Dihtosis-prošeakta ohcá skuvlagalledeaddjiid giđđat álgi skuvlagalledemiide

Sámedikki nuoraidráđi ja Nuoraid Akatemiija Dihtosis-prošeavtta olis fállojuvvojit badjeskuvllaide sámetemát skuvlagalledeamit. Ohcatge dál movttegis badjel 18-jahkásaš sámenuoraid miehtá Suoma skuvlagalledeaddjin giđa 2019 áigge ollašuhtton guossástallamiidda.

Galledeaddjiid bargun lea badjeskuvllas iešráđálaččat lágidit galledeami, gos muitaluvvo sámekultuvrras. Galledeapmi čohkiida sámekultuvrra ovdanbuktimis sihke doaibmanbargobájiin. Bargobájiid dárkkuhussan lea lávdadit dieđuid sápmelaččain ja sámekultuvrras váldoálbmoga nuoraide. Galledeami bistu lea dábálaččat 75- 90 minuhta, mii lea gitta oahppolágádusa diimmuid guhkkodagas. Galledeaddjit ohccojit ee. oaivegávpotguvlui, Turkui, Jyväskyläi, Tamperei, Oului ja Roavvenjárgii. Skuvlagalledeamit ollašuhttojit dábálaččat skuvlabeivviid áigge áigodagas 1.2.-31.5.2019.

Skuvlagalledemiin máksojuvvo 54€/fitnan sihke mátkkit galledanbáikái. Skuvlagalledemiid mearri lea gitta diŋgojumiin ja galledeaddji iežas áigetávvaliin.

Skuvlagalledeaddjiide dollojuvvo Helssegis Nuoraid Akatemiija lanjain skuvlejupmi vuossárgga 14.1.2019. Skuvlejupmái oassálastin lea eaktun gallejeaddjin doaibmamii. Skuvlejumis ii máksojuvvo buhtadus. Vejolaš mátke- ja idjadangolut máksojuvvojit.

Vuordit skuvlagalledeaddjiin sámekultuvrra dovdama, movttegis doaladumi ja doaibmavuogi skuvlagalledeami jođiheapmái sihke buriid gulahallandáidduid.

Doaimmat friijahápmásaš ohcamuša 30.11.2018 dmu 16.00 rádjai čujuhussii: minna.lehtola(at)samediggi.fi

Lassidieđut:
Minna Lehtola
Prošeaktabargi
tel: 010 839 3132 | +358 40 650 3620
minna.lehtola(a)samediggi.fi

https://www.samediggi.fi/dihtosis-proseakta/?lang=dav

Govva: Satu Miettinen

Nuorat besset ieža plánet sámegielat astoáiggedoaimmaid

Sámedikki nuoraidráđi De!-prošeakta čielggada dál jearahallamiin nuorain, ahte makkár sámegielat astoáiggedoaimmaide sii háliidivčče oassálastit. Jearahallamii sáhttet Sámedikki neahttasiidduin ja nuoraidráđđi sosiála media kanálain vástidit buot 13-29-jahkásaš nuorat, geat háliidivččet oassálastit sámegielat nuoraiddoaimmaide man nu sámegielain. 

– Sámegielat nuoraiddoaimmat leamaš dán rádjái dušše unnán. De!-prošeavtta ulbmilin lea fidnet nuoraid ieža mielde plánet, makkár sámegielat doaimmaide sii háliidit oassálastit. Dál lea buorre muddu muitalit, jos lea ieš dahje ovttas skihpáriiguin niegadan man nu astoáiggedoaimmas, mii ii leat leamaš iežas ruoktoguovllus. Prošeavtta ulbmilin lea ollašuhttit justa diekkár ideaid, tipse De!-prošeavtta prošeaktabargi Tuuli Miettunen.

De!-prošeavtta áigge ollašuhttit nuoraid ieža plánen sámegielat astoáiggedoaimmaid pilohtaid. Ulbmilin lea nannet sámegielat nuoraidkultuvrra ja movttiidahttit nuoraid geavahit sámegielaid maid astoáiggis.

Sámegielat nuoraiddoaimmaid ordnema lea ovdal hehtten dat, ahte gielddain eai leamaš sámegielat nuoraidbargit. Bargiid váilun lea ain čuolbma, mieđiha Miettunen.

