Škovlâkolliistâlmijd puáhtá tääl tiiláđ kiiđân 2019

Sämitige nuorâirääđiNuorâi Akatemia ohtsâšhaahâ Dihtosis lii škovlim ohtsis 12 škovlâkyessid, kiäid puáhtá tiiláđ škovláid muštâliđ ášálii tiäđu sämmilâšvuođâst. Kolliistâlmijd puáhtá tiiláđ 1.2.-31.5.2019 koskâsii ááigán.

Kolliistâlmijd puáhtá tiiláđ uáivikaavpugkuávlun, Tuurkun, Tamperen, Jyväskylän, Oulun, Ruávinjaargân sehe Suáđigilán já ton aldakuávlun. Tot, mon kuhháá kolliistâllâm pištá, meriduvvoo oppâlájádâs oppâtiijmij kukkoduv mield. Oppâtijmeest lii uánihis info-uási sehe toimâliih hárjuttâsah. Tiijmij ääigi uáppeeh peesih vuáijuđ fáádán oovtâst porgâmáin, savâstâlmáin já suogârdâlmáin. Kolliistâllâm lii oppâlájádâsân nuuvtá.

Jis tuu oppâlájádâs päikkikodde lii eres saajeest ko ovdil mainâšum soojijn tâi tuu uáppeeh láá eres luokkatääsist ko paješkoovlâst, te mij faallâp tijjân máttááttâs toorjân sämmilâšfáádáid siskeldeijee vyehikorttâpaakâ. Korttâpaakâst lii info-uási sehe 18 toimâlâš hárjuttâssâd, moi vievâst lii älkkee vuáijuđ fáádán. Vyehikorttâpaakâ puáhtá oppâlájádâsâin anneeđ ävkkin sämmilij aalmugpeeivi (6.2.) áávvudmist. Korttâpakkâ lii nuuvtá.

Dihtosis-haahâ lii Sämitige nuorâirääđi já Nuorâi Akatemia ohtsâšhaahâ, mon ulmen lii lasettiđ válduaalmugân kullee nuorâi tiäđulâšvuođâ sämmilijn já sämikulttuurist. Máttááttâs- já kulttuurministeriö ruttâd haavâ.

Tiiláá škovlâkolliistâllâm tâi vyehikorttâpaakâ tuu oppâlájádâsân: www.nuortenakatemia.fi/kouluvierailulomakkeet/

Lasetiäđuh:

Proojeektpargee, Sämitigge, Minna Lehtola 040 650 3620 minna.lehtola(a)samediggi.fi

Proojeektkoordinaattor, Nuorâi Akatemia, Ulla Saalasti 040 567 4203, ulla.saalasti(at)nuortenakatemia.fi

 

Vala lii asto uuccâđ škovlâkyessin

Sämitige nuorâirääđi já Nuorâi Akatemia Dihtosis-haavâst fäälih paješkovláid škovlâkolliistâlmijd, main lii sämmilâš teema. Tääl mij uuccâp movtijgis paijeel 18-ihásijd säminuorâid pirrâ Suomâ škovlâkyessin kolliistâlmáid, moh olášuttojeh kiiđâ 2019 ääigi. Uuccâmäigi lii vala taan oho.

Kuosij pargon lii jiešráđálávt kolliistâllâđ já muštâliđ sämikulttuurist paješkoovlâin. Tijme juáháš info-uásán sehe toimâlij pargoi porgâmân oovtâst nuorâiguin. Kolliistâlmij ulmen lii sirdeđ tiäđu sämmilijn já sämikulttuurist väldiaalmug nuoráid. Materiaaleh láá valmâšin, te kuosij pargon páácá kolliistâllâm škoovlâin. Kuossijd uárnejuvvoo škovlim Helsigist 14.1.2018, kost uápásmiteh sii. Škovliimân uásálistem lii iähtu kyessin toimâmân

Škovlâkolliistâlmeh olášuttojeh škovlâpeeivij ääigi 1.2.-31.5.2018. Kyesih iä taarbâš čonâdâttâđ leđe fáárust oles kiiđâ, peic kolliistâlmeh láá ton verd ko tiilámeh láá já kyesi jieijâs äigitaavlun heivee. Te tun puávtáh toohâđ kolliistâlmijd eres pargoi tâi uápui paaldâst. Jyehi kolliistâlmist máksoo 54€ stuárusâš pälkki sehe mätkikoloh kolliistâllâmsajan.

