Säminuorâi taaiđâtábáhtusân almottâttâm aalgij

/in , , , /by

Almottâttâm Säminuorâi taaiđâtábáhtusân lii álgám, já tot tábáhtuvá neetist, Webropolist. Almottâttâm lii áávus 1.-15.3 Puohah, kiäh uásálisteh tábáhtusân, kalgeh tevdiđ almolii almottâttâmluámáttuv – meiddei sij, kiäh iä uásálist teatter- teikkâ muštâlemkištoid.

 

Kyehtipiäivásâš taaiđâtábáhtus uárnejuvvoo taan kiiđâ Anarist Sämikulttuurkuávdáš Saijoosist 10.-11.4 Tábáhtus riijkâvijđosâš teeman lii teatter já sämiteeman Mainâstem maaŋgah häämih. Tábáhtus lekkâmtilálâšvuotâ lii koskoho 10.4 tijme 18.00 äälgin.

 

Almottâttâmluámáttuvah láá tääbbin:

 

  • Luámáttâh, moin almottuvvojeh puoh tábáhtusân uásálisteeh sáátui já puurâdmij ornim tiet.

https://link.webropolsurveys.com/S/C67FF7C6292352B1

 

Toos lasseen teatter- já muštâlemkištoid uásálistee juávhuh kalgeh tevdiđ vala sierâ almottâttâmluámáttuv.

  • Luámáttâh, teatterteeman uásálistee juávhuh.

https://link.webropolsurveys.com/S/106AE0C82FC95EED

 

Teatterteemast lii eenâb tiätu TEATRIS -tábáhtus siijđoin:

https://nuorikulttuuri.fi/teatris/

 

3) Luámáttâh, mainâstem maaŋgah häämih -teeman uásálisteeh. https://link.webropolsurveys.com/S/D42DD998146685CB

 

Mainâstem maaŋgah häämih lii teeman uáli viijđes, já tast lii lope kevttiđ mielâkuvviittâs! Tehálumos lii, et muštâlem lii sämikielân já ton vuolgâsaje lii sämikulttuurist. Teeman hiäivulâš čájáttâs puáhtá leđe ovdâmerkkân mainâstem, tiivtâ luuhâm, stand-up -koomik, juáigus, leuʹdd teikkâ livđe – sänitaaiđâ, mon oovdânpyehtip läävdi alne!

 

Taaiđâtábáhtuspargen lii algâttâm 25.2 Anna Lumikivi, kiäin puáhtá leđe ohtâvuođâst puoh tábáhtusân kyeskee aašijn. Sämitigge uárnee taan-uv ive uásálistei sáátuid, táárbu mield ijâstâllâmsoojijd já tábáhtus váldupeeivi purâdem.

 

Tábáhtus postereh láá valmâštum, taid finnee Škovlim- já oppâmaterialtoimâttuvâst Sämitiggeest, Saijoosist. Taan ive poster kove lii máálám 13-ihásâš Aslak Pieski Kärigâsnjaargâ škoovlâst.

 

 

Lasetiäđuh:

Anna Lumikivi

010 839 3174, 040 684 1957

anna.lumikivi(at)samediggi.fi

Facebook: @saamelaisnuortentaidetapahtuma

Instagram: @samenuoraid_daiddadahpahus

Tábáhtus hashtagih: #sndd2019 / #sntt2019

Anna Lumikivi aalgij taaiđâtábáhtuspargen

/in , , , , /by

Säminuorâi taaiđâtábáhtus ornim vuálgá tääl tuođâst joton. Nuorttâkielâlâš musikkár Anna Lumikivi lii álgám taaiđâtábáhtuspargen škovlim- já oppâmaterialtoimâttuvvâst. Taaiđâtábáhtus uárnejuvvoo Anarist Saijoosist cuáŋuimáánu 10.-11. peeivijn, teeman lii teatter já muštâlem maaŋgah häämih.

Tábáhtusâst väljejuvvojeh säminuorâi ovdâsteijeeh riijkâ tääsi Teatris-tábáhtusân, mii uárnejuvvoo Jyväskyläst vyesimáánust. Toos lasseen palhâšuvvojeh pyeremuuh muštâleijeeh. Muštâlem häämih pyehtih leđe jieškote-uvlágán sänitaiđuu häämih sehe juáigus, livđe já le´udd.

