Sosiála- ja dearvvašvuohtaministeriija: Koronaepidemiija váttásnuvvá – deakstadieđáhus guvllolaš rávvagiid doarjjan

Koronavirusdilli lea hedjonan measta juohke sajes Suomas maŋemus vahkuid áigge. Daningo dilli lea hedjonan measta juohke guovllus Suomas maŋemus vahkuid áigge. Daningo dilli lea sierra guovlluin sierralágán, de maid ávžžuhusat ja ráddjehusat sáhttet molsašuddat.

Ávžžuhusaid ja ráddjehusaid ulbmilin lea caggat koronavirusa viidáneami, dorvvastit dearvvašvuohtafuolahusa suvdinnávcca ja suodjalit earenoamážit olbmuid, geat gullet riskajoavkkuide.

Sosiála- ja dearvvašvuohtaministeriija lea soahpan suopmelaš telefonoperáhtoriiguin ja heahteguovddášlágádusaiguin, ahte Suomas doaibmi operáhtoriid geavahanlavttaide sáddejuvvo deakstadieđáhus, mii guoská koronavirusa.

Deakstadieđáhusas ávžžuhuvvo doahttalit addojuvvon ávžžuhusaid ja ráddjehusaid, vai dávdda leavvan ožžojuvvo bisánit. Dieđáhusa sisdoallu lea: ”SDM Koronadieđáhus: Epidemiijadilli Suomas váttásmuvvá. Suddje iežat ja earáid. Čuovo guovllut ávžžuhusaid ja ráddjehusaid. Lassedieđut thl.fi/alueet”

Guvllolaš ráddjehusat ja ávžžuhusat leat čohkkejuvvon buohccedikšunbiirriid fierbmesiidduin, maid čujuhusaid Dearvvašvuođa ja buresbirgejumi lágádus lea čohkken ovtta siidui:

Deakstadieđáhus lea okta dain doaibmabijuin, maiguin gaskkustuvvo diehtu koronaepidemiijadili váttásnuvvamis. Dieđáhus sáddejuvvo suoma-, ruoŧa- ja davvisámegillii.

Dieđáhusat álgojuvvojit sáddet gaskavahkko juovlamánu 2. beaivve. Bargogohčus operáhtoriidda vuolgá ovdal gaskabeaivvi ja bálvalus boahtá johtui fargga dan maŋŋel. Dieđáhusaid doaimmahus dáhpáhuvvá muttuid mielde, nu ahte dieđáhusat sáhttet boahtit olbmuide sierra áiggiid.

Lassidieđut

válmmavuođa hoavda Pekka Tulokas, STM, t. 0295 163 202, ovdanamma.goargu@stm.fi

Sámedikki gullandilálašvuođat guoskkadin duohtavuođa- ja soabadankomissáraid válljema

Sámediggi ordne gullamiid sápmelaččaide duohtavuođa- ja soabadankomissáraid válljemiin. Koronadili dihtii dilálašvuođat lágiduvvojit gáiddusoktavuođaid bokte.

Gáiddusgullamat lágiduvvojit Zoom -heivehusa bokte ja gullamiidda sáhttá oassálastit juogo heivehusa bokte dahje riŋgemiin telefovnnain.  Gáiddusgullamiidda galgá almmuhit ovddalgihtii maŋimustá guoskevaš gullandilálašvuođa ovddit árgabeaivve dmu 12.00 rádjai dán liŋkkas https://link.webropolsurveys.com/S/9A23CFEB09B76748 dahje riŋgemiin nummirii 040 676 5102. Sáddet almmuhan olbmuide šleađgapoasttain liŋkka gullandilálašvuođaide, oassálastinrávvagiid ja etihkalaš rávvagiid dilálašvuođaid ságastallamiid vuođđun.

Gullandilálašvuođaid lágideamis vuhtii váldojit sámi sierra giellajoavkkut sihke suomagiella. Lassin dilálašvuođain vuhtii váldojit olbmot, geat ásset sierra bealde sámiid ruovttuguovllu sihke dan olggobealde. Buot sámegielat dilálašvuođain lea Zoom- heivehusa bokte oassálastettiin tulkon sáme-suomagiella.

