Sámediggi almmuha ohcan láhkai plánejeaddji mearreáigásaš doaimma

Sámedikki sámegiela doaimmahat ohcá mearreáigásaš plánejeaddji, gean bargun lea ráhkadit dieđihanmateriála sámi giellalágas ja sámiid eará gielalaš vuoigatvuođain sámeálbmogii neahttasiidduide ja eará kanálaide.  Bargu álgá soahpamuša mielde ja bistá 31.12.2021 radjai ja vejolaččat dan maŋŋelge.

Gelbbolašvuođagáibádussan lea barggu eaktudan skuvlejupmi ja lassin eaktuduvvo sámegiela dáidu (ásahus 1727/95). Barggu ceavzilis dikšun gáibida sámiid gielalaš vuoigatvuođaid, sámekultuvrra ja hálddahusbargguid buori dovdamuša ja buriid gulahallandáidduid. Bargohárjánupmi vástideaddji bargguin gehččojuvvo ovdun.

Bálká mearrašuvvá Sámedikki bálkávuogádaga gáibádusdási IV/III mielde (vuođđobálká 2645,46 euro/mb). Vuođđobálkká lassin máksojuvvojit bargohárjánumi vuođul ahkelasit sihke sámeguovllus barggadettiin 24 %:a sámeguovllu lassi. Doaimmas čuvvojuvvo guovtte vahku geahččalanáigi.

Ohcamuša mildosiiguin galgá doaimmahit Sámedikki čállingoddái 1.11.2021 rádjai čujuhussii: Ma. suunnittelija (sympahr.net)

Lassidieđuid barggus addá gielladorvočálli Anne Kirste Aikio tel. 010 839 3124. Sámedikki doibmii sáhttá oahpásmit neahttačujuhusas www.samediggi.fi

Anáris 18.10.2021

Sámegiella buohkaide! – rabas oahppodiimmut sámegielaid vahkus

Sámegielaid gáiddusoahpahusa pilohttafidnu ordne maiddái dán jagi rabas giellalávgun oahppodiimmuid sámegielaid vahkus 25-31-10.2021. 

Oahppodiimmut lea oaivvilduvvon vuođđooahpahusa oahppiide ja nuppi dási studeanttaide, muhto diimmuide ožžot searvat buohkat geat leat beroštuvvan sámegielain. Diimmuide sáhttá oassálastit guđege oahppi iešráđálaččat, dahje olles luohkká sáhttá oassálastit ovttas seammá boddui oktasaš rusttegiin. Oassálastit sáhttá maiddái máŋgga diibmui. 

Oahppodiimmuid ulbmilin lea lasihit dieđu sápmelaččaid ja sámegielaid birra sihke movttiidahttit oassálastiid sámegielaide giellalávgunmetodaiguin nu, ahte oahpaheaddji hállá oahppodiimmuin eanaš sámegiela. Diimmut sisttisdollet lávlagiid, hoahkamiid ja spealuid! 

Oahppodiimmut dollojuvvojit Microsoft Teams bokte. Diimmut leat oktiibuot golbma, okta guđege Suomas hállojuvvon sámegielas: nuortalaš-, anáraš- ja davvisámegielas. Oahppodiimmut leat heivehuvvon sierra ahkejoavkkuide ja juohke diimmus lea iežas fáddá.  

Áigetávval: 

Di/Ma 26.10. dmu 10-11 

Nuortalašgiella luohkáide 3-6, fáddán muorjjit 

Ga 27.10. dmu 10-11 

Davvisámegiella badjedási luohkáide, fáddán vahkubeaivvit  

Duo 28.10. dmu 13-14 

Anárašgiella vuolledási luohkáide, fáddán meahcceeallit 

Diimmuid áigge lea vejolaš jearrat gažaldagaid ja ságastallat chatas. Oahpaheaddji lassin gažaldagaide vástidit gáiddusoahpahusfitnu bargit. It dárbbaš almmuhit iežat ovddalgihtii. Oahppodiimmut báddejuvvojit ja báttit almmustahttojit diimmuid maŋŋá čujuhusas www.saamenetaopetus.com/tapahtumia

Dárkilut rávvagat das mo searvvat diibmui gávdnojit gáiddusoahpahusfitnu neahttasiidduin ja Facebookas.  