Taaiđâtábáhtus lii Annan uápis jo ovdišist. – Mun lam párnážin uásálistám kiišton já ton maŋa lam kuohtii porgâm tábáhtus tuámárin já ohtii jođetteijen, muštâl Anna. – Lii hävski peessâđ orniđ Säminuorâi taaiđâtábáhtus, mast láá nuuvt kuhes ärbivyevih já mast lii lamaš nuuvt stuorrâ merhâšume sämikuávlu párnáid já nuoráid – nuuvtko meiddei munjin-uv.

Tábáhtusân almottem lekkâs forgâ Webropolist. Čuávu Sämitige nettisiijđoid, tábáhtus jieijâs Facebook-siijđoid já uásálist!

Riijkâ tääsi Teatris-tábáhtus njuolgâdusah láá tääbbin: https://nuorikulttuuri.fi/wp-content/uploads/sites/12/saannot-teatris-2019.pdf

 

Ohtâvuotâtiäđuh

anna.lumikivi(at)samediggi.fi

puh. 010 8393 174 da 040 684 1957

Facebook: @saamelaisnuortentaidetapahtuma

Instagram: @samenuoraid_daiddadahpahus

Vyehikorttâpakkâ- oppâmateriaal škovláid sämmilâšvuođâ kieđâvušmân

/in , /by

Dihtosis-haavâst lii pyevtittum materiaal škovlâkolliistâlmij várás sehe vyehikorttâpakkâ máttáátteijeid fáádá jiečânâs kieđâvuššâm várás uáppeiguin. Dihtosis-vyehikorttâpakkâ lii uáivildum máttááttâs toorjân ovdâmerkkân sämmilij aalmugpeeivi (6.2.) áávvudmân škoovlâin pirrâ Suomâ. Maht ličij skiärrurääđi sämimuusikist tâi uápásmem sämikielâláid tiervâttâssáid? Sierâlágánij já sierâkukkosij hárjuttâsâi vievâst tun puávtáh rähtiđ tuu mielâmield oppâtijme sämmilâšvuođâst.

Vyehikorttâpakkâ ana sistees info-oosijd sehe toimâlijd hárjuttâsâid já taid ovtâstitmáin tun puávtáh rähtiđ sierâlágán oppâtiijmijd. Hárjuttâsah heivejeh paješkoovlâi lasseen meid vyeliškoovlâ alemuu luokkaid sehe nube tääsi oppâlájádâssáid. Pakkâ lii juohhum kuulmâ teeman: Sämmiliih, Algâaalmug já Kulttuur. Jieškote-uv teema ana sistees 2 tiätukoortâ sehe 6 hárjuttâskoortâ.

Koortâin puáhtá rähtiđ vijđes ubâlâšvuođâ, teikâ taid puáhtá kieđâvuššâđ sierâ já vuáijuđ tiätuteeman. Koortáid láá merkkejum hárjuttâs uásálistei ucemusmeeri, tárbuliih piergâseh já äigi, mii suulân kolá hárjuttâssáid. Puoh hárjuttâsah tuáimih tagarin, mutâ uásán lii finnimnáál  lasemateriaal Nuorâi Akatemia nettisiijđoin. Hárjuttâsâid puáhtá heiviittiđ juávhu já kieđâvuššâm vuálásij aašij mield. Vyehikorttâpakkâ lii nuuvtá.

Paakâ puáhtá tiiláđ čujottâsâst: www.nuortenakatemia.fi/kouluvierailulomakkeet/ tâi haavâ proojeektpargest.

Tun puávtáh ovdil tiilám uápásmuđ paakâ siskáldâsân já lasemateriaaláid  tääbbin.

Dihtosis-haahâ lii Sämitige nuorâirääđi já Nuorâi Akatemia ohtsâšhaahâ, mon ulmen lii lasettiđ válduaalmugân kullee nuorâi tiäđuid sämmilijn já sämikulttuurist. Máttááttâs- já kulttuurministeriö ruttâd haavâ.

