Johtti nuoraidlatnja čakčat Sámiid ruovttuguvlui

/in /by

Vistebiillas nuoraidlatnjan rievdaduvvon Walkers-biila dahjege wauto bálvala sámiid ruovttuguovlu nuoraid boahtte čakčamánus juovlamánnui. Johtti nuoraidbargun háliidit olahit nuoraid, geat ásset viidát.

Wauto konseapta lea oktageardán: mannat dohko, gos nuorat leat ja buktit dorvvolaš rávesolbmuid sin asttuáigái. Fállun leat káfet, kortespealut ja rávesolbmuid háleštansearvi. Dárbbu mielde nuorra oažžu maiddái čiekŋalut rávvema iežas eallindillái.

Wauto oamasta ja dan doaimma koordinere Aseman Lapset ry. Sámiid ruovttuguovllus doaimmas fástida Sámedikki nuoraidráđđi ja dat ollašuhtto ovttasbarggus Eanodaga, Ohcejoga ja Anára gielddain. Doaimmas leat mielde maid sámegielat eaktodáhtolaččat.

Sámiid ruovttuguvlui boahtti Wauto lea okta nealljis Suomas johtti Wautos ja dan doaibmasadjin lea earenoamážit Lappi ja eará Davvi-Suopma. Ovdalgo dat boahtá Sápmái dat lea doaibman Gihttelis, Soađegilis ja Oulu guovllus.

– Sámedikki nuoraidráđis lea áigumuššan ovddidit Wauto bokte sámegielat nuoraidbarggu, daningo oktage gielda ii dan dal ordne. Lea dehálaš, ahte sámenuorain lea vejolašvuohta geavahit eatnigiela maid astoáiggis, muitala nuoraidráđi ságádoalli Risten Mustonen.

– Álgojagi vásáhusaid vuođul Wauto heive hui bures doaimmaige Lappi unna gilážiin ja guhkes mátkkiin. Wauton leat deaivvadan nu gieldaguovddážiid go unnit gilážiid nuoraid, main máŋgasat eai beasa muđuid mielde nuoraidbargui. Nuorat leat čielgasit návddašan Wautos ja dorvvolaš ollesolbmuid mieldeorrumis, muitala Wauto-koordináhtor Niilo Karjalinen Aseman Lapset searvvis.

Ovttasbargoguimmiide ja mediai ordnejuvvo fierpmádat- ja diehtojuohkindilálašvuođa duorastaga 24.5. dmu 14-16 Avvilis nuoraidlatnja Stönös. Báikki ala oččot boahtit buohkat, geat leat beroštuvvan doaimmas.

 

Lassedieđut:

Wauto doaimmas sámiid ruovttoguovllus:

Kaisa Tapiola-Länsman, Sámedikki nuoraidčálli, 050 382 5179

kaisa.tapiola-lansman@samediggi.fi

 

Wauto doaimmas almmolaččat:

Niilo Karjalainen, Wauto-doaibmavástideaddji, Aseman Lapset ry, tel. 040 575 9364

niilo.karjalainen@asemanlapset.fi

 

www.asemanlapset.fi

www.facebook.com/autowauto

 

Aseman Lapset rs. lea jagis 1990 vuođđuduvvon politihkalaččat ja oskkoldatlaččat čatnasmeahttun riikkaviidosaš searvi. Searvvi vuođđobargun lea ovddidit mánáid, nuoraid, bearrašiid ja olles servodaga burešbirgejumi sihke eastadit hilggohallama.

Walkers-doaibma lea Aseman Lapset searvvis ráhkaduvvon ovddalgihtii eastadan nuoraidbargu, mii vuođđuduvvá dorvvolaš, eaktodáhtolaš rávesolbmuid nuoraide addin áigái.

Wauto-doaibma lea oassi Aseman Lapset rs Walkers On Wheels-fitnu. Fitnu lea ruhtaduvvon RAY:s boahtti ruđain oahpahus- ja kulturministeriija sierradoarjjan. Davás boahtti biila lea searvvi goalmmát, ja dat lea skáhppojuvvon Suomen Lions-lihtu skeŋkenváriin, guokte eará biila fas Eevi ja Eemil Tannisa säätiö ruhtadeamin. Fitnus leat njeallje biilla sierra sajiin Suomas ja dárkkuhussan lea fitnet johtti nuoraidbarggu vuogi bissovažžan sierra guovlluide.

