Sääʹmteʹǧǧ vuässõõđi Venetsia arkkitehtuurbiennaal ääʹveempeeiʹvid

/in , /by

Sääʹmteʹǧǧ vuässõõđi Venetsia arkkitehtuurbiennaal ääʹveempeeiʹvid voʹzzenjapeeiʹv 18.5. Venetsia arkkitehtuurbiennaalâst lij mieʹldd sääʹm- arkkiteʹhtt da čeäppõsneǩ Joar Nango Troomsâst, Taarr beäʹl Sääʹmjânnmest. Nango Girjegumpi-projeeʹktest peäss naaudšed skamm-mannu räjja Tâʹvvjânnam paviljooŋgâst Venetsiast.

Snimldõk: Taarr Sääʹmteeʹǧǧ tiuddsåbbar saaǥǥjååʹđteeʹjj [dievasčoahkkinjođiheaddji] Tom Sottinen (čiʹǯsb.), Sääʹmsuåvtõõzz saaǥǥjååʹđteeʹjj Áslat Holmberg, arkkiteʹhtt da čeäppõsneǩ Joar Nango, da Lääʹdd Sääʹmteeʹǧǧ kulttuurluʹvddkååʹdd saaǥǥjååʹđteeʹjj Pirita Näkkäläjärvi Girjeguumpâst Venetsia arkkitehtuurbiennaalâst 2023. Snimldõk: James Taylor-Foster.

Snimldõk: Taarr Sääʹmteeʹǧǧ tiuddsåbbar saaǥǥjååʹđteeʹjj Tom Sottinen (čiʹǯsb.), Sääʹmsuåvtõõzz saaǥǥjååʹđteeʹjj Áslat Holmberg, arkkiteʹhtt da čeäppõsneǩ Joar Nango, da Lääʹdd Sääʹmteeʹǧǧ kulttuurluʹvddkååʹdd saaǥǥjååʹđteeʹjj Pirita Näkkäläjärvi Girjeguumpâst Venetsia arkkitehtuurbiennaalâst 2023. Snimldõk: James Taylor-Foster.

Joar Nango lij noorrâm pâʹjjel vitmlo eeʹjj ääiʹj ǩeʹrjjpõõrt kuõskeeʹl alggmeerai arkkitehtuuʹre, designiiʹje, alggmeerai äʹrbbvuõđlaž tiõttu, aktiviʹsmme da dekolonisâsttmõʹšše. Norldõõǥǥâst liâ ååʹn pâʹjjel 500 õõlmtõõzz.

Girjegumpi puätt tâʹvvsääʹmǩiõl saaʹnin ‘girji’ leʹbe ǩeʹrjj da ‘gumpi’ leʹbe uʹcc moottorǩeâlk mieʹldd ǩieʹssem vaunn, koon puäʒʒoummu âʹnne tuâjstes. Sääʹnnsiõrr viʹjttai ǩeʹrjjpõʹrtte da arkiiʹve di rajjsa, koʹst ǩeʹrjjpõõrt da arkiiv seeiltet.

Girjegumpi pirr lij rajjʼjõõvvâm obb alggmeerteâttkõõskõs, koʹst liâ sääʹm čeäppõõzz da duodji (äʹrbbvuõđlaž ǩiõtt-tuâj), materiaal, design-tääʹrǩeld, uʹccjieʹllikartt-teatter di jeeʹresnallšem sââʹj lookkmõʹšše da noorõõttmõʹšše.

–Girjegumpi lij ääiʹjpoddsaž saǥstõõllâmääʹvummuš alggmeerai da sääʹm arkkitehtuurâst. Tät lij ǩiõččâmvueʹǩǩ, kååʹtt ij leäkku saǥstõõllmõõžžin mieʹldd tääiʹben Lääʹddjânnam beäʹlnn. Seämma ääiʹj Girjegumpi lij peäʹlestvälddmõš alggmeerai vuõiggâdvuõđi peäʹlest pirr maaiʹlm. Girjegumpi põhtt kuâsttjemnalla tõn, što rajjum pirrõõzz leävvnummuš pâi da ääʹl vaiddsab ij takainalla vääʹld lokku alggmeerai jieʹllemnaaʹlid da juʹrddemnääʹl, särnn Lääʹdd Sääʹmteeʹǧǧ kultturluʹvddkååʹdd saaǥǥjååʹđteeʹjj Pirita Näkkäläjärvi, kååʹtt eeʹttkõõʹsti Lääʹdd Sääʹmteeʹǧǧ biennaal ääʹveempooddâst.

Arkiteakta ja dáiddár Joar Nango (gasku badjin) joavkkuinis. Govas maiddái Suoma Sámedikki kulturlávdegotti ságadoalli Pirita Näkkäläjärvi (badjin olgeš bealde) ja su bálddas gurut bealde Norgga Sámedikki dievasčoahkkinjođiheaddji Tom Sottinen ja Sámiráđi ságadoalli Áslat Holmberg. Govva: Laurian Ghinițoiu (2023). CC BY-SA 4.0.

Arkkiteʹhtt da čeäppõsneǩ Joar Nango (kõõsk. pâʹj.) tiimines. Snimldõõǥǥâst še Lääʹdd Sääʹmteeʹǧǧ kulttuurluʹvddkååʹdd saaǥǥjååʹđteeʹjj Pirita Näkkäläjärvi (pâʹj. vuäʹljsb.) da suu paaldâst čiʹǯsbeäʹlnn Taarr Sääʹmteeʹǧǧ tiuddsåbbar saaǥǥjååʹđteeʹjj Tom Sottinen da Sääʹmsuåvtõõzz saaǥǥjååʹđteeʹjj Áslat Holmberg. Snimldõk: Laurian Ghinițoiu (2023). CC BY-SA 4.0.