Mij uuccâp kuosijd ei. uáivikaavpugkuávlun, Jyväskylän, Tamperen, Oulun já Ruávinjaargân. Meid eres päikkikuudijn perustum säminuorah pyehtih uuccâđ fáárun.

Tooimât rijjâhámásii ucâmuš 30.11.2018 tme 16.00. räi čujottâsân: minna.lehtola(at)samediggi.fi

Lasetiäđuh:

Minna Lehtola
Proojeektpargee
tel: 010 839 3132 | +358 40 650 3620
minna.lehtola(a)samediggi.fi

https://www.samediggi.fi/dihtosis-haaha/?lang=an

Dihtosis-haahâ ocá škovlâkuosijd škovlâkolliistâlmáid moh älgih kiđđuv

Sämitige nuorâirääđi já Nuorten Akatemia Dihtosis-haavâst fäälih paješkovláid škovlâkolliistâlmijd, main lii sämmilâš teema. Tääl mij uuccâp movtijgis paijeel 18-ihásijd säminuorâid pirrâ Suomâ škovlâkyessin kolliistâlmáid, moh olášuttojeh kiiđâ 2019 ääigi.

Kuosij pargon lii jiešráđálávt kolliistâllâđ já muštâliđ sämikulttuurist paješkoovlâst. Kolliistâlmist lii sämikulttuur oovdânpyehtim já toimâliih pargopáájáh. Pargopáájái ulmen lii sirdeđ tiäđu sämmilijn já sämikulttuurist väldiaalmug nuoráid. Kolliistâllâm pištá táválávt 75- 90 minuttid, tađe mield mon kuheh oppâlájádâs tiijmeh láá. Kuosijd uuccâp ei. uáivikaavpugkuávlun, Tuurkun, Jyväskylän, Tamperen, Oulun já Ruávinjaargân. Škovlâkolliistâlmeh láá iänááš škovlâpeeivij ääigi 1.2.-31.5.2019.

Škovlâkolliistâlmijn mäksip 54€/kolliistâllâm sehe maađhijd kolliistâllâmpááikán. Škovlâkolliistâlmeh láá ton verd ko tiilámeh láá já kyesi jieijâs äigitaavlun heivee.

Škovlâkuossijd tuálloo Helsigist Nuorten Akatemia tiilijn škovlim vuossaargâ 14.1.2019. Škovliimân uásálistem lii iähtu kyessin toimâmân. Škovliimist ij finnii päälhi. Máhđuliih mätki- já ijâstâllâmkoloh máksojeh.

Mij vyerdip škovlâkuosijn sämikulttuur tubdâm, movtijgis mielâ škovlâkolliistâlmij tolâmân sehe šiev vuáruvaikuttâstááiđuid.

Tooimât rijjâhámásii ucâmuš 30.11.2018 tme 16.00. räi čujottâsân: minna.lehtola(at)samediggi.fi

Lasetiäđuh:
Minna Lehtola
Proojeektpargee
tel: 010 839 3132 | +358 40 650 3620
minna.lehtola(a)samediggi.fi

https://www.samediggi.fi/dihtosis-haaha/?lang=an

Kove: Satu Miettinen

Sämitigge almoot uuccâmnáál NUORÂIČÄLLEE VIRGESAJASŠVUOĐÂ

Sämitigge almoot uuccâmnáál NUORÂIČÄLLEE VIRGESAJASŠVUOĐ ááigán 1.12.2018–31.10.2019. Nuorâičällee váldupargon lii toimâđ nuorâirääđi oovdânpyehten já čällen. Lasseen čällee pargoid kuleh nuorâirääđi vuálásij haavâi koordinistem já stivrim.

Asâttâsvuáđustâslâš tohálâšvuođâvátámâššân lii virge vaattâm škovlim já lasseen váttoo sämikielâ táiđu (asâttâs 1727/95). Virgesajasâšvuođâ miänástuvvee tipšom išedeh hiäivulâš ollâškovlâtuđhos sehe šiev nuorâiaašij já haldâttâstooimâ tubdâm. Pälkki miärášuvá sämitige pálkkááttemvuáháduv vátávâšvuođâtääsi IV/IV-II mield (vuáđupälkki losijttáá 2491,54 – 2596,52 eurod/mp). Virgesajasâšvuođâ tevdimist lii kyevti mánuppaje keččâlemäigi.