Sámi parlamentáralaš ráđi (SPR) ságajođihanvuorru sirdašuvvá Norggas Ruŧŧii 15.5.

/in , /by

Sámi parlamentáralaš ráđđi (SPR) doallá dievasčoahkkima 15.5.2018 Kárášjogas. Sámediggi Norggas lea jođihan Sámi parlamentáralaš ráđi 22.9.2016 rájes 15.5.2018 rádjai. Presideantadoaimma leaba Vibeke Larsen ja Aili Keskitalo juogadan. SPR ságajođihanvuorru lea 16.5.2018 rájes Ruoŧa Sámedikkis. Bargu bistá uhcimusat 16 mánu ovddasguvlui.  Áigodaga sáhttá guhkidit dárbbu mielde. Sámediggi Suomas joatká jođiheami dan maŋŋá.

Suoma Sámedikki ovddasteaddjit dievasčoahkkimis 15.5.2018:

Tiina Sanila-Aikio
Tuomas Aslak Juuso
Petra Magga-Vars (Aslak Holmbergga várrelahttu)
Pentti Pieski
Heikki Paltto
Neeta Jääskö

Sámi párlamentáralaš ráđi bargoortnega § 3 vuođul árvala oktasašstivra čuovvovaš áššelisttu:

SPR ášši 1/18 – Čoahkkima vuođđudeapmi (nammačuorvun, ođđa válljejuvvon lahtuid nannen, gohččuma ja áššelistu dohkkeheapmi, čoahkkinjođiheaddji válljen)

SPR ášši 2/18 – Stivrra doaibmadieđáhus

SPR ášši 3/18 – Sámi parlamentáralaš ráđi doaibmaplána

SPR ášši 4/18 – Sámi parlamentáralaš ráđi nuoraidpolitihkalaš ráđđi muitala iežaset doaimmas

SPR ášši 5/18 – Jiekŋameara ruovdegeaidnoprošeakta – SPR cealkámuš

SPR ášši 6/18 – Sámi parlamentáralaš ráđi čoahkkinplána 2018/2019

SPR ášši 7/18 – Sámi parlamentáralaš ráđi jođiheami molsun

SPR ášši 8/18 – Čoahkkima loahpaheapmi

Sámi parlamentáralaš ráđđi (SPR) lea Suoma, Norgga ja Ruoŧa Sámedikkiid gaskasaš parlamentáralaš ovttasbargoorgána. Ruošša sámeorganisašuvnnat oassálastet ovttasbargui dárkojeaddjin SPR:s.

Lassidieđut:

Sámedikki ságajođiheaddji Tiina Sanila-Aikio tel. 050 300 1780, tiina.sanila-aikio(at)samediggi.fi

Sámediggelága nuppástusa válmmaštalli doaibmagoddi dieđiha čuovvovaš háve 18.5.

/in /by

 

Sámediggelága nuppástusa válmmaštalli doaibmagoddi doalai čoahkkima gaskavahku 9.5., gos sohppui, ahte doaibmagotti barggu birra dieđihuvvo čuovvovaš háve 18.5.

Stáhtaráđđi lea ásahan mearrádusain 23.10.2017 guđa olbmo doaibmagotti válmmaštallat evttohusa sámediggelága ođasmahttima várás. Doaibmagotti lei dárkkuhus oažžut barggu gárvvisin 30.4.2018 rádjai ja luohpadit smiehttamuša evttohussan stáhtaráđđái sámediggelága ođasmahttima várás. Doaibmagoddi addá evttohusa ráđđehusa evttohusa hámis, ja dat galggašii beassat ovttamielalašvuhtii evttohusa sisdoalus. Doaibmagoddi lea dán rádjai čoahkkanan jagi 2017 loahpa rádjai guktii ja jagi 2018 áigge logi geardde. Doaibmagotti barggu čuovvuma várás stáhtaráđđi nammadii lassin parlamentáralaš čuovvunjoavkku. Doaibmagoddi ja parlamentáralaš čuovvunjoavku leat doallan guokte oktasaš čoahkkima jagi 2018.