Sámegielaid gáiddusoahpahusa pilohttafitnu hálddaša Ohcejoga gielda ja koordinere Sámediggi. Pilohttafitnu ruhtada oahpahus- ja kulturministeriija. Pilohttafitnu ulbmilin lea buoridit sámeoahpahusa olahahttivuođa sámiid ruovttuguovllu olggobealde.  

Fidnu fállá vuođđooahpahusa/logahatoahpahusa dievasmahtti sámegiela oahpahusa guokte oahppodiimmu vahkus gáiddusoktavuođaid bokte miehtá Suoma. Dál fitnu bokte sámegiela oahpahusa ožžot 105 oahppi ja studeantta. Fidnu lea ožžon joatkkaruhtadeami 31.8.2023 rádjai. Lohkanbadjái 2022-2023 almmuheapmi rahppojuvvo ođđasit giđđadálvve 2022.  

Sámi giellavahkku ávvuduvvo 25.-31.10.2021 ja Sámediggi lea bovden buohkaid searvat temávahkkui ovdamearkka dihtii dáhpáhusaid lágidemiid ja sámegielaid oainnusmahttima bokte. Giellalávgundiimmuid lassin sápmelašvuhtii ja sámegielaide sáhttá oahpásmuvvat Oktavuohta – neahttasiidduin, gos gávdno ollu temámateriála oahpahussii.  

Dan lassin sáhtát diŋgot sámefáttát skuvlagalledemiid, mobiilaspealuid ja metodapáhka Dihtosis-fitnu neahttasiiddus. 

Lassedieđut: 

Satu Pieski, prošeaktahoavda 
satu.pieski@edu.utsjoki.fi 
040 5466 514 

Anni-Sofia Niittyvuopio, prošeaktakoordináhtor  
anni-sofia.niittyvuopio@samediggi.fi 
040 5843 098 

Searvva Sámi giellavahkkui 25.-31.10.2021

GIELLAVAHKKU – KIELÂOKKO – ǨIÕLLNEÄʹTTEL ­– KIELIVIIKKO

Goas: 25.–31.10.2021

Gos: Olles Suomas, Ruoŧas ja Norggas

Geasa: Buohkat leat bures boahtin searvat ja oassálastit

Duogáš

Jagi 2019 lei Ovttastuvvan Našuvnnaid riikkaidgaskasaš álgoálbmotgiellajahki – International Year of Indigenous Languages (iyil2019.org). Temájagi áigge lágiduvvojedje doalut, mat čalmmustahtte eamiálbmotgielaid miehtá máilmmi. Giellavahkku lágiduvvui vuosttaš geardde jagi 2019. Jagi 2020 lágideamit lihkkostuvvojedje nu bures, ahte Norgga, Suoma ja Ruoŧa Sámedikkit háliidit doallat Giellavahkku jahkásaččat.

Sámegielat Suomas

Sámit leat Eurohpa Uniovnna áidna álgoálbmot. Suomas sámiid gielalaš ja kultuvrralaš rivttiid vuođđun lea vuođđoláhka, man mielde sámiin álgoálbmogin lea vuoigatvuohta doalahit ja ovddidit iežaset giela ja kultuvrra. Sámegielat leat Eurohpa eamiálbmotgielat ja nuortamearrasuopmelaš gielaid (dego suoma- ja esttegiela) lagamus gáiddus fuolkegielat. Sámegielat hubmojuvvojit Suomas, Ruoŧas, Norggas ja Ruoššas. Suomas hubmojuvvojit golbma sámegiela: davvisámegiella, anárašgiella ja nuortalašgiella. Vuođđolága mielde sámiin lea sámiid ruovttuguovllus (Anár, Eanodat, Ohcejohka ja Soađegili gieldda davimus oassi) iežaset gillii ja kultuvrii guoski iešmearrideapmi dan mielde go lágain mearriduvvo.