Ucâmušâid lahtosijdiskuin kalga toimâttiđ sämitige čäällimkoodán 9.11.2018 tme 16.00 räi čujottâsân Sajos, 99870 Aanaar. Lasetiäđuid pargoost addel haldâttâhhovdâ Pia Ruotsala-Kangasniemi puh. 010 839 3106 teikâ nuorâičällee Kaisa Tapiola-Länsman puh. 010 839 3134. Sämitige tooimân puáhtá uápásmuđ nettičujottâsâst www.samediggi.fi

Anarist 15.10.2018 Sämitigge

Seminaar säminuorâi kuáhtám seksuaallii heemâdmist já -viehâvääldist, äigitavlu

Seminaar ulmen lii, ete säminuorah peesih jyehiđ ferimijdis já jurduidis seksuaallii heemâdmist já viehâvääldist. Taažâ Sämitige nuorâipoolitlâš lävdikodde lii algâttâm savâstâllâm fáádást já tárguttâssân lii vijđediđ savâstâllâm oles sämienâmân. Lii tehálâš pyehtiđ fáádá uáinusân, tastko fáádást jaskodeh viehâ távjá. Seminaar viggá adeliđ pargoniävuid kuáhtáđ já tuárjuđ nuorâ, kote lii kuáhtám seksuaallii viehâvääldi, sehe kieđâvuššâđ jieijâs feeriimijd.

Äigi: vástuppeivi 5.10.2018 tme 9.00-15.30

Saje: Aanaar, Saijoos Parlamentsali Solju

Äigitavlu

9.00-9.10 Seminaar lekkâm, Risten Mustonen nuorâirääđi saavâjođetteijee

9.10-9.40 Seksi ij lah räjittem – rääjih láá Västideijee kriisâpargee Kati Puhakka, Raiskauskriisikeskus Tukinainen

9.40-10.10 Nuorâi feerim seksuaalviehâväldi  Seksuaalviehâväldipargo stivrejeijee Noora Wilhelmsson, Otava-haahâ, Tyttöjen Talo® Ruávinjargâ

10.10-10.40 Sämikielâliih já -kulttuurmiäldásiih palvâlusah Sämmilâš mättimkuávdáš ‐ psyykkisâš pyereestvaijeem já uáiváditteehuolâttâs, SÁNAG tooimâ oovdânpyehtim, Raghild Varsi Dahl Säminuorâi psykiatrisâš juávkku, proojeekthovdâ/seksolog Ingunn Eriksen AMATHEA-haahâ

10.40-11.00 Rape culture – mii já kiän čuolmâid tot lii? Nuorâ sämmilâš elleekoverähtee Sunna Nousuniemi

11.00-12.00 Säminuorâi paaneelsavâstâllâm

12.00-13.00 Peivimäälis, Saijoos raavâdviäsu Čaiju

13.00-14.00 Pargopáájáh:

Seksuaalviehâvääldi kuáhtám nuorâ kuáhtám Seksuaalviehâväldipargo stivrejeijee Noora Wilhelmsson, Otava-haahâ, Tyttöjen Talo® Ruávinjargâ Stivrejeijee Elina Kreus, Tyttöjen Talo® Ruávinjargâ

Pargopáájást uásálisteeh finnejeh kiärgusvuođâid seksuaalviehâvääldi kuáhtám nuorâ sensitiivlii kuáhtámân. Mij kieđâvuššâp meid seksuaalviehâvääldi väldimist savâstâlmân já tahheid, moh suojâleh nuorâid.

Aktivistee pargopáájá: Seksuaallii viehâvääldi kuáhtám nuorâi tuárjum sehe säminuorâi pyereestvaijeem toorjâtooimâi vuávám pajemáttáátteijee, psykolog Tomi Guttorm, Áámmátlâš máttáátteijeeollâškovlâ / Oamk 

Pargopáájást mij kieđâvuššâp ovdâmeerhâid, maid uásálisteeh pyehtiđ kyeđđiđ nomâtteemmin ohtsâš porgâmvuálášân (Huám! tiättur fáárun). Lasseen pargopáájást vuáváp ohtsâštoimâlávt toorjâtooimâid säminuorâi várás. Pargopáájá maŋa puáhtá meid savâstâllâđ priivaatlávt psykologáin suomâkielân teikâ orjâlâškielân.

Seksuaalšoddâdem merhâšume seksuaallii viehâvääldi estimist västideijee kriisâpargee Kati Puhakka Raiskauskriisikeskus Tukinainen.