Lassidieđut:

Sámedikki ságajođiheaddji Tiina Sanila-Aikio tel. 050 300 1780, tiina.sanila-aikio(at)samediggi.fi

 

Oahpahusráđđehusa stáhtaveahkit giellalávgundoaimmaid ovddideapmái leat dál ohcan láhkái

/in /by

Oahpahusráđđehus lea almmuhan ohcan láhkái jagi 2018 stáhtavehkiid giellalávgundoaimmaid viiddideami várás. Juohkin láhkái lea 842 000 euro. Stáhtavehkiid ulbmilin lea Suoma giellaskuvlenpolitihka mielde lasihit ja viiddidit suopmelaččaid giellamáhtu giellalávgun- ja eará guovttegielat oahpahusa ovddidemiin. Stáhtaveahkit leat oaivvilduvvon árabajásgeassima, ovdaoahpahusa ja vuođđooahpahusa ordnejeaddjiide. Ohcanáigi lea 3.5.-4.6.2018 dmu 16.15 rádjái.

– Ovddit jagiin dát earenoamáš stáhtaveahkit leat mieđihuvvon maiddái sámi giellalávgundoaimmaid ovddideapmái, muitala Sámedikki skuvlenčálli Ulla Aikio-Puoskari. – Veahkkeruđaid leat ožžon ee. Ohcejoga, Soađegili ja Enodaga gielddat. Sámi giellalávgunluohkká lea doaibman Ohcejogas guokte jagi. Soađegili girkosiiddas sámi giellalávguma ovddideapmi álggahuvvui davvisámegiela giellabeasi vuođđudemiin ja Soabbáda skuvlla plánain lea dál maiddái sámi giellalávgunluohká vuođđudeapmi. Enodagas giellalávgunoahpahus ollašuhttojuvvo giela riggodahtti oahpahussan Heahtá skuvllas.

– Eará gielddain, mat ordnejit sámeoahpahusa, maiddái Gihttel ja Roavvenjárga leat ožžon stáhtaveahki giellalávgundoaimma ovddideapmái. Sámegielat árabajásgeassin ja davvisámegiela oahpahus besse johtui Gihttela Sirkka-gilis mannan čavčča. Roavvenjárggas dát stáhtaveahkki dagai vejolažžan sámegiela oahpahusa ovddideaddji oahpaheaddji bálkáheami ja plánain lea maid guovttegielalaš oahpahusa álggaheapmi boahttevaš jagiin.

Lassedieđut Oahpahusráđđehusa stáhtavehkiid ohcamis.

Giellabeassedoaimma stivrenjoavkku čoahkkanii ja ortniiduvai

/in , /by

Sámediggi lea bovden sápmelaš kultuvra- ja giellabeassedoaimma lágideaddji gielddaid ja servviid čoahkkái vuosttas giellabeassedoaimma stivrenjoavkku deaivvádeapmái. Stivrenjoavku lea dál ortniiduvvan ja ságastallan giellabeassedoaimma hástalusaid, lihkostuvvamiid ja áigeguovdilis ovddidandárbbuid birra. Stivrenjoavkku ságadoallin doaibmá Sámedikki sámi giellaráđi ságadoalli Neeta Jääskö. Stivrenjoavku válljii gaskavuođastis várreságadoallin Rauni Äärelä-Vihriälä.

– Čoahkkimis čatnaseimmet oktasaš ulbmilii ovddidit sápmelaš kultuvra- ja giellabeassedoaimma ja láhčit sámemánáid giellaealáskahttimii nanu ja oadjebas birrasa, muitala stivrenjoavkku ságadoalli Neeta Jääskö.

Sámediggi mearridii juovlamánu 2017 dievasčoahkkimis stivrenjoavkku vuođđudeamis, ja sápmelaš kultuvra- ja giellabeassedoaimma lágideaddji gielddat ja searvvit leat nammadan dasa iežaset ovddasteaddjiid. Stivrenjoavkku doaibmabadji lea njealje jagi, ja dat doaibmá Sámedikki giellaráđi vuolde ráđđeaddi orgánan. Mielde leat Sámediggi čoahkkáibovdejeaddjin, Ohcejoga gielda, Anára gielda ja Anarâškielâ servi, Soađegili gielda, Eanodaga gielda, Oulu gávpot, Roavvenjárgga gávpot ja City-Sámit rs.

Lassedieđut:

Má. giellabeassestivrejeaddji Annika Pasanen, tel. 010 839 3119, annika.pasanen(at)samediggi.fi

Sámedikki ságastallandilálašvuohta Vuohčus vuossárgga 23.4. dmu 18 ordnejuvvo SámiSoster Mokta-viesus čujuhusas Luuhkatie 10 E 9

/in /by

Sámedikki ságastallandilálašvuohta Vuohčus vuossárgga 23.4. dmu 18 ordnejuvvo SámiSoster Mokta-viesus čujuhusas Luuhkatie 10 E 9, ii skuvllas nugo ovdal lea almmuhuvvon. Jorggit váldogeainnus gávppi guvlui ja dálán gurot guvlui. Luuhkatie jorggiha fárgga olgeš guvlui. Oaidnalit Vuohčus!