Mii ávžžuhit buot Suoma vuođđoskuvllaid lágidit temábeivviid sámegielain ja sámi kultuvrras vahkus 43 (25–31.10.2021). Mii sávvat, ahte buot skuvllat čalmmustahttet sámegielaid giellavahkus iešguđetlágan doaimmaiguin.

Mii lea giellavahkku – ǩiõllneäʹttel – kielâokko?

Giellavahkku lea aktasaš áŋgiruššan čalmmustahttit sámegielaid. Giellavahkku galgá veahkehit sámegielaid oidnot ja gullot buot surggiin servodagas. Mii sávvat, ahte nu máŋgasat go vejolaš servet aktasaš áŋgiruššamii čalmmustahttit sámegielaid iešguđetlágan doaimmaid bakte, sihke báikkálaš, regionálalaš ja našuvnnalaš dásis.

Mannin lea Giellavahkku dehálaš?

Sámegielat leat dehálaččat sihke ovttaskas giellageavaheaddjái, sámi álbmogii ja maiddái Suoma servodahkii. Sámegielat eai leat dehálaččat dušše gulahallama gaskaoapmin, muhto maiddái olbmo identitehttii, kulturárbái ja gullevašvuhtii. Giela oainnusmahttin beaivválaš eallimis lea dehálaš giela árvui, gullevašvuhtii ja dohkkeheapmái. Go giella oidno beaivválaččat, de addá dat dovddu, ahte min giella lea dohkkehuvvon, das lea árvu ja dat gullá servvodahkii. Go min gielat oidnojit servvodagas, de dat sakka illudahttá min.

Mii háliidit, ahte Suoma servvodat oahpašii eanet ja buorebut ipmirdit sámegiela, sámi kultuvrra ja sámi servvodateallima. Min mielas lea dehálaš ahte mánát beaiveruovttus ja skuvllas oahpásnuvvet sámegielaide. Jus buot mánát oahpašedje muhtin sámegiela sániid, de loktešii giela árvvu ja seammás attášii eanet ipmárdusa iešguđetlágan gielaide.

Evttohusat giellavahku doaibman:

  • Geavahit sámegielat oahpistangalbbaid, omd. girjerádju, boradansále, WC, luohkká. Válmmas oahpistangalbbaid gávnnat čujuhusas Oahpistangalbbat davvisáme-, anáraš- ja nuortalašgillii sihke suomagillii
  • Ráhkadit frásasátnegirjji omd. Buorre iđit! Mo manná? Sámegielat vuođđosánit ja frásaid gávnnat Unna sátnegirji vuosttasdeaivvadeapmái, árgabeaivái ja ávvudoaluide
  • Kuáti.fi   https://kuati.fi/ lea Sámi árrabajásgeassinmateriálabáŋku, man Suoma Sámediggi doallá ja lea čohkken. Siidduin gávdnojit earret eará spealut mánáide.
  • Dieđut sámiin oahpahusa várás gávdnojit siiddus https://www.oktavuohta.com davvisámegillii, nuortalašgillii, anárašgillii ja suomagillii.
  • Bovdet sámi artisttaid skuvlii oahpahit lávlut sámegillii dahje juoigat
  • Bovdet guossin skuvlii olbmuid geat leat čeahpit muitalit sámi máidnasiid.
  • Lohkat sámegielat teavsttaid, ja daid vuođul tevdnet ja málet govaid
  • Čohkket lagasbirrasa sámi báikenamaid ja čállit dain. Sáhttibehtet geavahit informánttaid/áššedovdiid veahkkin maiddái.
  • Reivvestallat eará skuvllain giellavahkku birra, juogadit dieđuid ja jurdagiid.
  • Oahppat duddjot, omd. bárgidit dahje čuoldit čoavddaguoimmi.
  • Praktihkalaš bargguid bokte oahppat doahpagiid iešguđet fáttáid birra nu go; lávu, herggiid, bohccuid, suidnema ja fierbmuba birra.
  • Bovdet vuorraset informánttaid skuvlii, geain sámegiella lea eatnigiellan, vai oahppit besset sámástit singuin.