– Go gielddain eai leat sámegielat nuoraidbargit, mii fertet gávdnat nuoraiddoaimmaid bagadalliid eará sajis. Danin mii seammá áigge čielggadit maid, makkár sámegielat olbmot gielddain ja sámeguovllu servviin leat ja sáhtášeimmetgo ávkkástallat sin máhtuid nuoraid plánen doaimmain, muitala Miettunen.

Jearahallamiidda beasat vástidit čujuhusas: https://www.samediggi.fi/de/

De!-prošeavtta sáhttá čuovvut Nuoraidráđi sosiála media kanálain, Instagramas ja Facebookas. Prošeavtta ollašuhttit áiggis 1.10.2018-30.8.2019 ja dan ruhtada Leader Pohjoisin Lappi.

Lassedieđut:
Prošeaktabargi Tuuli Miettunen, tuuli.miettunen(at)samediggi.fi, tel. 010 839 3133 / 040 650 7505

 

           

Sámediggi almmuha ohcanláhkai NUORAIDČÁLLI VIRGESADJÁSAŠVUOĐA

Sámediggi almmuha ohcanláhkai NUORAIDČÁLLI VIRGESADJÁSAŠVUOĐA áigodahkii 1.12.2018–31.10.2019. Nuoraidčálli váldobargun lea doaibmat nuoraidráđi áššemeannudeaddjin ja čállin. Lassin čálli bargguide gullá nuoraidráđi vuollásaš prošeavttaid koordineren ja jođiheapmi.

Seađáhusvuđot gelbbolašvuođagáibádussan lea barggu eaktudan skuvlejupmi ja lassin gáibiduvvo sámegiela dáidu (ásahus 1727/95). Virgesadjásašvuođa ceavzilis dikšuma veahkehit heivvolaš allaskuvladutkkus ja maiddái nuoraidáššiid ja hálddahusdoaimma bures dovdan. Bálká mearrašuvvá sámedikki bálkávuogádaga gáibádusdási IV/IV-II mielde (vuođđobálká lasiid haga 2491,54 – 2596,52 euro/mb). Virgesadjásašvuođa deavdimis čuvvojuvvo guovtti mánotbaji geahččalanáigi.

Ohcamušaid čuvvosiiguin galgá doaimmahit sámedikki čállingoddái 9.11.2018 dmu 16.00 rádjai čujuhussii Sajos, 99870 Anár. Lassedieđuid barggus addá hálddahushoavda Pia Ruotsala-Kangasniemi tel. 010 839 3106 dahje nuoraidčálli Kaisa Tapiola-Länsman tel. 010 839 3134. Sámedikki doibmii sáhttá oahpásmuvvat neahttačujuhusas www.samediggi.fi

Anáris 15.10.2018 Sámediggi

Seminára sámenuoraid vásihan seksuálalaš heađušteamis ja -veahkaválddis, áigetávval

Seminára ulbmilin lea, ahte sámenuorat besset juogadit iežaset vásáhusaid ja jurdagiid seksuálalaš heađušteamis ja veahkaválddis. Norgga Sámedikki nuoraidpolitihkalaš lávdegoddi lea álggahan ságastallama fáttás ja dárkkuhussan lea viiddidit ságastallama olles sámeguvlui. Lea dehálaš bajidit fáttá oidnosii, daningo fáttá birra dávjá jávohuvvo. Seminára geahččala addit bargoneavvuid seksuálalaš veahkaválddi vásihan nuorain deaivvadeapmái ja su doarjumii sihke iežas vásáhusaid gieđahallamii.

Áigi: bearjadat 5.10.2018 dmu 9.00-15.30

Báiki: Anár, Sajosa Parlameantasále Solju

Áigetávval

9.00-9.10 Seminára rahpan, Risten Mustonen nuoraidráđi ságajođiheaddji

9.10-9.40 Seksi ii leat rájáheapme – ráját leat Vástideaddji kriisabargi Kati Puhakka, Raiskauskriisikeskus Tukinainen

9.40-10.10 Nuoraid vásihan seksuálaveahkaváldi Seksuálaveahkaváldebarggu jođiheaddji Noora Wilhelmsson, Otava-prošeakta, Tyttöjen Talo® Roavvenjárga