 

Lasetiäđuh:

Proojeektpargee, Sämitigge, Minna Lehtola 040 650 3620 minna.lehtola(a)samediggi.fi

Proojeektkoordinaattor, Nuorâi Akatemia, Ulla Saalasti 040 567 4203, ulla.saalasti(at)nuortenakatemia.fi

Škovlâkolliistâlmijd puáhtá tääl tiiláđ kiiđân 2019

/in , /by

Sämitige nuorâirääđi já Nuorâi Akatemia ohtsâšhaahâ Dihtosis lii škovlim ohtsis 12 škovlâkyessid, kiäid puáhtá tiiláđ škovláid muštâliđ ášálii tiäđu sämmilâšvuođâst. Kolliistâlmijd puáhtá tiiláđ 1.2.-31.5.2019 koskâsii ááigán.

Kolliistâlmijd puáhtá tiiláđ uáivikaavpugkuávlun, Tuurkun, Tamperen, Jyväskylän, Oulun, Ruávinjaargân sehe Suáđigilán já ton aldakuávlun. Tot, mon kuhháá kolliistâllâm pištá, meriduvvoo oppâlájádâs oppâtiijmij kukkoduv mield. Oppâtijmeest lii uánihis info-uási sehe toimâliih hárjuttâsah. Tiijmij ääigi uáppeeh peesih vuáijuđ fáádán oovtâst porgâmáin, savâstâlmáin já suogârdâlmáin. Kolliistâllâm lii oppâlájádâsân nuuvtá.

Jis tuu oppâlájádâs päikkikodde lii eres saajeest ko ovdil mainâšum soojijn tâi tuu uáppeeh láá eres luokkatääsist ko paješkoovlâst, te mij faallâp tijjân máttááttâs toorjân sämmilâšfáádáid siskeldeijee vyehikorttâpaakâ. Korttâpaakâst lii info-uási sehe 18 toimâlâš hárjuttâssâd, moi vievâst lii älkkee vuáijuđ fáádán. Vyehikorttâpaakâ puáhtá oppâlájádâsâin anneeđ ävkkin sämmilij aalmugpeeivi (6.2.) áávvudmist. Korttâpakkâ lii nuuvtá.

Dihtosis-haahâ lii Sämitige nuorâirääđi já Nuorâi Akatemia ohtsâšhaahâ, mon ulmen lii lasettiđ válduaalmugân kullee nuorâi tiäđulâšvuođâ sämmilijn já sämikulttuurist. Máttááttâs- já kulttuurministeriö ruttâd haavâ.

Tiiláá škovlâkolliistâllâm tâi vyehikorttâpaakâ tuu oppâlájádâsân: www.nuortenakatemia.fi/kouluvierailulomakkeet/

Lasetiäđuh:

Proojeektpargee, Sämitigge, Minna Lehtola 040 650 3620 minna.lehtola(a)samediggi.fi

Proojeektkoordinaattor, Nuorâi Akatemia, Ulla Saalasti 040 567 4203, ulla.saalasti(at)nuortenakatemia.fi

 

Vala lii asto uuccâđ škovlâkyessin

/in , /by

Sämitige nuorâirääđi já Nuorâi Akatemia Dihtosis-haavâst fäälih paješkovláid škovlâkolliistâlmijd, main lii sämmilâš teema. Tääl mij uuccâp movtijgis paijeel 18-ihásijd säminuorâid pirrâ Suomâ škovlâkyessin kolliistâlmáid, moh olášuttojeh kiiđâ 2019 ääigi. Uuccâmäigi lii vala taan oho.

Kuosij pargon lii jiešráđálávt kolliistâllâđ já muštâliđ sämikulttuurist paješkoovlâin. Tijme juáháš info-uásán sehe toimâlij pargoi porgâmân oovtâst nuorâiguin. Kolliistâlmij ulmen lii sirdeđ tiäđu sämmilijn já sämikulttuurist väldiaalmug nuoráid. Materiaaleh láá valmâšin, te kuosij pargon páácá kolliistâllâm škoovlâin. Kuossijd uárnejuvvoo škovlim Helsigist 14.1.2018, kost uápásmiteh sii. Škovliimân uásálistem lii iähtu kyessin toimâmân

Škovlâkolliistâlmeh olášuttojeh škovlâpeeivij ääigi 1.2.-31.5.2018. Kyesih iä taarbâš čonâdâttâđ leđe fáárust oles kiiđâ, peic kolliistâlmeh láá ton verd ko tiilámeh láá já kyesi jieijâs äigitaavlun heivee. Te tun puávtáh toohâđ kolliistâlmijd eres pargoi tâi uápui paaldâst. Jyehi kolliistâlmist máksoo 54€ stuárusâš pälkki sehe mätkikoloh kolliistâllâmsajan.

