs tuâjast mâiʹd tuejjeet sääʹm kulttuur da sääʹm ǩiõli seeiltem õuʹdde säʹmmlai dommvuuʹd åålǥbeäʹlnn, särnn sääʹm ǩiõllsuåvtõõzz saaǥǥjååʹđteei Neeta Jääskö. Sääʹmkulttuur jieʹllem-mäinnan lij sääʹm ǩiõl seillmõš pueʹtti puõlvvõõǥǥid da ǩiõll lij sääʹmkulttuurâst tääʹrǩmõs da kõskksumus vueʹssen, koon serddjummuš gååradpirrõõzzâst vuäitt leeʹd väʹǯǯel. Pasila škooul lij jiiʹjjes positiivlaž ouddmiârkines älšmâttam sääʹm-mättʼtõõzz ooudummša še jeeʹres gåårdin – tän ääʹšš vuäitt lookkâd škooul rehtorr pueʹrren, späʹssbââšš Jääskö.

Paʹlǩǩummuš lij Ilmari Tapiola ǩiõtt-tuâjj– duodji

Sääʹm ǩiõlltuâjj -paʹlǩǩummuš lij sääʹm ǩiõtt-tuâjj (duodji), koon valmšteei lij vaʹlljääm Sámi Duodji ry. Paʹlǩǩummuš lij muõrâst rajjum čueʹrvin heärvtum muõrrnäʹpp (tâʹvvsäämas gárri) da tõn valmšteei lij ǩiõtt-tuâjjlaž Ilmari Tapiola, Uccjooǥǥâst.

Sääʹm ǩiõlltuâjjpaʹlǩǩummuš 2019. Valmštam ǩiõtt-tuâjjlaž Ilmari Tapiola.

Sääʹmteeʹǧǧ vuâđđõõttmõš

Sääʹmteeʹǧǧ ǩiõllsuåvtõs vuâđđan tuʹmmstõʹǩǩe lij jm. tõt, što Pasila  vuâđđškooul tuåimmjemnääʹll oudd tuäiv da rääjj vueiʹttemvuõđid, što gåårdest vuäitt ââʹnned sääʹmǩiõl, jieʹlled säʹmmliʹžžen da mättjed kulttuur. Feʹrttai še vuâmmšed, što tät Pasila vuâđđškooul pilotâsttmõš lij älšmâttam še jeeʹres škooulid seʹlvvted vueiʹttemvuõđ altteed kuõiʹtǩiõllsaž klaass leʹbe vuâđđeed nåkam. Ǩiõllsuåvtõõzz mieʹldd Pasila  škooul pueʹrren vueiʹtet lookkâd še tõn, što tõt veekk čõõđ säʹmmlai ǩiõlʼlaž vuõiggâdvuõđid veiddsubun, ko lääʹǩǩ õõlǥat.

Pasila škooul lij še kaggâm säʹmmlaid da uʹcc sääʹmklaassâs puki äʹššen škooulâst, škooulâst lij määŋgai jeeʹres naaʹli da šõddmõõžživuiʹm valddum lokku sääʹm kulttuur da sääʹm ǩiõll.

Sääʹm ǩiõlltuâjj -cistt

Lââʹssteâđ:

Ǩiõllstaanpiisar Anne Kirste Aikio, teʹl. 010 839 3124, anne-kirste.aikio@samediggi.fi