Lassidieđut:

Sámedikki ságajođiheaddji Tiina Sanila-Aikio tel. 050 300 1780, tiina.sanila-aikio(at)samediggi.fi

Geassekummekampánjja kondomat maiddái golmma sámegillii

/in /by

Sámedikki nuoraidráđi temán leat dán jagi seksuáladearvvasvuođaáššit. Temá olis nuoraid gaskavuođas dovdojuvvon Geassekummekampánjja kondomat jorgaluvvojit Suomas hállon golmma sámegillii. Maiddái kampánjii gullevaš Ráhkistanmeašttir -seksuáladearvvasvuođajearahallama sáhttá dahkat sámegillii.

Geassekummekampánja muitala nuoraide kondoma geavaheami dehálašvuođas. Kampánja muittuha, ahte buohkain galggašedje leat seammát seksuálavuoigatvuođat ja vuolggasajit geavahit eastadeami sihke oažžut dieđuid dorvvolaš eastadeamis.

Sámegielat Geassekummet leat oažžumis nuoraidráđi ordnen dáhpáhusain sihke eamiálbmogiid musihkkadáhpáhusas Ijahis Ijas.

Kampánjjas leat mielde YleX, Suoma Rukses Ruossa, Álbmotlihttu, Borasdávdasearvvit ja Soalddátruovttolihttu. Sosiála- ja dearvvasvuođaministeriija doarju kampánjja. Kampánjja áigge juhkkojit 220 000 geassekumme sierra dáhpáhusain.

Govva: Jagi 2017 geassekummekampánja, Álbmotlihttu

Lassidieđut:

Kaisa Tapiola-Länsman, 050 382 5179, kaisa.tapiola-lansman@samediggi.fi

Sari Hälinen, sari.halinen@vaestoliitto.fi

 

 

Mearreáigásaš prošeaktabargi Sámemusihkkaguovddážii

/in /by

Bargu álgá 4.6. ja bistá 31.8.2018 rádjai. Prošeaktabargi bargguide gullet ee. sámemusihkkaguovddáža veahkkin doaibman sihke Ijahis idja -eamiálbmogiid musihkkafestivála veahkkebuvttadeaddji barggut. Barggu menestuvvi dikšumis veahkehit heivvolaš skuvlejupmi, sámegiela máhttu sihke doarvái buorre eaŋgalsgiela máhttu. Prošeaktabargi bálká mearrašuvvá Suoma sámedikki bálkávuogádaga gáibádusdási VII/I mielde (vuođđobálká 1 755,62 euro/mb). Vuođđobálkká lassin máksojuvvojit 24 % sámeguovllu lassi sihke ahkelasit, mat mearrašuvvet bárgohárjánumi mielde. Prošeaktabargi doaibmabáiki lea sámekulturguovddáš Sajosis.

Ohcamušaid oktan mildosiiguin galgá doaimmahit sámedikki čállingoddái 11.5.2018 dmu 16.00 rádjai čujuhussii Sajos, 99870 Anár/Inari. Lassedieđuid barggu birra addá sámemusihkkaguovddáža plánejeaddji Oula Guttorm tel. 050 574 2765, oula.guttorm(at)samediggi.fi. Sámedikki doaimmaide sáhttá oahpásmuvvat neahttačujuhusas www.samediggi.fi ja Ijahis idja -eamiálbmogiid musihkkadáhpáhussii čujuhusas: www.ijahisidja.fi.

Anáris 17.4.2018 Sámediggi

Boađe ságastallat áigeguovdilis áššiin Vuhččui 23.4.

/in , /by

Sámedikki stivra lágida čoahkkima oktavuođas ságastallandilálašvuođa Vuohču skuvllas mánnodaga 23.4.2018 dmu 18-20. Dilálašvuođa dárkkuhussan lea deaivvadit guovllu sámiiguin ja láhčit vejolašvuođa ságastallat áigeguovdilis áššiin.