Pargopáájást mij vuáijup seksuaalšoddâdem merhâšumán sehe smiettâp meid konkreetlijd vuovijd uásálistei perustume mield.

Vyevih sárnuškyettiđ rikosaašijn, seksuaalrikkoos tubdâm já iše uuccâm tehálâšvuotâ kuávluhovdâ Päivi Alanne-Kunnari já toimâstivrejeijee Katja Huotari Rikosuhripäivystys

Pargopáájást mij eellip čoođâ sierâlágán seksuaallii viehâvääldi haamijd ovdâmerkkâtábáhtusâi vievâst já suogârdâllâp oovtâst ei, ete maht puáhtá išediđ skippáár, kote lii karttâm seksuaalrikkoos uhren.

14.00-14.30    Kähvi fáállun

14.30-15.30    Pargopáájái čuákánkiäsu

Seminaar lii nuuvtá já uásálisteid fálloo peivimäälis já kähvi. Seminaar kielah láá sämikielâ já suomâkielâ. Tilálâšvuođâst lii tulkkum. Ohjelmnubástusah láá máhđuliih.

Lasetiäđuh já almottâtmeh 27.9.2018 räi:

Kaisa Tapiola-Länsman, kaisa.tapiola-lansman@samediggi.fi, 050 382 5179

Tiervâpuáttim digitaallii mainâstâllâm pargopááján 5.-7.10.2018 Anarân!

Pargopáájást vuájuh nuorâi feerimijn já jurduin jiešsuurmij estimist já mielâ pyereestvajemist säminuorâi juávhust.

Pargopáájá lii uáivildum säminuoráid Suomâst, Ruotâst já Taažâst. Uásálisteeh pyehtih leđe 16 ‒ 30 -ihásiih. Pargopáájá uárnejuvvoo Sajosist, Anarist. Porgâm álgá vástuppeeivi 5.10. ehidist já pištá pasepeeivi eehidpeeivi räi. Uárnejeijeeh kuástideh mätki- já ijâstâllâmkoloid sehe purâdem.

Ulmen lii jyehiđ mainâstâllâm peht feerimijd já jurduid jiešsuurmij estimist já mielâ pyereestvaijeem tuárjumist säminuorâi siärváduvâin. Uásálisteeh uáppih, ete muštâlusâst ráhtoo digitaallâš maainâs anemáin ävkkin Adobe Final Cut Pro -ohjelm. Pargopáájá loopâst uásálisteest lii máhđulâšvuotâ jyehiđ suu mainâs juávkun.

Digitaallii mainâstâllâm pyehtih uásálistiđ 10‒15 säminuorâd, kiäh pargeh áámmáttáiđulâš fasilitaattorjuávhoin. Digitaallii mainâstâllâm vyehi tuárju uásálisteid kevttiđ teknologia jieijâs mainâsij muštâlmist. Fasilitaattoreh fäälih uásálisteid mainâsmateriaal, mii iššeed sii rähtiškyettiđ mainâs. Uásálisteeh pyehtih rähtiđ mainâs ohtuu teikâ uccâ juávhuin. Mainâseh vuájuh mielâtiervâsvuotân já mielâ pyereestvajemân, jiešsuurmij estimân, psyykkisii sävrivuotân já siärváduv tooimân säminuorâi uáinust.

Uásálisteid fálloo meid máhđulâšvuotâ jyehiđ suu maainâs uássin tutkâmuš já viestâdem arktâsii rääđi merideijeid. Mainâsij rähtim lasseen uásálisteeh kuleh arktâsii rääđi já ton pištee ovdánem pargojuávhu pargoost, jiešsuurmij estimist já tutkâmušetiikast.

Pargopáájá uárnee Suomâ sämitige nuorâirääđi oovtâstpargoost kanadalii äššitobdeejuávhoin, sosiaal- já tiervâsvuotâministeriöin já arktâsâš rađđijn. Tot lii uási arktâsii rääđi proojeekt Circumpolar Resilience, Engagement and Action Through Story (CREATeS).

Pargopáájá pargokielâ lii eŋgâlâskielâ, mutâ tulkkum sämikielân lii fáállun.

Pargopáájá lii uási arktâsii kuávlu aalmuglij pargopáájái rááiđu. Sajosist, Anarist, uárnejuvvoo 30.1.-1.2.2019 rááiđu lopâtteijee pargopáájá, moos puáhtá uásálistiđ arktâsii kuávlu jieškote-uv algâaalmugij nuorah.

