Sämitige kulttuurtorjui uuccâm 2024

/in , /by

Sämitigge almoot uuccâmnáál Máttááttâs- já kulttuurministeriö (Säämi kulttuurmeriruttâ) torjuid, moh mieđettuvvojeh sämikielâlâš kulttuur oovdedmân já sämiseervij toimâmân ihán 2024 čujottum meriruuđâst.

Toorjâucâmušâid kalga čujottiđ Sämitiigán majemustáá 31. roovvâdmáánu 2023 tme 16.15 räi čujottâssáin: info@samediggi.fi teikâ Sämitigge, Sajos, 99870 Aanaar. Uuccâmluámáttuvâid já lasetiäđuid uážžu kulttuurčällest puh. 010 839 3103 já šleđgâpoostâ pehti kulttuuri@samediggi.fi

Šleđgâlâš uuccâmluámáttuvah láá Sämitige internetsiijđoin čujottâsâst www.samediggi.fi. Toorjâucâmušâid puáhtá toimâttiđ persovnlávt tâi äššialmaa pehti, vuolgâttiđ šleđgâpoostâ teikâ poostâ pehti. Toorjâucâmušâi vuolgâttem tábáhtuvá vuolgâtteijee ovdâsvástádâssáin.

Šleđgâlâš uuccâmluámáttuvah

Sierânâstorjui iävtuh já raijiittâsah (PDF)

Pargoišeruttâ | Uuccâmluámáttuv tevdimravvuuh (PDF)

Seervi toimâtoorjâ / proojeekttoorjâ | Uuccâmluámáttuv tevdimravvuuh (PDF)

Proojeekttoorjâ | Uuccâmluámáttuv tevdimravvuuh (PDF)

Tiličielgiittâs | Tiličielgiittâs ravvuuh (PDF)

Njuolgimvátámâščujottâs (PDF)

Kove: Ville Fofonoff

Sämitigge uásálistij Venetsia arkkitehtuurbiennaal lekkâmtilálâšvuotân

/in , /by

Sämitigge uásálistij Venetsia arkkitehtuurbiennaal lekkâmtilálâšvuotân heltuorâstuv 18.5.  Venetsia arkkitehtuurbiennaalist lii mieldi sämmilâš arkkiteht já taaidâr Joar Nango Romssaast, Taažâ pele Säämist.  Nango Girjegumpi-projektist piäsá navdâšiđ skammâmáánu räi Tave-enâmij paviljoŋgist Venetsiast.

Kove: Taažâ Sämitige olesčuákkim saavâjođetteijee Tom Sottinen (čižetpeln), Sämirääđi saavâjođetteijee Áslat Holmberg, arkkiteht já taaidâr Joar Nango, já Suomâ Sämitige kulttuurlävdikode saavâjođetteijee Pirita Näkkäläjärvi Girjegumpist Venetsia arkkitehtuurbiennaalist 2023. Kove:  James Taylor-Foster.

Joar Nango lii čuággám paijeel vittânubálov ive ääigi kirjerááju algâaalmugij arkkitehtuurâst, designist, algâaalmugij ärbivuáválâš tiäđust, aktivismist já dekolonisaatiost.  Nurâlduvvâst lii tääl paijeel 500 almostitmid.

Girjegumpi puátá tavesämikielâ saanijn ‘girji’ ađai kirje já ‘gumpi’ ađai uccâ vávnu mon keessiđ moottorkiälhá maajeeld, mon puásui-ulmuuh kevttih pargostis.  Sänileikkâ čuujoot kirjeráájun já arkkâdâhân sehe viäsun, kost kirjerááju já arkkâduv siäiluttuvvoo.

Girjegumpi pirrâsân lii rahtum oles algâaalmugtiätukuávdáš, mast lii sämitaiđuu já tyeje (ärbivuáválâš kietâpargo), materiaaleh, design-detaljid, minielleekoveteatter sehe jieškote-uvlágán soojijd luhâmân já čokkânmân.

– Girjegumpi lii äigikyevdilis savâstâllâmlehâstâh algâaalmugij já säämi arkkitehtuurâst.  Taat lii uáinu, mii váilu savâstâlmist aainâs-uv tääbbin Suomâ peln.  Siämmást Girjegumpi lii peliväldim algâaalmugij rievtij peeleest pirrâ maailm.  Girjegumpi puáhtá uáinusân tom, ete rahtum pirrâs levânem ain já ain vijđásuubon ij táválávt vääldi huámmášumán algâaalmugij eellim- já jurdâččemvuovijd, iätá Suomâ Sämitige kulttuurlävdikode saavâjođetteijee Pirita Näkkäläjärvi, kote ovdâstij Suomâ Sämitige biennaal lekkâmtilálâšvuođâst.

Arkiteakta ja dáiddár Joar Nango (gasku badjin) joavkkuinis. Govas maiddái Suoma Sámedikki kulturlávdegotti ságadoalli Pirita Näkkäläjärvi (badjin olgeš bealde) ja su bálddas gurut bealde Norgga Sámedikki dievasčoahkkinjođiheaddji Tom Sottinen ja Sámiráđi ságadoalli Áslat Holmberg. Govva: Laurian Ghinițoiu (2023). CC BY-SA 4.0.

Arkkiteht já taaidâr Joar Nango (kuáv. paij.) juávhuinis. Kooveest meiddei Suomâ Sämitige kulttuurlävdikode saavâjođetteijee Pirita Näkkäläjärvi (kuáv. uálgispeln) já suu paaldâst čižetpeln Taažâ Sämitige olesčuákkim saavâjođetteijee Tom Sottinen já Sämirääđi saavâjođetteijee Áslat Holmberg. Kove: Laurian Ghinițoiu (2023). CC BY-SA 4.0.

Ovdâl Venetsia biennaal Girjegumpi lâi jottáám miätá maailm ive 2018 rääjist.  Ohtâ versio tast lii lamaš uáinimnáál tááláštaiđuu museo Kiasmast Helsigist.  Ko Girjegumpi ij jođe, te tom päikki lii Säämi taaiđâkuávdáást (Sámi Dáiddaguovddáš) Kárášjuuvâst, Taažâ peln.

Venetsia arkkitehtuurbiennaalân ceggejum Girjegumpi lii viijđes oovtâstpargoproojeekt.  Tast láá mieldi eereeb iärrás čuávuvááh taidâreh, arkkitehteh, totkeeh já eres uásipeleh.:  Havard Arnhoff, Ken Are Bongo, Petter Bratland, Stefano Crosera + Margherita Pasqualato (Cantiere Daniele Manin), Mathias Danbolt, Ole-Henrik Einejord, Astrid Fadnes, Jenni Hakovirta, Eirin Hammari, Elin Haugdal, Petri Henriksson, Tone Huse, Robert Julian Hvistendahl, Iver Jaks + Jon Ole Andersen, Anne Kare Kemi, Annik Kristiansen Hagen, maka design, Grete Johanna Minde, Karen Inger Anne Nango, Nils John Nango, Anne Henriette Nilut, Ole Thomas Nilut, Raisa Porsanger, Tobias Aputsiaq Prytz, Anders Rimpi, Katrine Rugeldal, Wimme Saari, Säämi arkkitehtyyrsänikirjepargojuávkku, Arne-Terje Sather, Katarina Spik Skum, Mary Ailonieida Somban Mari, Četil Somby, Anders Sunna, Anna-Stina Svakko, Eystein Talleraas, Petter Tjikkom, Magnus Antaris Tuolja, Ájtte-museo, Arctic Arts Festival – Festspillene i Nord-Norge -festivaal, Sámi Dáiddaguovddaš (SDG) ađai säämi taaiđâkuávdáš, RDM – Sámiid Vuorka-Davvirat -museo já UiT – Taažâ arktisâš ollâopâttâh.  

Tave-enâmij paviljoŋg omâsteh oovtâst Ruotâ, Suomâ já Taažâ.  Taan tove válduovdâsvástádâs tave-enâmij čáitálduv orniimist lii ArkDesist ađai Ruotâ arkkitehtuur- já designkuávdáást.  Kuraattorin toimâv Carlos Minguez Carrasco já James Taylor-Foster, já projekthovdân Luba Kuzovnikova.  Käävcinubálovváád almugijkoskâsâš arkkitehtuurčáitáldâh La Biennale di Venezia lii áávus 20.5.–26.11.2023 Venetsiast, Italiast.  