Gullandilálašvuođaid ságajođiheaddjin doaibmá psykiátralaš buohccedivššár Niila Rahko ja čállin Sámedikki má. plánejeaddji Heli Aikio.

Gullandilálašvuođat báddejuvvojit ja báttit seailluhuvvojit Sámedikkis guokte vahku dilálašvuođa maŋŋelii raporterema doarjjan. Buot gullandilálašvuođain ráhkaduvvo muittuhančála ja muittuhančállagiid vuođul čohkkejuvvo raporta Sámedikki stivrra ja dievasčoahkkima geavahussii komissáraid válljema guoski mearrádusbargama doarjjan.

Gáiddusgullandilálašvuođaid lassin iežas oainnu guoskkadin duohtavuođa- ja soabadankomissárain gáibiduvvon iešvuođaid ja máhttima sihke doarjaga olbmuide geat leat evttohassan, sáhttá ovdan buktit Sámediggái maiddái šleađgapoasttain info(at)samediggi.fi, poastta mielde čujuhussii Sámediggi, Sajos, 99870 Anár 17.11.2020 rádjai dahje telefovnna bokte ovddalgihtii almmuhuvvon telefonáiggiid.

Gáiddusgullamiid áigetávval:
  • Gaskavahkku 4.11.2020 dmu 18–20.30 suomagielat gullan
  • Vuossárga 9.11.2020 dmu 18–20.30 davvisámegielat gullan Anára guovllus ássiide
  • Maŋŋebárga 10.11.2020 dmu 18–20.30 davvisámegielat gullan Vuohču guovllus ja sámiid ruovttuguovllu olggobealde ássiide
  • Gaskavahkku 11.11.2020 dmu 18–20.30 anárašgielat gullan
  • Duorastat 12.11.2020 dmu 18–20.30 sámenuoraid gullan
  • Vuossárga 16.11.2020 dmu 18–20.30 davvisámegielat gullan Ohcejoga ja Eanodaga guovllus ássiide
  • Maŋŋebárga 17.11.2020 dmu 18-20.30 nuortalašgielat gullan

Gáiddusgullamiidda galgá almmuhit ovddalgihtii maŋimustá guoskevaš gullandilálašvuođa ovddit árgabeaivve dmu 12.00 rádjai dán liŋkkas https://link.webropolsurveys.com/S/9A23CFEB09B76748 dahje riŋgemiin nummirii 040 676 5102.

Telefonáiggit:
  • Vuossárga 2.11.2020 dmu 9–16.00 anárašgielat telefongullan, Heli Aikio, tel. 040 676 5102 / 010 839 3107
  • Maŋŋebárga 3.11.2020 dmu 9–16.00 davvisámegielat telefongullan, Pia Ruotsala-Kangasniemi, tel. 040 726 2688 / 010 839 3106
  • Gaskavahkku 4.11.2020 dmu 9–16.00 nuortalašgielat telefongullan, Laura Olsén-Ljetoff, tel. 040 617 5113 / 010 839 3190
  • Bearjadat 6.11.2020 dmu 9–16.00 suomagielat telefongullan, Heli Aikio, tel. 040 676 5102 / 010 839 3107
Lassidieđut

čálli, má. plánejeaddji Heli Aikio, 040 676 5102/010 839 3107, heli.aikio(at)samediggi.fi

ságajođiheaddji veahkkebargi Laura Olsén-Ljetoff, 040 617 5113/010 839 3190, laura.olsen-ljetoff(at)samediggi.fi

Sámedikki siiddut sámiid duohtavuođa- ja soabadankomišuvnnas

Govva: Tarja Länsman

Sámi parlamentáralaš ráđđi lea fuolas koronaviruspandemiija váikkuhusain sámeservošii

Sámi parlamentáralaš ráđi stivra lea gieđahallan giđa áigge koronaviruspandemiija ja olgorájiid giddema váikkuhusaid sámeservošii ja mearridan dahkat oktasaš almmolaš cealkámuša áššis.