Õõudbeäʹlnn Venetsia biennaal Girjegumpi lij jååttam pirr maaiʹlm eeʹjjest 2018 vueʹljeeʹl. Õhtt versio tõʹst lij leämmaž vueiʹnnemnalla nykytaiteen museo Kiasmast Heʹlssnest. Ǥu Girjegumpi ij jååʹđ, di tõn põrtt lij Sääʹm čeäppõskõõskõõzzâst (Sámi Dáiddaguovddáš) Karasjooǥǥâst, Taarr beäʹlnn.

Venetsia arkkitehtuurbiennaal ciâggtum Girjegumpi lij veiddsõs õhttsažtuâjjprojeʹktt. Tõʹst liâ mieʹldd jeäʹrbi mieʹldd täk čeäppõsneeʹǩǩ, arkkiteeʹht, tuʹtǩǩeei da jeeʹres toiʹmmjeeʹj. Havard Arnhoff, Ken Are Bongo, Petter Bratland, Stefano Crosera + Margherita Pasqualato (Cantiere Daniele Manin), Mathias Danbolt, Ole-Henrik Einejord, Astrid Fadnes, Jenni Hakovirta, Eirin Hammari, Elin Haugdal, Petri Henriksson, Tone Huse, Robert Julian Hvistendahl, Iver Jaks + Jon Ole Andersen, Anne Kare Kemi, Annik Kristiansen Hagen, maka design, Grete Johanna Minde, Karen Inger Anne Nango, Nils John Nango, Anne Henriette Nilut, Ole Thomas Nilut, Raisa Porsanger, Tobias Aputsiaq Prytz, Anders Rimpi, Katrine Rugeldal, Wimme Saari, Sääʹm arkkitehtyyrsääʹnnǩeʹrjjtuâjj-joukk, Arne-Terje Sather, Katarina Spik Skum, Mary Ailonieida Somban Mari, Četil Somby, Anders Sunna, Anna-Stina Svakko, Eystein Talleraas, Petter Tjikkom, Magnus Antaris Tuolja, Ájtte-museo, Arctic Arts Festival – Festspillene i Nord-Norge -festivaali, Sámi Dáiddaguovddaš (SDG) leʹbe sääʹm čeäppõskõõskõs, RDM – Sámiid Vuorka-Davvirat -museo ja UiT – Taarr aarktlaž universiteʹtt. 

Tâʹvvjânnam paviljooŋg vuäʹmste õõutâst Ruõcc, Lääʹdd da Taarr. Tän vuâra väʹlddvasttõs tâʹvvjânnmallaš čuäjtõõzz jäʹrjstummšest lij ArkDesist leʹbe Ruõcc arkkitehtuur- da designkõõskõõzzâst. Kuraattoorân tåimma Carlos Minguez Carrasco da James Taylor-Foster, da projeʹkttšurrân Luba Kuzovnikova. Käʹhcclååǥǥad meeraikõskksaž arkkitehtuurčuäjtõs La Biennale di Venezia lij äävai 20.5.–26.11.2023 Venetsiast, Italiast. 

Lââʹssteâđ:

Pirita Näkkäläjärvi
Kulttuurluʹvddkååʹdd saaǥǥjååʹđteei
040 3577 006
pirita.nakkalajarvi@gmail.com

Kulttuurciisti jueʹǩǩempoodd 25.3. Hettast da 31.3. Aanrest

/in , /by

Sääʹmteeʹǧǧ kulttuurluʹvddkåʹdd jueʹjji eeʹjj 2023 kulttuurciist, koonn vuåǯǯu Anja Kaarret, Marja-Liisa Laiti da Marja Näkkälä. Kulttuurciist miõđât ooccâmtaa da tõn täävtõsân lij cisttjed kulttuur tuejjeei leʹbe čeäppneeʹǩǩ cisttân miârkteei tuâjast sääʹm kulttuurjieʹllem pueʹrren.

Marja Näkkälä kulttuurciist jueʹǩǩempoodd ââʹnet sueʹvet 25. peeiʹv pâʹsslâšttam-mannust 2023 čiâss 13–15 Tuõddâr-Lappi luâttkõõskõs Hettast.

Marja Näkkälä (1952) lij vuâlǥaž puäʒʒpiârrjest Näkkälä siidâst, Jeänõõǥǥâst. Ååʹn son lij jeältõõǥǥâst. Duodji kååʹtt miârkkšââvv sääʹm ǩiõtt-tuâjj lij Marja jieʹllemnääʹll, kååʹtt kuâsttai suu äärvain da jieʹllemvaʹlljummšin. Son ǩiõttʼtââll puõccust vuäǯǯmes aunnsid ǩiõtt-tuâjaines. Tääuʹjmõsân Marja âânn teeʹmes aunnsid. Marja kuärr nuʹtt åummai ko neezzni sääʹmpihttsid (gákti) da son lij še samai čieʹppes kooʹđđi. Suu euʹnnreeʹǧǧes sääʹm ollreeʹppiǩ lie mooččâd da čieʹppeld tuejjuum. Son lij še čeäʹpp vuõddjid kååʹđđed.