Lasetiäđuh:

Pirita Näkkäläjärvi
Kulttuurlävdikode saavâjođetteijee
040 3577 006
pirita.nakkalajarvi@gmail.com

Kulttuurpalhâšuumij jyehimtilálâšvuođah 25.3. Hettaast já 31.3. Anarist

/in , /by

Sämitige kulttuurlävdikodde juovij ive 2023 kulttuurpalhâšume Anja Kaarretân, Marja-Liisa Laitin já Marja Näkkälän. Kulttuurpalhâšume mieđettuvvoo ucâmušttáá já ton ulmen lii palhâšiđ kulttuur tahhee tâi taaiđâr tubdâstâssân merhâšittee pargoost sämmilii kulttuureellim pyerrin.

Marja Näkkälä kulttuurpalhâšume jyehimtilálâšvuotâ tuálloo lávurduv njuhčâmáánu 25. peeivi 2023 tme 13–15 Tuodâr-Laapi luándukuávdáš Hettaast.

Marja Näkkälä (1952) lii meddâl puásuipaimânperrust Näkkäl siijdâst, Iänuduvâst. Tääl sun lii iäláttuvâst. Tyeji lii Marja eellimvyehi, mii uáinoo suu áárvuin já eellimhäämist. Sun kieđâvuš poccust finnejum amnâsijd tuojijnis. Iänááš Marja kiävttá timmâ amnâsijd. Marja kuáru sehe almai já nisonij gáktijd já sun lii meid eromâš čepis kođđee. Suu ivnáás säämi ulloliijneh láá muččâdeh já čeepiht tuoijum. Sun lii meid čeppi vuoddui tuáijár.

Anja Kaarret já Marja-Liisa Laiti kulttuurpalhâšume jyehimtilálâšvuotâ tuálloo vástuppeeivi njuhčâmáánu 31. peeivi 2023 tme 17–19 Säämi kulttuurkuávdáš Sajosist, Anarist.

Anja Kaarret (1960) lii meddâl Aanaar Pärttihist já lii porgâm eellimpargos anarâškielâlâš toimâtteijen. Sun lii porgâm toimâtteijen Yle sämikielâlii toimâttuvâst ive 1985 rääjist, ađai paijeel 35 ihheed. Anja lii toimâttâm eereeb iärrás Anarâš saavah -peiviohjelm sehe anarâškielâlijd párnáiohjelmijd, tv-uđđâsijd, nettiuđđâsijd já sosiaallii media materiaalijd. Sun lii toimâtteijee, kote oovded ohtânmaanoost jieijâs siskáldâsâid, ige kuássin eeđâ ij uđđâ ideaid.

Marja-Liisa Laiti (1952) lii meddâl tyejiperrust Aanaarjuv Mihkku -pääihist, Ucjuuvâst. Sun paasij iäláttâhân Säämi máttááttâskuávdáást já lii porgâm eellimpargos tyejimáttáátteijen. Marja-Liisa oopâi jo pärnin tuoijuđ vanhimij já huolhij mield maaŋgâpiälásávt sierâ amnâsijn tuojijd. Sun lii meid iäljáris kuálásteijee Aanaarjuuvâst tâi riävtui lâi talle, ko vala uážui kuálástiđ.

Ohjelmist ei. muusik, nuuvtá peessâm.

Lasetiäđuh:

Riitta Orti-Berg
Kulttuurčällee
puh. 010-839 3103
riitta.orti-berg(at)samediggi.fi

Kulttuurlävdikodde juovij ive 2023 kulttuurtorjuid

/in , /by

Sämitige kulttuurlävdikodde juovij kulttuurlävdikode čuákkimist 16.-17.2.2023 máttááttâs- já kulttuurministeriö mieđettem staatâtorjuu ihán 2023 ohtsis 236 000 eurod sämikielâlii kulttuur oovdedmân, tave-eennâmlij sämiseervij tuárjumân já sämikirkkotuuvij paijeentolâmân.