10.10-10.40 Sámegielat ja -kulturvuđot bálvalusat, Sámi našuvnnalaš gealboguovddáš ‐ psykalaš dearvvasvuođasuddjen ja gárrendilli, SÁNAG doaimma ovdanbuktin, Raghild Varsi Dahl Sámi nuoraid psykiatriijajoavku, prošeaktahoavda/seksologa Ingunn Eriksen AMATHEA-prošeakta

10.40-11.00 Rape culture – mii dat lea ja geasa dat čuohcá? Nuorra sápmelaš filbmadahkki Sunna Nousuniemi

11.00-12.00 Sámenuoraid panelaságastallan

12.00-13.00 Beaivemális, Sajosa restauráŋŋa Čaiju

13.00-14.00 Bargobájit:

Seksuálaveahkaválddi vásihan nuorain deaivvadeapmi Seksuálaveahkaváldebarggu jođiheaddji Noora Wilhelmsson, Otava-prošeakta, Tyttöjen Talo® Roavvenjárga Jođiheaddji Elina Kreus, Tyttöjen Talo® Roavvenjárga

Bargobájis oassálastit ožžot válmmašvuođaid seksuálaveahkaválddi vásihan nuora sensitiivvalaš deaivvadeapmái. Gieđahallat maiddái seksuálaveahkaválddi sáhkan váldima ja vugiid, mat suddjejit nuoraid.

Doaibmanbargobádji: Seksuálalaš veahkaválddi vásihan nuoraid doarjun sihke sámenuoraid buresveadjima doarjjadoaimmaid plánen njunušoahpaheaddji, psykologa Tomi Guttorm, Ámmátlaš oahpaheaddjiallaskuvla / Oamk 

Bargobájis gieđahallojit ovdamearkkat, maid oassálastit sáhttet guođđit namaheapmen oktasaš bargovuorkái (Fuom! dihtor fárrui). Lassin bargobájis lea dárkkuhus plánet ovttas doarjjadoaimmaid sámenuoraide. Bargobáji maŋŋá lea maiddái vejolaš ságastallat guovttá gaskan psykologain suomagillii dahje davvisámegillii.

Seksuálabajásgeassima mearkkašupmi seksuálalaš veahkaválddi eastadeamis Vástideaddji kriisabargi Kati Puhakka Raiskauskriisikeskus Tukinainen.

Bargobájis giddejuvvo fuopmášupmi seksuálabajásgeassima mearkkašupmái sihke smihttojuvvojit maiddái konkrehtalaš vuogit oassálastiid beroštumiid mielde.

Vuogit rihkusáššiid sáhkan váldimii, seksuálarihkkosa dovdán ja veahki ohcama dehálašvuohta, guovlluhoavda Päivi Alanne-Kunnari ja doaimmajođiheaddji Katja Huotari Rihkusoaffargohcin.

Bargobájis gevvojit čađa iešguđetlágan seksuálalaš veahkaválddi hámit ovdamearkadáhpáhusaid vehkiin ja guorahallo ovttas ee. man láhkai veahkehit seksuálarihkkosa oaffarin gártan skihpára.

14.00-14.30    Káfestallan

14.30-15.30    Bargobájiid čoahkkáigeassu

Seminára lea nuvttá ja oassálastiide guossohuvvo beaivemális ja káfet. Seminára gielat leat sámegiella ja suomagiella. Dilálašvuođas lea tulkon. Prográmmanuppástusat leat vejolaččat.

Lassidieđut ja almmuheamit 27.9.2018 rádjai:

Kaisa Tapiola-Länsman, kaisa.tapiola-lansman@samediggi.fi, 050 382 5179

Bures boahtin digitálalaš muitalanbargobadjái 5.-7.10.2018 Anárii!

Bargobájis oahpásmuvvat nuoraid vásáhusaide ja jurdagiidda iešsoardimiid eastadeamis ja miela buresveadjimis sámenuoraid gaskavuođas.

Bargobádji lea dárkkuhuvvon sámenuoraide Suomas, Ruoŧas ja Norggas. Oassálastit leat 16 ‒ 30 -jahkásaččat. Bargobádji lágiduvvo Sajosis, Anáris. Bargan álgá bearjadaga 5.10. eahkedis ja bistá sotnabeai veaigái. Lágideaddjit mákset mátke- ja idjadangoluid sihke borademiid.