Mii sávvat, ahte searvabehtet dán gelddolaš áŋgiruššamii. Ovttas mii sáhttit čalmmustahttit ja lasihit gelbbolašvuođa sámegielain golggotmánus 2021!

Lassedieđut:

Má. sámi giellaáššiid čálli Marko Marjomaa, 050 438 2484 / 010 839 3183, marko.marjomaa(at)samediggi.fi

Gielladorvočálli Anne Kirste Aikio, 040 707 5626 / 010 839 3124, anne-kirste.aikio(at)samediggi.fi

Dahje galledit Giellavahku ruovttusiiddus www.giellavahkku.org (Siiddut rahppojuvvojit vahkus 37, 13.9.–19.9.2021)

Dearvvuođaiguin – Tiervuođâiguin – Tiõrvʼvuõđin – Terveisin

Tuomas Aslak Juuso

Sámedikki ságajođiheaddji

Sámediggi joatká mearreáigásaš davvisámegiela jorgaleaddji doaimma ohcanáiggi 31.8.2021 radjái

Jorgaleaddji bargun lea bargat davvisámegielat jorgalan- ja terminologiijabargguid gielladoaimmahagas. Jorgaleaddji barggu gelbbolašvuođagáibádussan lea bargui heivvolaš bajit allaskuvladutkkus dahje eará skuvlejupmi sihke lágas auktoriserejuvvon jorgaleaddjiin (1231/2007) oaivvilduvvon riekti doaibmat auktoriserejuvvon jorgaleaddjin suomagielas davvisámegillii ja nuppegežiid. Bargu álgá 6.9.2021 dahje soahpamuša mielde ja joatkašuvvá 31.7.2022 radjái dahje vejolaččat dan maŋŋelge. Barggus čuvvojuvvo guovtti mánotbaji geahččalanáigi. Bálká mearrašuvvá Sámedikki bálkávuogádaga gáibádusdási IV/IV dahje V/II mielde (vuođđobálká 2597,07-2247,67 euro/mb). Vuođđobálkká lassin máksojuvvojit bargohárjánumi mielde mearrašuvvan ahkelasit sihke sámeguovllus barggadettiin 24 % sámeguovllu lassi.

Ohcamušaid duođaštusaiguin galgá doaimmahit Sámedikki čállingoddái 31.8.2021 rádjai čujuhussii
https://www.sympahr.net/public/pq.aspx?b450ac2a

Lassidieđuid addá gielladorvočálli Anne Kirste Aikio tel. +358 40 707 5626 dahje anne-kirste.aikio(at)samediggi.fi.i. Sámedikki doibmii sáhttá oahpásmit neahttačujuhusas www.samediggi.fi

10.8.2021
Sámediggi

Kädet kannettavan tietokoneen näppäimistöllä.

Sámediggi ordne infodilálašvuođa auktoriserejuvvon jorgaleaddji dutkosa birra 29.6.2021

Sámediggi lágida infodilálašvuođa auktoriserejuvvon jorgaleaddji dutkosa birra 29.6.2021 dmu 14.00-14.45 gáiddusoktavuođain. Dilálašvuođas muitaluvvo mii dutkkus lea ja man láhkai dasa sáhttá ráhkkanit. Ieš dutkosii almmuheapmi lea borgemánus. Infodilálašvuođas dutkosa birra muitala gielladorvočálli Anne Kirste Aikio. Infodilálašvuohta lea dárkkuhuvvon buohkaide, geat leat beroštuvvan dutkosis.