Sopâmušah/miärádâsah vuolgâttuvvojeh šleđgâlávt já vuáláčälimist kiävttoo noonâ tubdâttâttâm.

Torjuuh mieđettuvvojii čuávuvávt: Kulttuurmeriruttâ 2023

Kulttuurlävdikodde juovij ive 2023 kulttuurpalhâšume Anja Kaarretân, Marja-Liisa Laitin já Marja Näkkälän. Kulttuurpalhâšume mieđettuvvoo ucâmušttáá já ton ulmen lii palhâšiđ kulttuur tahhee tâi taaiđâr tubdâstâssân merhâšittee pargoost sämmilii kulttuureellim pyerrin. Kulttuurpalhâšuumij jyehimtilálâšvuođah 25.3. Hettaast já 31.3. Anarist.

Lasetiäđuh

Kulttuurčällee Riitta Orti-Berg 010-839 3103, riitta.orti-berg(at)samediggi.fi

Kove: Riitta Orti-Berg

Sämitigge lii finnim pajedem ive 2023 kulttuurmeriruutân

/in , /by

Máttááttâs- já kulttuurministeriö lii mieđettâm sämikielâlii kulttuur oovdedmân, Tave-eennâmlij sämiseervij tuárjumân já Ucjuv Sämikirkkotuuvij paijeentolâmân ohtsis 236 000 eurod. Pajedem ovdebij iivij háárán lii 57 000 eurod. 

– Mij lep maaŋgâi iivij oovtâst taistâlâm kulttuurmeriruuđâ pajedem peeleest. Mun lam kulttuurpolitiikist västideijen tuđâvâš toos, ete mij viijmâg finnip ááigán pajedem kuhes pargo puáđusin, iätá Sämitige saavâjođetteijee Tuomas Aslak Juuso. 

Sämitigge almottij ive 2023 kulttuurmeriruuđâ uuccâmnáál roovvâdmáánust 2022. Ucâmušâid koolgâi toimâttiđ roovvâdmáánu loopâ räi. Kulttuurlävdikodde čokkân 16.-17.2.2023 meridiđ meriruuđâ jyehimist. Miärádâsâin almotteh kuovâmáánu loopâ räi. 

– Sämisiärvádâh lii kuhháá vuárdám, ete mij finnip lase resursijd sämikielâlii kulttuurpaargon já taaiđâelimân. Kulttuurmeriruuđâ paajeedmist lii stuorrâ merhâšume Suomâ sämikielâlii kulttuurelimân jyehi kuulmâ sämikielâst, illood kulttuurlävdikode saavâjođetteijee Pirita Näkkäläjärvi. 

Sämitige valjâpaje ulmen lii lamaš kulttuurmeriruuđâ uuccâmproosees šleđgâháámán pieijâm. Proosees lii ovdánâm jo nuuvt kuhás, ete taan ive sopâmušah vuáláčállojeh šleđgâlávt. Čuávuvâš kulttuurmeriruuđâ uuccâm já tiličielgiittâsah olášuttojeh šleđgâhäämist. 

– Šleđgâlijn vuáláčälimijn mij kevttip noonâ tubdâttâttâm, mii täähid proosees torvolâšvuođâ. Ulmen lii išediđ kulttuurmeriruuđâ occeid já toohâđ oles proosees njyebžilubbon. Taat lii lamaš pargo vyelni kuhháá já mun lam ilolâš, ete mij lep tääl peessâm taan tilán, iätá Sämitige kulttuurčällee Riitta Orti-Berg. 

Lasetiäđuh: 

Tuomas Aslak Juuso
Saavâjođetteijee
040 687 3394
tuomas.juuso@samediggi.fi 

Pirita Näkkäläjärvi 
Kulttuurlävdikode saavâjođetteijee 
040 357 7006 
pirita.nakkalajarvi@gmail.com 

Riitta Orti-Berg 
Kulttuurčällee 
010 839 3103 / 040 840 0383 
riitta.orti-berg@samediggi.fi 

Sämikulttuurkuávdái tooimâ kalga turviđ

/in , , /by

Sämitigge kiäsá máttááttâs- já kulttuurministeriön oovtviärdásii já juvsâttettee sämikulttuur ovdedem keežild. Sämisiärváduv pyereestvaijeem tááhust eellimtehálij kulttuurkuávdái tooimâ ruttâdem kalga turviđ, vâi sämmiliih kulttuurpalvâlusah liččii eellimvuáimáliih já puohâi juksâmnáál.

Párnáikulttuurkuávdáš Mánnu uásálist sämitábáhtusâi orniimân pyevtitmáin ohjelmsiskáldâsâid párnáid já nuoráid. Kove: Petra Magga-Vars.

Kuávdáin, moh tuáimih Sämitige vuálásâžžân, lii stuorrâ merhâšume ellee sämikulttuur já sämisiärváduv pyereestvaijeem oovdedmist. Elleekovekuávdáš Skábma, párnáikulttuurkuávdáš Mánnu já Säämi muusikkuávdáš láá sehe tuárjum sämmilij kulttuuridentiteet já lasettâm sämmilii taiđuu oinum. Tai tooimâst lii lamaš stuorrâ merhâšume eromâšávt sämipárnáid já -nuoráid, nuuvt sämikuávlust ko meid ton ulguubeln-uv.

– Jis mij ep finnii tuárvi ruttâdem, te ovdâmerkkân párnáikulttuurkuávdáš Mánnu tooimâ nohá ollásávt puáttee ive, tastko ruttâdem pijssáá tuš oovtâ pargee pälkkikoloid. Talle puoh fyysilâš toimâ muttoo vuávámpargon, mii ij lah innig ulmemiäldásâš. Mun lam huolâstum tast, ete olášuveh-uv sämipárnái vuoigâdvuođah, jis sijjân ij lah kielâ já kulttuur miäldásâš jieijâs toimâ fáállun, iätá säämi párnáikulttuurkuávdáá kuhesáigásâš pargee Petra Magga-Vars.

Tááláš ruttâdem ij máhđulist kuávdái oles tooimâ, iäge toh paste laseruđâittáá faallâđ jieijâs palvâlusâid oovtviärdásávt tâi ovdediđ puáttee pargos. Sämitigge kiäsá-uv máttááttâs- já kulttuurministeriön vâi kuávdái toimâ ličij torvejum meid puátteevuođâst.

Duodji-akatemia jotonpieijâm tehálâš

Tuáimee kuávdái lasseen lii tehálâš peessâđ juátkiđ meid Duodji-akatemia pargo. Iänuduv kieldáin ovdedum haavâst lii lamaš ulmen sämituojij mättim nanodem já uđđâ pargosoojijd vuáđudem, sehe Iänuduvâst já oles sämikuávlust.

– Sämikulttuurkuávdái já Duodji-akatemia tooimâi turvim lii eromâš tehálâš. Akatemia maaŋgâ suhâpuolvâ piirâs nanodičij meid oovtâstpargo Ruotâ já Taažâ tuáijárijguin, iätá Sämitige saavâjođetteijee Tuomas Aslak Juuso.

Akatemia ornim kuursah iäláskiteh sämikulttuur já nanodeh tyejimáátu sirdâšum suhâpuolvâst nuubán. Mättim, mii lii ovdil sirdâšum pääihist já aldapirrâsist, käibid tääl toorjân aktiivlijd toorjâtooimâid. Sämitige ulmen lii finniđ Duodji-akatemia Sämitige kulttuurkuávdáštooimâ uássin.

Luuvâ Sämitige áánnum pyerebeht juvsâttettee já oovtviärdásub sämikulttuur ovdedem peeleest

Lasetiäđuh:

Tuomas Aslak Juuso
Saavâjođetteijee
040 687 3394
tuomas.juuso@samediggi.fi 

Petra Biret Magga-Vars
Toimâstivrejeijee
puh. 040 7325503
petra.magga@samediggi.fi

Syksymaisema, etualalla vesistö.Kove: Ville Fofonoff

Sämitige kulttuurtorjui uuccâm 2023

/in , /by

Sämitigge almoot uuccâmnáál Máttááttâs- já kulttuurministeriö (Säämi kulttuurmeriruttâ) torjuid, moh mieđettuvvojeh sämikielâlâš kulttuur oovdedmân já sämiseervij toimâmân ihán 2023 čujottum meriruuđâst.