Mij uuccâp kuosijd ei. uáivikaavpugkuávlun, Jyväskylän, Tamperen, Oulun já Ruávinjaargân. Meid eres päikkikuudijn perustum säminuorah pyehtih uuccâđ fáárun.

Tooimât rijjâhámásii ucâmuš 30.11.2018 tme 16.00. räi čujottâsân: minna.lehtola(at)samediggi.fi

Lasetiäđuh:

Minna Lehtola
Proojeektpargee
tel: 010 839 3132 | +358 40 650 3620
minna.lehtola(a)samediggi.fi

https://www.samediggi.fi/dihtosis-haaha/?lang=an

Dihtosis-haahâ ocá škovlâkuosijd škovlâkolliistâlmáid moh älgih kiđđuv

/in , /by

Sämitige nuorâirääđi já Nuorten Akatemia Dihtosis-haavâst fäälih paješkovláid škovlâkolliistâlmijd, main lii sämmilâš teema. Tääl mij uuccâp movtijgis paijeel 18-ihásijd säminuorâid pirrâ Suomâ škovlâkyessin kolliistâlmáid, moh olášuttojeh kiiđâ 2019 ääigi.

Kuosij pargon lii jiešráđálávt kolliistâllâđ já muštâliđ sämikulttuurist paješkoovlâst. Kolliistâlmist lii sämikulttuur oovdânpyehtim já toimâliih pargopáájáh. Pargopáájái ulmen lii sirdeđ tiäđu sämmilijn já sämikulttuurist väldiaalmug nuoráid. Kolliistâllâm pištá táválávt 75- 90 minuttid, tađe mield mon kuheh oppâlájádâs tiijmeh láá. Kuosijd uuccâp ei. uáivikaavpugkuávlun, Tuurkun, Jyväskylän, Tamperen, Oulun já Ruávinjaargân. Škovlâkolliistâlmeh láá iänááš škovlâpeeivij ääigi 1.2.-31.5.2019.

Škovlâkolliistâlmijn mäksip 54€/kolliistâllâm sehe maađhijd kolliistâllâmpááikán. Škovlâkolliistâlmeh láá ton verd ko tiilámeh láá já kyesi jieijâs äigitaavlun heivee.

Škovlâkuossijd tuálloo Helsigist Nuorten Akatemia tiilijn škovlim vuossaargâ 14.1.2019. Škovliimân uásálistem lii iähtu kyessin toimâmân. Škovliimist ij finnii päälhi. Máhđuliih mätki- já ijâstâllâmkoloh máksojeh.

Mij vyerdip škovlâkuosijn sämikulttuur tubdâm, movtijgis mielâ škovlâkolliistâlmij tolâmân sehe šiev vuáruvaikuttâstááiđuid.

Tooimât rijjâhámásii ucâmuš 30.11.2018 tme 16.00. räi čujottâsân: minna.lehtola(at)samediggi.fi

Lasetiäđuh:
Minna Lehtola
Proojeektpargee
tel: 010 839 3132 | +358 40 650 3620
minna.lehtola(a)samediggi.fi

https://www.samediggi.fi/dihtosis-haaha/?lang=an

Kove: Satu Miettinen

Sämitigge almoot uuccâmnáál NUORÂIČÄLLEE VIRGESAJASŠVUOĐÂ

/in , /by

Sämitigge almoot uuccâmnáál NUORÂIČÄLLEE VIRGESAJASŠVUOĐ ááigán 1.12.2018–31.10.2019. Nuorâičällee váldupargon lii toimâđ nuorâirääđi oovdânpyehten já čällen. Lasseen čällee pargoid kuleh nuorâirääđi vuálásij haavâi koordinistem já stivrim.