Oahpahusráđđehusa hálddašan auktoriserejuvvon jorgaleaddji dutkkus ordnejuvvo čuovvovaš geardde skábmamánus 2021. Auktoriserejuvvon jorgaleaddji dutkosa sáhttá čađahit Suomas hállon buot sámegielain ja dat lea virggálaš duođaštus jorgaleaddji ámmátdáiddus. Dutkosa sisdoalus sáhtát lohkat dárkilabbot oahpahusráđđehusa siidduin: https://www.oph.fi/koulutus_ja_tutkinnot/auktorisoidut_kaantajat

Auktoriserejuvvon jorgaleaddjidutkkus lea maid gelbbolašvuođagáibádussan Sámedikki jorgaleaddji virgái, nu mo lea meroštallojuvvon Sámedikkis addon ásahusas.

Sámediggi lágida maŋŋelabbos čakčat sierra ráhkkanandilálašvuođa dutkosis.   

Buohkaide rabas infodilálašvuohta ordnejuvvo gáiddusoktavuođain Microsoft Teams bakte čujuhusas: https://urly.fi/25YW

Lassidieđuid addá gielladorvočálli Anne Kirste Aikio:

anne-kirste.aikio(at)samediggi.fi
Mob. +358 40 707 5626
Tel. 010 839 3124

Sámediggi almmustahttá prentejuvvon veršuvnna digitála suoma–nuortalašgiela-sátnegirjjis

Sámediggi ja Giellagas-instituhtta almmustahttet prentejuvvon  suoma–nuortalašgiela-sátnegirjji bearjadaga 5.3.2021 dii. 13.00. Sátnegirji lea prentejuvvon veršuvdna Giellagas-instituhtta ovdal almmustahttán digitála suoma–nuortalašgiela-sátnegirjjis. Buohkaide rabas almmustahttindilálašvuohta ordnejuvvo gáiddusoktavuođain Microsoft Teams bakte čujuhusas https://urly.fi/1X2m  

Bures boahttin čuovvut dilálašvuođa!

Prentejuvvon suoma–nuortalašgiela sátnegirjjis, mii dál almmustahttojuvvo  lea suomagielat ohcansániid lohkomearri badjel 20 000. Prentejuvvon sátnegirji vuođđoduvvá eanas Satu ja Jouni Moshnikoffa álgoálgosaš sátnelistui, muhto fárrui leat váldojuvvon muhtin veardde maiddái maŋŋeleappos lasihuvvon sánit, go lea gávnnahuvvon, ahte sánit leat sajáiduvvon gillii dahje leat earenoamáš dárbbašlaččat.

Nuortalašgiela sátnegirjjiid  doaimmahanbargu lea dahkkojuvvon eanaš dainna sierra ruhtademiin, man Oahpahus- ja kulturministeriija lea juolludan Giellagas-instituhttii.  Ollašuhttin lea dahkkon Oulu universiteahta Giellagas-instituhta,  Sámedikki ja Helssega universiteahta ovttasbargun.

Doaimmahangottis ledje Eino Koponen, Miika Lehtinen, Merja Fofonoff ja Raija Lehtola.

Giellagas-instituhta nuortalašgiela universiteahttaoahpaheaddji Miika Lehtinen lea doaimmahan sátnegirjji Romssa  universiteahta sámegiela giellateknologiija guovddáža, Giellatekno vuolážis borgemánus 2020 almmustahttojuvvon digitála suoma–nuortalašgiela-sátnegirjjis.

Sámedikki sámegiela doaimmahat lea ordnen sátnegirjji almmustahttimis.