Ulbmilin lea juogadit muitaleami vehkiin vásáhusaid ja ideaid iešsoardimiid eastadeamis ja miela buresveadjima doarjumis sámenuoraid gaskavuođas. Oassálastit ohppet, mo muitalusas ráhkaduvvo digitálalaš muitalus nu ahte geavahuvvo ávkin Adobe Final Cut Pro – prográmma. Bargobádji bajálašto dainna, ahte oassálastiin lea vejolašvuohta juohkit iežaset muitalusa jovkui.

Digitálalaš muitalanbargobadjái sáhttet oassálastit 10-15 sámenuora, geat barget ámmátdáiddolaš fasilitáhtorjoavkkuin. Digitálalaš máinnasteami vuohki doarju oassálastiid geavahit teknologiija iežaset muitalusaid ovdanbuktimis. Fasilitáhtorat fállet oassálastiide fáddávuođu, mii veahkeha sin álggahit muitalusa ráhkadeami. Oassálastit sáhttet ráhkadit muitalusa okto dahje smávva joavkkuin. Muitalusat vudjot mielladearvvasvuhtii ja miela buresveadjimii, iešsoardimiid eastadeapmái, psyhkalaš nanusvuhtii ja servoša doaibmamii sámenuoraid perspektiivvas.

Oassálastiide fállojuvvo maiddái vejolašvuohta juohkit muitalusa oassin dutkamuša ja diehtojuohkima árktalaš ráđi mearrideaddjiide. Muitalusaid ráhkadeami lassin oassálastit gullet árktalaš ráđi ja dan suvdilis ovdáneami bargojoavkku barggus, iešsoardimiid eastadeamis ja dutkanetihkas.

Bargobáji ordne Suoma sámedikki nuoraidráđđi oktasašbarggus kanádalaš áššedovdijoavkkuin, sosiála- ja dearvvasvuođaministeriijain ja árktalaš ráđiin. Dat lea oassi árktalaš ráđi prošeavttas Circumpolar Resilience, Engagement and Action Through Story (CREATeS).

Bargobáji bargangiella lea eaŋgalsgiella, muhto tulkon sámegielaide lea fállun.

Bargobádji lea árktalaš guovllu álbmotlaš bargobájiid ráiddu oassi. Sajosis, Anáris, lágiduvvo bargobádji 30.1.-1.2.2019, mii  loahpaha ráiddu. Dasa sáhttet oassálastit árktalaš guovllu sierra eamiálbmogiid nuorat.

Lassidieđut ja almmuheamit 30.9.2018 rádjai:

Kaisa Tapiola-Länsman, kaisa.tapiola-lansman@samediggi.fi, 050 382 5179

   

Skuvlenbovdehus sámenuoraide olmmošvuoigatvuođaid birra

Boađe oahppat olmmošvuoigatvuođaid birra! Olmmošriektelihtu ja Sámedikki nuoraidráđi lágidan skuvlemis gevvojit čađa mat olmmošvuoigatvuođat leat ja mii daidguin dahkkojuvvo. Gieđahallat erenomážit eamiálbmotvuoigatvuođaid ja sámiid Suomas deaividan olmmošvuoigatvuođaloavkidemiid. Guorahallat ovttas vugiid bealuštit ja ovddidit olmmošvuoigatvuođaid ollašuvvama.

Áigi: lávvardat 22.9.2018 dmu 9.30-15.30

Báiki: Oulu váldogirjerádju, Kaarlenväylä 3, Eanagoddečoakkáldatlatnja (3. grd)

Álgomuttu áigetávval:

9.15-9.30        Iđitkáfet

9.30-11.00      Olmmošvuoigatvuođat: mat dat leat, gos dat bohtet ja mii daidguin dahkkojuvvo? Ságastallat olmmošvuoigatvuođavuogádagas ja dan doaibmamis bidjamin deattu erenomážit dasa, man láhkai olmmošvuoigatvuođat váikkuhit geavadis ja oidnojit beaivválaš doaimmas. Matti Jutila, olmmošvuoigatvuođaid áššedovdi

11.00-12.00    Beaivemális

12.00-13.30    Olmmošvuoigatvuođaid ovddideapmi váikkuhanbargguin: Váikkuheami plánen, áigemeroštallan ja iešguđetlágan vuogit. Hábmejuvvo ovttas váikkuhanplána oassálastiid válljen fáttás. Heli Markkula, váikkuhanbarggu hoavda

13.45-15.15    Vuoigatvuođaid bealušteapmi: Maid áššiin váidaluvvo riekteduopmostuoluide, mas váidaluvvo lágalašvuođagohccái (omd. riikkabeivviid vuoigatvuođaáššeolbmui)? Maid lea buorre váldit vuhtii? Makkár ákkastallandoarjaga sáhttá oažžut Eurohpá olmmosvuoigatvuođaduopmostuolu geavadis? Heta Heiskanen, ALL-YOUTH STN

15.15-15.30    Loahpaheapmi, máhcahat ja joatkkabarggu plánen

Skuvlen lea nuvttá ja oassálastiide fállojuvvo beaivemális.