Koronaviruspandemiija váikkuha sámeservošii vugiin, mii ii leat goassige ovdal leamaš. Pandemiija geažil stáhtaid olgorájiin leat ráddjen rádjejohtolaga jagi 2020 giđa ja geasi áigge. Sápmelaččat leat eamiálbmot, mii orru njealji stáhta guovllus Suomas, Norggas, Ruoŧas ja Ruoššas, nu ahte rádjerasttildeapmái guoski ráddjehusat leat váikkuhan mearkkašahtti ládje sámeservošii. Sámi parlamentáralaš ráđi stivra buktá ovdan cealkámušastis stáhtaid rádjerasttildeapmái guoski ráddjehusaid váikkuhusaid sámeservošii sihke gieđahallá stáhtaid geatnegasvuođaid sápmelaččaid guovdu spiehkastatdilis ja ráhkkaneami boahtteáigái  sámeservodaga geahččanguovllus.

Sámi parlamentáralaš ráđi almmolaš cealkámuš koronavirus-dili dagahan rádjerasttildeami ráddjehusain ja dan váikkuhusain sámeservošii

Det samiska parlamentariska rådets uttalande om begränsningar av gränsövergång på grund av coronavirussituationen samt dess inverkan på den samiska gemenskapen

Lassidieđut

ságajođiheaddji Tuomas Aslak Juuso, 040 687 3394, tuomas.juuso(at)samediggi.fi

riikkaidgaskasaš áššiid čálli Inka Saara Arttijeff, 050 574 7629, inka-saara.arttijeff(at)samediggi.fi

Govva: Tarja Länsman

Sámedikki čoahkkin 17.-18.9. lágiduvvo osohahkii gáiddusin

Sámedikki čoahkkin 3/2020 lágiduvvo 17.-18.9.2020 Sajosis, Anáris ja gáiddusoktavuođaiguin. Guovttebeaivásaš čoahkkin mearrida ee. Sámedikki doaibmaprográmmas badjái 2020-2023 ja cealkámušas sode-eanangottiid vuođđudeapmái ja sosiála- ja dearvvašvuođafuolahusa ja gádjundoaimma lágideami ođastussii guoski láhkaásaheapmin. Parlameantasálii eai váldojuvvo geahččit koronadili dihte.

Sámedikki čoahkkin mearrida Sámedikki doaibmabaji 2020-2023 doaibmaprográmmas ja ekonomiijaplánas, cealkámušas sode-eanangottiid vuođđudeapmái ja sosiála- ja dearvvašvuođafuolahusa ja gádjundoaimma lágideami ođastussii guoski láhkaásaheapmin, lahtuid nammadeamis Sámi Giellagáldu stivrii ja nuoraidráđi lahtu válljemis earu bivdán lahtu sadjái.

Čoahkkimis čađahuvvojit lassin golbma sáttaságastallama. Stivra lea válmmaštallan Sámedikki čoahkkima sáttaságastallamii sámi dálkkádatpolitihka ovddideami, ruvkelága ođasmahttima ja sámediggelága ođasmahttima.

Čoahkkima 3/2020 áššelistu leat dokumeantabáŋkkus.

Parlameantasálii eai váldojuvvo geahččit

Sámedikki lahtut oassálastet guovttebeaivásaš čoahkkimii juogo báikki alde Sajosis dahje gáiddusoktavuođaiguin. Koronadili dihte álbmot ja media sáhttet čuovvut čoahkkima dušše live stream -sáddaga bokte čujuhusas www.samediggi.fi/live. Sáddagis lea oažžun láhkai dulkon buot golmma sámegillii ja suomagillii. Sajosa parlameantasálii ii váldojuvvo álbmot báikki ala.

Lassedieđut:

Sátnejođiheaddji Tuomas Aslak Juuso, tlf. 040 687 3394 / 010 839 3101, tuomas.juuso(at)samediggi.fi

hálddahushoavda Pia Ruotsala-Kangasniemi tlf. 010 839 3100 / 040 726 2688, pia.ruotsala(at)samediggi.fi

dieđihančálli Johanna Alatorvinen, tlf. 010 839 3140 / 040 663 4493, johanna.alatorvinen(at)samediggi.fi

Ijahis idja -eamiálbmogiid musihkkafestivála šluhttejuvvo koronaviruspandemiija dihte

Ijahis idja -eamiálbmogiid musihkkafestivála šluhttejuvvo koronaviruspandemiija dihte. Festivála galggai lágiduvvot 14.–15.8.2020 Anáris.