Asâttâsvuáđustâslâš tohálâšvuođâvátámâššân lii virge vaattâm škovlim já lasseen váttoo sämikielâ táiđu (asâttâs 1727/95). Virgesajasâšvuođâ miänástuvvee tipšom išedeh hiäivulâš ollâškovlâtuđhos sehe šiev nuorâiaašij já haldâttâstooimâ tubdâm. Pälkki miärášuvá sämitige pálkkááttemvuáháduv vátávâšvuođâtääsi IV/IV-II mield (vuáđupälkki losijttáá 2491,54 – 2596,52 eurod/mp). Virgesajasâšvuođâ tevdimist lii kyevti mánuppaje keččâlemäigi.

Ucâmušâid lahtosijdiskuin kalga toimâttiđ sämitige čäällimkoodán 9.11.2018 tme 16.00 räi čujottâsân Sajos, 99870 Aanaar. Lasetiäđuid pargoost addel haldâttâhhovdâ Pia Ruotsala-Kangasniemi puh. 010 839 3106 teikâ nuorâičällee Kaisa Tapiola-Länsman puh. 010 839 3134. Sämitige tooimân puáhtá uápásmuđ nettičujottâsâst www.samediggi.fi

Anarist 15.10.2018 Sämitigge

Seminaar säminuorâi kuáhtám seksuaallii heemâdmist já -viehâvääldist, äigitavlu

/in , , /by

Seminaar ulmen lii, ete säminuorah peesih jyehiđ ferimijdis já jurduidis seksuaallii heemâdmist já viehâvääldist. Taažâ Sämitige nuorâipoolitlâš lävdikodde lii algâttâm savâstâllâm fáádást já tárguttâssân lii vijđediđ savâstâllâm oles sämienâmân. Lii tehálâš pyehtiđ fáádá uáinusân, tastko fáádást jaskodeh viehâ távjá. Seminaar viggá adeliđ pargoniävuid kuáhtáđ já tuárjuđ nuorâ, kote lii kuáhtám seksuaallii viehâvääldi, sehe kieđâvuššâđ jieijâs feeriimijd.

Äigi: vástuppeivi 5.10.2018 tme 9.00-15.30

Saje: Aanaar, Saijoos Parlamentsali Solju

Äigitavlu

9.00-9.10 Seminaar lekkâm, Risten Mustonen nuorâirääđi saavâjođetteijee

9.10-9.40 Seksi ij lah räjittem – rääjih láá Västideijee kriisâpargee Kati Puhakka, Raiskauskriisikeskus Tukinainen

9.40-10.10 Nuorâi feerim seksuaalviehâväldi  Seksuaalviehâväldipargo stivrejeijee Noora Wilhelmsson, Otava-haahâ, Tyttöjen Talo® Ruávinjargâ

10.10-10.40 Sämikielâliih já -kulttuurmiäldásiih palvâlusah Sämmilâš mättimkuávdáš ‐ psyykkisâš pyereestvaijeem já uáiváditteehuolâttâs, SÁNAG tooimâ oovdânpyehtim, Raghild Varsi Dahl Säminuorâi psykiatrisâš juávkku, proojeekthovdâ/seksolog Ingunn Eriksen AMATHEA-haahâ

10.40-11.00 Rape culture – mii já kiän čuolmâid tot lii? Nuorâ sämmilâš elleekoverähtee Sunna Nousuniemi

11.00-12.00 Säminuorâi paaneelsavâstâllâm

12.00-13.00 Peivimäälis, Saijoos raavâdviäsu Čaiju

13.00-14.00 Pargopáájáh:

Seksuaalviehâvääldi kuáhtám nuorâ kuáhtám Seksuaalviehâväldipargo stivrejeijee Noora Wilhelmsson, Otava-haahâ, Tyttöjen Talo® Ruávinjargâ Stivrejeijee Elina Kreus, Tyttöjen Talo® Ruávinjargâ

Pargopáájást uásálisteeh finnejeh kiärgusvuođâid seksuaalviehâvääldi kuáhtám nuorâ sensitiivlii kuáhtámân. Mij kieđâvuššâp meid seksuaalviehâvääldi väldimist savâstâlmân já tahheid, moh suojâleh nuorâid.