Lassidieđut ja almmuheamit 19.9.2018 rádjai:

Kaisa Tapiola-Länsman, kaisa.tapiola-lansman@samediggi.fi, 050 382 5179

 

  

Suoma skuvllaide diđolašvuohta sámiid birra

Oahpahus- ja kulturministeriija lea mieđihan Sámedikki nuoraidráđi ja Nuoraid Akatemia Dihtosis- prošektii ruhtadeami. Prošeavttain dahkkojuvvo sámekultuvrra oahpisin skuvllain.

Sámit leat Eurohpa uniovnna áidna eamiálbmot, muhto Suoma skuvllain sámiid birra oahpahuvvo hui uhcán ja máŋgii diehtu, mii lea oahppogirjjiin, lea gárži ja boarásmuvvan. Otná beaivve juo badjel 70 % sámenuorain ja –mánáin ássá sámiid ruovttuguovllu olggobealde, gos sii sáhttet dieđu vátnivuođa dihtii vásihit vealaheami ja givssideami. Maiddái sámenuorat, geat leat aktiivvalaččat somes, vásihit olu vaššisága. Oktan sivvan dasa lea media fállan ovttabealat govva sámiin. Prošeavtta deháleamos dárkkuhussan lea lasihit váldoálbmoga nuoraid diđolašvuođa sámiid birra.

Sámiid álbmotbeaivi dollojuvvo guovvamánu 6. beaivve. 6.2.1917 dollui Norgga Troanddimis vuosttas davviriikkalaš sámečoahkkin, mii álggahii riikkarájáid rasttildeaddji ovttasbarggu sámiid gaskkas. Sámiid álbmotbeaivi ávvuduvvo jahkásaččat sierra guovlluin Sámis ja Suomas ovdamearkan sámeguovllu skuvllain dollojuvvo dalle ávvobeaivi. Prošeavtta oktan dárkkuhussan lea ovddidit sámiid álbmotbeaivvi riikkadási temábeaivin Suoma skuvllain. Temábeaivvi lassin giđđat lágiduvvojit skuvllain bargobájit, maid jođihit oahpahuvvon sámenuorat.

Prošeavtta Sámedikki bargin lea válljejuvvon kulturbuvttadeami (AMK) stuđerejeaddji anáraš Minna Lehtola. Minna bargun lea ovttasbarggus sámenuoraiguin čoaggit dieđuid das, maid sámiid birra galggašii muitalit suopmelaš mánáide ja nuoraide. Nuoraid Akatemias lea guhkes dovddiidus iešguđetlágan prošeavttaid ja bargobájiid ordnemis ja sii vástidit prošeavttas das, mo dieđu galgá ovdanbuktit mánáide ja nuoraide, nu ahte dat miellagiddevaš ja áddehahtti.

 

Lassidieđut:

Kaisa Tapiola-Länsman, Sámedikki nuoraidčálli, kaisa.tapiola-lansman@samediggi.fi, 050 382 5179

Hilla Aaltio, Prošeaktakoordináhtor, Nuoraid Akatemia, hilla.aaltio@nuortenakatemia.fi, 045 260 8801

Seminára sámenuoraid vásihan seksuálalaš heađušteamis ja -veahkaválddis sihke digitálalaš muitaleami bargobádji iešsoardimiid eastadeami dihtii

Sámedikki nuoraidráđđi lágida golggotmánu 5. bve seminára sámenuoraid vásihan seksuálalaš heađušteamis ja -veahkaválddis sihke sámenuoraide dárkkuhuvvon digitálalaš muitaleami bargobáji golggotmánu 5.-7. bve ovttasbarggus eará doaibmiiguin Anáris.