Ijahis idja -festivála lágideaddjit atnet festiválagallededdjiid ja bargiid dorvvolašvuođa sihkkarastima buot diliin dehálamos áššin dáhpáhusa lágideamis. Lágideaddjit leat čuvvon COVID-19 -dili ovdáneami guhká, muhto dál lea čielggas, ahte riikkaidgaskasaš dáhpáhusa lágideapmi dorvvolaččat borgemánu beallemuttus lea veadjemeahttun. Festivála šluhtten lea váidalahtti, muhto áidna rivttes ja vásttolaš mearrádus dán dilis.

Festivála lágida vejolašvuođaid mielde eará doaimmaid ja dieđiha daid birra maŋŋelabbos.

Ijahis ija ordnejit ovttasbarggus Anára Sámisearvi rs, Suoma Sámediggi, Sámekulturguovddáš Sajos, Sámi oahpahusguovddáš, Sámemusea Siida, Anára gielda ja Yle Sápmi.

Lassedieđut:

buvttadeaddji
Oula Guttorm
oula.guttorm(at)samediggi.fi
+358 40 667 4545

Sámedikki stivra čoahkkana gáiddusoktavuođain

Sámedikki stivra lea sirdásan koronaepidemiija geažil čoahkkanit ollásit gáiddusoktavuođain. ”Min guhkes hárjánupmi gáiddusoktavuođain lea dahkan vejolažžan doaimma joatkašuvvama goasii ovddeš láhkai. Hálidange rábmot Sámedikki bargoveaga, ahte mii leat nákcen doalahit doaibmanávccaid bures dili ektui”, gávnnaha ságadoalli Tuomas Aslak Juuso.

Sámedikki stivra nammadii čoahkkimisttis duorastaga cuoŋománu 16. beaivve Bálgosiid ovttastusa stivrii fásta lahttun Asko Länsmana ja várrelahttun Magreta Sara. Länsman lea doaibman Sámedikki ovddasteaddjin maiddái jagiin 2018-2020. Sámediggi hálida maid buoridit oktasašbarggus Bálgosiid ovttastusain ja evttoha oktasaš deaivvadeami ordnema, go dat lea fas vejolaš.

Interreg 2021-2027 bargojovkui Sámedikki ovddasteaddjin nammaduvvui Veikko Feodoroff ja várreolmmožin Sámedikki riikkaidgaskasaš áššiid čálli Inka Saara Arttijeff. Ruoŧa Sámediggi lea evttohan, ahte čuovvovaš prográmmabaji vuhtiiváldimiin Sámi parlamentáralaš ráđđi vuođđuda Ingerreg-bargojoavkku, man oaivilin lea čielggadit sámiid dárbbuid ruhtadeami ektui.

Muittut, muittulusat – the story of the Sámi by the Sámi – projeavtta stivrenjovkui nammaduvvui Sámedikki kulturlávdegotti ságadoalli Pirita Näkkäläjärvi ja várreolmmožin Maria Sofia Aikio. Projeavtta ollašuhttináigi 1.1.2020 – 30.09.2022.

Lappi lihtu stivrii Sámedikki ovddasteaddjin nammaduvvui I várreságadoalli Anni Koivisto ja várrelahttun ságadoalli Tuomas Aslak Juuso.

Koronavirusdilli váikkuha Sajosa doaimmaide

Sámedikki stivra ságastalai Sajosa bálvalanovttadaga ja restoráŋŋa dilis. Sámekulturguovddáš Sajos leamašan gitta njukčamánu 16. beaivve rájes. Stivra mearridii doallat Sajosa gitta miessemánu loahpa rádjai.

”Dán spiehkastatdilis mii fertet čielggadit bargiid vejolašvuođa doallat juo čoggon luomuid ja jos dilli joatkašuvvá, lea jáhkehahtti ahte mii gártat mannat luopmudemiide. Mii maiddái ságastallat vuoigatvuođaministeriijain dili váikkuhusas Sajosa doaimmaide”, ságadoalli Juuso geardduha dili.

Bargoburesveadjinjearahallama mielde bohtosat leat buorránan buot oassesurggiin

Erenomážit duđavašvuohta lea lassánan jođihan- ja hovdenbarggu ektui sihke oktasaš njuolggadusaid čuovvuma ektui. Hovdenbarggu ja bargoservoša gillilis ovddideapmi lea buktán bohtosa. Bargoburesveadjinjearahallan čađahuvvui juovlamánus 2019.