Aktivistee pargopáájá: Seksuaallii viehâvääldi kuáhtám nuorâi tuárjum sehe säminuorâi pyereestvaijeem toorjâtooimâi vuávám pajemáttáátteijee, psykolog Tomi Guttorm, Áámmátlâš máttáátteijeeollâškovlâ / Oamk 

Pargopáájást mij kieđâvuššâp ovdâmeerhâid, maid uásálisteeh pyehtiđ kyeđđiđ nomâtteemmin ohtsâš porgâmvuálášân (Huám! tiättur fáárun). Lasseen pargopáájást vuáváp ohtsâštoimâlávt toorjâtooimâid säminuorâi várás. Pargopáájá maŋa puáhtá meid savâstâllâđ priivaatlávt psykologáin suomâkielân teikâ orjâlâškielân.

Seksuaalšoddâdem merhâšume seksuaallii viehâvääldi estimist västideijee kriisâpargee Kati Puhakka Raiskauskriisikeskus Tukinainen.

Pargopáájást mij vuáijup seksuaalšoddâdem merhâšumán sehe smiettâp meid konkreetlijd vuovijd uásálistei perustume mield.

Vyevih sárnuškyettiđ rikosaašijn, seksuaalrikkoos tubdâm já iše uuccâm tehálâšvuotâ kuávluhovdâ Päivi Alanne-Kunnari já toimâstivrejeijee Katja Huotari Rikosuhripäivystys

Pargopáájást mij eellip čoođâ sierâlágán seksuaallii viehâvääldi haamijd ovdâmerkkâtábáhtusâi vievâst já suogârdâllâp oovtâst ei, ete maht puáhtá išediđ skippáár, kote lii karttâm seksuaalrikkoos uhren.

14.00-14.30    Kähvi fáállun

14.30-15.30    Pargopáájái čuákánkiäsu

Seminaar lii nuuvtá já uásálisteid fálloo peivimäälis já kähvi. Seminaar kielah láá sämikielâ já suomâkielâ. Tilálâšvuođâst lii tulkkum. Ohjelmnubástusah láá máhđuliih.

Lasetiäđuh já almottâtmeh 27.9.2018 räi:

Kaisa Tapiola-Länsman, kaisa.tapiola-lansman@samediggi.fi, 050 382 5179

Tiervâpuáttim digitaallii mainâstâllâm pargopááján 5.-7.10.2018 Anarân!

/in , , /by

Pargopáájást vuájuh nuorâi feerimijn já jurduin jiešsuurmij estimist já mielâ pyereestvajemist säminuorâi juávhust.

Pargopáájá lii uáivildum säminuoráid Suomâst, Ruotâst já Taažâst. Uásálisteeh pyehtih leđe 16 ‒ 30 -ihásiih. Pargopáájá uárnejuvvoo Sajosist, Anarist. Porgâm álgá vástuppeeivi 5.10. ehidist já pištá pasepeeivi eehidpeeivi räi. Uárnejeijeeh kuástideh mätki- já ijâstâllâmkoloid sehe purâdem.

Ulmen lii jyehiđ mainâstâllâm peht feerimijd já jurduid jiešsuurmij estimist já mielâ pyereestvaijeem tuárjumist säminuorâi siärváduvâin. Uásálisteeh uáppih, ete muštâlusâst ráhtoo digitaallâš maainâs anemáin ävkkin Adobe Final Cut Pro -ohjelm. Pargopáájá loopâst uásálisteest lii máhđulâšvuotâ jyehiđ suu mainâs juávkun.

Digitaallii mainâstâllâm pyehtih uásálistiđ 10‒15 säminuorâd, kiäh pargeh áámmáttáiđulâš fasilitaattorjuávhoin. Digitaallii mainâstâllâm vyehi tuárju uásálisteid kevttiđ teknologia jieijâs mainâsij muštâlmist. Fasilitaattoreh fäälih uásálisteid mainâsmateriaal, mii iššeed sii rähtiškyettiđ mainâs. Uásálisteeh pyehtih rähtiđ mainâs ohtuu teikâ uccâ juávhuin. Mainâseh vuájuh mielâtiervâsvuotân já mielâ pyereestvajemân, jiešsuurmij estimân, psyykkisii sävrivuotân já siärváduv tooimân säminuorâi uáinust.