Anja Kaarret da Marja-Liisa Laiti kulttuurciist jueʹǩǩempoodd ââʹnet piâtnâc 31. peeiʹv pâʹsslâšttam-mannust 2023 čiâss 17–19 Sääʹmkulttuurkõõskõs Sajoozzâst, Aanrest.

Anja Kaarret (1960) lij vuâlǥaž Aanar Päärtõk-siidâst da lij tuejjääm jieʹllemtuâjas aanarsääʹmǩiõllsaž tooiʹmteeʹjen. Son lij tuejjääm tooiʹmteeʹjen Yle sääʹmǩiõllsaž tooimtõõzzâst eeʹjjest 1985 ääʹljeeʹl, mii tuejjad pâʹjjel 35 eeʹǩǩed. Anja lij tooiʹmtam jeeʹrab mieʹldd Anarâš saavah -peiʹvvprograamm di aanarsääʹmǩiõllsaž päärnaiprograammid, tv-ođđsid, neʹttođđsid da sosiaalʼlaž media materiaalid. Son lij tooiʹmteei, kååʹtt pâi-i veekk ooudâs jiijjâs siiskõõzzid, ij-ka ni kuäʹss säärn ij ođđ ideaid.

Marja-Liisa Laiti (1 952) lijvuâlǥaž ǩiõtt-tuâjjpiârrjest Aanarjooǥǥ Mihkku -pääiʹǩest, Uccjooǥǥâst. Son paaʹʒʒi jeältõʹǩǩe Sääʹm škooultemkõõskõõzzâst da lij tuejjääm jieʹllemtuâjas duodji- leʹbe sääʹmǩiõtt-tuâj uʹčteeʹlen. Marja-Liisa mättji juʹn päärnžen tuejjeed puärrsi da ruåđi määttain määŋgpeällsânji jeeʹres aunnsin ǩiõtt-tuâjaid. Son lij še viiššlõš kueʹllšiiʹlli Aanarjooǥǥâst leʹbe pueʹrben teʹl, ko vuäǯǯai veâl šeeʹlled kueʹl.

Prograammâst mm. musikk, ääv piâssmõš.

Lââʹssteâđ:

Riitta Orti-Berg
kulttuurpiisar
teʹl. 010-839 3103
riitta.orti-berg(at)samediggi.fi

Kulttuurluʹvddkåʹdd juõʹjji eeʹjj 2023 kulttuurveäʹǩǩtieʹǧǧid

/in , /by

Sääʹmteeʹǧǧ kulttuurluʹvddkåʹdd jueʹjji kulttuurluʹvddkååʹdd såbbrest 16.-17.2.2023 Mättʼtõs- da kulttuurministeria miõttâm riikkveäʹǩǩvuõđ eeǥǥas 2023 õhttsiʹžže 236 000 euʹrred sääʹmǩiõllsaž kulttuur õõuʹdummša, tâʹvvjânnmallaš sääʹmorganisaatioi tuärjjeem vääras da sääʹmceerkavpõõrti tuõʹllʼjummša.

Suåppmõõžžid/tuʹmmstõõǥǥid vuõltteet liâdǥlânji da vuâllaǩeeʹrjtõõzzâst ââʹnet raavâs tobddõõttmõõžž.

Veäʹǩǩvuõđid miõʹtteš tän nalla: Kulttuurmieʹrrteäʹǧǧ 2023

Kulttuurluʹvddkåʹdd jueʹjji eeʹjj 2023 kulttuurciist, koonn vuåǯǯu Anja Kaarret, Marja-Liisa Laiti da Marja Näkkälä. Kulttuurciist miõđât ooccâmtaa da tõn täävtõsân lij cisttjed kulttuur tuejjeei leʹbe čeäppneeʹǩǩ cisttân miârkteei tuâjast sääʹm kulttuurjieʹllem pueʹrren. Kulttuurciisti jueʹǩǩempoodd 25.3. Hettast da 31.3. Aanrest.

Lââʹssteâđ

Kulttuurpiisar Riitta Orti-Berg, 010-839 3103, riitta.orti-berg(at)samediggi.fi

Snimldõk: Riitta Orti-Berg

Sääʹmteʹǧǧ lij vuäǯǯam pââjõõzz eeʹjj 2023 kulttuurmieʹrrteägga 

/in , /by

Mättʼtõs- da kulttuurministeria lij miõttâm sääʹmǩiõllsaž kulttuur ooudâsviikkmõʹšše, Tâʹvvjânnmallaš sääʹmorganisaatioi tuärjjummša da Uccjooǥǥ Sääʹmceerkavǩeâmpi tuõʹllʼjummša õhttsiʹžže 236 000 euʹrred. Pââjõs oouʹdab iiʹjjid lij 57 000 euʹrred. 

– Leäʹp määŋg eeʹjj ooudâst maistam kulttuurmieʹrrtieʹǧǧ pââʹjummuž peäʹlest. Leäm tååđvaž kulttuurpolitiikkâst vasttõõzzâst åårrjen, što mââimõõzzâst vuäǯǯap pââʹjummuž äigga kuʹǩesäiggsaž tuâj puäđõssân, särnn Sääʹmteeʹǧǧ saaǥǥjååʹđteeʹjj Tuomas Aslak Juuso. 

Sääʹmteʹǧǧ iʹlmmti teâttan eeʹjj 2023 kulttuurmieʹrrtieʹǧǧ ooccâmnalla kålggmannust 2022. Ooccmõõžžid õõlǥi tooiʹmted kålggmannu loʹppe mõõneeʹst. Kulttuurluʹvddkåʹdd noorââtt 16.-17.2.2023 tuʹmmeed mieʹrrtieʹǧǧ juâǥǥast. Tuʹmmstõõǥǥin iʹlmmtet täʹlvvmannu looppâst. 