Toorjâucâmušâid kalga čujottiđ Sämitiigán majemustáá 31. roovvâdmáánu 2022 tme 16.15 räi čujottâssáin: info@samediggi.fi teikâ Sämitigge, Sajos, 99870 Aanaar. Uuccâmluámáttuvâid já lasetiäđuid uážžu kulttuurčällest puh. 010 839 3103 já šleđgâpoostâ pehti kulttuuri@samediggi.fi

Uuccâmluámáttuvâid puáhtá meid printtiđ Sämitige internetsiijđoin čujottâsâst www.samediggi.fi. Toorjâucâmušâid puáhtá toimâttiđ persovnlávt tâi äššialmaa pehti, vuolgâttiđ šleđgâpoostâ teikâ poostâ pehti. Toorjâucâmušâi vuolgâttem tábáhtuvá vuolgâtteijee ovdâsvástádâssáin.

Luámáttuvah

Tun puávtáh luodiđ vuoluubeln tevdimnáál pdf-luámáttuv. Luámáttuv puáhtá tevdiđ meid motomijn laađđâmijn, tego Google Chrome.

Teknisâš ravvuuh

Pargoišeruttâ

Seervi toimâtoorjâ / proojeekttoorjâ

Proojeekttoorjâ

Tiličielgiittâs

Kove: Ville Fofonoff

Saavâjođetteijee Juuso já kulttuurlävdikode saavâjođetteijee Näkkäläjärvi uásálistev Venetsia taaiđâbiennaalân

/in , /by

Sämitige saavâjođetteijee Tuomas Aslak Juuso já Sämitige kulttuurlävdikode saavâjođetteijee Pirita Näkkäläjärvi uásálistev Venetsia taaiđâbiennaalân 21.4.-23.4.  Tääl vuossâmuu keerdi taaiđâbiennaal aalmuglii paviljoŋgist láá tuš sämitaaiđâreh já meid vuossâmuu keerdi sämmiliih láá aalmugin ovdâstum paviljoŋgist.

Sämitige saavâjođetteijee Tuomas Aslak Juuso illood sämitaiđuu noonâ oovdâstmist Venetsia taaiđâbiennaalist.

– Must lii ilo uásálistiđ biennaalân oovtâst nuubij Sämitiigij ovdâsteijeiguin. Lii tehálâš tuárjuđ sämitaaiđârijd já keččâliđ ovdediđ sii tile maailm taaiđâareenain, iätá Juuso.

Sämitaaiđâreh Pauliina Feodoroff, Máret Ánne Sara já Anders Sunna nubásmiteh Venetsia 59. taaiđâbiennaal Tave-eennâmlii paviljoŋg Säämi paviljoŋgin. Nubástus Säämi paviljoŋgin áávvud sämmilii algâaalmug taiđuu já suvereniteet.

Säämi parlamentaarlâš rääđi já Office for Contemporary Art Norway (OCA) uárnejeh Säämi paviljoŋg lekkâmijd tuorâstuv 21.4. Suomâ Sämitige ovdâsteijeeh saavâjođetteijee Tuomas Aslak Juuso já  kulttuurlävdikode saavâjođetteijee Pirita Näkkäläjärvi uásálistev lekkâmáid oovtâst Taažâ já Ruotâ Sämitiigij ovdâsteijeiguin.

Säämi paviljoŋg lekkâmtilálâšvuotâ 21.4.2022. Kooveest čižetpeln: Asta Balto, Tuomas Aslak Juuso, Pauliina Feodoroff já Pirita Näkkäläjärvi. Kove: Ánde Somby

Sämitige kulttuurlävdikode saavâjođetteijee Pirita Näkkäläjärvi mielâst lii tehálâš ete ohtsâškodde kuldâl taaiđârijd. 