Čielggadusa mielde bargit vásihit, ahte sáhttet álkit lahkonit hoavddaid bargoáššiin ja atnet bargguset movttiidahttin ja mearkkašahttin. Boađus lei fuotnánan dušše guovtti čuoččuhusa buohta: mus lea doarvái áigi barggu bargamii albmaláhkai ja veajan barggustan bures.

 

Sámedikki stivrra čoahkkima 3/2020 beavdegirji dárkkistuvvo maŋimuštá 30.4.2020 ja dollojuvvo oaidninláhkai 1.5.-1.6.2020 Sámedikki fierbmesiidduin www.samediggi.fi.

Lassediehtu:

ságadoalli Tuomas Aslak Juuso tel. 040 687 3394, tuomas.juuso(at)samediggi.fi

Boađe mielde Sámenuoraid dáiddadáhpáhusa neahttadoaluide!

Sámenuoraid dáiddadáhpáhusa ávvudit bearjadaga 17.4. interneahtas. Boađe mielde neahttadoaluide ja gávnna doppe suohtas dáiddadáhpáhusmuittuid ja oahpes sámeartisttaid. Sámedikki skuvlen- ja oahppamateriáladoaimmahat bovde Sámenuoraid dáiddadáhpáhusa historjásiidduid rahpandoaluide bearjadaga 17.4. dmu 12 rájes čujuhusas saamelaisnuortentaidetapahtuma.com.

Neahttasiidduide leat čohkkejuvvon govat, teavsttat ja filmmat Sámenuoraid dáiddadáhpáhusas 1990-logus gitta dán beaivvi rádjái. Dáiddadáhpáhusas dáiddakarrieara vuosttaš lávkkiid váldán sámedáiddarat muitalit filbmadearvvuođaid bokte maid dáiddadáhpáhus lea sidjiide mearkkašan.

Sámenuoraid dáiddadáhpáhusa historjásiidduid leat bargan neahttabuvttadeaddji Eeva Mäkinen, dáiddadáhpáhusbargi Unna-Maari Pulska, skuvlenčálli Ulla Aikio-Puoskari ja oahppamateriálaplánejeaddji Anni Näkkäläjärvi. Siiddus leat teavsttat buot golmma sámegillii ja suomagillii. Fitnu ruhtada oahpahus- ja kulturministeriija.

Lassedieđut:

Unna-Maari Pulska
unna.pulska@samediggi.fi
040 614 5949

Bohccuid guohtunráfi galgá dorvvastit spiehkastat diliin

Bohccuid guohtunráfi  ja boazodoalu dábálaš doaibmanvejolašvuođaid galgá dorvvastit spiehkastat diliin. Sámediggi doarjala Meahciráđđehussii, ahte dat biehttalivččii dán giđa ja geassebaji oasil bivdo- ja johtinlobiid mieđiheamis sámiid ruovttuguovllus  ja beavttálmahtášii goziheami lobihis lihkadeami eastadeami dihte.

Dán dálvve leamašan Davvi-Suomas spiehkastat ollu muohta. Muohtadilli ja jiekŋagearddit muohtagokčasa gasku leat váttásmahttán ja hehtten bohccuid lunddolaš biepmu oažžuma erenoamážit lahppuhis dálveguohtuneatnamiin. Dán dili geažil bohccot vedjet áigemuttu ektui heittodubbot ja dáin diliin bohccot leat maid hui hearkki olggobeale hehttehusaide.

”Dát dálvi lea erenoamáš váttis badjeolbmuide ja buot badjelmearálaš hehttehusas šaddá mearkkašahtti lassebargu. Ovdamearkka dihte meahcásteaddjit dahje mohtorgielkkáin vuodjit sáhttet dagahit boazoealu lávdama ja dárbbašmeahttun lihkadeapmi heajuda jo ovddežis heittot veajuin leahkki bohccuid ja ovddida boazojápmimiid ja lasiha lassebiepmu dárbbu”, dadjá ságadoalli Tuomas Aslak Juuso hástaleaddji dili birra.