– Sääʹmõhttsažkåʹdd lij kuuʹǩǩ vuârddam, što vuäǯǯap lââʹzz resuursid sääʹmǩiõllsaž kulttuurtuõjju da čeäppõsjieʹllma. Kulttuurmieʹrrtieʹǧǧ pââjõõzzin lij šurr miârktõs pukin kooumin Lääʹddjânnmest jieʹlli sääʹmǩiõlin šõddi kultuurjieʹllma, rämmaš kulttuurluʹvddkååʹdd saaǥǥjååʹđteeʹjj Pirita Näkkäläjärvi. 

Sääʹmteeʹǧǧ vaalpoodd täävtõssân lij leämmaž liâdggeed kulttuurmieʹrrtieʹǧǧ ooccâmproseʹss. Proseʹss lij ouddnam juʹn nuʹt kookkas, što tän eeʹjj suåppmõõžž vuâllaǩeeʹrjtet liâđǥlânji. Puõʹtti kulttuurmieʹrrtieʹǧǧ ooccmõš da tillčiõlǥtõõzz puäʹđet čõõđ viikkâd liâđǥlânji. 

– Liâđǥlaž vuâllaǩeeʹrjtõõzzin ââʹnnep raavâs tobddõõttmõõžž, mii stäänn proseeʹss staanvuõđ. Miârktõssân lij hiâlpeed kulttuurmieʹrrtieʹǧǧ ooccjid da soljvâʹtted proseeʹss obbnes. Tät lij leämmaž tuâj vueʹlnn kuuʹǩǩ da leäm kuärǥaž, što leäʹp ååʹn piâssâm tän räjja, särnn Sääʹmteeʹǧǧ kulttuurpiisar Riitta Orti-Berg. 

Lââʹssteâđaid: 

Tuomas Aslak Juuso
Saaǥǥjååʹđteeʹjj
040 687 3394
tuomas.juuso@samediggi.fi

Pirita Näkkäläjärvi 
Kulttuurluʹvddkååʹdd saaǥǥjååʹđteeʹjj 
40 357 7 006 
pirita.nakkalajarvi@gmail.com 

Riitta Orti-Berg 
Kulttuurpiisar 
10 839 3 103 / 40 840 383 
riitta.orti-berg@samediggi.fi 

Sääʹmkulttuurkõõskõõzzi tåimm’mõš feʹrttai tuõrvvâd 

/in , , /by

Sääʹmteʹǧǧ nuäjjââtt mättʼtõs- da kulttuurministeriaaʹje õõutverddsa da âsttjemlaaǥǥan sääʹmkulttuur ooudâsviikkmõššân. Sääʹmõhtsažkååʹdd pueʹrrvââjjmõʹšše jieʹllma vieʹltʼtem kulttuurkääzzkõõzzi tåimmʼmõõžž teäggtõs feʹrttai tuõrvvâd, što sääʹm kulttuurkääzzkõõzz leʹčče jieʹllemviõkksa da pukid vuäǯǯamnalla.

Päärnaikulttuurkõõskõs Mánnu vuässââtt sääʹmšõddmõõžži jäʹrjstummša puuʹtʼteeʹl programmsiiskõõzzid päärnaid da nuõrid. Snimldõk: Petra Magga-Vars

Sääʹmteeʹǧǧ vueʹlnn toiʹmmjeei kõõskõõzzin lij jõnn miârktõs jieʹlli sääʹmkulttuur da sääʹmõhttsažkååʹdd pueʹrrvââjjam ooudâsviikkmõõžžâst. Jieʹllikarttkõõskõs Skábma, päärnaikulttuurkõõskõs Mánnu da Sääʹm-musikk-kõõskõs liâ tuärjjääm nuʹt sääʹm kulttuuridentiteeʹtt ǥu lââʹzztam sääʹmčeäppõõzzi kuâsttjemvuõđ. Tõi tåimmʼmõõžžin lij leämmaž jõnn miârktõs jeäʹrben sääʹmpäärnaid da -nuõrid, nuʹt sääʹmvuuʹdest ǥu še tõn ååuǥbeäʹlnn.

– Jõs riʹjttjeei teäggtõõzz jeät vuäǯǯ, åårast ouddmiârkkân päärnaikulttuurkõõskõs Mánnu tåimmʼmõš vooʹps puõʹtti eeʹjj, ǥu teäggtõs riʹjttai tåʹlǩ tuâjjlai päʹlǩǩ-kuulid. Tâʹl puk fyyslaž tåimm’mõš mõttai plaaneemtuâjjan, kååʹtt ij leäkku teänab mieʹrrmeâldlaž. Leäm piâkkõõttâm, teâuddje-a sääʹmpäärnai vuõiggâdvuõđ, jõs siʹjjid jiâ leäkku ǩiõl da kulttuur meâldlaž jiijjâs tåimmʼmõõžž vuäǯǯamnalla, särnn sääʹm päärnaikulttuurkõõskõõzz kuʹǩesäiggsaž tuâjjlaž Petra Magga-Vars.

Ânnʼjõž teäggtõs ij vueiʹtlvââʹst kõõskõõzzi tiuddmeärrsaž tåimmʼmõõžž, jiâ-ka tõk pââʹst lââʹssteäggtõõzztaa taʹrjjeed kääzzkõõzzeez õõutverddsânji leʹbe ooudâsviikkâd puõʹtti tuâjas. Sääʹmteʹǧǧ nuäjjââtt-i mättʼtõs- da kulttuurministeriaaʹje, što kõõskõõzzi tåimmʼmõš tuõrvčeš še juätkast.

