Sämitige varriidâttâm koronavirustilán

Taan siijđon peividuvvoo Sämitiigán kyeskee tiätu koronavirustiileest.

 

5.5.

Spiekâstâhtiilij kiärgusvuotâjuávkku čokkân 12.5.2020.

 

17.4.

Sämitige stivrâ čokkân káidusohtâvuođâiguin

Sämikulttuurkuávdáš Sajos lii lamaš kiddâ njuhčâmáánu 16. peeivi rääjist. Stivrâ meridij toollâđ Saijoos kiddâ vyesimáánu loopâ räi.

 

16.4.

Saamelaisnuorten Säminuorâi taaiđâtábáhtus ávuduvvoo vástuppeeivi 17.4. viermist.

Tääl puáhtá keččâđ live-vuolgâttâs. Tot álgá saajeest 2.20.

 

24.3.

Sämitigge čuákkee taan siijđon almostittum ravvuid já tiäđáttâsâid koronavirusist sämikielân.

Lah-uv tun huámášâm eres sämikielâlijd ravvuid tâi lah-uv viestâdâm sämikielân koronavirustiileest? Vuolgât čujottâsân: tiedotus(at)samediggi.fi

 

23.3.

Sämitigge kiäsá uáiviministerân Suomâ siskáldâs jotteem raijiimân, vâi pastep hitodiđ koronavirus levânem já suoijiđ riskâjuávhuid.

 

20.3.

Sämitige cuáŋuimáánu tievâsčuákkim já vaaljâpaje 2020-2023 lekkâmtilálâšvuotâ sirdâšuveh koronavirustile keežild maajeeb äigimuudon, mii meriduvvoo maŋeláá.

Sämitige stivrâ kieđâvušâi čuákkimistis njuhčâmáánu 19. peeivi Sämitige varriidâttâm koronavirustilán (COVID-19) já meridij tärhibijn tooimâin.

Sämitiigán vuáđuduvvoo spiekâstâhtiilij kiärgusvuotâjuávkku, mii addel táárbu mield tievâsmittee tâi eres ravvuid tilán. Kiärgusvuotâjuávhu joođeet saavâjođetteijee já oovdânpyehten tuáimá haldâttâhhovdâ. Kiärgusvuotâjuávhu eres jesâneh láá I já II värisaavâjođetteijeeh sehe lahâčällee.

Sämitige váldupargohäämi lii tuáistáážân káiduspargo, ijge virgemaađhijd uážžu porgâđ spiekâstâhtile ääigi. Sämitige ornim seminaareh, tilálâšvuođah já tábáhtumeh iä olášuu vyesimáánu loopâ räi já čuákkimáid uásálisteh káidusohtâvuođâiguin. Sämitigge viestâd tiileest já ton nubástusâin aktiivlávt pargoviehân.

Sämitige stivrâ lii moonnâm Suomâ haldâttâs 16.3.2020 adelâm linjimijd čoođâ já adelâm čuávuvâš Sämitige tooimân kyeskee ravvuid. Sämitige stivrâ čuávu tile já čokkân táárbu mield meridiđ jotkâtooimâin.

 

17.3.

Sämitigge avžuut kevttiđ sämikielâlijd digimateriaalijd päikkimáttááttâsâst.

Sämitige pargeeh pargeh káiduspargoost já västideh tiäđustâlmáid šleđgâpostáin já puhelimáin. Mii ohtâvuotâtiäđuid kaavnah nettisiijđoin: Ohtâvuotâtiäđuh oovtâ siijđost.

Sämikulttuurkuávdáš Sajos lii kiddâ tuáistáážân.

 

16.3.

Sämitigge lii varriidâttâm koronavirustilán (COVID-19) tienuuvt, ete tot räijee kuosij já ulguupiälááš ulmui peessâm toimâttâhtiilijd Sajosist, Ucjuuvâst já Hettaast. Tuše Sämitige pargeeh já ovdâulmuuh peesih jotteeđ toimâttâhtiilijn.

Sämitige stivrâ kieđâvuš 19.3. Sämitige varriidâttâm koronavirustilán já meerrid tärhibijn tooimâin.

Sämitige pargeid láá ravvim uásálistiđ čuákkimáid tuše káidusohtâvuođâiguin. Pargoadeleijee lii ravvim, ete jis pargest lii lenccu, te sun ij uážu puáttiđ paargon. Ige meid talle, jis kiinii suu perruujesânijn lii pyeccee, veikâ pargee jieš ij tubdâččiigin jieijâs pyeccen. Sämitige pargeeh pargeh tääl iänááš káiduspargoost.

Sämitigge čuávu Suomâ haldâttâs avžuuttâsâid, ijge astoäigitoimâ uárnejuu Sajosist tâi eres soojijn Sämitige tooimâst. Puoh soppum teivâdmeh, kolliistâlmeh já škovlimtilálâšvuođah iä olášuu tâi toh láá sirdum puátteevuotân.

Sämikulttuurkuávdáš Saijoos info já raavâdviäsu Čaiju láá kiddâ 16.-20.3. Saijoos uápistemrieggeeh láá joskâm tuáistáážân, iäge elleekovetábáhtusah tet. uárnejuu Sajosist.

Sämitige škovlim- já oppâmateriaaltoimâttâh lii almottâm, ete Säminuorâi taaiđâtábáhtus ij olášuu amas koronavirus levâniđ. Kyevti peeivi tábáhtus ličij lamaš Anarist Sajosist já Rivdul Vasatokkast 15.-16.4.

 

Lasetiäđuh pargotiervâsvuođâlájádâs siijđost:
https://www.ttl.fi/toimintaohje-tyontekijoille-wuhanin-koronaviruksen-tartunnan-ehkaisyyn/

sehe THL siijđoin:
https://thl.fi/fi/ajankohtaista/tiedotteet-ja-uutiset

 

Lasetiäđuh:

Haldâttâhhovdâ Pia Ruotsala-Kangasniemi puh. 040 726 2688, pia.ruotsala(at)samediggi.fi
Saavâjođetteijee Tuomas Aslak Juuso puh. 040 1871 331, tuomas.juuso(at)samediggi.fi

Säminuorâi taaiđâtábáhtus ij olášuu

Sämitige škovlim- já oppâmaterialtoimâttâh almoot, et sij iä tääl uárnee Säminuorâi taaiđâtábáhtus  koronavirus njuámmum estim tiet. Kyevti peeivi tábáhtus ličij uárnejum Anarist Sajosist já Rivdulist Vasatokkas 15.-16.4.

– Uáli väivi ko karttâp kiäsádâttâđ Säminuorâi taaiđâtábáhtus orniimist, mut taan tiileest tot oro lemin áinoo muulsâiähtu. Tábáhtusâst lii uáli stuorrâ merhâšume sämipárnáid já -nuoráid, já tom vyerdih já toos rahttâteh ive miätá, muštâl taaiđâtábáhtus proojeektpargee Unna-Maari Pulska. – Lii uáli surgâd já murâšlâš kiäsádâttâđ tábáhtus orniimist. Selvâttep tile riijkâvijđosij uárnejijjeiguin já tutkâp sirdâšuvá-uv tánssámteema iivijn ovdâskulij.

Lasetiäđuh koronavirus estimist THL nettisiijđoin (Tiervâsvuođâ já pyereestpiergim lájádâs): https://thl.fi/fi/web/infektiotaudit-ja-rokotukset/taudit-ja-torjunta/taudit-ja-taudinaiheuttajat-a-o/mers-koronavirus

Lasetiäđuh:

Unna-Maari Pulska
unna.pulska@samediggi.fi
040 614 5949