Prentejuvvon sátnegirjji sáhttá diŋgot Sámedikki oahppomateriála neahttagávppis: https://www.samediggi.fi/tuote/suomi-koltansaame-sanakirja/

Digitála suoma–nuortalašgiela-sátnegirji gávdno https://saan.oahpa.no/fin/sms/

Lassedieđut: 

Sámediggi: Marko Marjomaa (+358 10 839 3183) marko.marjomaa(at)samediggi.fi 

Giellagas-instituhtta: Miika Lehtinen (+358 50 5692300) miika.lehtinen(at)oulu.fi 

Niina Aikio-Siltala

Giellabeassejođiheaddjin álggahan Niina Aikio-Siltala

Sámedikki má. giellabeassejođiheaddjin válljejuvvui ođđajagemánus Niina Aikio-Siltala. Aikio-Siltalas lea árrabajásgeassima oahpaheaddji (KK) skuvlejupmi ja son lea bargan ovdal anárašgielat giellabesiin ja maiddái Avvila skuvllain anárašgiela diibmooahpaheaddjin.

Giellabeassejođiheaddji bargguide gullet ee. giellabesiid stáhtadoarjaga hálddašeapmi, giellabeassedoaimma ovddideapmi ovttas eará doaibmiiguin, giellabeassebargiid skuvlejumiid koordineren ja maiddái pedagogihkalaš doarjaga fállan giellabesiide.

– Ođđa bargu lea vuolgán bures johtui. Dál álggos lean ságastallan giellabeassebargiiguin áigeguovdilis áššiid birra, bargan stáhtadoarjjaáššiin ja maiddái plánen giellabeassebargiid dán jagi skuvlejumiid. Maiddái giellarávvehat joatkašuvvá farggabáliid ja Kuáti.fi – siidduid ođasmahttinbargu lea gárváneamen, Aikio-Siltala muitala.

– Gielaealáskahttin, giellabeasit ja sámi árrabajásgeassin leat čielgasit alccen dakkár áššit, maiguin háliidan bargat dál ja boahttevuođasge nu ahte lean duođaige ilolaš, ahte bessen smávva bottu maŋŋá ruovttoluotta giellabeasseáššiid olis bargat.

Giellabeassejođiheaddjái sáhttá eandalii leat oktavuođas giellabeassedoibmii laktáseaddji buot gažaldagain. Giellabeassejođiheaddji čuovvu ovttas gielladorvočálliin doaimma ollašuvvama. Doaimma guoski mearrádusaid ja linnjádemiid ráhkada Sámedikki giellaráđđi.

Dán siiddus gávnnat vuođđodieđuid giellabeassedoaimma birra:
https://www.samediggi.fi/doaibma/samegiella/giellabeassi/?lang=dav

Lassidieđut

Má. giellabeassejođiheaddji Niina Aikio-Siltala, 040 487 5414 / 010 839 3115, niina.aikio-siltala(at)samediggi.fi

Gielladorvočálli Anne Kirste Aikio, 040 707 5626 / 010 839 3124, anne-kirste.aikio(at)samediggi.fi

Sámediggi almmustahttá rávagirjjáža sámásteamis bearrašis

Sámediggi almmustahttá girjjáža ”Leago giella ruovttus? Sámegiela sirdin mánnái”. Girjjáš lea čállojuvvon sámegielat bearrašiidda, muhto lea sávvamis maid ávkin ovdamearkka dihte sosiála- ja dearvvašvuođa suorggi bargiide, guđet deivet sámi mánnábearrašiid. Girjjis gieđahallojuvvo sámegiela geavaheapmi vávváagis nuorravuhtii.