Duodji-akatemia jåʹttʼtummuš vääžnai

Tåimmʼmõõžžâst åårrai kõõskõõzzi lââʹssen lij vääžnai piâssâd juäʹtǩǩed še Duodji-akatemia tuâj. Jeänõõǥǥ kooʹddin ooudâsvikkum haʹŋǩǩõõzzâst lij leämmaž täävtõssân raʹvvjed sääʹmǩiõtt-tuâjai silttummuž da raajjâd ođđ tuâjjpaaiʹǩid, nuʹt Jeänõõǥǥâst ǥu veeʹzz sääʹmvuuʹdest.

– Sääʹmkulttuurkõõskõõzzi da Duodji-akatemia tååimi tuõrvvmõš lij samai vääžnai. Akatemia tuejjeem määŋg puõlvvõõǥǥ pirrõs raʹvvjeʹči še õhttsažtuâj Ruõcc da Taarr sääʹmǩiõtt-tuâj čieʹppivuiʹm, särnn Sääʹmteeʹǧǧ saaǥǥjååʹđteei Tuomas Aslak Juuso.

Akatemia jäʹrjstem kuurs jeällʼjâʹtte sääʹmkulttuur da raʹvvje ǩiõtt-tuâjjtääid serddjummuž puõlvvõõǥǥâst nobba. Ääiʹjab dååma da âʹlddpirrõõzzâst serddjam tääid kaiʹbbje ååʹn tuärjjeem diõtt aktiivlaž tuärjjeemtååimid. Sääʹmteeʹǧǧ täävtõssân lij vuäǯǯad Duodji-akatemia pieʹǩǩen Sääʹmteeʹǧǧ kulttuurkõõskõståimmʼmõõžž.

Looǥǥ Sääʹmteeʹǧǧ raukkmõš âsttjemlaaǥǥab, õõutverddsab sääʹmkulttuur ooudâsviikkmõššân.

Lââʹssteâđaid:

Tuomas Aslak Juuso
Saaǥǥjååʹđteei
040 687 3394
tuomas.juuso@samediggi.fi

Petra Biret Magga-Vars
Tåimmamvuäʹpsteei
teʹl. 040 7325503
petra.magga@samediggi.fi

Syksymaisema, etualalla vesistö.Snimldõk: Ville Fofonoff

Sääʹmteeʹǧǧ kultturveäʹǩǩvuõđi ooccmõš 2023

/in , /by

Sääʹmteʹǧǧ čõõđat sääʹmǩiõllsa kulttuur ooudâsviikkmõʹšše Mättʼtõs- da kulttuurministeria (sääʹm kulttuurmieʹrrteäʹǧǧ) da sääʹmorganisaatioi tuåimmjummša čuäʹjtum mieʹrrtieʹǧǧest eeʹjjest 2023   miõttâmvuâlaž veäʹǩǩvuõđid ooccâm diõtt.

Veäʹǩǩvuõttooccmõõžž âʹlǧǧe vuõltteed Sääʹmtegga mââimõõzzâst kålggmannu 31. peeiʹv 2022 čiâss 16.15 räjja addrõõzzin: info@samediggi.fi leʹbe Sääʹmteʹǧǧ, Sajos, 99870 Aanar. Ooccâmblaaŋkid da lââʹssteâđaid vuäǯǯ kultturpiisrest teʹl. 010 839 3103 da neʹttpååʹštest kulttuuri@samediggi.fi

Ooccâmblaaŋk liâ priʹnttjemnalla Sääʹmteeʹǧǧ säiʹmmseeidin addrõõzzâst www.samediggi.fi. Veäʹǩǩvuõttooccmõõžžid vuäitt tuåimted jiõčč leʹbe äʹššoummu mieʹldd, vuõltteet neʹttpååʹšt leʹbe pååʹšt mieʹldd. Veäʹǩǩvuõttooccmõõžži vuõlttummuš lij vuõltteei jiiʹjjes vaʹsttõõzzâst.  

Lomaakk

Vuäitak väʹldded pdf-lomaakk tieuʹddem vääras vueʹlnn. Lomaakk vuäitt tieuʹdded še måttmin neʹttlookkjin, mâʹte Google Chromein.

Teknlaž vuäppõõzz

Reâuggamveä´ǩǩteä´ǧǧ

Õhttõõzz tuåimmjemveä´ǩǩvuõtt / proje´kttveä´ǩǩvuõtt

Proje´kttveä´ǩǩvuõtt

Teäǧǧčiõlǥtõs

Snimldõk: Ville Fofonoff

Saaǥǥjååʹđteei Juuso da kulttuurluʹvddkååʹdd saaǥǥjååʹđteei Näkkäläjärvi vuässâʹtte Venetsia čeäppõsbiennaaʹle

/in , /by

Sääʹmteeʹǧǧ saaǥǥjååʹđteei Tuomas Aslak Juuso da Sääʹmteeʹǧǧ kulttuurluʹvddkååʹdd saaǥǥjååʹđteei Pirita Näkkäläjärvi vuässâʹtte Venetsia čeäppõsbiennaaʹle 21.4.-23.4.  Ååʹn vuõssmõs vuâra čeäppõsbiennaal meersaž paviljongâst liâ tåʹlǩ sääʹmčeäppõsneeʹǩǩ da še vuõssmõs vuâra säʹmmla liâ meeran eeʹttkâʹsttmen paviljoongâst.

Sääʹmteeʹǧǧ saaǥǥjååʹđteei Tuomas Aslak Juuso rämmaš sääʹmčeäppõõzz raʹvves eeʹttkâsttmõõžžâst Venetsia čeäppõsbiennaalâst.

– Muʹst lij rämm vuässõõttâd Venetsia biennaaʹle õõutsââʹjest jeeʹres Sääʹmteeʹǧǧ eeʹttǩeeʹjivuiʹm. Lij vääžnai tuärjjeed sääʹmčeäppõsniiʹǩǩid da ǩiččlõõttâd ooudâsvieʹǩǩted sij sââʹjes maaiʹlm čeäppõsareenain, särnn Juuso.

Sääʹmčeäppõsneeʹǩǩ Pauliina Feodoroff, Máret Ánne Sara da Anders Sunna mõʹtte Venetsia 59. čeäppõsbiennaal Tâʹvvjânnmallaš paviljoong Sääʹmpaviljonggân. Muuttâs Sääʹmpaviljonggân juuhljâtt sääʹmalggmeer čeäppõõzz da suvereniteeʹtt.

Sääʹm parlamentaarlaž suåvtõs da Office for Contemporary Art Norway (OCA) jäʹrjste Sääʹm paviljoong ääʹveempeeiʹv neljdpeeiʹv 21.4. Lääʹdd Sääʹmteeʹǧǧ eeʹttǩeei saaǥǥjååʹđteei Tuomas Aslak Juuso ja kulttuurluʹvddkååʹdd saaǥǥjååʹđteei Pirita Näkkäläjärvi  vuässâʹtte ääʹveempeivva õõutâst Taarr da Ruõcc Sääʹmteeʹǧǧ eeʹttǩeeʹjivuim.

Sääʹm paviljoong ääʹveempeiʹvv 21.4.2022. Snimldõõǥǥâst čiʹǯsbeäʹlnn: Asta Balto, Tuomas Aslak Juuso, Pauliina Feodoroff da Pirita Näkkäläjärvi. Snimldõk: Ánde Somby

Sääʹmteeʹǧǧ kulttuurluʹvddkååʹdd saaǥǥjååʹđteei Pirita Näkkäläjärvi miõlâst õhttsažkååʹdd lij vääžnai kuvddled čeäppõsniiʹǩǩid. 

– Čeäppõsniiʹǩǩin lij pâstlvažvuõtt da tuõsttlõsvuõtt kõõččâd kõõččmõõžžid da eʹtǩǩeed vueiʹnnemkuuʹlmid, kook muđoi vuäitči kuâđđjed ǩiõččkani. Venetsia biennaalâst sääʹmčeäppõsneeʹǩǩ käʹǧǧe veezz maaiʹlm tieʹttemvuõʹtte räʹtǩǩeeǩânai kõõččmõõžž saaʹmi mäddvuõiggâdvuõđin, Näkkäläjärvi säärnai.

Sääʹm paviljoong čeäppõsčuäjtõõzz lij raajjâm joukk, koʹst liâ mieʹldd säʹmmlaž tuʹtǩǩeei Liisa-Rávná Finbog, säʹmmlaž luâđsuõjjeei da ǩiõtt-tuâjjlaž Beaska Niillas da OCA jååʹđteei Katya García-Antón. Joouk vieʹǩǩteeʹjen liâ Martina Petrelli, Liv Brissach da Raisa Porsanger. OCA lij Tâʹvvjânnmallaš paviljoong väʹlddeeʹttǩeei eeʹjjest 2022.

Venetsia čeäppõsbiennaal âlgg juõʹǩǩ nuuʹbb eeʹjj jäʹrjsted ânnʼjõžčeäppõõzz meeraikõskksaž jõnnǩiõččâlm. Biennaal nårrai väʹlddvueʹzzin čuäjtõõzzin riikki iiʹjji säättast raajtem paviljoongin. Vuõssmõs Venetsia čeäppõsbiennaal jäʹrjsteš eeʹjjest 1895.

Lââʹssteâđ:

Tuomas Aslak Juuso
 Saaǥǥjååʹđteei
040 687 3394
tuomas.juuso@samediggi.fi 

Pirita Näkkäläjärvi
Kulttuurluʹvddkååʹdd saaǥǥjååʹđteei
040 3577 006
pirita.nakkalajarvi@gmail.com

Kulttuurluʹvddkåʹdd juõʹjji eeʹjj 2022 kulttuurveäʹǩǩtieʹǧǧid

/in , /by

Sääʹmteeʹǧǧ kulttuurluʹvddkåʹdd jueʹjji kulttuurluʹvddkååʹdd såbbrest 24.2.2022 Mättʼtõs- da kulttuurministeria miõttâm riikkveäʹǩǩtieʹǧǧ ekka 2022 õhttseʹžže 179 000 euʹrred. Sääʹmǩiõllsaž kulttuur ooudâsviikkmõʹšše, Tâʹvvjânnmallaš sääʹmorganisaatioi tuärjjeem diõtt da Sääʹmceerkavpõõrti ooudâsjuäʹtǩǩummša.

Veäʹǩǩtieʹǧǧid miõʹtteš puõʹttinalla: Kulttuurmieʹrrteäʹǧǧ 2022

Lââʹssteâđ

Kulttuurpiisrest Riitta Orti-Bergist 010-839 3103 riitta.orti-berg(at)samediggi.fi

Snimldõk: Kari Kuivamäki

Mii mááccuh, mij sääʹmpihttâz, min gávttit, meidän saamenpukumme – virtuaalʼlaž mättčiâss saaʹmi meersažpeeiʹv cisttân 8.–10.2.2022

/in , , , , /by

Sääʹmǩiõli ougglõsõhttvuõđid äuʹǩǩeei mättʼtõõzz piʹlotthaʹŋǩǩõs juuhljâtt 6.2. vieʹttjem saaʹmi meersažpeeiʹv ja jääʹrjast virtuaalʼlaž mättčiâssid sääʹmpihttsin 8.–10.2.2022. Mättčiâss liâ õhttseʹžže koumm, da tõi teeʹmmen liâ aanarsääʹmm mááccuh, nuõrttsääʹmm sääʹmpihttâz da tâʹvvsääʹmm gákti. Mättčiâssi miârktõssân lij uʹvdded jäänab teâttvuõđ saaʹmin tobdstõõđeeʹl jeeʹres vuuʹdi sääʹmpihttsid. Čiâssin ouddmiârkkân seʹlvvan, måkam jeeʹres pihttâz piiutâsobbvuõʹtte koʹlle, måkam eeuʹnid jiijjâs-i pihttsin takainalla ââʹnet da måkam aaʹššid pihttâz kuõddjest vuäitt vueiʹnned pihttâz ǩiõččeeʹl leʹbe looǥǥeeʹl.

Čiâssid peäss seuʹrrjed vuõigg vuõlttõssân õhtteemliiŋkid čuålkkleeʹl leʹbe vaajtõsmääinsânji ǩiõččeeʹl mättčiâssi liânttummšid. Liânttummši ǩiõččâmäiʹǧǧ lij 10.–24.2. addrõõzzâst https://www.saamenetaopetus.com/tapahtumat-ja-tallenteet. Čiâssi seuʹrrjummuš lij määustem ij-ka õõlǥât ouddiʹlmmtõõttmõõžž. Čiâssin lij še vueiʹtlvažvuõtt kõõččâd da saǥstõõllâd chaatâst.

Äiʹǧǧtaull:

mââibargg 8.2. čiâss 10–11
Gákti
Uʹčteeʹlen Teija Kaartokallio
Õhtteemliŋkk

seärad 9.2 čiâss 10–11
Mááccuh
Uʹčteeʹlen Essi Morottaja
Õhtteemliŋkk

nelljdpeiʹvv 10.2. čiâss 15–16
Sääʹmpihttâz
Uʹčteeʹlen Heini Wesslin
Õhtteemliŋkk

Mättčiâssid liâ tiõrv puättam puk sääʹm-meerpihttsin älšmam oummu. Čiâssid vuäitt vuässõõttâd juâkksaž mättjeei jiõččânji leʹbe obbklass vuäitt vuässõõttâd õõutâst seämma poʹdde õhttsaž aparaattâst. Čiâss liâ lääddas, leša čiâssin tobdstõõđât še sääʹmǩiõllsaž piiutâsnõõmtummšid.

Tääʹrǩab vuäppõõzz čiâssid vuässõõttâm diõtt tääi´ben.

Bures boahtim! Pyeri puáttim! Tiõrv pueʹttem! Tervetuloa!

Lââʹssteâđaid:

Anni-Sofia Niittyvuopio, haʹŋǩǩõsjååʹđteei
anni-sofia.niittyvuopio@edu.utsjoki.fi
040 701 2094

Arla Magga, haʹŋǩǩõskoordinaattor
arla.magga@samediggi.fi
040 687 5989

Saaʹmi meersažpeeiʹv vieʹttjet piirieeʹjji täʹlvvmannu 6. peeiʹv. Juhllvuõđid riâššât tâʹl ääʹrbvuâlželd jeeʹres beäʹlnn Sääʹmjânnam da ânnʼjõžääiʹj še Sääʹmjânnam ååuǥbeäʹlnn.

Vuäitak vuässõõttâd saaʹmi meersažpeivva še nääiʹt:

  • Seuʹrre Meersažmuʹzei virtuaalšõddmõõžž piâtnâc 4.2. čiâss 9.15 ääʹljeeʹl.
  • Seuʹrre saaʹmi meersažpeeiʹv vuõigg neʹttvuõlttõõzz Sajoozzâst pâʹsspeeiʹv 6.2. čiâss 16 ääʹljeeʹl.
  • Tobdstõõđ Oktavuohta –sääʹmteâđ mättʼtõʹsse-seiddõʹsse. Seiddõõzzâst käunnʼje jeeʹres škooul- da klass-taaʹzzid plaanuum, teeʹmmkruuggi mieʹldd vuâđđõttum vueʹss da tuâj.
  • Tiʹlle video-mättčiâssid sääʹmteeʹmi/aaʹšši ǩiõttʼtõõllmõʹšše škooulâst.
  • Tobdstõõđ sääʹmkulttuur ǩiõttʼtõõli mobiilsiõrid da harjjtõõzzid seʹst õõʹnni mõõntõõllâmpaʹǩǩe Nuõri Akatemia seeidast.
  • Tobdstõõđ Sano se saameksi-mainstemǩiõllsiʹžže fraas-sääʹnnǩerjja tâʹvv-, aanar- da nuõrttsääʹmǩiõʹlle. Seiddõõzzâst še vitt vuäʹniǩdokumeeʹnt, ǩiõʹrǧǧesvueʹppes sääʹmkulttuuʹre, soundboard di kueʹhtt ǩiõllteeʹm õõʹni artikkeel.
  • Mättʼtõõđ tâʹvvsääʹmǩiõl Sääʹmsuåvtõõzz IndyLan-ǩiõllmättjemsuåvldõõzz veäkka. Suåvldõs laaddâmnalla Apple Storest da Google Playst.
  • Mättʼtõõđ tâʹvv-, aanar- leʹbe nuõrttsääʹmǩiõl päärnaid plaanuum Kaupunkiseikkailu-siõrin, kååʹtt lij kuälas luʹvddsiõr da speâl. Siõrr lij laaddâmnalla Apple Storest da Google Playst.

Lââʹssteâđaid Sääʹmǩiõli ougglõsõhttvuõđid äuʹǩǩeei mättʼtõõzz piʹlotthaʹŋǩǩõõzzâst:

Haʹŋǩǩõs lij Uccjooǥǥ kååʹdd vaaldšem da Sääʹmteeʹǧǧ koordinâʹsttem. Piʹlotthaʹŋǩǩõõzz teäggat mättʼtõs- da kulttuurministeria. Piʹlotthaʹŋǩǩõõzz miârktõssân lij pueʹreed sääʹm-mättʼtõõzz âsttjemvuõđ saaʹmi dommvuuʹd ååuǥbeäʹlnn. Haʹŋǩǩõs õudd kueʹhtt neäʹttelčiâss vuâđđmättʼtõõzz/lookkjiškooulškooultõõzz tiuddeei sääʹmǩiõl mättʼtõõzz ougglõsõhttvuõđin pirr Lääʹddjânnam. Tän poodd haʹŋǩǩõõzz pääiʹǩ sääʹmǩiõli mättʼtõõzz vuäǯǯa 109 škooulneeʹǩǩ da mättʼtõõđi. Haʹŋǩǩõs lij vuäǯǯam lââʹssteäggtõõzz 31.8.2023 räjja. Lookkâmpâjja 2022–2023 iʹlmmtõõttmõš ääʹveed âʹpet täʹlvvmannust 2022.

https://www.saamenetaopetus.com/

https://www.oktavuohta.com/

Ooʒʒ harjjtõõllʼjen Walt Disney Animation Studioid 2022

/in , /by

Leäk-a mättʼtõõttmen leʹbe eiʹdde valmštõõvvâm čeäppõõzz, animaatio, grafiikk leʹbe jieʹllikaart sueʹrjest? Walt Disney Animation Studios kåčč sääʹm mättʼtõõđjid ooccâd harjjtõõlliprograʹmme, kååʹtt älgg vueʹssmannust 2022.

Ooddi ooudâsviikkmõš -harjjtõõllmõõžžâst vuäǯǯak oʹdinakai vueiʹttemvuõđ leeʹd tuâjast Disney ohjjeeʹjin da tobdstõõttâd pukid čeäppõõzz, mainnâz jååʹđtummuž da jieʹllikaart vueʹssvuuʹdid.

Walt Disney Animation Studioi ǩieʹssharjjtõõllʼji programm lij 10 neäʹttel määusteʹmes programm. Tõt lij plaanuum mättʼtõõttjid, kook lie mättʼtõõttmen čeäppõõzz, animaatio, grafiikk da jieʹllikaart. Hoʹhsse, što mij tuâjjlai staanvuõtt da pueʹrrvââjjam lij sami vääžnai miʹjjid. Mij tuʹmmeep pueʹtti mannui ääiʹj halltõõzz siâzztõõzzi vuâđald, jäʹrjstep-a mij tän prograamm pääiʹǩ âʹlnn Burbank, CA studioin avi virtuaalʼlânji.

Looǥǥ lââʹzz harjjtõõllâmprograammâst da õõlǥtõõzzin täʹst:

Ooccâmäiʹǧǧ WDAS harjjtõõllmõʹšše poott 16.1.2022 čiâss 23:59 Pacific Standard Time (Hoʹhsse äiʹǧǧjeäʹrdõõzz)

Mäʹtǩǩveäʹǩǩteäʹǧǧ

Harjjtõõlli vuäitt ooccâd mäʹtǩǩveäʹǩǩtieʹǧǧ, koon Sääʹmrääʹđđ da Sääʹmteʹǧǧ meäʹtte. Veäʹǩǩtieʹǧǧ šorradvuõtt lij 10 000 $. Ooccjest âlgg leeʹd sääʹmtuâǥǥaž, tiuddeed WDAS harjjtõõllʼji määinaid da suʹst âlgg leeʹd plaan tõʹst, mäʹhtt haʹŋǩǩuum silttummuš puätt äuʹǩǩen sääʹmõhttsažkådda, ouddmiârkkân sosiaalʼlaž media, loǥlmi dno. pääiʹǩ. Ǩeeʹrjet jäänmõsân õõut seeid ooccmõõžž, koʹst mainstak tuâǥǥstad da plaanstad silttummuž äuʹǩǩeem diõtt.

Vuõlttâd ooccmõõžž addrõʹsse kmr@saamicouncil.net da meärk tõõzz “WDAS harjjtõõlli”

Mäʹtǩǩveäʹǩǩtieʹǧǧ ooccâmäiʹǧǧ poott: 16.1.2022, čiâss 23:59  Pacific Standard Time (Hoʹhsse äiʹǧǧjeäʹrdõõzz)

Õhttvuõtt-teâđ

Christina Hætta, Sääʹmrääʹđđ
+47 48021734
christina@saamicouncil.net