Seminára sámenuoraid vásihan seksuálalaš heađušteamis ja -veahkaválddis 5.10.2018

Semináras guorahallat, man láhkai sihkkarastit sámemánáide ja -nuoraide dorvvolaš šaddanbirrasa, mii lea seksuálalaš heađušteapmi- ja veahkaváldi, maid sáhttá bargat dan eastadeami dihtii ja maiddái movt galgá doaibmat, juos ieš vásiha seksuálalaš heađušteami dahje -veahkaválddi. Seminára čohkiida ámmátolbmuid sáhkavuoruin, sámenuoraid iežaset vásáhusain ja bargobájiin. Seminára lea buohkaide rabas ja nuvttá ja dat lágiduvvo Sámekulturguovddáš Sajosis Anáris.

Nuoraidráđi jagi 2018 temán lea buktit oidnosii sámenuoraid deaividan seksuálalaš heađušteami ja -veahkaválddi ja ohcat dasa darvánanvugiid. Norgga Sámedikki nuoraidpolitihkalaš lávdegoddi (SáNuL) lea bajidan ovdan, ahte sápmelaš nissonat, albmát ja mánát vásihit dávjá seksuálalaš heađušteami ja SáNuL atná ášši servodaga probleman, masa olles servodat galgá darvánit.

Digitálalaš muitaleami bargobádji 5.-7.10.2018

Bargobáji ulbmilin lea juogadit muitaleami vehkiin vásáhusaid ja ideaid iešsoardimiid eastadeamis ja miela buresveadjima doarjumis sámenuoraid gaskavuođas. Oassálastit ohppet, mo muitalusas ráhkaduvvo digitálalaš muitalus nu ahte geavahuvvo ávkin Adobe Final Cut Pro – prográmma. Bargobádji bajálašto dainna, ahte oassálastit juhket iežaset muitalusa jovkui.

Digitálalaš muitaleami bargobadjái sáhttet oassálastit 16-30-jahkásaš sámenuorat, geat barget ámmátdáiddolaš fasilitáhtorjoavkkuin. Digitálalaš máinnasteami vuohki doarju oassálastiid geavahit teknologiija iežaset muitalusaid ovdanbuktimis. Fasilitáhtorat fállet oassálastiide fáddávuođu, mii veahkeha sin álggahit muitalusa ráhkadeami. Oassálastit sáhttet ráhkadit muitalusa okto dahje smávva joavkkuin. Muitalusat vudjot mielladearvvasvuhtii ja miela buresveadjimii, iešsoardimiid eastadeapmái, psyhkalaš nanusvuhtii ja servoša doaibmamii sámenuoraid perspektiivvas.

Muitalusat báddejuvvojit, ja daid sáhttá juohkit eará olbmuide seminárain ja dáhpáhusain ja/dahje interneahtas. Dutkit geavahit muitalusaid dutkanmateriálan ovddidan dihtii áddejumi das, man láhkai mielladearvvasvuođa sáhttá ovddidit ja iešsoardimiid eastadit árktalaš guovllu eamiálbmogiidda gullevaš nuoraid gaskavuođas. Muitalusaid ráhkadeami lassin oassálastit gullet árktalaš ráđi ja dan suvdilis ovdáneami bargojoavkku barggus, iešsoardimiid eastadeamis ja dutkanetihkas.

Bargobáji ordne Suoma sámedikki nuoraidráđđi oktasašbarggus kanádalaš áššedovdijoavkkuin, sosiála- ja dearvvasvuođaministeriijain ja árktalaš ráđiin. Dat lea oassi árktalaš ráđi prošeavttas Circumpolar Resilience, Engagement and Action Through Story (CREATeS). Bargobáji bargangiella lea eaŋgalsgiella, muhto tulkon sámegielaide lea fállun.

Bargobádji lea árktalaš guovllu álbmotlaš bargobájiid ráiddu oassi. Sajosis, Anáris, lágiduvvo bargobádji 30.1.-1.2.2019, mii loahpaha ráiddu. Dasa sáhttet oassálastit árktalaš guovllu sierra eamiálbmogiid nuorat.