– Taaiđâreh mättih já tyestih koijâdiđ koččâmušâid já pyehtiđ oovdân uáinuid, moh mudoi iä veltihánnáá puáđi uáinusân. Venetsia biennaalist sämitaaiđâreh pyehtih oles maailm tiätun čuávdimettum koččâmuš sämmilij eennâmvuoigâdvuođâin, Näkkäläjärvi eeđâi.

Säämi paviljoŋg taaiđâčáitálduv lii pyevtittâm juávkku, mast láá mieldi sämmilâš totkee Liisa-Rávná Finbog, sämmilâš luándusuojâleijee já tuáijár Beaska Niillas já OCA hovdâ Katya García-Antón. Juávhu išedeijen láá Martina Petrelli, Liv Brissach já Raisa Porsanger. OCA lii Tave-eennâmlii paviljoŋg válduovdâsteijee ive /8/2022.8

Venetsia taaiđâbiennaal lii moodeern taiđuu aalmugijkoskâsâš stuorrâ kejâstâh, mii uárnejuvvoo jyehi nubbe ive. Biennaal šadda iänááš čáitálduvâin, moh láá paviljoŋgijn, maid staatah láá iivij mield huksiittâm. Vuossâmuš Venetsia taaiđâbiennaal uárnejui ive 1895.

Lasetiäđuh:

Tuomas Aslak Juuso
Saavâjođetteijee
040 687 3394
tuomas.juuso@samediggi.fi 

Pirita Näkkäläjärvi
Kulttuurlävdikode saavâjođetteijee
040 3577 006
pirita.nakkalajarvi@gmail.com

Kulttuurlävdikodde juovij ive 2022 kulttuurtorjuid

/in , /by

Sämitige kulttuurlävdikodde juovij kulttuurlävdikode čuákkimist 24.2.2022 máttááttâs- já kulttuurministeriö mieđettem staatâtorjuu ihán 2022 ohtsis 179 000 eurod sämikielâlii kulttuur oovdedmân, Tave-eennâmlij sämiseervij tuárjumân já Sämmilâškirkkotuuvij paijeentolâmân.

Torjuuh mieđettuvvojii čuávvoo náál: Kulttuurmeriruttâ 2022

Lasetiäđuh

Kulttuurčällee Riitta Orti-Berg 010-839 3103, riitta.orti-berg(at)samediggi.fi

Kove: Kari Kuivamäki

Mii mááccuh, mij sääʹmpihttâz, min gávttit – virtuaalliih oppâtiijmeh sämmilij aalmugpeeivi kunnen 8.–10.2.2022

/in , , , , /by

Sämikielâi káidusmáttááttâs piiloothaahâ áávvud sämmilij aalmugpeeivi 6.2. já uárnee virtuaallijd oppâtiijmijd sämimááccuhijn 8.–10.2.2022. Oppâtiijmeh láá ohtsis kulmâ, já tai fáddán láá mááccuh, sääʹmpihttâz já gákti. Oppâtiijmij ulmen lii lasettiđ tiäđu sämmilijn jieškote-uv kuávlu sämipihtâsij peht. Tiijmij ääigi selvân ovdâmerkkân, ete moh oosijd kuleh pivtâsolesvuotân, moh iivnijd jieškote-uv sämipihtâsis táválávt láá já maid aašijd puáhtá uáiniđ sämipiivtâs kevttest.

Tiijmijd puáhtá čuávvuđ njuolgâ vuolgâttâssân uásálistemliiŋkâi peht tâi nuuvt, ete kiäččá paddiimijd tiijmij maŋa. Paadijd puáhtá keččâđ 10.–24.2. čujottâsâst https://www.saamenetaopetus.com/tapahtumat-ja-tallenteet. Tiijmijd puáhtá čuávvuđ nuuvtá ige taarbâš almottâttâđ muuneeld. Tiijmij ääigi lii meid máhđulâš koijâdiđ já savâstâllâđ chatist.