Lasetiäđuh já almottâtmeh 30.9.2018 räi:

Kaisa Tapiola-Länsman, kaisa.tapiola-lansman@samediggi.fi, 050 382 5179

   

Škovlimpovdiittâs säminuoráid olmoošvuoigâdvuođâin

Puáđi oppâđ olmoošvuoigâdvuođâin! Olmoošvuoigâdvuotâlito já Sämitige nuorâirääđi ornim škovliimist eellip čoođâ, ete moh láá olmoošvuoigâdvuođah já mii tain tahhoo. Mij kieđâvuššâp eromâšávt algâaalmugvuoigâdvuođâid já olmoošvuoigâdvuotâluávkkámijd, maid sämmiliih láá kuáhtám Suomâst. Mij suogârdep oovtâst vuovijd piäluštiđ já ovdediđ olmoošvuoigâdvuođâi olášume.

Äigi: lávurdâh 22.9.2018 tme 9.30-15.30

Saje: Oulu váldukirjerááju, Kaarlenväylä 3, Eennâmkoddenurâldâhviste (3. keerdi)

Vuáđusteijee äigitavlu:

9.15-9.30        Iiđeedkähvi

9.30-11.00      Olmoošvuoigâdvuođah: moh toh láá, mast toh puátih já mii tain tahhoo? Mij savâstâllâp olmoošvuoigâdvuotâvuáháduvvâst já ton tooimâst já vuáijup eromâšávt toos, ete maht olmoošvuoigâdvuođah vaikutteh keevâtlávt já uáinojeh jyehipiäiválii tooimâst. Matti Jutila, olmoošvuoigâdvuođâi äššitobdee

11.00-12.00    Peivimäälis

12.00-13.30    Olmoošvuoigâdvuođâi ovdedem vaikuttempargoin: Vaikuttem vuávám, ääigi miäruštâllâm já sierâlágán vyevih. Rähtip oovtâst vaikuttem vuávám uásálistei valjim fáádást. Heli Markkula, vaikuttempargo hovdâ

13.45-15.15    Vuoigâdvuođâi piäluštem: Main aašijn vaidâleh riehtituámustovlijd, mast kuoddâleh lavâlâšvuotâkoccei (om. ovdâskode riehtiäššialmai)? Maid lii pyeri väldiđ huámmášumán? Maggaar argumentaatiotorjuu puáhtá finniđ Euroop olmoošvuoigâdvuotâtuámustoovli vuáháduvâst? Heta Heiskanen, ALL-YOUTH STN

15.15-15.30    Lopâttem, macâttâs já jotkâpargo vuávám

Škovliittâs lii nuuvtá já uásálisteid fálloo peivimäälis.

Lasetiäđuh já almottâtmeh 19.9.2018 räi:

Kaisa Tapiola-Länsman, kaisa.tapiola-lansman@samediggi.fi, 050 382 5179

 

  

Suomâ škovláid tiätu sämmilijn

Máttááttâs- já kulttuurministeriö lii mieđettâm Sämitige nuorâirääđi já Nuorâi Akatemia Dihtosis-haahân ruttâdem. Haavâ tárguttâs lii toohâđ sämikulttuur uápisin škoovlâin.

Sämmiliih láá Euroop union áinoo algâaalmug, mutâ Suomâ škoovlâin sämmilijn máttáátteh uáli uccáá já maŋgii oppâkiirjij tiätu lii kärži já puárásmum. Taan ääigi jo paijeel 70 % säminuorâin- já paarnijn ääsih sämmilij päikkikuávlu ulguubeln, kost sij pyehtih tiäđu uccáávuođâ tiet kuáhtáđ olgoštem já kivsedem. Meid säminuorah, kiäh láá aktiivliih somest, kuáhtájeh ennuv vajesaavâ. Ohtân suijân taas lii media rähtim oovtpiälálâš kove sämmilijn. Haavâ tehálumos ulmen lii lasettiđ väldiaalmug nuorâi tiäđuid sämmilijn.