Rávagirji almmustahtto daningo diehtu sámegiela sirdimis sohkabuolvvas nubbái iešguđet­lágan bearašdiliin ja dilálašvuođain lea fidnemis oalle un­nán ja dat soaitá leat eahpečielggas. Suomas dieđut, mat leat álkit fidnemis guovttegielatvuođas, govvidit dávjá áib­bas nuppelágan gielladiliid go dat, gos sápmelaččat ellet. Dát rávagirjjáš lea ráhkaduvvon namalassii sá­megielat bearrašiid várás.  Vánhemat eai álo gávnna iežaset árgabeaivvis dan doarjaga man ohcalit sámegiela sirdimii ja máná gielalaš ovdáneapmái, namalassii áššiide mat dorjjošedje gielalaš vuoigatvuođaid ollašuvvama. Sámedikki I várreságajođiheaddji Anni Koivisto sávvá, ahte rávagirjjáš govččašii oasistis dan diehtovátnivuođa:

– Mii sávvat ahte girji oasistis govččašii váilevašvuođaid ja maid movttiidivččii bearrašiid earálágan diliin doaibmat buoremus vejolaš vugiin. Lea dehálaš ahte bargu giela ovdii dahkko máŋgga dásis, sihke doarjumin bearrašiid árgga , muhto maid ovddidit servodaga oppalaš vuoiŋŋa gielaid ektui. Nu mii sáhttit bajásgeassit ođđa sámegielagiid sohkabuolvva, mii lea rámis iežas giela ja kultuvrras.

Suomas lea árabut almmustuvvan okta rávagihppagaš seamma fáttás, Stukes jagis 1993 almmustahttán ja Aino Snellman ja Kerttu Vuolab čállán Puhu omaa kieltäsi lapsellesi – Hála mánnásat iežat eatnigiela. Dál dát ođđa rávagirji almmustuvvá golmma sámegillii ja suomagillii.

Girjjáža almmustahttima lea dahkan vejolažžan oahpahus- ja kulturministeriija doarjja, man Sámediggi oaččui oassin stuorit prošeavtta ON:a eamiálbmogiid gielaid temájagi 2019 oktavuođas. Teakstaosiid lea čohkken giel­ladutki FD Annika Pasanen. Girjjážis leat mielde golbma sámebearraša juogadeamen iežaset vásáhusaid sámásteamis earálágan diliin.

Rávagirjjáš lea lohkamis Sámedikki neahttasiidduin:

Girjjáš lea maid juohkinlahkái sámiid ruovttuguovllu rávvehagaid bokte bearrašiidda.

Lassidieđut:

Sámedikki I várreságadoalli Anni Koivisto, tlf. +358 40 415 5969, anni.koivisto(at)samediggi.fi

Sámi gielladorvočálli Anne Kirste Aikio, tlf.  +358 40 707 5626, anne-kirste.aikio(at)samediggi.fi

Vuoigatvuohtaministeriija juohká doarjaga sámi giellalága ollašuhttimii

Vuoigatvuođaministeriija almmuha ohcanláhkái sámi giellalága (1086/2003) 31 §:s oaivvilduvvon doarjagiid. Doarjagat leat dán jagi geavahanláhkái oktiibuot 150 000 euro. Doarjaga sáhttá mieđihit sámiid ruovttuguovllu gielddaide, searvegottiide ja bálgosiidda ja maiddái lága 18 §:s dárkkuhuvvon priváhta beliide lága heiveheamis šaddan sierra lassigoluid gokčamii. Dál ohcanláhkái doarjagat leat oaivvilduvvon 1.1.2021 maŋŋá šaddi lassegoluide.

Stáhtadoarjagiid ohcanáigi lea 1.2.-26.2.2021. 

Stáhtadoarjagiid ulbmilin lea ovddidit sámi giellalága ollašuvvama gokčamiin lága heiveheamis šaddan erenoamáš lassegoluid. Doarjagiid sáhttet mieđihit ee. čuovvovaš ollisvuođaide: jorgalan ja dulkongolut (sis. almmustahttindoaibma), dieđiheapmi, skuvlema ja giellaoahpuid áigásaš sadjásašgolut, sihke sámi giellalága heiveheami ovddideapmái laktáseaddji golut.