Äigitavlu:

majebargâ 8.2. tme 10–11
Gákti
Máttáátteijen Teija Kaartokallio
Servâmliŋkkâ

koskokko 9.2. tme 10–11
Mááccuh
Máttáátteijen Essi Morottaja
Servâmliŋkkâ

tuorâstâh 10.2. tme 15–16
Sääʹmpihttâz
Máttáátteijen Heini Wesslin
Servâmliŋkkâ

Oppâtijmijd láá tiervâpuáttim puohah, kiäid sämmilij aalmugpihtâseh kiäsutteh. Tijmijd puáhtá uásálistiđ jieškote-uv uáppee jiečânávt tâi oles luokka puáhtá uásálistiđ siämmáá puudân oovtâst ohtsii piergâsijn. Tiijmeh láá suomâkielân, mutâ tiijmij ääigi uápásmep meid pihtâsij sämikielâláid nomâttâssáid.

Tärhibeh ravvuuh tijmijd uásálistmân láá tääbbin.

Bures boahtin! Pyeri puáttim! Tiõrv pueʹttem! Tervetuloa!

Lasetiäđuh:

Anni-Sofia Niittyvuopio, hahâhovdâ
anni-sofia.niittyvuopio@edu.utsjoki.fi
040 701 2094

Arla Magga, hahâkoordinaattor
arla.magga@samediggi.fi
040 687 5989


Sämmilij aalmugpeeivi viettip jyehi ive kuovâmáánu 6. peeivi. Ávutuáluh uárnejuvvojeh talle ärbivuáválávt pirrâ Sämieennâm já onnáá peeivi meid Sämieennâm ulguubeln.

Tun puávtáh uásálistiđ sämmilij aalmugpiäiván meid návt:

  • Čuávu Aalmuglâšmuseo virtuaaltábáhtus vástuppeeivi 4.2. tme 9.15 rääjist.
  • Čuávu sämmilij aalmugpeeivi njuolgâ nettivuolgâttâs Sajosist pasepeeivi 6.2. tme 16 rääjist.
  • Uáppáásm Oktavuohta – saamelaistietoa opetukseen-sijđoid. Siijđoin láá jieškote-uv škovlâ- já luokkatáásán vuávájum fáddáuásih já pargopitáh.
  • Tiiláá video-oppâtiijmijd sämifáádái kieđâvušmân škoovlâst.
  • Uáppáásm sämikulttuur kieđâvuššee moobiilspelláid já hárjuttâspaakân Nuorâi Akatemia siijđoin.
  • Uáppáásm Sano se saameksi-eđâldâhsänikiirján orjâlâš-, anarâš- já nuorttâlâškielân. Siijđoin láá meid vittâ uánihisdokument, almoliih tiäđuh sämikulttuurist, soundboard sehe kyehti artikkâl kielâfáádást.
  • Máttááttâl orjâlâškielâ Sämirääđi IndyLan-kielâoppâmheiviittâssáin. Heiviittâs puáhtá luođiđ Apple Storest já Google Playst.
  • Máttááttâl orjâlâš-, anarâš- tâi nuorttâlâškielâ párnáid čuosâttum Kaavpugfiäráán-spelláin, moos láá ovtâstittâm lävdi- já korttâspeelâ. Speelâ puáhtá luođiđ Apple Storest já Google Playst.

Lasetiäđuh Sämikielâi káidusmáttááttâs piiloothaavâst:

Haavâ haaldâš Ucjuv kieldâ já koordinist Sämitigge. Piiloothaavâ ruttâd máttááttâs- já kulttuurministeriö. Piiloothaavâ ulmen lii pyerediđ sämimáttááttâs finnim sämmilij päikkikuávlu ulguubeln. Haahâ addel kyehti oppâtiijme vuáđumáttááttâs/luvâttâhškovlim tievâsmittee sämikielâ máttááttâs káidusohtâvuođâ peht pirrâ Suomâ. Tääl haavâ peht sämikielâ máttááttâs finnejeh 109 uápped. Haahâ lii finnim jotkâruttâdem 31.8.2023 räi. Almottâttâm luuhâmihán 2022–2023 lekkâs oppeet kuovâmáánust 2022.

https://www.saamenetaopetus.com/

https://www.oktavuohta.com/