Sämmilij aalmugpeivi lii kuovâmáánu 6. peeivi. 6.2.1917 tollui Taažâ Ruándimist vuossâmuš tave-eennâmlâš sämičuákkim, mii algâttij väldikuudij raajijd rastaldittee ohtsâšpargo sämmilij kooskâst. Sämmilij aalmugpeivi ávuduvvoo jyehi ive sämieennâm jieškote-uv kuávlust já Suomâst ovdâmerkkân sämikuávlu škoovlâin lii talle juhlepeivi. Haavâ ohtân ulmen lii rähtiđ sämmilij aalmugpeeivist väldikodálâš teemapeivi Suomâ škoovlâin. Teemapeeivi lasseen kiđđuv uárnejuvvoo škoovlâin pargopáájáid, maid tuálih škuávlejum säminuorah.

Haavâ Sämitige pargen lii väljejum kulttuurpyevtittem (AMK) uáppee anarâš Minna Lehtola. Minna pargon lii oovtâstpargoost säminuorâiguin nuurrâđ tiäđu tast, ete maid sämmilijn kolgâččij muštâliđ syemmilâš párnáid já nuoráid. Nuorâi Akatemiast lii kuhes hárjánem sierâlágán haavâi já pargopaajij orniimist já sij västideh haavâst tast, ete maht kalga oovdânpyehtiđ tiäđu párnáid já nuorâid tienuuvt, ete sij iberdeh tom já tot kiäsut sii.

 

Lasetiäđuh:

Kaisa Tapiola-Länsman, Sämitige nuorâičällee, kaisa.tapiola-lansman@samediggi.fi, 050 382 5179

Hilla Aaltio, Proojeektkoordinaattor, Nuorâi Akatemia, hilla.aaltio@nuortenakatemia.fi, 045 260 8801

Seminaar säminuorâi kuáhtám seksuaallii heemâdmist já -viehâvääldist sehe digitaallii mainâstâllâm pargopáájá jiešsuurmij estimân

Sämitige nuorâirääđi uárnee roovvâdmáánu 5. peeivi seminaar säminuorâi kuáhtám seksuaallii heemâdmist já -viehâvääldist sehe säminuoráid uáivildum digitaallii mainâstâllâm pargopáájá roovvâdmáánu 5.-7. peeivi oovtâstpargoost eres tuáimeiguin Anarist.

Seminaar säminuorâi kuáhtám seksuaallii heemâdmist já -viehâvääldist 5.10.2018

Seminaarist suogârdeh, ete maht tähiduvvoo sämipárnáid já -nuoráid torvolâš šoddâmpiirâs, mii lii seksuaallâš hemâdem já -viehâväldi, maid puáhtá porgâđ tom estim várás sehe maht kalga toimâđ, jis jieš kuáhtáá seksuaallii hemâdem teikâ -viehâvääldi. Seminaarist láá áámmátulmui sahâvuáruh, säminuorâi jieijâs feerimeh sehe pargopáájáh. Seminaar lii puohháid ávus já nuuvtá já tot uárnejuvvoo Sämikulttuurkuávdáš Sajosist Anarist.

Nuorâirääđi ive 2018 teeman lii pyehtiđ uáinusân säminuorâi kuáhtám seksuaallii hemâdem já -viehâvääldi já uuccâđ toos tarvanemvuovijd. Taažâ Sämitige nuorâipoolitlâš lävdikodde (SáNuL) lii puáhtám oovdân, ete säminisoneh, -almaah já -párnááh kuáhtájeh maŋgii seksuaallii hemâdem já SáNuL uáiná, ete äšši lii ohtsâškodálâš čuolmâ, moos oles ohtsâškodde kalga tarvaniđ.

Digitaallii mainâstâllâm pargopáájá 5.-7.10.2018

Pargopáájá ulmen lii jyehiđ mainâstâllâm peht feerimijd já jurduid jiešsuurmij estimist já mielâ pyereestvaijeem tuárjumist säminuorâi siärváduvâin. Uásálisteeh uáppih, ete maht muštâlusâst ráhtoo digitaallâš maainâs anemáin ävkkin Adobe Final Cut Pro -ohjelm. Pargopáájá loopâst uásálisteeh jyehih sii mainâsijd juávkun.

Digitaallii mainâstâllâm pargopááján pyehtih uásálistiđ 16-30-ihásiih säminuorah, kiäh pargeh áámmáttáiđulâš fasilitaattorjuávhoin. Digitaallii mainâstâllâm vyehi iššeed uásálisteid kevttiđ teknologia jieijâs mainâsij muštâlmist. Fasilitaattoreh fäälih uásálisteid materiaal, mii iššeed sii rähtiškyettiđ mainâs. Uásálisteeh pyehtih rähtiđ mainâs ohtuu teikâ uccâ juávhuin. Mainâseh vuájuh mielâtiervâsvuotân já mielâ pyereestvajemân, jiešsuurmij estimân, psyykkisii sävrivuotân já siärváduv tooimân säminuorâi uáinust.