Lassidieđut:

Risten Mustonen, Nuoraidráđi ságajođiheaddji, risten.mustonen@samediggi.fi, 040 529 60 93

Kaisa Tapiola-Länsman, Nuoraidčálli Sámediggi, kaisa.tapiola-lansman@samediggi.fi, 050 382 5179

Digitálalaš muitaleami bargobádji:

Meri Larivaara, Ráđđádalli virgeolmmoš, Sosiála- ja dearvvasvuođaministeriija, meri.larivaara@stm.fi, 050 563 3634

Mearreáigásaš prošeaktabargi Dihtosis -sámeskuvlagalledeamit prošektii

Bargu álgá 1.10.2018 ja bistá 15.2.2019 rádjai. Prošeavttain dahkkojuvvo sámekultuvrra oahpisin skuvllain. Prošeavtta olis ráhkaduvvojit skuvlagalledemiid várás materiálat, ollašuhttojit skuvlagalledeamit sihke ovddiduvvo sámi álbmotbeaivi riikkadási temábeaivin Suoma skuvllain. Prošeaktabargi bargun lea koordineret, makkár dieđuid sámiid birra galggašii muitalit skuvllain, ovttasbarggus stivrenjoavkkuin, nuoraidčálliin ja Nuoraid Akatemiijain.

Barggu ceavzilis dikšuma veahkehit heivvolaš skuvlejupmi, sámekultuvrra dovdan, hárjánupmi viiddes materiálaid hálddašeamis sihke máhttu bargat iehčanasat ja ovttas eará doaibmiiguin. Prošeaktabargis eaktuduvvo sámegiela dáidu.

Prošeaktabargi bálkkámáksin mearrašuvvá Sámedikki bálkávuogádaga gáibádusdási V/II mielde (vuođđobálká 2 139,83 euro/mb). Vuođđobálkká lassin máksojuvvojit 24 %:a sámeguovllu lassi ja bargohárjánumi mielde ahkelasit.

Ohcamušaid mildosiiguin galgá doaimmahit sámedikki čállingoddái 3.8.2018 dmu 16.00 rádjai čujuhussii Sajos, 99870 Anár dahje info(at)samediggi.fi.

Lassidieđuid barggus addá nuoraidčálli Kaisa Tapiola-Länsman, kaisa.tapiola-lansman(at)samediggi.fi, 050 382 5179 ja nuoraidčálli ságajođiheaddji Risten Mustonen risten.mustonen(at)samediggi.fi, 040 529 6093. Sámedikki doibmii sáhttá oahpásmuvvat čujuhusas www.samediggi.fi.

Anáris 29.6.2018 Sámediggi

Mearreáigásaš prošeaktabargi De! -Sámegielat nuoraidkultuvrra kárten ja ovddideapmi prošektii

Bargu álgá 1.9.2018 ja bistá 31.8.2019 rádjai. Prošeaktabargi vástida prošeavtta ollašuhttimis ja raporteremis. Bargui gullá kártet sámegielat nuoraidkultuvrra dárbbu ja dálá lágideaddjiid, ovddidit doaimma mihttomearálažžan ja maiddái ordnet dan bissovaš doaibman. Sámedikki nuoraidráđđi lea ožžon prošektii ruhtadeami Davimus Lappi Leaderis.

Barggu ceavzilis dikšuma veahkehit heivvolaš skuvlejupmi, hárjánupmi prošeaktabarggus ja raporteremis, buorit diehtoteknihkalaš dáiddut sihke dáidu iešráđálaš bargamii. Prošeaktabargis eaktuduvvo sámegiela dáidu.

Prošeaktabargi bálkkámáksin mearrašuvvá Sámedikki bálkávuogádaga gáibádusdási V/II mielde (vuođđobálká 2 139,83 euro/mb). Vuođđobálkká lassin máksojuvvojit 24 %:a sámeguovllu lassi ja bargohárjánumi mielde ahkelasit.

Ohcamušaid mildosiiguin galgá doaimmahit sámedikki čállingoddái 3.8.2018 dmu 16.00 rádjai čujuhussii Sajos, 99870 Anár dahje info(at)samediggi.fi.

Lassidieđuid barggus addá nuoraidčálli Kaisa Tapiola-Länsman, kaisa.tapiola-lansman(at)samediggi.fi, 050 382 5179 ja nuoraidčálli ságajođiheaddji Risten Mustonen risten.mustonen(at)samediggi.fi, 040 529 6093. Sámedikki doibmii sáhttá oahpásmuvvat čujuhusas www.samediggi.fi.

Anáris 29.6.2018 Sámediggi