Suoma ráđđehus lea ávžžuhan viruspandemiija dihte vealtit buot dárbbašmeahttun lihkadeami virusa leavvama eastadeapmin. Sámediggi doarjalage Meahciráđđehussii, ahte dat heaittášii dán spiehkastatdilis lohpevuovdima olgobáikegotteolbmuide sámiid ruovttuguovllus sihke guorahalašii jo vuvdojuvvon lobiid šluhttema  dán giđa ja geasi oasil.

Dan lassin Sámediggi ustitlaččat ávžžuha Meahciráđđehusa beavttálmahttit lobihis ja vahága dagahahtti lihkadeami goziheami ja rávvet báikegotteolbmuid go sii lihkadit meahcis.

”Livččii maid dehalaš, ahte báikegotteolbmot válddášedje vuhtii dili. Meahcis lihkadettiin berrešii giddet fuopmášumi erenoamáš várrugasvuhtii ja fuolalašvuhtii, vai badjelmearálaš vahágiid dagaheamis boazodollui sáhtášii beassat, joatká II várreságadoalli Leo Aikio.

Sámediggi lea fuolas olgobáikegoddelaš meahcásteaddjiid ja lustagielkástalliid  dárbbašmeahttun lihkadeamis sámiid ruovttuguovllus maid dán koronavirusdili geažil. Jos koronavirus njomošii ovdamearkka dihte ovttaskas siidda smávva badjeolbmuidservošii, sáhtášii dát leat várálaš oppa guoskevaš siidda boazodollui dálá erenoamášdiliin.

Boazodoallu lea sámekultuvrra dehalaš oassi nu Lappi go sámiid borramušdorvvu, biebmoiešbirgenlági ja nuppe dáfus dehalaš oassi kriisadiliin Suoma riikkasis fuolahansihkkarvuođa.

Sámedikki ávžžuhus Meahciráđđehussii 1.4.2020 (suomagillii)

Lassedieđut:

ságadoalli Tuomas Aslak Juuso tel. 040 687 3394, tuomas.juuso(at)samediggi.fi

II várreságadoalli Leo Aikio tel. 040 621 6505, leo.aikio(at)samediggi.fi

 

Govva: Tarja Länsman

Diehtu koronavirusa birra sámegillii

Sámediggi čohkke dán siidui almmustahtton sámegielat rávvagiid ja dieđáhusaid koronavirusa birra.

Leatgo don fuomášan eará sámegielat rávvagiid dahje leatgo dieđihan sámegillii koronavirusdili birra? Cavgil čujuhussii: tiedotus(at)samediggi.fi.

Lassediehtu:

Gielladorvočálli Anne Kirste Aikio, 010 839 3124 / 040 707 5626, anne-kirste.aikio(at)samediggi.fi

Sosiála- ja dearvvasvuođačálli Anne Länsman-Magga, 010 839 3128 / 040 182 9998, anne.lansman-magga(at)samediggi.fi

Dieđihančálli Johanna Alatorvinen, 010 839 3140 / 040 663 4493, johanna.alatorvinen(at)samediggi.fi

Sámegielaid gáiddusoahppodiimmut fállun skuvlalaččaide!

Sámegielaid gáiddusoahpahusfidnu lágida buohkaide rabas nuortalaš-, anáraš- ja davvisámegiela oahppodiimmuid neahtas. Oahppodiimmut leat oaivvilduvvon erenomážit skuvlalaččaide.

Fállun leat oahppodiimmut guđege sámegielas čuovvovaččat:

Nuortalašgiella badjeskuvlalaččaide ja logahatstudeanttaide gaskavahku 25.3., 1.4. ja 8.4. dii 10.00–10.45

Anárašgiella 3.–6. luohkálaččaide duorastaga 26.3., 2.4. ja 9.4. dii 10.00–10.45

Davvisámegiella 0–2. luohkálaččaide bearjadaga 27.3., 3.4. ja mánnodaga 6.4. dii 14.00–14.45

 

Oassálastinrávvagat gávdnojit dáppe. Diimmuide ii dárbbaš almmuhit ovddalgihtii!

Bures boahtin! Tiervâpuáttim! Tiõrv pueʹttem! Bures boahtin!

www.saamenetaopetus.com