Mainâseh vyerkkejuvvojeh, já taid puáhtá jyehiđ eres kuldâleijeid seminaarijn já tábáhtusâin já/teikâ internetist. Totkeeh kevttih mainâsijd tutkâmamnâstâhhân vâi ovdedeh ibárdâs tast, ete maht puáhtá ovdediđ mielâtiervâsvuođâ já estiđ jiešsuurmijd arktâsii kuávlu algâaalmugáid kullee nuorâi juávhust. Mainâsij rähtim lasseen uásálisteeh kuleh arktâsii rääđi já ton pištee ovdánem pargojuávhu pargoost, jiešsuurmij estimist já tutkâmetiikast.

Pargopáájá uárnee Suomâ Sämitige nuorâirääđi oovtâstpargoost kanadalii äššitobdeejuávhoin, sosiaal- já tiervâsvuotâministeriöin já arktâsâš rađđijn. Tot lii uási arktâsii rääđi proojeekt Circumpolar Resilience, Engagement and Action Through Story (CREATeS). Pargopáájá pargokielâ lii eŋgâlâskielâ, mutâ tulkkum sämikielân lii fáállun.

Pargopáájá lii uási arktâsii kuávlu aalmuglij pargopáájái rááiđu. Sajosist, Anarist, uárnejuvvoo 30.1.-1.2.2019 rááiđu lopâtteijee pargopáájá, moos puáhtá uásálistiđ arktâsii kuávlu jieškote-uv algâaalmugij nuorah.

 

Lasetiäđuh:

Risten Mustonen, Nuorâirääđi saavâjođetteijee, risten.mustonen@samediggi.fi, 040 529 60 93

Kaisa Tapiola-Länsman, Nuorâičällee Sämitigge, kaisa.tapiola-lansman@samediggi.fi, 050 382 5179

Digitaallii mainâstâllâm pargopáájá:

Meri Larivaara, Ráđádâllee virgeolmooš, Sosiaal- já tiervâsvuotâministeriö, meri.larivaara@stm.fi, 050 563 3634

Meriáigásâš proojeektpargee Dihtosis -sämiškovlâkolliistâlmeh haahân

Pargo álgá 1.10.2018 já pištá 15.2.2019 räi. Haavâ ulmen lii toohâđ sämikulttuur uápisin škoovlâin. Haavâst ráhtojeh škovlâkolliistâlmij várás materiaaleh, kolliistâleh škoovlâin sehe tahhoo sämmilij aalmugpeivi uápisin aalmuglâš teemapeivin Suomâ škoovlâin. Proojeektpargee pargon lii koordinistiđ, ete maggaar tiäđu sämmilijn kolgâččij muštâliđ škoovlâin, oovtâstpargoost stivrimjuávhoin, nuorâičällein já Nuorten Akatemiain.

Hiäivulâš škovlim, sämikulttuur tubdâm, hárjánem vijđes amnâsij haaldâšmist sehe nahcâ jiečânâs porgâmân já oovtâstpargon eres tuáimeiguin išedeh pargo miänástuvvee hoittám. Proojeektpargest váttoo sämikielâ táiđu.

Proojeektpargee pälkki meriduvvoo Sämitige pálkkááttemvuáháduv vátávâšvuotâtääsi V/II mield (vuáđupälkki 2 139,83 eurod/mp). Vuáđupäälhi lasseen máksojeh 24 % sämikuávlu lase já pargohárjánem mield miärášuvvee hárjánemlaseh.

Ucâmušâid lahtosijdiskuin kalga toimâttiđ sämitige čäällimkoodán 3.8.2018 tme 16.00 räi čujottâsân Sajos, 99870 Inari teikâ info(at)samediggi.fi.

Lasetiäđuid pargoost addel nuorâičällee Kaisa Tapiola-Länsman, kaisa.tapiola-lansman(at)samediggi.fi, 050 382 5179 já nuorâirääđi saavâjođetteijee Risten Mustonen risten.mustonen(at)samediggi.fi, 040 529 6093. Sämitige tooimân puáhtá uápásmuđ čujottâsâst www.samediggi.fi.

Anarist 29.6.2018 Sämitigge