Uásálisteid fálloo meid máhđulâšvuotâ jyehiđ suu maainâs uássin tutkâmuš já viestâdem arktâsii rääđi merideijeid. Mainâsij rähtim lasseen uásálisteeh kuleh arktâsii rääđi já ton pištee ovdánem pargojuávhu pargoost, jiešsuurmij estimist já tutkâmušetiikast.

Pargopáájá uárnee Suomâ sämitige nuorâirääđi oovtâstpargoost kanadalii äššitobdeejuávhoin, sosiaal- já tiervâsvuotâministeriöin já arktâsâš rađđijn. Tot lii uási arktâsii rääđi proojeekt Circumpolar Resilience, Engagement and Action Through Story (CREATeS).

Pargopáájá pargokielâ lii eŋgâlâskielâ, mutâ tulkkum sämikielân lii fáállun.

Pargopáájá lii uási arktâsii kuávlu aalmuglij pargopáájái rááiđu. Sajosist, Anarist, uárnejuvvoo 30.1.-1.2.2019 rááiđu lopâtteijee pargopáájá, moos puáhtá uásálistiđ arktâsii kuávlu jieškote-uv algâaalmugij nuorah.

Lasetiäđuh já almottâtmeh 30.9.2018 räi:

Kaisa Tapiola-Länsman, kaisa.tapiola-lansman@samediggi.fi, 050 382 5179

   

Škovlimpovdiittâs säminuoráid olmoošvuoigâdvuođâin

/in , , /by

Puáđi oppâđ olmoošvuoigâdvuođâin! Olmoošvuoigâdvuotâlito já Sämitige nuorâirääđi ornim škovliimist eellip čoođâ, ete moh láá olmoošvuoigâdvuođah já mii tain tahhoo. Mij kieđâvuššâp eromâšávt algâaalmugvuoigâdvuođâid já olmoošvuoigâdvuotâluávkkámijd, maid sämmiliih láá kuáhtám Suomâst. Mij suogârdep oovtâst vuovijd piäluštiđ já ovdediđ olmoošvuoigâdvuođâi olášume.

Äigi: lávurdâh 22.9.2018 tme 9.30-15.30

Saje: Oulu váldukirjerááju, Kaarlenväylä 3, Eennâmkoddenurâldâhviste (3. keerdi)

Vuáđusteijee äigitavlu:

9.15-9.30        Iiđeedkähvi

9.30-11.00      Olmoošvuoigâdvuođah: moh toh láá, mast toh puátih já mii tain tahhoo? Mij savâstâllâp olmoošvuoigâdvuotâvuáháduvvâst já ton tooimâst já vuáijup eromâšávt toos, ete maht olmoošvuoigâdvuođah vaikutteh keevâtlávt já uáinojeh jyehipiäiválii tooimâst. Matti Jutila, olmoošvuoigâdvuođâi äššitobdee

11.00-12.00    Peivimäälis

12.00-13.30    Olmoošvuoigâdvuođâi ovdedem vaikuttempargoin: Vaikuttem vuávám, ääigi miäruštâllâm já sierâlágán vyevih. Rähtip oovtâst vaikuttem vuávám uásálistei valjim fáádást. Heli Markkula, vaikuttempargo hovdâ

13.45-15.15    Vuoigâdvuođâi piäluštem: Main aašijn vaidâleh riehtituámustovlijd, mast kuoddâleh lavâlâšvuotâkoccei (om. ovdâskode riehtiäššialmai)? Maid lii pyeri väldiđ huámmášumán? Maggaar argumentaatiotorjuu puáhtá finniđ Euroop olmoošvuoigâdvuotâtuámustoovli vuáháduvâst? Heta Heiskanen, ALL-YOUTH STN

15.15-15.30    Lopâttem, macâttâs já jotkâpargo vuávám

Škovliittâs lii nuuvtá já uásálisteid fálloo peivimäälis.

Lasetiäđuh já almottâtmeh 19.9.2018 räi:

Kaisa Tapiola-Länsman, kaisa.tapiola-lansman@samediggi.fi, 050 382 5179