Sámedikki doaibmaplána-bušeahta 2018 mielde stivrra čoahkkimat lágiduvvojit vejolašvuođaid mielde Ohcejogas, Vuohčus, Helssegis, Eanodaga Gárasavvonis ja Anáris. Čoahkkimiid oktavuođas ordnejuvvo báikegottis ságastallandilálašvuohta, gos stivra deaivvada guovllu sámiiguin, muitala čoahkkáigeassun stivraáigodaga doaimmain ja fállá eahpevirggálut vejolašvuođa ságastallat áigeguovdilis áššiin.

– Ordniimet vuosttas ságastallandilálašvuođa oaivegávpotguovllu sámiide guovvamánus Helssegis. Ságastallandilálašvuođaid ulbmilin lea nannet sámeservoša ja Sámedikki gaskasaš gulahallama oktasaš áššiid ovddideami olis, muitala Sámedikki ságajođiheaddji Tiina Sanila-Aikio.

Čuovvovaš ságastallandilálašvuohta ordnejuvvo Vuohču skuvllas 23.4.2018 dmu 18-20.

– Sávan Vuohču guovllu sámiid bures boahtin válgaáigodaga nuppi ságastallandilálašvuhtii. Boahttevaš ságastallandilálašvuođain almmuhit, go dat leat áigeguovdilat, Sanila-Aikio loahpaha.

Lassidieđut:

Sámedikki ságajođiheaddji Tiina Sanila-Aikio tel. 050 300 1780, tiina.sanila-aikio(at)samediggi.fi

 

Čuovo áigeguovdilis áššiid Sámedikki some-kanálain

/in /by

Sámedikki virggálaš Facebook– ja Twitter-siidduin beasat čuovvut Sámedikki áigeguovdilis dáhpáhusaid, doaimmaid, bealiváldimiid ja maiddái prošeavttaid.

– Sosiálalaš media siidduid dárkkuhussan lea buoridit dieđuoažžuma Sámedikki birra. Háliidit buktit Sámedikki doaimma lagabui sámiid árgga, Sámedikki ságajođiheaddji Tiina Sanila-Aikio lohká.

Maiddái Sámedikki ođđa neahttasiiddut leat almmustahtton ja siidduide buvttaduvvo ođđa sisdoallu geažosáigge. – Siiddut beaividuvvojit jotkkolaččat dan dihtii, ahte bastit bálvalit buorebut siidduid geavaheaddjiid ja maiddái álkidahttit dieđu gávdnama, joatká Sámedikki má. dieđihančálli Johanna Alatorvinen.

Sámedikki diehtojuohkinstrategiija

Sámediggi dohkkehii čoahkkimis 19.6.2017 diehtojuohkinstrategiija. Strategiija dárkkuhussan lea jođihit ja ovddidit Sámedikki diehtojuohkima. Ođđa diehtojuohkinvuogit dárbbašuvvojit, dasgo sullii 65 % Suoma sámiin ássá sámiid ruovttuguovllu olggobealde. Lassin diehtojuohkima ovddideapmi lea vealtameahttun Sámedikki doibmii ja sámegažaldagaid ovdan buktimii rivttes refereansarámaid siste.

Diehtojuohkinstrategiija mielde rabas ja beaktilis diehtojuohkima prinsihppan lea ovddidit sámegažaldagaid guoski almmolaš diđolašvuođa, buori hálddahusa ja sámiid vejolašvuođa váikkuhit sin guoski mearrádusbargamii. Sámediggi geavaha diehtojuohkimis árbevirolaš kanálaid lassin maiddái sosiálalaš media kanálaid aktiivvalaččat.

Sámediggi lea čujuhan ruhtadeami sihke luohttámušolbmuide ja bargovehkii dárkkuhuvvon diehtojuohkinskuvlema lágideapmái jagi 2018 bušeahtas. Lassin Sámediggi lea bálkáhan mearreáigásaš dieđihančálli. Dieđihančálli álggahii barggus njukčamánus 2018 ja su bargun lea plánet, čuovvut, ollašuhttit ja koordineret Sámedikki diehtojuohkima.

www.facebook.com/saamelaiskarajat/

www.twitter.com/Saamelaiskaraja

Lassidieđut:

Sámedikki dieđihančálli Johanna Alatorvinen tel. 040 553 493, johanna.alatorvinen(at)samediggi.fi

Sámedikki ságajođiheaddji Tiina Sanila-Aikio tel. 050 300 1780, tiina.sanila-aikio(at)samediggi.fi

Mildosat: