Säʹmmlai jieʹllemvueʹjj da kulttuur harjjtummuš lij vuâđđtõllum mäinn pueʹtted jânnma

/in , , /by

Riikksuåvtõs čoouǥii ođđeeʹjjmannu 22. peeiʹv jânnmapueʹttem rajjtõõzzid Lääʹddjânnmest. Ođđ rajjtõõzz puõʹtte viõʹǩǩe 27.1. da tõk lie viõǥǥâst 25.2. räjja. Muttsivuiʹm põõrǥât ǩieʹppeed rââst raaj pueʹtti joottlõõǥǥ ođđ koronavirusmuttsi leävvnummuž cõggâm diõtt. Riikksuåvtõõzz tuʹmmstõõǥǥ mieʹldd sääʹm jieʹllemvueʹjj da kulttuur harjjtummuš lij vieʹltʼteʹmes da  vuâđđtõllum mäinn pueʹtted jânnma.

Riikksuåvtõõzz tuʹmmstõõǥǥ mieʹldd siiʹsǩraajjvalvvmõõžž maacctõõzz ääiʹj säʹmmla vuäiʹtte jååʹtted rââst Lääʹddjânnam da Ruõccjânnam di Lääʹddjânnam da Taarrjânnam kõskksaž mäddraaji da raajj-jooǥǥi luâttvuejjamneävvaivuiʹm še jeeʹres sââʹjest ko raajjrâstldempaaiʹǩi mieʹldd. Tuʹmmstõk kuâskk Lääʹddjânnam raaj rââst jååttmõõžž. Siiʹsǩraaji rââst jååʹttmen âlgg väʹldded lokku še viõǥǥâst åårrai Taarrjânnam da Ruõccjânnam veʹrǧǧniiʹǩǩi meärrõõzzid da vuäppõõzzid. Ruõššjânnma jååʹttmen âlgg väʹldded lokku mõõk lie viõǥǥâst åårrai Ruõššjânnma veʹrǧǧniiʹǩǩi meärrõõzz.

Lappi raajjväärdtõk valmštââtt vueiʹtlvaž raajjrâstldempaaiʹǩi äävaiåårramaaiʹji rajjtummša viõstâr- da tâʹvvraajin. Jos äävaiåårramaaiʹjid rajjtet ooumažjoottlõõǥǥ beäʹlnn, teʹl äävaiåårramaaiʹji åålǥbeäʹlnn raaj rââst jååʹttem diõtt raajjrâstldempääiʹǩest oummuin õõlǥteʹčeš raajjrâstldemlååʹv.

Lååʹppmõõntõõllmõõžžin vuäitčeš tän vueʹjjest vueiʹtlvâʹstted vieʹltʼteʹmen  ǩiõččum ooumažjoottlõõǥǥ raajjrâstldempaaiʹǩi äävaiåårramaaiʹji åålǥbeäʹlnn, õuddmiârkkân kriittlaž suõʹrji tuâjjla da sääʹm jieʹllemvueʹjj da kulttuur harjjtummuš. Lappi raajjväärdtõõǥǥ vaʹstteemvuuʹdest raajjrâstldemlååʹv miõttmõõžžâst tuʹmmad raajjväärdtõõǥǥ mieʹrreei. Jos raajjrâstldempaaiʹǩi äävaiåårramaaiʹjid tuʹmmeet rajjted,  teʹl ääʹššest teâđtet õuʹddel rajjtõõzzi viõʹǩǩepuättmõõžž.

– Sääʹmteeʹǧǧ vueiʹnlmest lij vääžnai, što sääʹmõhttsažkååʹddest lij veiddsânji teâtt da säʹmmlaid kuõskki aaʹšši pirr teâđtet. Raajjtõppmõõžž lie vaaiktam sääʹmoummid veiddsânji da leäʹp tuejjääm tõn õuʹdde, što riikk vuâmmšeʹče  sääʹmvuuʹd vuällmõõžž neellj riikk voudda, ceälkk Sääʹmteeʹǧǧ saaǥǥjååʹđteei Tuomas Aslak Juuso.

Raajjväärdtõkstroiʹttel vuäʹppast raajjrâstldemjoottlõõǥǥ pirr

Raajjväärdtõkstroiʹttel vuäʹppast meerlaid raajjrâstldemjoottlõõǥǥ pirr teʹlfoonâst da neʹttpååʹšt mieʹldd. Kääzzkõs lij vuäǯǯamnalla lääʹddǩiõʹlle, ruõccǩiõʹlle da eŋgglõsǩiõʹlle čiâss 8-16 kõskksaž ääiʹj nââmrest 0295 420 100.

Raajjväärdtõkstroiʹttel vuäppõõzz raajjrâstldem vääras koronapandemia ääiʹj (lääddas)
https://raja.fi/rajaliikenne-ohjeet-korona 

Jânnmapueʹttem rajjtõõzzid čoouǥât 27.1. (lääddas)
https://valtioneuvosto.fi/-/1410869/maahantulon-rajoituksia-kiristetaan-27.1

Lââʹssteâđ

Saaǥǥjååʹđteei Tuomas Aslak Juuso teʹl. 040 687 3394 / 010 839 3101, tuomas.juuso(at)samediggi.fi 

Lääʹǩǩpiisar Kalle Varis teʹl. 010 839 3187 / 050 384 7040, kalle.varis(at)samediggi.fi

Sosiaal- da tiõrvâsvuõttministeria: Koronaepidemia vaigsmââvv – teʹksttsaakk vooudlaž vuäppõõzzi tuärjjan

/in , /by

Koronavirusvueʹǩǩ lij huânnʼnam miâlggâd juõʹǩǩsââʹjest Lääʹddjânnmest mââimõs neäʹttli äiʹǧǧen. Ko vueʹǩǩ lij vuuʹdi mieʹldd jeeʹresnallšem, vuäiʹtte še siâzztõõzz da rajjtõõzz vaajtõõllâd.

Siâzztõõzzi da rajjtõõzzi mieʹrren lij cõggâd koronaviruuzz leävvnummuž, staanâd tiõrvâsvuõtthuâl kapasiteeʹtt da suõjjled jeäʹrben riskkjooukid kuulli oummid.

Sosiaal- da tiõrvâsvuõttministeria lij suåppâm lääʹdd teʹlfoonoperaattoorivuiʹm da jieʹttkõõskõs-stroiʹttlin, što Lääʹddjânnmest tåimmjeei operaattoori õhttmid vuõltteet koronaviruuzz kuõskki teʹksttsaaǥǥ.

Saaǥǥâst auʹǯǯjet jääʹǩǩted uvddum siâzztõõzzid da rajjtõõzzid, što taaud leävvnummuš vuäǯǯat årstõttum. Saaǥǥ siiskõs lij: ”STM koronateâđtõs: Epidemiavueʹǩǩ Lääʹddjânnmest vaigsmââvv. Suõjjâd jiijjad da jeärrsid. Jääʹǩǩet vouddad siâzztõõzzid da rajjtõõzzid. Lââʹssteâđ thl.fi/alueet”

Vooudlaž rajjtõõzz da siâzztõõzz lie norrum puõccihåiddamvuuʹdi neʹttseeidain, koi addrõõzzid Tiõrvâsvuõđ da pueʹrrvââjjamstrooiʹtel lij noorrâm õõut seeid õõl:

Teʹksttsaakk lij õhtt tååimain, koin jååʹđtet teâđ koronaepidemiavueʹjj vaigsmõõvvâm pirr. Saaǥǥ vuõltteet lääʹddǩiõʹlle ruõccǩiõʹlle, eŋgglõsǩiõʹlle da tâʹvvsääʹmǩiõʹlle.

Saaǥǥid vuõltteeškuäʹđet seärad rosttovmannu 2. peeiʹv. Tåimmanouddmõš operaattoorid vuâlgg õuʹddel kõskkpeeiʹv da kääzzkõs jåttai sõrgg mâŋŋa tõʹst. Saaǥǥi tååimtõs šâdd podd pooddi, tõn diõtt saaǥǥ vuäiʹtte pueʹtted oummid jeeʹres ääiʹj.

Lââʹssteâđ

vaalmâsvuõttjååʹđteei Pekka Tulokas, STM, p. 0295 163 202, etunimi.sukunimi@stm.fi

Sääʹmteeʹǧǧ kuullâmpoodd tuõttvuõtt- da suåvâdvuõttkomissaari vaʹlljummšid kuõskeeʹl

/in , , /by

Sääʹmteʹǧǧ jääʹrjast kuullâmpooddid sääʹm meeru tuõttvuõtt- da suåvâdvuõttkomissaari vaʹlljummši pirr. Koronavueʹjj diõtt pooddid tuõʹllʼjet ougglõsõhttvuõđin.

Ougglõskuullmõõžžid jääʹrjstet Zoom-suåvldõõzz pääiʹǩ da kuullmõõžžid vuäitt vuässõõttâd juʹn-a suåvldõõzz pääiʹǩ leʹbe teʹlfoonin sååiteeʹl. Ougglõskuullmõõžžid âlgg iʹlmmtõõttâd ooudǩiõʹtte mââimõõzzâst kõõččmõõžžâst åårrai kuullâmpoodd oouʹdab arggpeeiʹv čiâss 12.00 mõõneeʹst tän liiŋkâst (https://link.webropolsurveys.com/S/9A23CFEB09B76748) leʹbe sååiteeʹl nââmra 040 676 5102. Vuõltteep iʹlmmtõõttjid neʹttpååʹšt mieʹldd liiŋk kuullâmpooddid, vuässõõttâmvuäppõõzzid di eettlaž vuäppõõzz kuullâmpooddi saǥstõõllâm vuâđđan.

Kuullâmpooddi jäʹrjstummšest vääʹldet lokku jeeʹres sääʹmǩiõlljooukid di lääʹddǩiõl. Pooddin vääʹldet veâl lokku jeeʹres åʹrnn sääʹm dommvuuʹdest di tõn åålǥbeäʹlnn jälsteei oummid. Pukin sääʹmǩiõllsaž kuullâmpooddin Zoom-suåvldõõzz pääiʹǩ vuässõõttmen lij tuʹlǩǩummuš sääʹmm-lääʹdd.

Kuullâmpooddi saaǥǥjååʹđteeʹjen toiʹmmai psykiaatrlaž puõccihoiʹddjeei Niila Rahko da piisren Sääʹmteeʹǧǧ mä. plaanni Heli Aikio.

Kuullâmpooddid liântteet da liânttõõzzid seeiltet Sääʹmteeʹǧǧest kuõʹhtt neäʹttel mâŋŋa kuullâmpooddâst raportâsttmõõžž tuärjjan. Pukin kuullâmpooddin raajât mošttaz da mošttsi vuâđald noorât rapoort Sääʹmteeʹǧǧ halltõõzz da tiuddsåbbar ââʹnnma komissaari vaʹlljummuž kuõskki tuʹmmstõktuâj tuärjjan.

Ougglõskuullâmpooddi lââʹssen vuäinnmõõžžâs tuõttvuõtt- da suåvâdvuõttkomissaarin kaiʹbbjum naaʹlin da silttummšest di tuärjas eʹtǩǩuum oummid vuäitt õlmmeed Sääʹmtegga še neʹttpooʹštin info(at)samediggi.fi, pååʹšt mieʹldd addrõʹsse Saamelaiskäräjät, Sajos, 99870 Inari 17.11.2020 mõõneeʹst leʹbe teʹlfoonin õõudǩiõʹtte iʹlmmtum teʹlfoonaaiʹjin.

Ougglõskuullâmpooddi äiʹǧǧmeäʹr:
  • Seärad 4.11.2020 čiâss 18–20.30 lääʹddǩiõllsaž kuullâmpodd
  • Vuõssargg 9.11.2020 čiâss 18–20.30 tâʹvvsääʹmǩiõllsaž kuullâmpodd Aanar vuuʹdest jälsteeʹjid
  • Mââibargg 10.11.2020 čiâss 18–20.30 tâʹvvsääʹmǩiõllsaž kuullâmpodd Vuâčč vuuʹdest da säʹmmlai dommvuuʹd åålǥbeäʹlnn jälsteeʹjid
  • Seärad 11.11.2020 čiâss 18–20.30 aanarsääʹmǩiõllsaž kuullâmpodd
  • Nelljdpeiʹvv 12.11.2020 čiâss 18–20.30 sääʹmnuõri kuullâmpodd
  • Vuõssargg 16.11.2020 čiâss 18–20.30 tâʹvvsääʹmǩiõllsaž kuullâmpodd Uccjooǥǥ da Jeänõõǥǥ vuuʹdest jälsteeʹjid
  • Mââibargg 17.11.2020 čiâss 18–20.30 nuõrttsääʹmǩiõllsaž kuullâmpodd

Ougglõskuullmõõžžid âlgg iʹlmmtõõttâd ooudǩiõʹtte mââimõõzzâst kõõččmõõžžâst åårrai kuullâmpoodd oouʹdab arggpeeiʹv čiâss 12.00 mõõneeʹst tän liiŋkâst (https://link.webropolsurveys.com/S/9A23CFEB09B76748) leʹbe sååiteeʹl nââmra 040 676 5102.

Teʹlfoonääiʹj:
  • Vuõssargg 2.11.2020 čiâss 9–16.00 aanarsääʹmǩiõllsaž teʹlfoonkuullmõš, Heli Aikio, teʹl. 040 676 5102 / 010 839 3107
  • Mââibargg 3.11.2020 čiâss 9–16.00 tâʹvvsääʹmǩiõllsaž teʹlfoonkuullmõš, Pia Ruotsala-Kangasniemi, teʹl. 040 726 2688 / 010 839 3106
  • Seärad 4.11.2020 čiâss 9–16.00 nuõrttsääʹmǩiõllsaž teʹlfoonkuullmõš, Laura Olsén-Ljetoff, teʹl. 040 617 5113 / 010 839 3190
  • Piâtnâc 6.11.2020 čiâss 9–16.00 lääʹddǩiõllsaž teʹlfoonkuullmõš, Heli Aikio, teʹl. 040 676 5102 / 010 839 3107
Lââʹssteâđ

piisar, mä. plaanni Heli Aikio, 040 676 5102 / 010 839 3107, heli.aikio(at)samediggi.fi

saaǥǥhååʹđteei vieʹǩǩteei Laura Olsén-Ljetoff, 040 617 5113 / 010 839 3190, laura.olsen-ljetoff(at)samediggi.fi

Sääʹmteeʹǧǧ seiddõs säʹmmlai tuõttvuõtt- da suåvâdvuõttkomissio pirr

Komissaarân eʹtǩǩuum oummu

Snimldõk: Tarja Länsman

Sääʹmteeʹǧǧ såbbar 17.-18.9. vuäzzai ougglõs-såbbren

/in , , /by

Sääʹmteeʹǧǧ såbbar 3/2020 jäʹrjstet 17.-18.9.2020 Sajoozzâst, Aanrest di ougglõsõhttvuõđin. Kuõiʹtpeivvsaž sååbbar tuʹmmad jm. Sääʹmteeʹǧǧ toiʹmmjemprograammâst pââjas 2020-2023 di ciâlklmest soti-mäddkooʹddi vuâđđummuž da sosiaal- da tiõrvâsvuõtthuâl- di peälštemtooiʹm jäʹrjstem oođummuž kuõskki lääʹjjšiõttummšen. Parlameʹnttpäikka jeät valddu kulddleeʹjid koronavueʹjj diõtt.

Sääʹmteeʹǧǧ sååbbar tuʹmmad Sääʹmteeʹǧǧ tuåimmpââʹj 2020-2023 toiʹmmjemprograammâst da tällõsplaanâst, ciâlklmest soti-mäddkooʹddi vuâđđummuž da sosiaal- da tiõrvâsvuõtthuâl di peälštemtooiʹm jäʹrjstem oođummuž kuõskki lääʹjjšiõttummšen, vuäzzlai nõõmtummšest Sääʹm Ǩiõllkaʹlddi halltõʹsse di nuõrisuåvtõõzz vuäzzla  vaʹlljummšest čouddmõõžž raukkâm vuäzzla sâjja.

Såbbrest saǥstõõlât veâl kolmm vuõlttõs-saǥstõõllmõõžž. Halltõs lij valmštõõllâm teeʹǧǧ såbbar vuõlttõs-saǥstõõllmõʹšše sääʹm ääimaspolitiikk oouʹdummuž, kuåivâslääʹjj oođummuž di sääʹmteʹǧǧlääʹjj oođummuž.

Såbbar 3/2020 äʹššlistt käunnai dokumeʹnttbaaŋkâst.

Parlameʹnttpäikka jeäʹt valddu kulddleeʹjid

Sääʹmteeʹǧǧ vuäzzla vuässâʹtte kuõiʹtpeivvsaž såbbra juʹn-a âʹldd Sajoozzâst leʹbe ougglõsõhttvuõđin. Koronavueʹjj diõtt kulddleei da media vuäiʹtte seuʹrrjed såbbar tåʹlǩ live striim -vuõlttõõzzâst addrõõzzâst www.samediggi.fi/live. Vuõlttõõzzâst lij vuäǯǯamnalla tuʹlǩǩummuš pukid koolm sääʹm ǩiõʹlle da lääddas. Sajoozz parlameʹnttpäikka jeäʹt valddu kulddleeʹjid pääiʹǩ ool.

Lââʹssteâđ:

Saaǥǥjååʹđteei Tuomas Aslak Juuso teʹl. 040 687 3394, tuomas.juuso(at)samediggi

Vaaldâšmjååʹđteei Pia Ruotsala-Kangasniemi teʹl.. 010 839 3100 / 040 726 2688, pia.ruotsala(at)samediggi.fi

saaǥǥtempiisar Johanna Alatorvinen teʹl.. 010 839 3140 / 040 663 4493, johanna.alatorvinen(at)samediggi.fi

Iinnteʹmes inn -alggmeerai musikkfestivaal jårrââʹstet koronaviruspandemia diõtt

/in , /by

Iinnteʹmes inn -alggmeerai musikkfestivaal jårrââʹstet koronaviruspandemia diõtt. Iinnteʹmes inn -festivaal leäi mieʹrren jäʹrjsted 14.–15.8.2020 Aanrest.

Iinnteʹmes inn -festivaal jäʹrjsteei âʹnne noorõõttmõõžž jäʹrjstummšest pukin tääʹrǩmõs äʹššen festivaal kuõʹssi da tuâjjlai staanvuõđ täʹǩǩummuž pukin vuõʹjjin. Jäʹrjsteei lie seuʹrrjam COVID-19 -vueʹjj ouddnummuž kuuʹǩǩ, leâša ååʹn lij čiõlǥâs, što påʹrǧǧmannu peäʹlrääʹjest ij leäkku vueiʹtlvaž jäʹrjsted meeraikõskksaž noorõõttmõõžž staanâld. Festivaal jårrâsttmõš lij žaaʹll, leâša oʹdinakai vuõigg da vasttõõzzlaž tuʹmmstõk tän vueʹjjest.

Iinnteʹmes inn jääʹrjast vueiʹttemvuõđi mieʹldd jeeʹres tuåimmjummuž da teâđat ääʹššest mâʹŋŋlakast.

Iinnteʹmes inn -festivaal jäʹrjste õõutveäkka Anára Sámisearvi rõ, Sääʹmteʹǧǧ, Sääʹmkultturkõõskõs Sajos, Sääʹm škooultemkõõskõs, Sääʹm-museo Siida, Aanar kåʹdd da Yle Sääʹmm.

Lââʹssteâđ:

Puuʹtʼteei
Oula Guttorm
oula.guttorm(at)samediggi.fi
+358 40 667 4545

Sääʹmteeʹǧǧ halltõs noorââtt ougglõsõhttvuõđin

/in , /by

Sääʹmteeʹǧǧ halltõs lij serddjam koronaepidemia diõtt noorõõttâd obbnes ougglõsõhttvuõđin. “Mij kuʹǩes harjjnummuš ougglõsõhttvuõđin lij vueiʹtlvâsttam tuåimi juätkkjummuž âlddsin seämmanallšeʹmmen. Haaʹlääm-i ǩeittad Sääʹmteeʹǧǧ tuâjjlažkååʹdd, što leäʹp pâsttam pâʹjjentuõʹllʼjed reâuggpâstlvažvuõđ puârast täin åårrmõõžžin”, tuâtt saaǥǥjååʹđteei Tuomas Aslak Juuso.

Sääʹmteeʹǧǧ halltõs nõõmti såbbreʹstes njuhččmannu 16. peeiʹv Paalǥâskooʹddi õhttõõzz halltõʹsse vuäzzliʹžžen Asko Länsman da väärrneʹǩǩen Magreta Sara. Länsman lij tuåimmâm Sääʹmteeʹǧǧ eeʹttǩeeʹjen še iiʹjjin 2018-2020. Sääʹmteʹǧǧ haaʹlad lââʹssen pueʹreed õhttsažtuâjas Paalǥâskooʹddi õhttõõzzin da eʹtǩǩad õhttsaž kaaunõõttmõõžž jäʹrjstummuž, ko tõt lij eʹpet vueiʹtlvaž.

Interreg 2021-2027 tuâjj-jouʹǩǩe Sääʹmteeʹǧǧ eeʹttǩeeʹjen nõõmteš Veikko Feodoroff da väärrneʹǩǩen Sääʹmteeʹǧǧ meeraikõskksaž aaʹšši piisar Inka Saara Arttijeff. Ruõcc Sääʹmteʹǧǧ lij eʹtǩǩääm, što pueʹtti programmpââʹj vääras Sääʹm parlamentaarlaž suåvtõs vuâđđad Interreg-tuâjj-joouk, koon mieʹrren lij seʹlvted säʹmmlai taarbid teäggtõʹsse.

Muittut, muittulusat – the story of the Sámi by the Sámi -haʹŋǩǩõõzz ohjjeemjouʹǩǩe nõõmteš Sääʹmteeʹǧǧ kulttuurluʹvddkååʹdd saaǥǥjååʹđteei Pirita Näkkäläjärvi da väärrneʹǩǩen Maria Sofia Aikio. Haʹŋǩǩõõzz čõõđtemäiʹǧǧ lij 1.1.2020 – 30.9.2022.

Lappi leett halltõʹsse Sääʹmteeʹǧǧ eeʹttǩeeʹjen nõõmteš I väärrsaaǥǥjååʹđteei Anni Koivisto da väärrneʹǩǩen saaǥǥjååʹđteei Tuomas Aslak Juuso.

Koronavirusvueʹǩǩ vaaikat Sajoozz tuåimmjummša

Sääʹmteeʹǧǧ halltõs saǥstõõli Sajoozz kääzzkâʹsttemjuâkkaz da poorrâmpääiʹǩ vueʹjj pirr. Sääʹmkulttuurkõõskõs Sajos lij leämmaž ǩidd pâʹsslašttâm-mannu 16. peeiʹvest vueʹljeeʹl. Halltõs tuʹmmji, što Sajos pââšš ǩidd vueʹssmannu loopp räjja.

“Tän čoʹrstemvueʹjjest meeʹst feʹrttai seʹlvted tuâjjlai vueiʹttemvuõđ ââʹnned juʹn nårrjam luämaid da jõs vueʹǩǩ peštt kuuʹǩǩab ääiʹj, lij viggâmnalla, što jouddâp ouddned luämmâttmõõžžid. Lââʹssen saǥstõõllâp vuõiggâdvuõttministeriain vueʹjj vaaiktõõzzâst Sajoozz tuåimmjummša”, saaǥǥjååʹđteei Juuso mâânn čõõđ vueʹjj.

Tuâjjpuârastvââjjamkõõjjõõzz mieʹldd puåđõõzz lie puârrnam pukin vueʹss-sueʹrjin.

Toođvažvuõtt lij lâssnam jeäʹrben jååʹđtummša da ouddooumažtuõjju di õhttsaž vuâkkõõzzi jääʹǩǩtummša. Kuuʹǩǩ pešttam ouddooumažtuâj da tuâjjõutstõõzz oouʹdeem lij pohttam puåđõõzzid. Tuâjjpuârastvââjjamkõõjjõõzz čõõđteš rosttovmannust 2019.

Seʹlvtõõzz mieʹldd tuâjjla ǩiõččlâʹstte, što sij vuäiʹtte hieʹlǩeld âlddned njonnšid tuâjjaaʹššin da âʹnne jiijjâz tuâj jeärmmjen da miârkkšõõvvjen. Puåđõs leäi huânnʼnam tåʹlǩ kueiʹt sââʹj vueʹzzeld: muʹst lij nokk äiʹǧǧ tuejjeed tuâjään kuddnalla da vââjam tuâjstan puârast.

Sääʹmteeʹǧǧ halltõõzz såbbar 3/2020 påʹrddǩeeʹrj tääʹrǩstet mââimõssân 30.4.2020 da tuõʹllʼjet vueiʹnnemnalla 1.5.-1.6.2020 Sääʹmteeʹǧǧ neʹttseeidain www.samediggi.fi.

Lââʹssteâđ:

saaǥǥjååʹđteei Tuomas Aslak Juuso teʹl. 040 687 3394, tuomas.juuso(at)samediggi

Puäʹđ mieʹldd Sääʹmnuõri čeäʹppvuõttpeeiʹv neʹttjuʹhlle!

/in , , , /by

Sääʹmnuõri čeäʹppvuõttpeeiʹv prääzkjet piâtnâc 17.4. neeʹttest. Puäʹđ mieʹldd neʹttjuʹhlle da kaaun toʹben nuʹtt hääʹsǩes čeäʹppvuõttpeiʹvvmooštaid ko še toobdâs sääʹmčeäppniiʹǩǩid. Sääʹmteeʹǧǧ škooultõs- da mättmateriaalkoontâr kåčč Sääʹmnuõri čeäʹppvuõttpeeiʹv historiaseeidai ääʹveempoʹdde piâtnâc 17.4. čiâss 12 ääʹljeeʹl addrõõzzâst saamelaisnuortentaidetapahtuma.com.

Seeidaid lie norrum snimldõõǥǥ, teeʹkst da video Sääʹmnuõri čeäʹppvuõttpeeiʹvin 1990-lååǥǥast tän peeiʹv räjja. Čeäʹppvuõttpeeiʹvin čeäppneǩ-ǩeäineez vuõssmõs laauʹǩid välddam sääʹm čeäppneeʹǩǩ mušttle videotiõrvʼvuõđin, mâid čeäʹppvuõttpeiʹvv lij siʹjjid miârkkšõõvvâm.

Sääʹmnuõri čeäʹppvuõttpeeiʹv historiaseeidaid lie tuejjääm neʹttpuuʹtʼteei Eeva Mäkinen, čeäʹppvuõttpeiʹvvtuâjjlaž Unna-Maari Pulska da škooultõspiisar Ulla Aikio-Puoskari. Seeidain lie teeʹkst pukin kooumin sääʹmǩiõlin da lääddas. Haʹŋǩǩõõzz teäggat mättʼtõs- da kulttuurministeria.

Lââʹssteâđ:

Unna-Maari Pulska
unna.pulska@samediggi.fi
040 614 5949

Teâđ koronaviruuzz pirr sääʹmǩiõʹlle

/in , /by

Sääʹmteʹǧǧ nåårr tän sijddu õlmstõttum vuäppõõzzid da teâđtõõzzid koronaviruuzz pirr sääʹmǩiõʹlle:

Leäk-a ton hoʹhssjam jeeʹres sääʹmǩiõllsaž vuäppõõzzid leʹbe leäk-a teâđtam sääʹmǩiõʹlle koronavirusvueʹjj pirr? Vuõlttâd teâđ tõn pirr addrõʹsse: tiedotus(at)samediggi.fi.

Lââʹssteâđ:

Ǩiõllstaanpiisar Anne Kirste Aikio, 010 839 3124 / 040 707 5626, anne-kirste.aikio(at)samediggi.fi

Sosiaal- da tiõrvâsvuõttpiisar Anne Länsman-Magga, 010 839 3128 / 040 182 9998, anne.lansman-magga(at)samediggi.fi

Saaǥǥtempiisar Johanna Alatorvinen, 010 839 3140 / 040 663 4493, johanna.alatorvinen(at)samediggi.fi

Sääʹmǩiõl ougglõsmättčiâss tarjjeemnalla škooulniiʹǩǩid!

/in , , /by

Sääʹmǩiõli ougglõsmättʼtõshaʹŋǩǩõs jääʹrjast pukid äävai nuõrtt-, aanar-, da tâʹvvsääʹmǩiõl mättčiâssid neeʹttest. Mättčiâss lie primmum jeärbi mieʹldd škooulniiʹǩǩid.

 

Taʹrjjeemnalla lie mättčiâss koonn-a sääʹmǩiõlâst nääiʹt:

Nuõrttsääʹmǩiõll pâʹjjškooulniiʹǩǩid da lookkjiškooulniiʹǩǩid seärdi 25.3., 1.4. ja 8.4. čiâss 10.00–10.45

Aanrõšǩiõll   3. – 6 klassniiʹǩǩid nelljdpeeiʹvi 26.3., 2.4. ja 9.4. čiâss 10.00–10.45

Tâʹvvsääʹmǩiõll 0 – 2 klassniiʹǩǩid piâtnci 27.3., 3.4. da vuõssaarǥ 6.4. čiâss 14.00–14.45

 

Vuässõõttâmvuäʹppõõzz käunnʼje täʹst. Čiâssid ij taarbâž iʹlmmtõõttâd õuddǩiõʹtte.

Bures boahtin! Tiervâpuáttim! Tiõrv pueʹttem! Bures boahtin! Tervetuloa!

www.saamenetaopetus.com

Sääʹmteʹǧǧ ännââtt, što rääʹjteʹče liikkummuž Lääʹddjânnmest

/in , /by

Sääʹmteʹǧǧ ännââtt väʹlddministeeʹrest, što rääʹjteʹče liikkummuž Lääʹddjânnam raaji seʹst, što vuäitčeš miâlǥeed koronaviruuzz leävvnummuž da nuʹt suõjjeed riskkjooukid.

Neäʹttel-loopp ääiʹj määŋg media lie õlmstâttam ođđsid Lääʹddjânnam siiskâž maatkčummuž da Lappi-vuuʹdest luämai âânnmõõžž pirr, håʹt-i Lääʹddjânnam halltõs lij ouddam vuäppõõzzid vieʹltted sosiaalʼlaž kontaaktid da ǩeâlddam pâʹjjel 10 oummu õõlmâs noorõõttmõõžžid.

– Leäm seuʹrrjam vueʹjj sami huõl ââʹnškuäʹđeeʹl. Ååʹn leʹčči juõʹǩǩkast äiʹǧǧ väʹldded vueʹjj tuõđlânji da jääʹǩǩted uvddum vuäppõõzzid. Mij jeäʹp haaʹled piijjâd riskkjooukid vaar vuâlla, jeäʹrben sääʹmvuäʹmmoummu lie joukk, koon meeʹst feʹrttai suõjjeed, teäʹddad Sääʹmteeʹǧǧ saaǥǥjååʹđteei Tuomas Aslak Juuso.

Sääʹmteeʹǧǧ mieʹldd Lääʹddjânnam siiskâž liikkummuž rääʹjtem leʹčči pueʹrmõs nääʹll suõjjeed sääʹm-meer da jeäʹrben riskkjooukid, mâʹte sääʹmvuäʹmmoummid, njuämmam vuâstta da tõn staanâm diõtt, što håidd riʹjttai pukid. Sääʹmǩiõl siltteei tiõrvâsvuõtthuõl tuâjjla lie juʹn tän vueʹjjest occanj da jeäʹrben ǩirrsallaš hååid õhttvuõđâst da kriisvuõʹjjin jiijjâsǩiõllsaž kääzzkõõzzin lij jõnn miârktõs.

Sääʹmvuäʹmmoummin miârkteei vueʹss jäälast säʹmmlai dommvuuʹdest. – Sääʹmteʹǧǧ ännââtt väʹlddministeeʹrest, što son tuejjeʹči taarbšum tuåimid, što tuuʹššes maatkčem Lääʹddjânnmest puuđči, ǩiõrǥat saaǥǥjååʹđteei Juuso.

Sääʹmǩiõllsaž teâttjueʹǩǩem õõlǥči lââʹzzted

Sääʹmteʹǧǧ mušttʼtat jeeʹres veʹrǧǧniiʹǩǩid, mâʹte THL da riikksuåvtõõzz kanslia, sääʹmǩiõllsaž teâttjueʹǩǩem vääžnaivuõđâst. Sääʹmteʹǧǧ lij eʹtǩǩääm sääʹmǩiõllsaž teâttjueʹǩǩem lââʹzztummuž da pueʹrummuž sääʹm ǩiõll-lääʹjj vuâđald da õõlmâs staanvuõđ diõtt. Teâttjueʹǩǩmest âlgg še väʹldded lokku sääʹmǩiõllsai taarbid âsttjemvuõttõõlǥtõõzzi peäʹlest, ouddmiârkkân tõn, što määŋg sääʹmǩiõllsa jie silttâd lookkâd jiijjâs jieʹnnǩiõl.

– Tõn, što teâđ mottje ǩeeʹjjmieʹldd ääiʹj, ij vueiʹt ââʹnned mäinnan, što õõlmâs vuäppõõzzid jie jåårǥlââʹtt sääʹmǩiõlid. Sääʹmǩiõllsaž teâttjueʹǩǩmest âlgg ouddned še plaan meâldlânji da vuäppõõzzid peeiʹvteeʹl, vuäʹppast ǩiõllstaanpiisar Anne Kirste Aikio. – Ååʹn jeeʹres veʹrǧǧneeʹǩǩ âʹlǧǧe še ââʹnned huõl jeäʹrben tõʹst, što säʹmmlai ǩiõlʼlaž vuõiggâdvuõđ teâuddje da ooumaž šâdd fiʹttjum sääʹmǩiõʹlle, håʹt jieʹttkõõskõʹsse leʹbe tiõrvâsvuõttkõõskõʹsse sååiteen, jõs son kädd koronanjuämmam.

Lââʹssteâđ:

Saaǥǥjååʹđteei Tuomas Aslak Juuso, 010 839 3101 / 040 687 3394, tuomas.juuso(at)samediggi.fi

Ǩiõllstaanpiisar Anne Kirste Aikio, 010 839 3124 / 040 707 5626, anne-kirste.aikio(at)samediggi.fi

Sosiaal- da tiõrvâsvuõttpiisar Anne Länsman-Magga, 010 839 3128 / 040 182 9998, anne.lansman-magga(at)samediggi.fi