Rávvagat ja lassidieđut:

Saamen kielilain mukaiset avustukset – Oikeusministeriö (oikeusministerio.fi)

Lassidieđut:

Sámi gielladorvočálli Anne Kirste Aikio, 010 839 3124, anne-kirste.aikio(at)samediggi.fi

Sámiid kultur- ja giellabeassedoibmii 200 000 euro lasseruhta boahtte jahkái

Riikkabeivviid ruhtaváljagoddi evttoha lasseruhtadeami sámegielaid ealáskahttimii boahtte jahkái nu gohčoduvvon juovlaskeaŋkaruđain. Ruhtaváljagotti evttohusa mielde sámiid kultur- ja giellabeassedoibmii mieđihuvvošii 200 000 euro lasseruhta jahkái 2021, dalle kultur- ja giellabeassedoibmii mieđihuvvon doarjaga ollessubmi livččii 1,4 miljon euro.

Sámediggi lea evttohan riikkabeivviide kultur- ja giellabeassedoaimma ruhtadeami lasiheami, vai doaimma sáhttá joatkit dan viidodagas masa lea dárbu. Váljagotti smiehttamuša mielde bajádus vástida sámegiela ealáskahttinprográmma guoski stáhtaráđi prinsihppamearrádusa mihttomeari, man mielde giellabeassedoaimma ruhtadeami galggašii lasihit vehážiid mielde 1,4 miljon euroi.  Sámedikki ságadoalli Tuomas Aslak Juuso lea duđavaš, ahte lasáhus lea boahtimin.

– Fiinnis, ahte juovlaskeaŋkaruđaid bokte sáhttá johtilit lasihit ruhtadeami akuhta dárbbuid várás. Sámegielaid ealáskahttin dárbbaša beaktilis doaimmaid, go gielaid dilli lea ain áitatvuloš. Sávvamis dát maid geažida dan, ahte ruhtadeapmi livččii bissovaččat bajiduvvomin.

Lasáhusain nagodat dorvvastit buot dálá kultur- ja giellabesiid doaimma, muhto maid ovdánahttit doaimma. Stáhta bušeahtas lea jagi 2011 rájes čujuhuvvon oahpahus- ja kulturministeriija váldoluohkás mearreruhta sámiid kultur- ja giellabeassedoaimma várás. Sámediggi juohká doarjaga ovddos doaimma lágideaddjiide. Sámiid kultur- ja giellabeassedoaibma lágiduvvo davvi-, anár- ja nuortalašsámegillii sámiid ruovttuguovllus ja dan olggobealde ja dat adnojuvvo oktan beaktilamos doaibman ealáskahttit sámegielaid.

Ruhtaváljagotti bušeahta lasáhusat riikkabeivviin jagi 2021 stáhta bušeahta gieđahallama oktavuođas ovdal juovllaid. Skábmamánu dievasmahtti evttohusas stáhta jagi 2021 bušeahttan lea váldon vuhtii lasáhussan 34 000 euro bálkámáksimiid dárkkistusaide, ja ná sámiid kulturiešstivrejumi bajásdoalus šaddi manuid várás evttohuvvo jahkái 2021 oktiibuot 3 943 000 euro. Sámedikkis ledje maid eará evttohusat lassemearreruhtan, muhto dat eai váldon vuhtii dán háve.

Evttohus, mii guoská stáhta 2021 bušeahta lassemearreruđa

Sámediggái evttohuvvo jagi 2021 bušeahtas lasáhus hálddahusa ovdánahttimii

Lassedieđut:

Ságadoalli Tuomas Aslak Juuso t. 040 687 3394 / 010 839 3101, tuomas.juuso(at)samediggi.fi

Gielladorvočálli  Anne Kirste Aikio t. 010 839 3124 / 040 707 5626, anne-kirste.aikio(at)samediggi.fi